Te Kalitātē ʼAē ʼe Maʼuhiga Tāfito Ki He Tahi Ke Faiako Lelei
1. Koteā te kalitātē ʼaē ʼe maʼuhiga tāfito ki he tahi ʼe faiako lelei?
1 Koteā ʼaē ʼe fakafealagia ki he tahi ke liliu ai ko he faiako Tohi-Tapu lelei? Tana ako ʼi te faleako? Te ʼu meʼa ʼaē neʼe hoko ʼi tona maʼuli? Te ʼu fealagia ʼaē ʼe kita maʼu? ʼO kaku ki te temi nei, ko te kalitātē ʼe ina fakahoko kātoa ia te Lao, ʼe ina fakaʼiloga ia te kau tisipulo ʼa Sesu, pea ko te kalitātē ʼaē ʼe maʼuhiga age pea mo matalelei age ia ʼi te ʼu kalitātē fuli ʼa Sehova. (Soa. 13:35; Kal. 5:14; 1 Soa. 4:8) Ko te ʼofa. Ko te kau faiako lelei, ʼe natou maʼuliʼi te ʼofa ʼaia.
2. He koʼē ʼe maʼuhiga ʼaupitō ke tou maʼu te ʼofa ki te hahaʼi?
2 ʼOfa Ki Te Hahaʼi: Neʼe fakahā e Sesu, ia te Tagata Faiako Lahi, ia te ʼofa ki te hahaʼi, pea neʼe uga ai natou ke natou fagono kiā te ia. (Luka 5:12, 13; Soa. 13:1; 15:13) Kapau ʼe tou tokaga ki te hahaʼi, ʼe feala ai ke tou fai fakamafola ʼi te ʼu temi faigamālie fuli. Ko te ʼu fihifihia ohagē ko te fakataga mo te mole fia logo ʼa te hahaʼi ʼe mole tāʼofi ai anai tātou. ʼE tou fakahā anai ki te hahaʼi ʼe tou tokagaʼi te ʼu meʼa ʼaē ʼe natou leleiʼia, pea ʼe tou fakaʼalutahi anai tatatou ʼu palalau mo te ʼu meʼa ʼaē ʼe natou hoha kiai. ʼE tou fia toʼo anai he temi maʼa te kau ako Tohi-Tapu fuli kae tāfito foki moʼo teuteuʼi fakatomuʼa ʼonatou ako.
3. ʼE tokoni feafeaʼi mai te ʼofa ki te ʼu moʼoni ʼo te Tohi-Tapu mokā tou fai fakamafola?
3 ʼOfa Ki Te ʼu Moʼoni ʼo Te Tohi-Tapu: Neʼe toe ʼofa foki ia Sesu ki te ʼu moʼoni ʼo te Tohi-Tapu, pea neʼe ina fakaʼuhigaʼi ko he ʼu koloa. (Mat. 13:52) Kapau ʼe tou ʼofa ki te moʼoni, ʼe tou palalau anai ʼaki te fiafia, pea ʼe feala ke tupu ai te fia logo ʼo te hahaʼi. Ko te taʼi ʼofa ʼaia ʼe tokoni mai anai ke tou tokagaʼi tāfito te maʼuhiga ʼo te logo ʼaē ʼe tou fakamafola ki te hahaʼi kae mole tou tuʼania ki ʼatatou tuʼakoi, koia ʼe mole tou mataku anai mokā tou fai fakamafola.
4. ʼE tou maʼu feafeaʼi ia te ʼofa?
4 Tou Maʼu Te ʼOfa: ʼE tou maʼu feafeaʼi te ʼofa ki te hahaʼi? ʼI tatatou fakakaukauʼi te ʼofa ʼaē neʼe fakahā e Sehova mo tona ʼAlo, pea mo te ʼaluʼaga fakaʼofaʼofa fakalaumālie ʼa te hahaʼi ʼo tatatou telituale. (Mko. 6:34; 1 Soa. 4:10, 11) ʼI te fai tuʼumaʼu te ako takitokotahi pea mo te metitāsio, ʼe loloto anai tatatou ʼofa ki te ʼu moʼoni ʼo te Tohi-Tapu. Ko te ʼofa ʼe ko he koga ʼo te fua ʼo te laumālie. (Kal. 5:22) Koia, ʼe feala ke tou kole kiā Sehova ke ina foaki mai tona laumālie māʼoniʼoni ke tokoni mai ke lahi age totatou ʼofa. (Luka 11:13; 1 Soa. 5:14) Logolā te ʼu meʼa ʼaē neʼe tou ako ʼi te faleako, peʼe kua tou fualoa ʼi te moʼoni, peʼe ko te ʼu fealagia ʼaē ʼe kita maʼu, ʼe feala pē ia ke tou liliu ko he faiako faiva ʼo te Tohi-Tapu mokā ʼe tou maʼuliʼi ia te ʼofa.