He ʼu Katiko Foʼou Ki Te Tauhi
1 ʼI te fakatahi ʼo te taʼu fuli ʼae neʼe fai ʼi Amelika ʼi te ʼaho 4 ʼo Oketopeli 2014, neʼe fakaha ai ʼe ʼi ai anai he ʼu fetogi ʼi ʼatatou katiko. Neʼe ko he toe logo fakafiafia. Pea neʼe fakamanatuʼi ai ki te nofoʼaki ia te maʼuhiga ʼo te ʼu katiko ʼo te Puleʼaga ʼi tatatou tauhi.—Pes. 96:2.
2 ʼE lagi e ke feʼekeʼaki fenei: He koʼe ʼe maʼuhiga ke toe fai he ʼu fetogi ʼi te tohi hiva katiko? ʼE lahi ʼona tupuʼaga. ʼUluaki, ʼe haga hoko atu aipe tatatou mahino lelei ki te Tohi-Tapu pea ʼe feala ke tou toe logoʼi ʼi ʼatatou katiko. (Taag. 4:18) Koʼeni te tahi tupuʼaga: ʼE lahi te ʼu kupusiga palalau ʼe tou fakaʼaogaʼi nei ʼi tatatou tohi hiva katiko ʼae neʼe toʼo mai ʼi te Tohi-Tapu Traduction du Monde Nouveau (1995). Pea ʼe tonu ki te ʼu kupu ʼaia ke tatau mo ʼae ʼo te Tohi-Tapu ʼae neʼe toe fakaliliu foʼou. Neʼe ko he toe gaue lahi neʼe fai ki te toe fakafoʼou ʼo te ʼu kupu. Koia ʼae neʼe fai ai te fakatuʼutuʼu ke toe hilifaki ki ai he tahi ʼu katiko foʼou.
3 ʼE tou fakatalitali anai koa ke tou maʼu ia te ʼu tohi katiko foʼou ke tou kamata ai leva tatatou hiva? Kailoa. ʼE matou fiafia ʼi te fakaha atu ʼe tou maʼu anai ʼi te ʼu mahina ʼaeni ka haʼu he ʼu katiko foʼou ʼi tatatou tuʼasila ʼi te Neti jw.org. Pea ka maʼu ia he katiko foʼou, ʼe fakatuʼu anai ʼi te fakaʼosi ʼo te polokalama ʼo te Fono Gaue mo te kiʼi nota ʼae “katiko foʼou.”
4 ʼE Feafeaʼi Te Ako ʼo Te ʼu Katiko Foʼou: ʼE mole ko he meʼa faigafua ʼo te ako ʼo he katiko foʼou. Kaʼe, ohage ko te tagata faipesalemo, ʼe tou hiva leʼo lahi anai ʼi te ʼu fono pea “aua naa fakalologo”. (Pes. 30:12) Ke tou ako he katiko foʼou, tou mulimuli ki te ʼu faʼahi ʼae ʼe hoa mai.
Fakalogo liuliuga ia te tagi ʼo te musika ʼa te katiko ʼae ʼe maʼu anai ʼi tatatou tuʼasila ʼi te Neti. Ka lahi takotou fakalogo te tagi ʼo te musika pea ʼe faigafua anai kia koutou takotou toe manatuʼi.
Ako te ʼu kupu pea faigaʼi ke kotou maʼu loto.
Hiva fakatahi te katiko ʼaki te musika. Fai ʼo kaku ki takotou kua maʼu loto ia te katiko.
Ako liuliuga ia te ʼu katiko foʼou lolotoga takotou Ako Fakafamili ʼo kaku ki te kua maʼu loto e tokotou kiʼi famili.
5 ʼI te ʼu mahina ʼaeni ka haʼu moka ʼasi anai he katiko foʼou ʼi te polokalama fakaʼosi ʼo te Fono Gaue, ʼe tonu anai ki te kokelekasio ke natou fakalogo tuʼa tahi ia te tagi ʼo te musika. Pea ʼe hiva anai te nofoʼaki ʼo mulimuli ki te tagi ʼo te musika ohage ko tatatou fai ki ʼihi atu katiko.
6 Ka tou fakakaukauʼi ia te ʼu faʼahi fuli ʼaia, ʼe tou fiafia ʼi te fakatahiʼi ʼotatou leʼo ʼi ʼatatou fono moʼo fakavikiviki kia Sehova. Koia ʼae ʼe tonu ai ke tou heheka maʼu ʼi ʼotatou hekaʼaga moka ʼe tou hiva te katiko ʼi ʼatatou fono Fakakilisitiano.
7 ʼE ʼi ai he tahi faʼahi ʼe feala ke tou fakaha ai ʼe tou fakaʼapaʼapa ki ʼatatou musika. ʼI te ʼu fakatahi lalahi, ʼe teuteuʼi ai he polokalama musika ʼi muʼa ʼo te kamata ʼo te fakatahi. Tuʼa lua ʼi te taʼu, ʼe ʼomai ia he ʼu tehina mo he ʼu tuagaʼane mai te tahi ʼu fenua, neʼe natou lotolelei ke natou olo ki te kolo ko Patterson ʼi Amelika moʼo faʼu ia he ʼu musika matalelei ki tatatou tauhi. Koia, moka fakaafe tatou e te pelesita ʼo te fakatahi ke tou tahi heheka la ki tona hekaʼaga mo fakalogo lelei ki te polokalama musika ʼae neʼe teuteuʼi, ʼe tonu ke tou fai ia te faʼahi ʼaia. Pea ka tou fai ia te faʼahi ʼaia, ʼe tokoni mai anai ke tou teuteuʼi ʼotatou loto ki te polokalama ʼae ʼe hoa mai.—Eseta. 7:10.
8 Moʼo fakaʼosi te fono ʼaeni, ʼe tou hiva anai te katiko foʼou ko tona kupu tafitō ʼaeni “Kua ʼAfio Te Puleʼaga, Ke Hoko Mai Ia!” Ko te katiko ʼaia, neʼe ha ʼi te fakatahi ʼo te taʼu fuli ʼae neʼe hoki ʼosi atu pe ʼi Amelika, neʼe faʼufaʼu tafitō moʼo fakailoga keheʼi te taʼu 100 ʼo te ʼafio ʼo te Puleʼaga.
9 Ko te ʼu katiko foʼou ʼaia ,ʼe ko te ʼu “mea lelei” ʼae ʼe haʼu mai ia Sehova. (Mat. 12:35) Tou fakatotonu ke tou ako ia te ʼu katiko foʼou ʼaia pea mo tou hiva ʼaki ʼotatou loto katoa moʼo fakavikiviki pea mo fakakololiaʼi ia totatou ʼAtua.—Pes. 147:1