ʼE Maʼuhiga Ki Te Kau Minisi ʼAē ʼe Gāue Mālohi Ke Natou Faikole Pea Mo Metitāsio
1. Koteā ʼaē neʼe tokoni kiā Sesu ke ʼaua naʼa fakaleluʼi ia ia mai tana gāue ʼuluaki?
1 ʼI te pō kātoa neʼe fakamālōlō e Sesu te hahaʼi pea mo kapu te kau temonio. ʼI te maʼu atu e te kau tisipulo ia Sesu ʼi te ʼaho ake, neʼe natou ʼui fēnei age: “Ko te hahaʼi fuli ʼe natou kumi koe,” pea mo natou uga ai ia ia ke hoko atu tana fai ʼaē ʼo tana ʼu gāue fakaofoofo. Kae neʼe mole tuku e Sesu te faʼahi ʼaia ke ina fakaleluʼi ia ia mai tana gāue tāfito ʼaē ko te fakamafola ʼo te logo lelei ʼo te Puleʼaga. Neʼe ina tali fēnei age: “Tou ʼolo ki he tahi potu, ki te ʼu kolo lalahi ʼaē ʼe ovi mai, koteʼuhi ke au toe fai fakamafola ʼi ai, heʼe ko te tupuʼaga lā ʼaia ʼo taku ʼalu ki tuʼa.” Koteā ʼaē neʼe tokoni kiā Sesu ke ina taupau maʼu tana fakatuʼutuʼu? Neʼe tuʼu ake kae kei hegihegi ,ʼo ʼalu ʼo faikole pea mo metitāsio. (Mko. 1:32-39) ʼE toe lava tokoni feafeaʼi mai te faikole pea mo te metitāsio ke tou liliu ko he kau fai fakamafola ʼe gāue mālohi?
2. Koteā ʼaē ʼe feala ke tou metitāsio kiai ke tokoni mai ke tou gāue mālohi tuʼumaʼu ʼi te minisitelio?
2 Koteā ʼAē ʼe Tonu Ke Tou Metitāsio Kiai? Neʼe sio ia Sesu ko te hahaʼi “neʼe natou ʼāhua pea mo mavetevete, ohagē ko he faga ovi ʼe mole honatou tagata tauhi.” (Mat. 9:36) ʼO toe fēia pē mo tātou, ʼe feala ke tou metitāsio ki te ʼaoga ʼaupitō ʼaē ʼo te logo lelei ki te maʼuli ʼo te hahaʼi. ʼE feala pē ke tou fakatokagaʼi te maʼuhiga ʼo te temi ʼaenī ʼe tou māʼuʼuli ai. (1 Ko. 7:29) ʼE feala ke tou fakakaukauʼi te ʼu gāue pea mo te ʼu kalitātē ʼo Sehova, totatou pilivilēsio ʼaē ʼi totatou ʼuhiga Fakamoʼoni ʼa Sehova, pea mo te ʼu koloa fakalaumālie maʼuhiga ʼaē neʼe tou ako ʼi te Folafola ʼa te ʼAtua, ʼaē ko he ʼu koloa ʼe mole heʼeki ʼiloʼi e te hahaʼi ʼo totatou telituale.—Pes. 77:11-13; Isa. 43:10-12; Mat. 13:52.
3. Ko te temi fea ʼaē ʼe lagi feala ai ke tou metitāsio?
3 Ko Te Temi Fea ʼAē ʼe Tonu Ai Ke Tou Metitāsio? Ohagē pē ko Sesu, ko ʼihi ʼe natou ʼaʼala ake kae kei hegihegi te ʼaho, ʼi te temi ʼaē ʼe kei gona ai. ʼE tokagaʼi e ʼihi, ko te temi lelei ʼaē ke natou metitāsio ai, ʼe ko te pōʼuli ʼi muʼa ʼo tanatou momoe. (Sen. 24:63) Tatau aipē peʼe kotou maʼumaʼua ʼaupitō, kae ʼe feala pē ke kotou maʼu hokotou temi moʼo metitāsio. Ko ʼihi ʼe natou metitāsio mokā natou toʼo te papikā. Ko ʼihi ʼe natou fakaʼaogaʼi tonatou temi kai hoʼatā ke natou metitāsio faʼifaʼitaliha ai. ʼE fakatokagaʼi e ʼihi mokā natou metitāsio ʼi muʼa ʼo tanatou ʼolo ʼo fai fakamafola, tatau aipē peʼe ko he kiʼi temi ʼe nounou, kae ʼe tokoni kiā nātou te faʼahi ʼaia, ke natou maʼu he lototoʼa ʼe lahi age pea ke natou gāue mālohi age.
4. He koʼē ʼe tonu ke tou metitāsio?
4 ʼE lahi age anai tatatou fia tauhi ʼaē kiā Sehova mokā ʼe tou faikole pea mo metitāsio, pea ʼe tokoni mai anai kiā tātou ke lelei age tatatou mahino fakalaumālie, pea mo fakamālohiʼi tatatou fakatotonu ʼaē ke tou fai fakamafola tuʼumaʼu. Neʼe fua lelei ki te Minisi Tāfito ʼaē ʼa te ʼAtua ko Sesu ia tana metitāsio, pea ʼe toe fēia pē anai mo tātou.