ʼE logo tahi te hahaʼi mo maʼuli tokalelei mo kapau ʼe takitaki e te ʼAtua
He Koʼe ʼe ʼAoga Kia Tatou Te Puleʼaga ʼo Te ʼAtua?
ʼI te ʼuluaki fakatupu ʼo te tagata, neʼe ko Sehova pe, ia totatou Tupuʼaga, ʼae neʼe Pule. ʼE ha ʼi tana faʼahiga takitaki ia tona ʼofa ki te hahaʼi. Neʼe ina fai he ʼoloto ʼi Eteni, ko he nofoʼaga matalelei ke maʼuli ai te tagata. Neʼe lahi maumau te meʼa kai ʼae neʼe ina foaki age. Neʼe ina toe foaki age he gaue ke fiafia ai. (Senesi 1:28, 29; 2:8, 15) Ka na pau la neʼe tuku e te tagata ke hoko atu pe te takitaki ʼofa ʼa te ʼAtua, ʼe tou maʼuli fimalie nei.
Neʼe mole fakalogo ʼatatou ʼuluaki matuʼā ki te ʼuhiga pule ʼo te ʼAtua
ʼE fakaha ʼi te Tohi-Tapu neʼe ʼi ai he ʼaselo agatuʼu, neʼe higoa ki muli age ko Satana, te Tevolo. Pea neʼe ina ui ʼe mole tonu ke takitaki e te ʼAtua ia te tagata. Pea ʼe mole ʼaoga tana takitaki mo ʼana tokoni ke maʼuli fiafia ai te tagata. Kae, ko ʼatatou ʼuluaki matuʼā, ia Atama mo Eva, neʼe nā faʼifaʼitakiʼi ia Satana. Neʼe nā agatuʼu ki te ʼAtua.—Senesi 3:1-6; Fakaha 12:9.
Neʼe mole fakalogo ia Atama mo Eva ki te Pule ʼa te ʼAtua, koia neʼe mole kei nā maʼuʼuli ʼi tonā nofoʼaga matalelei pea mo maʼuli ʼo heʼe gata. (Senesi 3:17-19) Pea neʼe toe fua kovi ai ki ʼana fanau. ʼE ui ʼi te Tohi-Tapu neʼe agahala ia Atama, koia “neʼe hu ai te agahala ki te malamanei, pea ʼaki te agahala ia te mate.” (Loma 5:12) ʼAki te agahala ʼaia, neʼe toe iku ai ki te aluʼaga ʼaeni: “Ko te tagata ʼe ina puleʼi te tagata ki tona malaʼia.” (Ekelesiasi 8:9, MN) Koia, ka puleʼi pe e te tagata ia te tagata, ʼe hoko tuʼumaʼu pe te ʼu fihifihia.
ʼE PULEʼI PE E TE TAGATA IA TE TAGATA
Neʼe agatuʼu ia Nimelote kia Sehova
ʼE talanoa ʼi te Tohi-Tapu kia Nimelote, ia te ʼuluaki tagata ʼae neʼe pule ʼi te kele pea neʼe agatuʼu ki te takitaki ʼa Sehova. Talu mai te temi ʼo Nimelote, neʼe fakaʼaogaʼi e te tagata ia tonatou ʼuhiga pule moʼo fakamamahiʼi te hahaʼi. Neʼe tohi fenei e te Hau ko Salomone kua hili ki ai taʼu ʼe 3 000: “Koeni, kua taomia te hahai, mo fetagihi, pea e mole he tahi ke ina fakapelepelei natou! E kau te pule mo te kau fakataga, kae e mole he tahi ke ina fakapelepelei natou.”—Ekelesiasi 4:1.
ʼE heʼeki fetogi te pule ʼa te tagata ia ʼaho nei. ʼI te taʼu 2009, neʼe ui ʼi he sulunale ʼo te Kautahi ʼo te ʼu Puleʼaga ‘ ʼe tupu te ʼu fihifihia ʼae ʼi te malamanei he ʼe mole lelei te takitaki ʼa te ʼu puleʼaga fakatagata.’
KUA TONU LEVA KE FETOGI!
ʼE loto e te hahaʼi ke ʼi ai he ʼu pule ʼe lelei age tanatou takitaki pea mo he puleʼaga foʼou. Pea ko te faʼahi ʼaia ʼe fakapapauʼi mai e totatou Tupuʼaga.
Neʼe faiga te ʼu puleʼaga fakatagata ke natou fakatokatoka te ʼu fihifihia ʼo te malamanei, kae neʼe mole pe la natou lavaʼi
Neʼe fakatuʼu e te ʼAtua he Puleʼaga. Pea ʼe fetogi anai e te puleʼaga ʼaia ia te ʼu puleʼaga fakatagata fuli pea ʼe ‘tuʼu anai ʼo heʼe gata.’ (Taniela 2:44) Ko te Puleʼaga la ʼaia ʼe faikole ki ai te toko lauʼi miliona hahaʼi. (Mateo 6:9, 10) Pea ʼe mole takitaki anai e te ʼAtua te puleʼaga ʼaia. Kae neʼe ina fakanofo he tahi ke pule ʼi te puleʼaga ʼaia. Ko ai ʼae neʼe ina filifili?