Te Tali Ki ʼAkotou Fehuʼi

◼ Kotea ʼae ʼe tonu ke iloʼi e te fanau ke feala ai hana tuputupu ʼi te faʼahi fakalaumalie?

ʼE faiga fakamalotoloto ia te ʼu matuʼā Kilisitiano ke natou foaki ki ʼanatou fanau ia “te akonaki pea mo te ʼu fakatokaga ʼa Sehova.” (Efe. 6:4, MN) Ohage la, ʼi te uhu fuli, ʼe natou vakaʼi te vaega ʼo te ʼaho mo tanatou fanau. Pea ʼi te ako fakafamili pea mo ʼihi atu aluʼaga, ʼe feala ke natou sioʼi he foʼi ʼata viteo pea mo faipalalau ki ai. Peʼe natou faipalalau ki he ʼu manatu neʼe toʼo mai te tohi Les jeunes sʼinterrogent. ʼE toe feala ke natou gaoʼi he hisitolia ʼo te Tohi-Tapu, peʼe natou akoako pe feafeaʼi hanatou lava tauʼi te ʼu fakaneke. Kaʼe, ʼe toe ʼaoga foki ke loloto tanatou akoʼi ki ʼanatou fanau te ʼu moʼoni Fakatohi-tapu ke feala hanatou “hiki atu ki te katoa ʼo te ʼuhigaʼi tagata.”—Hep. 6:1, MN.

Tou vakaʼi muʼa pe kotea ʼae ʼe tou akoʼi age kia natou ʼae ʼi totatou telituale. ʼI he ʼuluaki faipalalau peʼe ko he ʼaʼahi, ʼe tou faiga anai ke tou kamata he ako Tohi-Tapu ʼaki te tohi Koteā ʼAē ʼe Akoʼi Moʼoni Mai ʼi Te Tohi-Tapu? ʼI tanatou ʼosi akoʼi te tohi ʼaia, ʼe tou fakaʼaogaʼi leva te tohi “Kotou Haga Nonofo ʼi Te ʼOfa ʼo Te ʼAtua.” Kotea tona tupuʼaga? Ko te tohi Te Ako Mai Te Tohi-Tapu ʼe ina foaki ki te kau ako ia te ʼatamai malama totonu ʼo te Tohi-Tapu. Pea ko te tohi “Te ʼOfa ʼo Te ʼAtua” ʼe ina akoʼi age kia natou te faʼahiga maʼuliʼi ʼo te ʼu pelesepeto ʼo te Tohi-Tapu ʼi te ʼaho fuli. Ko te ako ʼo te ʼu tohi ʼaia ʼe tokoni kia natou ʼae kei foʼofoʼou ke natou “tauaka” ia Kilisito pea mo natou “tuu malohi i te tui.” (Kol. 2:6, 7) ʼE mole koa la fua lelei ki takotou fanau ia te ʼu tohi ʼaeni? ʼE toe ʼaoga ke natou ako ʼo ʼuhiga mo te totogi ʼae neʼe foaki e Kilisito, mo te Puleʼaga, pea mo te aluʼaga ʼo te kau mate. ʼE ʼaoga ke mahino takotou fanau pe ko ʼe ʼe fakagafua e te ʼAtua ia te mamahi pea mo natou iloʼi ʼe tou maʼuʼuli nei ʼi te ʼu ʼaho fakamuli. ʼE tonu ke natou tui papau ʼe moʼoni te ʼu meʼa ʼae ʼe palalau ki ai te kau Fakamoʼoni ʼa Sehova. ʼE toe ʼaoga foki ki te kau tupulaga ke natou mahino ki te ʼu pelesepeto ʼo te Tohi-Tapu pea mo natou akoako ia te fakaʼaogaʼi ʼo tonatou “ ʼu fealagia fakakaukau.” (Hep. 5:14, MN) ʼE tonu foki ke tokagaʼi e te ʼu matuʼā ia te taʼu pea mo te ʼu meʼa ʼae ʼe kua mahino ki ai tanatou fanau. Logo la ʼe kei taʼu veliveli te fanau, kaʼe ʼe feala pe ke natou ako loloto te ʼu moʼoni ʼo te Tohi-Tapu.—Luka 2:42, 46, 47.