Ke Maʼuhiga Kiā Tātou Tatatou ʼu Pilivilēsio!
1 Talu te fakatupu ʼo te mālamanei, neʼe foaki e Sehova ki tana ʼu kaugana he ʼu tuʼuga pilivilēsio kehekehe. Peʼe ko he tagata, peʼe ko he fafine, peʼe kei tamasiʼi, peʼe kua matuʼa, peʼe masiva peʼe maʼu koloa, kae neʼe ina foaki kiā nātou he ʼu pilivilēsio. (Luka 1:41, 42; Gāue 7:46; Filp. 1:29) Ko te ʼu pilivilēsio fea ʼaē ʼe ina foaki mai kiā tātou iā ʼaho nei?
2 Ko Niʼihi Pilivilēsio ʼe Tou Maʼu: ʼE tou maʼu te pilivilēsio ʼaē ke akoʼi tātou e Sehova. (Mat. 13:11, 15) Ko te tahi pilivilēsio ʼe tou maʼu ko te fai ʼo ni ʼu tali moʼo fakavikiviki kiā Sehova ʼi te ʼu fono. (Pes. 35:18) Kā tou maʼu ni ʼu faigamālie ke tou fai ai hatatou ʼu tali, ʼe tonu ke tou tali ʼaki he loto fiafia. ʼO toe fēia pē, kapau ʼe maʼuhiga kiā tātou te ʼu gāue fuli ʼi te kōkelekāsio, pea ʼe tou fakahoko fakalelei anai te ʼu gāue ʼaia. ʼE tou kau tuʼumaʼu koa ki te pilivilēsio ʼaē ko te fakamaʼa ʼo te Fale ʼo Te Puleʼaga pea mo taupau ke lelei?
3 Logolā ko te ʼu lauʼi miliona hahaʼi ʼe natou feʼekeʼaki peʼe fakalogo te ʼAtua ki tanatou ʼu faikole, kae ʼe tou maʼu tātou ia te pilivilēsio ʼaē ke logoʼi tatatou ʼu faikole e Ia ʼaē ʼe maʼuhiga tokotahi ʼi te ʼatulaulau. (Taag. 15:29) Ko Sehova totonu ʼe fagono ki te ʼu faikole ʼo tana kau kaugana. (1 Pet. 3:12) ʼE fakalogo tuʼumaʼu pē mokā tou fakaovi age kiā te ia. ʼE ko he pilivilēsio lahi ʼe tou maʼu, ia te fealagia ʼaē ke tou faikole kiā te ia “ ʼi te lakaga fuapē.”—Efe. 6:18.
4 Ko Te “Kau Kaugā Gāue ʼa Te ʼAtua”: Ko te tahi ʼi te ʼu pilivilēsio lelei ʼaē ʼe tou maʼu, ʼe ko te tala ʼo te logo lelei ʼo te Puleʼaga ʼa te ʼAtua, ʼi totatou ʼuhiga “kau kaugā gāue ʼa te ʼAtua.” (1 Ko. 3:9) ʼE ko he gāue ʼe fakatupu lotofiafia pea mo fakatupu lotomālohi kiā tātou. (Soa. 4:34) Neʼe feala pē kiā Sehova ke mole ina fakaʼaogaʼi he hahaʼi moʼo fakahoko ia te gāue ʼaia, kae neʼe ina foaki mai te gāue ʼaia ke tou fai heʼe ʼofa kiā tātou. (Luka 19:39, 40) ʼI tana fai te faʼahi ʼaia, neʼe mole foaki e Sehova te pilivilēsio ʼaia ki te hahaʼi fuli, heʼe ko nātou ʼaē ʼe kau ki te minisitelio, ʼe tonu ke natou mulimuli pea mo taupau ia te ʼu fakamaʼua fakalaumālie. (Isa. 52:11) ʼE tou fakahā koa ʼe maʼuhiga kiā tātou te pilivilēsio ʼaia ʼo liliu te minisitelio ʼe ko he koga maʼuhiga ʼo tatatou polokalama ʼi te vāhaʼa fuli?
5 ʼE fakakoloaʼia totatou maʼuli ʼaki te ʼu pilivilēsio ʼaē ʼe foaki mai e Sehova. (Taag. 10:22) ʼAua naʼa tou meʼa noaʼi te ʼu pilivilēsio ʼaia. Kapau ʼe tou fakahā ʼe maʼuhiga moʼoni kiā tātou tatatou ʼu pilivilēsio gāue, pea ʼe tou fakafiafia ai tatatou Tamai ʼe ʼi selō, ia Ia ʼaē ʼe ina Foaki “te meʼa ʼofa lelei fuli pea mo te mōlaga haohaoa fuli.”—Sake 1:17.