ʼE Tou Fakahā ʼAki Tatatou Minisitelio Ia Totatou ʼOfa ʼAē Ki Te ʼAtua
1. Ko te ʼofa ʼo Sesu ki te ʼAtua neʼe ina uga ia ia ke ina fai tea?
1 Ko te ʼofa ʼo Sesu ʼaē neʼe ina uga ia ia ke ina fakahoko ia tana minisitelio. ʼI te ʼu faʼahi fuli ʼo te minisitelio ʼa Sesu, ʼe mole maʼu he fakafifihi ʼo ʼuhiga mo tona ʼofa ʼaē kiā Sehova. Neʼe ʼui fēnei e Sesu: “Ke feala ke ʼiloʼi e te mālamanei ʼe au ʼofa ki te Tamai, ʼio ohagē pē ko tona fakatotonu mai e te Tamai, ʼe au fai fēia.” (Soa. 14:31) ʼI totatou ʼuhiga tisipulo ʼa Sesu, ʼe tou maʼu mo tātou ia te pilivilēsio ʼaē ke tou fakahā ʼaki tatatou minisitelio ia totatou ʼofa lahi ʼaē ki te ʼAtua.—Mat. 22:37; Efe. 5:1, 2.
2. ʼE hā feafeaʼi ʼi tatatou minisitelio ia totatou ʼofa ʼaē kiā Sehova?
2 “Ke Tapuhā Tou Huafa”: Kā tou faʼafai ʼo fakaʼaogaʼi ia te ʼu faigamālie fuli moʼo palalau ki te hahaʼi ʼo ʼuhiga mo Sehova pea mo tona Puleʼaga, pea ʼe tou fakahā ai ia totatou ʼofa ʼaē ki te ʼAtua, pea ʼe tou lagolago ai ki te fakatapuhā ʼo tona huafa. (Pes. 83:18; Esk. 36:23; Mat. 6:9) Ohagē pē ko te minisitelio ʼa Sesu, ʼe tou fakahā tuʼumaʼu ʼaki tatatou minisitelio ia tatatou faiga fakamālotoloto ʼaē ke fakatapuhā ia te huafa ʼo Sehova pea ke fai ia tona finegalo.—Mat. 26:39.
3. Ko te ʼaluʼaga fea ʼaē ʼe tokoni mai ai kiā tātou ia totatou ʼofa kiā Sehova ke tou tekeʼi ia te ʼu fihifihia?
3 Ko Te ʼOfa ʼe Ina Uga Tātou Ke Tou Tekeʼi Ia Te ʼu Fihifihia: Ko te ʼofa ʼaē kiā Sehova ʼe mole hona ʼu tuʼakoi. (1 Ko. 13:4, 7) Neʼe felāveʼi Sesu mo te ʼu tuʼuga ʼaluʼaga ʼi tona maʼuli neʼe feala aipē ke ina tuku tana fakahoko ʼaē ia tana minisitelio. Kae ʼi te ʼu temi ʼaia, ko tona ʼofa lahi ʼaē kiā Sehova pea mo tana loto ʼaē ke ina fai tona finegalo, neʼe tokoni ki ai ke ina tekeʼi ia te ʼu fihifihia fuli. (Mko. 3:21; 1 Pet. 2:18-23) Mo tātou foki ʼe tou felāveʼi mo te ʼu tuʼuga fihifihia, pea ko totatou ʼofa ʼaē ki te ʼAtua ʼe feala ke tokoni mai kiā tātou ke tou tekeʼi ia te ʼu fihifihia ʼaia. ʼI tatatou mulimuli lelei ki te faʼifaʼitaki ʼa Kilisito, ʼe feala ke tou falala pea mo fai ia meʼa fuli ʼe tou lavaʼi moʼo fakahoko ia tatatou minisitelio. Logolā ʼe feala ke malave kiā tātou ia te fakafeagai ʼo totatou fāmili, peʼe ko te mahaki, peʼe ko te mātutuʼa, peʼe ko te mole fia logo ʼa te hahaʼi ki te moʼoni, kae ko te ʼu ʼaluʼaga ʼaia ʼe mole tupu ai anai hatatou mole fakahā ia totatou ʼofa ʼaē kiā Sehova ʼo fakahoko totatou minisitelio, ʼo mulimuli pē ki totatou ʼu fealagia.
4. Ko te pilivilēsio fea ʼe tou maʼu ʼuhi ko totatou ʼofa ʼaē kiā Sehova?
4 Ko te ʼofa ʼe mālohi, pea ʼe tapuakiʼi tātou ʼi tatatou lava fakahā ʼaki tatatou minisitelio ia totatou ʼofa kātoa ʼaē ki te ʼAtua. (1 Ko. 13:13) ʼI tatatou kua vave fakaovi ki te temi ʼaē kā fakatapuhā ai anai ia te huafa ʼo Sehova ʼo talu ai, ʼofa pē ‘ke ʼāsili tuputupu aipē totatou ʼofa.’—Filp. 1:9; Mat. 22:36-38.