Tou Akoʼi Te Kau Agavaivai Ke Nātou Haʼele ʼi Te ʼAla ʼo Te ʼAtua
1. Koteā ʼaē ʼe toe maʼua foki ke tou fai ʼi te gāue ʼaē ko te fai ʼo ni ʼu tisipulo?
1 Neʼe ʼui ʼo ʼuhiga mo te ʼu tisipulo ʼa Kilisito ʼo te ʼuluaki sēkulō, ʼe nātou kau ki “Te Ala.” (Gaue 9:2) Ko te lotu faka Kilisitiano moʼoni ʼe tonu ke ʼiloga ʼi totatou faʼahiga maʼuli kātoa. (Taag. 3:5, 6) Koia ka tou fai he ako Tohi-Tapu, ʼe mole tonu pe ke tou akoʼi age ia te ʼatamai mālama totonu ʼo ʼuhiga mo te ʼu akonaki ʼa te Tohi-Tapu. ʼE toe maʼua foki ke tou tokoni ki te kau ako Tohi-Tapu ke nātou haʼele ʼi te ʼala ʼo Sehova.
2. Koteā ʼaē ʼe ina uga he ako Tohi-Tapu ke mulimuli ki te ʼu fakatotonu ʼa te ʼAtua?
2 Te ʼOfa ʼAē Kiā Sehova Pea Mo Sesu: ʼE mole ko he meʼa faigafua ki ni ʼu hahaʼi agahala hanatou fetogi tanatou ʼu manatu, mo tanatou ʼu aga, pea mo tanatou ʼu palalau ke ʼalutahi mo te finegalo ʼo te ʼAtua. (Loma 7:21-23; Ef. 4:22-24) Kae ʼuhi ko tonatou ʼoʼofa ʼaē ki te ʼAtua pea mo tona ʼAlo, ko te hahaʼi agavaivai ʼe nātou fai he ʼu fetogi moʼo mulimuli ki te ʼu fakatotonu ʼaia. (Soa. 14:15; 1 Soa. 5:3) Koteā ʼaē ʼe tou lava fai moʼo tokoni ki tatatou kau ako Tohi-Tapu ke nātou fakatuputupu te ʼofa ʼaia?
3. E feafeaʼi hatatou tokoni ki te ʼu ako ke nātou fakatuputupu tanatou ʼoʼofa ʼaē kiā Sehova pea mo Sesu?
3 Koutou tokoni ki takotou ako ke ina ʼiloʼi te ʼulugaaga ʼo Sehova. Neʼe ʼui fēnei e te tēhina: “ ʼE mole feala ki te hahaʼi ke nātou ʼoʼofa ki he tahi ʼe mole nātou ʼiloʼi. Koia, ka au kamata he ʼu ako, ʼe au akoʼi age kiā nātou ia te huafa ʼo te ʼAtua ʼaē ʼe tuʼu ʼi te Tohi-Tapu, pea mo vakaʼi he ʼu temi faigamālie ke au fakahā age ia te ʼu kalitātē ʼa Sehova.” Moʼo fakahoko te faʼahi ʼaia, ʼe ko he puleʼaki lelei te faka maʼuhigaʼi ʼo te faʼifaʼitaki ʼa Sesu. (Soa. 1:14; 14:9) Tahi ʼaē meʼa, koutou fakaʼaogaʼi te ʼu fakamanatu ʼo te ʼu fakaʼosi kapite ʼo te tohi Te Ako Mai Te Tohi-Tapu, moʼo tokoni kiā ia ʼaē ʼe ako, ke ina metitāsioʼi ia te ʼu kalitātē fakaofoofo ʼo te ʼAtua pea mo tona ʼAlo.
4. (a) He koʼe ʼe faigataʼa maʼa te tokolahi ʼo te kau ako ia te gāue fai faka mafola? (b) ʼE tou lava tokoni feafeaʼi ki tatatou kau ako ʼi tanatou kamata gāue ʼi te minisitelio faka Kilisitiano?
4 Tou Tuku He Faʼifaʼitaki Lelei ʼi Tatatou Faiako: ʼI totatou ʼuhiga kau faiako pea mo takitaki, ʼe tou fakahā ki tatatou kau ako ʼaki tatatou ʼu gāue, te faka ʼuhiga ʼo te haʼele ʼi te ʼala ʼo te ʼAtua. (1 Ko. 11:1) Ohage la, tokolahi te kau ako Tohi-Tapu ʼe mole nātou māhani ʼi te palalau mo he kau matāpule moʼo fakahā age te ʼu meʼa ʼaē ʼe nātou tui kiai. ʼE maʼua anai ke tou faʼa kātaki pea mo popoto ʼi te fakatuputupu iā nātou ia te ʼofa, te tui, pea mo te lototoʼa ʼaē ka ʼaoga anai kiā nātou ke feala hanatou kau ki te gāue ʼaē ko te fai faka mafola pea mo te fai ʼo ni ʼu tisipulo. (2 Ko. 4:13; 1 Tes. 2:2) Ko tatatou fia takitaki ia tatatou kau ako, ʼe ina uga anai tatou ke tou lagolago kiā nātou mokā nātou kamata kau anai ki te minisitelio faka Kilisitiano.
5. Ko te tahi ʼu ʼaluʼaga fea ʼaē ʼe feala ke koutou tuku ai he faʼifaʼitaki lelei ki te kau ako?
5 ʼE ʼi ai te tahi ʼu ʼaluʼaga maʼuhiga ʼo te maʼuli faka Kilisitiano, ʼe lava ʼaoga ai takotou faʼifaʼitaki ki te kau ako. Ka koutou ʼaʼahi ia te kau mahaki pea mo fakatalitali lelei ia te hahaʼi ʼi te ʼu fono ʼo te kokelekasio, ʼe nātou sio ki takotou maʼuliʼi ia te ʼofa. (Soa. 15:12) Ka koutou kau ki te fakamaʼa ʼo te Fale ʼo te Puleʼaga, peʼe ka koutou fai he ʼu meʼa moʼo tokoni ki niʼihi, ʼe koutou akoʼi age peʼe feafeaʼi te tauhi ki te hahaʼi. (Soa. 13:12-15) Ka nātou sisio ki takotou maʼuli faka feʼauga, ʼe nātou mahino ai ki te faka ʼuhiga ʼo te ʼui ʼaē ke tou “haga kumi muʼa ia te Puleʼaga.”—Mat. 6:33, MN.
6. Koteā tona fua hatatou tokoni ki te hahaʼi agavaivai ke nātou tauhi kiā Sehova?
6 ʼE maʼua ke tou gāue kinakina moʼo akoʼi ki te hahaʼi ia te Folafola ʼa te ʼAtua pea mo tou fai ʼo ni ʼu tisipulo. Kae ʼi meʼa fakafiafia foki hatatou sio ki te kau agavaivai ‘ ʼe nātou haga haʼele ʼi te moʼoni’!—3 Soa. 4.