“ ʼAua Naʼa Ke Mataku”
1. Koteā lā he ʼu faigataʼaʼia ʼe tatau mo ʼaē ʼo Selemia ʼe lagi tau mo tātou takitokotahi?
1 ʼI te temi ʼaē neʼe fakatotonu ai kiā Selemia ke gāue fakapolofetā, neʼe ina logoʼi ʼi tona loto neʼe mole tuha mo ia te gāue ʼaia. Kae neʼe fakapapau fēnei age ia Sehova: “ ʼAua naʼa ke mataku,” pea ʼaki he lotoʼofa neʼe ina fakamālohiʼi ia ia ke ina fakahoko tona maʼua fakapolofetā. (Sel. 1:6-10) ʼI totatou temi, ʼe feala mo tātou ke tou tuʼaniaʼi tatatou fai fakamafola heʼe tou umiuminoa peʼe tou manatu ʼe mole kita lavaʼi te gāue. Ko takita tuʼaniaʼi ʼaē peʼe feafeaʼi anai tokita fakatalitali ʼaē e te hahaʼi, ʼe feala aipē ʼi ʼihi temi ke mole tou kau ki te fai fakamafola. ʼE tou lava tekeʼi feafeaʼi te ʼu taʼi tuʼania ʼaia, pea koteā anai ia te ʼu tapuakina kā tou maʼu mai ai e kita takitokotahi?
2. Kā tou teuteuʼi fakatomuʼa, pea ʼe tokoni feafeaʼi mai anai ke mole tou mātataku fau ʼi tatatou gāue fai fakamafola?
2 Tou Teuteuʼi Fakatomuʼa: ʼE feala mokā tou teuteu fakalelei ke mole tou mātataku fau ʼi te fai fakamafola. Ohagē lā, kapau ʼe tou fakakaukauʼi fakatomuʼa he ʼu faʼahiga palalau fakafeagai ʼe feala ke fai mai e te hahaʼi, pea ʼe tou nofo teuteu anai ʼo tali ki he ʼu faʼahiga palalau fakafeagai ʼe fai māhani mai ʼi te fai fakamafola. (Taag. 15:28) Kae lā hakita fai lolotoga ʼo takita Tauhi Fakafāmili ia he ʼu kiʼi faʼifaʼitaki ʼaoga moʼo teuteuʼi he ʼu faʼahiga faigataʼaʼia kehekehe ʼe feala ke hoko ʼi te faleako pea mo te minisitelio?—1 Pet. 3:15.
3. Ko tatatou falala ʼaē kiā Sehova, ʼe tokoni feafeaʼi mai ki tatatou tekeʼi ia totatou mataku?
3 Tou Falala Kiā Sehova: Kā tou falala ki totatou ʼAtua, pea ʼe tou lava tekeʼi anai totatou mataku. Neʼe kua fakapapau mai ia Sehova ʼe tokoni mai anai kiā tātou. (Isa. 41:10-13) ʼE mole he tahi age tokoni ʼe lahi age ʼi te tokoni ʼaē ʼe foaki mai e Sehova. Tahi ʼaē meʼa, neʼe fakapapau mai e Sesu, māʼiapē mo te ʼu ʼaluʼaga ʼaē ʼe hoko fakapunamaʼuli mai, kae ʼe feala anai ki te laumālie māʼoniʼoni ʼo te ʼAtua ke tokoni mai ke tou fakahoko fakalelei ia tatatou fai fagonogono. (Mko. 13:11) Koia, tou kole tuʼumaʼu kiā Sehova ia tona laumālie māʼoniʼoni.—Luka 11:13.
4. Koteā te ʼu tapuakina ʼe tou maʼu mai tatatou faʼa kātaki ʼaē ʼi te minisitelio logolā te ʼu fihifihia ʼaē ʼe tau mo tātou?
4 Te ʼu Tapuakina: Kā tou faʼa kātaki ʼi te minisitelio logolā te ʼu fihifihia ʼaē ʼe tau mo tātou, pea ʼe feala ai anai kiā tātou ke tou popoto ʼi te tauʼi ʼo he ʼu ʼahiʼahi ʼe feala ke hoko mai. ʼE tou maʼu ai ia te lotomālohi pea mo te lototoʼa—ko he ʼu kalitātē ʼe maʼu e nātou ʼaē ʼe gāue kiai ia te laumālie māʼoniʼoni. (Gāue 4:31) Pea tahi ʼaē meʼa, kā tou lolomi ia totatou mataku ʼaki te tokoni ʼa Sehova, pea ʼe tou fakamālohiʼi ai tatatou tui pea mo tatatou falala ʼaē ki tana tokoni mai kiā tātou. (Isa. 33:2) ʼE tou toe maʼu mo he loto fiafia, ʼi tatatou ʼiloʼi ʼaē ʼe tou fakafiafia ia tatatou Tamai ʼaē ʼe ʼi selō. (1 Pet. 4:13, 14) Koia, ʼaua naʼa tou mātataku ʼi te tala ʼo te logo ʼo ʼuhiga mo te Puleʼaga ʼaki he lototoʼa, ʼo tou falala tuʼumaʼu ki te tokoni ʼa Sehova!