He ʼu Manatu ʼo ʼUhiga Mo Te ʼu Nusipepa

Te Tule Leʼo ʼaho 1 ʼo Maio

“ ʼE faigataʼa ki ʼihi hanatou felogoi mo ʼonatou ʼohoana. ʼE fakahā ʼi te Tohi-Tapu ʼe tonu ki te taumātuʼa ke nā fefakamaʼuhigaʼiʼaki, mo feʼofaʼaki pea mo fefakaʼapaʼapaʼaki. [Lau age ia 1 Petelo 3:​7-9.] ʼI tau manatu, kapau ʼe tou mulimuli ki te ʼu tokoni ʼaenī, ʼe fua lelei anai koa? [Tuku ke fai mai hana tali.] ʼE fakahā ʼi te nusipepa ʼaenī ia te ʼu puleʼaki ʼaē ʼe lelei moʼo fakatupu he ʼu felogoi lelei ʼa te taumātuʼa.”

Réveillez-vous! ʼo Maio

“ ʼE manatu e ʼihi hahaʼi ʼe tonu ke tou agamālohi ke feala hatatou maʼuli lelei. Kae ʼe au fia fakahā atu ia te tokoni ʼaenī neʼe tuku mai e Sesu. [Lau age ia Mateo 5:​5, 9.] ʼE ke tali koa ia te ʼu palalau ʼaenī ʼa Sesu? [Tuku ke fai mai hana tali.] ʼE fakahā lelei ʼi te nusipepa ʼaenī ia te ʼu fua lelei e tolu ʼe tou maʼu mokā tou kumi te tokalelei.” Fakahā age te alatike ʼaē ʼe kamata ʼi te pasina 28.

Te Tule Leʼo ʼaho 1 ʼo Sūnio

“ ʼI te temi ʼo Noe, neʼe lōmaki totatou kele he neʼe fakahoko e te ʼAtua tana ʼu tautea ki te hahaʼi agakovi fuli. ʼE ke ʼiloʼi koa neʼe fakapapau e te ʼAtua ʼe ina toe molehi anai te agakovi ʼi te kele? [Lau age ia 2 Petelo 3:​5-7. Pea tuku ke fai mai hana tali.] ʼE fakamahino ʼi te nusipepa ʼaenī peʼe koteā ʼaē ʼe tonu ke tou fai ke feala hatatou hāo ʼi te ʼaho ʼaia, ohage ko Noe pea mo tona kiʼi famili.”

Réveillez-vous! ʼo Sūnio

“Ko te ʼu agamālohi ʼe ko he ʼu meʼa kua hoko talu mai fualoa, kae iā ʼaho nei kua hoko ʼi te malamanei kātoa, ʼo teitei pe ke hoko ki te hahaʼi fuli. ʼI tau manatu, he koʼe kua fakaʼāsili ia te ʼu agamālohi? [Tuku ke fai mai hana tali.] ʼE fakahā mai ʼi te Réveillez-vous ! ʼaenī, te fakapapau mai te Tohi-Tapu, ʼo ʼuhiga mo te temi ʼaē ka fakagata ai te ʼu agamālohi pea mo te haga anai ʼa te ʼAtua ʼo fakatuʼu ia te tokalelei moʼoni ʼi te kele.” Lau age ia Mikea 4:4.