ʼE Maʼuhiga Ia Te Ako Takitokotahi Pea Mo Te Ako Fakafāmili ʼo Te Tohi-Tapu!
1. Koteā ia te fakatuʼutuʼu makehe ʼaē neʼe fai e te Kolesi Pule maʼa tātou ʼi te temi nei, pea koteā tona tupuʼaga?
1 ʼI te ʼuluaki sēkulō, neʼe tokaga fakamālotoloto ia te Kolesi Pule ki te fīmālie ʼo te hahaʼi ʼa Sehova. (Gāue 15:6, 28) ʼI te kua fakaovi mai ʼo te mamahi lahi, ʼe maʼuhiga ke mālohi ia te ʼu felōgoi ʼa te kau fai fakamafola fuli pea mo Sehova. ʼE tou fakaʼaogaʼi feafeaʼi anai ia te temi ʼaē neʼe tou fakaʼaogaʼi ki muʼa atu ki te Ako Tohi ʼo Te Kōkelekāsio? ʼE fakalotomālohiʼi ia tātou fuli ke tou fakaʼaogaʼi ia te temi ʼaia ki te tauhi fakafāmili. Ko te fakaʼaogaʼi fakapotopoto ʼo te temi ʼaia, ʼe ina fakafealagia mai anai kiā tātou ke tou fai he ʼu kumi loloto ʼi te Folafola ʼa te ʼAtua pea mo tou maʼu he ʼu fua lelei mai tana ʼu akonaki.—Pes. 1:1-3; Loma 11:33, 34.
2. ʼE feafeaʼi anai hatatou fakatuʼutuʼu ia tatatou tauhi fakafāmili ʼi te afiafi?
2 Te Tauhi Fakafāmili ʼi Te Afiafi: ʼE fakalotomālohiʼi ia te ʼu pule fāmili ke natou fakahoko ia tonatou ʼu maʼua iā muʼa ʼo Sehova ʼo natou tōkakaga ke natou fakatuʼutuʼu he polokalama ʼo te ako fakafāmili ʼo te Tohi-Tapu ʼe fai tuʼumaʼu pea mo ʼaoga. (Teu. 6:6, 7) Ko te ʼu tehina mo tuagaʼane selipatea ʼaē ʼe mole ʼi ai honatou ʼu maʼua fakafāmili ʼe feala anai ke natou fakaʼaogaʼi ia te temi ʼaia ki te ako takitokotahi ʼo te Tohi-Tapu pea mo te fai ʼo he ʼu kumi. ʼE maʼuhiga kiā tātou fuli ke tou ‘totogi maʼa tātou ia te temi faigamālie’ ki te ako pea mo te metitāsio ke feala hatatou taupau ia te mālohi fakalaumālie ʼaē ʼe ʼaoga logopē lā “ ʼe kovi te ʼu ʼaho.”—Efe. 5:15, 16.
3, 4. Koteā ia te ʼu manatu ʼaē ʼe foaki mai ʼi henī ʼe feala ke tou fakaʼaogaʼi, pea koteā ʼaē ʼe tonu ke malave ki te ʼatamai?
3 Koteā ʼAē ʼe Kā Akoʼi?: Ko te Index des publications de la Société Watch Tower peʼe ko te CD-ROM Watchtower Library ʼe feala ke tokoni atu kiā koutou ke fiafia ia tokotou fāmili ʼi te ʼu temi ʼaē ʼe fai ai anai takotou ako ʼo te Tohi-Tapu. ʼE feala ki te ʼu fāmili ke natou vakaʼi ia te ʼu ʼalatike ʼo Te Tule Leʼo, ohagē ko te ʼu ʼalatike ʼaē ʼe hā tuʼumaʼu “Clés du bonheur familial” (Te ʼu Puleʼaki Ki He Maʼuli Fakafāmili Fiafia), “Enseignez vos enfants” (Kotou Akoʼi Takotou Fānau), “Pour nos jeunes lecteurs” (Maʼa Tatatou Kau Tūpulaga). Peʼe ko te Réveillez-vous ! ʼaē ʼe maʼu ai te ʼu ʼalatike “Les jeunes sʼinterrogent” (ʼE Feʼekeʼaki Ia Te Kau Tūpulaga) pea mo ʼihi atu ʼu ʼalatike fakaofoofo ʼo ʼuhiga mo te fakatupu taulekaleka.
4 Ko tatatou mole lau fakavilivili ia te Tohi-Tapu ʼe feala ai ke malave ia te ʼu pelesepeto pea mo te ʼu ako ki te ʼatamai pea mo te loto ʼo nātou fuli ʼo te fāmili. (Hep. 4:12) ʼI he tahi age ʼu ʼaluʼaga, ʼe feala ke kotou sisio pea mo fai palalau ki te ʼu foʼi fime viteo ʼaē neʼe fai e te kautahi. ʼE lahi te ʼu fealagia ke kotou fakakaukauʼi ai te filifili pe koteā ʼaē ʼe tonu ke kotou ako ʼo fēia mo tona faʼahiga fai. He koʼē ʼe mole kotou fakalavelave ki tokotou fāmili peʼe koteā ʼaē ʼe natou leleiʼia?
5. He koʼē ʼe maʼuhiga ki totatou maʼuli ʼi te temi nei ia te ako takitokotahi pea mo te ako fakafāmili ʼo te Tohi-Tapu?
5 He Koʼē ʼe Maʼuhiga ʼi Te Temi Nei?: Ko tatatou mālolohi ʼi te faʼahi fakalaumālie ʼe ina teuteuʼi anai tātou ke tou ‘tutuʼu ke maʼu pea mo tou mamata ki te haofaki ʼa Sehova.’ (Eke. 14:13) ʼE ʼaoga ki te ʼu mātuʼa ia te takitaki ʼa te ʼAtua moʼo akoako tanatou fānau “ ʼi te lotolotoiga ʼo he taʼiake aga fakalialia pea mo fakapikopiko.” (Filp. 2:15) ʼE ʼaoga ki te fānau ia te tokoni ʼaē ke ʼaua naʼa natou tō ki te ʼu aga ʼa te tamaliki ʼi te faleako ʼi te temi nei. (Taag. 22:3, 6) ʼE lelei ki te ʼu taumātuʼa ke natou fakamālohiʼi ia te “maea ʼe kau tolu” ʼaki ia Sehova. (Tnk. 4:12) Koia, tou fakaʼaogaʼi fakapotopoto ia te temi ʼaē kei toe moʼo fakalotomālohiʼi tātou ʼi tatatou “tui māʼoniʼoni ʼaupitō”!—Suta 20.