Tou Faʼifaʼitakiʼi Te Kau Polofeta—Oseo
1. Kotea te fehuʼi neʼe lagi kotou fai?
1 “Kotea la he ʼu faʼahi ʼe au fia sakilifisioʼi, ke au fai ia te finegalo ʼo Sehova?” Neʼe lagi kotou fai te fehuʼi ʼaia ʼi takotou fakakaukauʼi ia tona toe agalelei mo tona toe manavaʼofa lahi. (Pes. 103:2-4; 116:12) Neʼe fia fai e Oseo te ʼu meʼa ʼae neʼe fakatotonu age e Sehova, logo la neʼe maʼua ai ke ina fai he ʼu sakilifisio. ʼE tou lava faʼifaʼitakiʼi feafeaʼi ia Oseo?
2. ʼE tou lava faʼifaʼitakiʼi feafeaʼi ia Oseo ʼi tana faʼa kataki ʼi te gaue faifakamafola?
2 Neʼe Faifakamafola ʼi Te Temi Faigataʼa: Neʼe fakahagahaga tafitō te logo ʼae neʼe tala e Oseo ki te ʼu telepi ʼe hogofulu ʼo te puleʼaga ʼo Iselaele, he neʼe teitei pe ke puli ai te tauhi moʼoni. Ko te Hau ko Selopoamo 2 neʼe ina fai te meʼa ʼae ʼe kovi kia mata ʼo Sehova pea neʼe ina hoko atu te tauhi ʼae ki te pipi, ʼae neʼe kamata fai e Selopoamo 1. (2 Hau 14:23, 24) Ko te ʼu hau ʼae neʼe hoa mai, neʼe mole natou hikihiki te aluʼaga fakalaumalie ʼo te puleʼaga ʼo te ʼu telepi ʼe hogofulu, ʼo aʼu ki tona fakaʼauha ʼi te taʼu 740 I.M.T.S. Logo la te mafola ʼo te tauhi hala, kaʼe neʼe tauhi agatonu pe ia Oseo ʼi tona ʼuhiga polofeta, ia taʼu ʼe 59. ʼE tou faʼa kataki anai koa ʼo faifakamafola ohage ko Oseo, logo la te mole fia logo peʼe ko te fakafeagai ʼa te hahaʼi?—2 Tim. 4:2.
3. Neʼe fakata feafeaʼi e te maʼuli ʼo Oseo ia te manavaʼofa ʼo Sehova?
3 Neʼe Maʼuhiga Kia Ia Te Manavaʼofa ʼo Sehova: Neʼe fakatotonu e Sehova kia Oseo ke ʼohoana mo “he fafine faiaga.” (Oseo 1:2) Logo la neʼe fanau ia Komela kia Oseo, ʼo maʼu tanā tama, kaʼe ʼe ha mai, ki muli age, neʼe maʼu e Komela ʼana toe ʼe lua ʼi tana faiaga. Kaʼe ko te loto fakamolemole ʼa Oseo ki tona ʼohoana neʼe ina fakata ia te manavaʼofa lahi ʼo Sehova ki te kau Iselaele agatuʼu moka neʼe natou fakahemala. (Oseo 3:1; Loma 9:22-26) ʼE tou lotolelei koa ʼo tuku keheʼi te ʼu meʼa ʼae ʼe tou loto ki ai, kaʼe tou fakaha ki te hahaʼi fuli pe te manavaʼofa ʼo Sehova?—1 Ko. 9:19-23.
4. Kotea ʼihi sakilifisio ʼe feala ke tou fai maʼa Sehova?
4 Ko ʼihi kaugana ʼa Sehova neʼe natou liakī he ʼu gaue ʼi te malama neʼe totogi lelei, ke lahi age tonatou temi ki te faifakamafola. Ko ʼihi ʼe natou selipatea peʼe ko ʼihi ʼe mole maʼu fanau heʼe natou fia fakahoko te ʼu gaue ʼo te Puleʼaga ʼo te ʼAtua. Ka tou fakakaukauʼi te maʼuli ʼo Oseo, ʼe lagi tou manatu ʼe mole feafeala ia ke tou fai ohage ko ia. Kaʼe, kapau ʼe tuputupu totatou lotofakafetaʼi ki te ʼofa makehe ʼo Sehova pea mo tou falala ki tona laumalie maʼoniʼoni ke ina foaki mai te malohi, pea ʼe lagi feala pe ke fakaʼaogaʼi tatou e Sehova ʼi hona aluʼaga ʼe mole tou manatu ki ai, ohage pe ko Oseo.—Mat. 19:26; Filp. 2:13.