Tou Akoʼi Niʼihi Ke Natou ʼOʼofa Kiā Sehova
1. Koteā ʼaē neʼe ina taki mai ai ʼihi kiā Sehova?
1 ʼE kei kotou manatuʼi koa ia takotou ʼuluaki logo ʼaē ki te huafa ʼo Sehova? Koteā ʼaē neʼe ina taki mai ai koutou kiā te ia? Tokolahi ia te hahaʼi fakamālotoloto ʼe natou ʼui atu anai, neʼe natou fakaovi ki totatou Tupuʼaga ʼi te temi ʼaē neʼe natou mahino ai ki tona ʼu kalitātē ʼaē ʼe mole hona fakatatau, tāfito ia tona manavaʼofa pea mo tona ʼofa.—1 Soa. 4:8.
2, 3. ʼE feafeaʼi hatatou fakaʼaogaʼi ia te tohi Te Ako Mai Te Tohi-Tapu moʼo tokoni ki te kau ako Tohi-Tapu ke natou fakatuputupu ia tonatou ʼofa ʼaē kiā Sehova?
2 ‘Koʼenī Totatou ʼAtua’: ʼI te tohi Te Ako Mai Te Tohi-Tapu, ʼe fakahā lelei ai ia te ʼofa ʼo Sehova pea mo te ʼaoga ʼaē ke tou felōgoi lelei mo ia. ʼE feafeaʼi anai hatatou fakaʼaogaʼi ia te tohi ʼaia moʼo akoʼi niʼihi ke natou fakatuputupu ia tonatou ʼofa ʼaē ki te ʼAtua? Kā tou fia akoʼi ki niʼihi ia he puani foʼou, ʼe feala ke tou fai age ni ʼu fehuʼi ke ina fakakaukauʼi, ohagē lā: “Koteā ʼaē ʼe fakahā mai e te moʼoni ʼaia ʼo ʼuhiga mo Sehova?” peʼe “ ʼE fakahā feafeaʼi mai e te puani ʼaia ia te fakamoʼoni ʼaē ko Sehova ʼe ko he Tamai lelei ʼe feala ke fakaʼamu ki ai he tahi?” Ko te taʼi faiako ʼaia, ʼe feala ke tokoni ki he tahi ke ina maʼu hana ʼu felōgoi pea mo Sehova ʼi tona maʼuli kātoa.
3 Kā tou tokoni ki he kau ako Tohi-Tapu ke natou leleiʼia ia te pilivilēsio ʼaē ko te maʼu ʼo te mahino ki te ʼAtua moʼoni pē e tahi pea mo maʼuli, ʼe natou fakamoʼoni ai anai, ohagē ko tona ʼui fēnei e Isaia: ‘Koʼenī totatou ʼAtua.’ (Isa. 25:9) Kā tou fakamahino ia te Folafola ʼa te ʼAtua, ʼe tonu ke tou fakahā fakalelei peʼe tapuakinaʼi feafeaʼi anai ia te mālamanei mokā fakahoko anai ia te ʼu fakatuʼutuʼu ʼa Sehova ʼaki ia tona puleʼaga fakahau ʼaē ʼe takitaki e Kilisito Sesu.—Isa. 9:6, 7.
4, 5. Koteā ia te fakaʼuhiga ʼo te ʼofa ʼaē kiā Sehova?
4 Te Fakamoʼoni ʼo Totatou ʼOfa ʼAē Kiā Sehova: ʼE tou ʼiloʼi ko te ʼofa ʼaē kiā Sehova ʼaki te loto kātoa, mo te nefesi kātoa, pea mo te ʼatamai kātoa ʼe laka age ia ʼi he ʼui pē ʼe kita ʼofa ki te ʼAtua. ʼE tonu ke tou faʼifaʼitakiʼi pea mo maʼuliʼi ia tana faʼahiga manatu. (Pes. 97:10) Ko te ʼofa ʼaē ki te ʼAtua ʼe hā anai ʼaki tatatou fakalogo ki tana ʼu fakatotonu fuli pea mo tatatou haga kau ki ‘te ʼu gāue ʼaē ʼe fakaʼiloga ʼaki ai tatatou pipiki ki te ʼAtua,’ tatau aipē peʼe tou tau mo he ʼu ʼahiʼahi pea mo he ʼu fakataga.—2 Pet. 3:11; 2 Soa. 6.
5 ʼE tou fiafia ʼi te fai ʼo te finegalo ʼo te ʼAtua heʼe tou ʼoʼofa ai. (Pes. 40:8) ʼE tonu ke mahino kiā ia ʼaē ʼe ako Tohi-Tapu, neʼe fai ia te ʼu fakatotonu fuli ʼa te ʼAtua ki te fīmālie heʼegata ʼo Tana ʼu kaugana. (Teu. 10:12, 13) Kapau ʼe tou mulimuli ki te takitaki ʼa Sehova, ʼe tou fakahā ai ʼe tou leleiʼia ʼaupitō ia Tana ʼu gāue fakaofoofo fuli. Ko te tokoni kiā ia ʼaē ʼe ako, ke mahino ʼe mole maʼuli lotomamahi anai ʼi tana haʼele ʼaē ʼi te ʼu ala faitotonu ʼo Sehova.
6. Koteā ia te ʼu tapuakina ʼe feala ke maʼu anai e he tahi ʼe ʼofa kiā Sehova?
6 Te ʼu Tapuakina Kiā Nātou ʼAē ʼe ʼOʼofa Ki Te ʼAtua: ʼE tokaga fakamālotoloto ia Sehova kiā nātou ʼaē ʼe ʼoʼofa kiā te ia, pea ʼe ina fakahā kiā nātou ia “te ʼu meʼa loloto ʼa te ʼAtua.” (1 Ko. 2:9, 10) ʼAki ia te taʼi ʼatamai mālama ʼaia ʼo ʼuhiga mo te ʼu fakatuʼutuʼu ʼa Sehova, ʼe natou maʼu ai he faʼahiga sio ʼe lelei ki te kā haʼu pea mo he ʼamanaki moʼoni. (Sel. 29:11) Ko nātou ʼaē ʼe ʼoʼofa kiā Sehova ʼe natou liliu ko he ʼu ʼipu ʼo tona manavaʼofa makehe. (Eke. 20:6) ʼE maʼuhiga kiā nātou ia te ʼamanaki ki te maʼuli heʼegata ʼuhi ko te ʼofa lahi ʼaē ʼo te ʼAtua kiā nātou.—Soa. 3:16.
7. Koteā ʼaē ʼe kotou logoʼi ʼi takotou akoʼi niʼihi ke natou ʼoʼofa kiā Sehova?
7 Kapau ʼe lahi ia te ʼu meʼa ʼaē ʼe tou ʼiloʼi ʼo ʼuhiga mo tatatou Tamai ʼaē ʼe ʼi selō, pea ʼe toe lahi age mo te ʼu meʼa ʼaē kā tou vaevae mo niʼihi. (Mat. 13:52) ʼI toe pilivilēsio lahi hatatou akoʼi niʼihi, pea tāfito ia tatatou fānau ke natou ʼoʼofa kiā Sehova! (Teu. 6:5-7) ʼOfa pē ke lahi tuʼumaʼu aipē tatatou ʼu fakavikiviki, ʼo fēia mo tatatou kau ako Tohi-Tapu, ʼi tatatou maʼu ia ‘te mahu ʼo te agalelei ʼo Sehova.’—Pes. 145:7.