Akoʼi Te Moʼoni

ʼO kamata atu ʼi te mahina ʼo Sepetepeli, ʼe fakaha anai ʼi te Fono Maʼuli Fakakilisitiano Mo Te Faifakamafola, ia he fakatuʼutuʼu foʼou ʼo ʼuhiga mo he tahi faʼahiga fai ʼo he ʼu ʼuluaki palalau, ko tona kupu tafitō ʼaeni “Akoʼi Te Moʼoni.” Ko tatatou fakatuʼutuʼu ʼe ko te fakamaʼuhigaʼi ia he moʼoni Fakatohi-tapu, ʼaki hatatou fakaʼaogaʼi ia he fehuʼi pea mo he vaega.

Kapau ʼe fia logo he tahi, ʼe feala ke tou fakatuʼutuʼu ke tou toe liliu ʼo ʼaʼahi ia ia ʼaki hatatou tuku age he tohi, peʼe fakaha age he ʼata viteo mai te jw.org. ʼE tonu ke tou faiga ke tou toe liliu ʼo hoko atu te faipalalau ʼi te ʼu ʼaho pe ʼae ʼe hoa mai. ʼE fakatafito anai te tahi faʼahiga fai ʼo te ʼu ʼuluaki palalau ʼaia pea mo te ʼu faipalalau ki te ʼu kapite ʼae ʼe tou maʼu ʼi te tohi Koteā ʼAē ʼe Akoʼi Moʼoni Mai ʼi Te Tohi-Tapu? ʼE tou maʼu ai he tahi ʼu fehuʼi mo he ʼu vaega Tohi-Tapu ʼe tokoni mai ke tou toe liliu ʼo fai te ʼu ʼaʼahi peʼe fai he ako ʼaki pe te Tohi-Tapu.

ʼE ko te ala pe ʼe tahi ʼae ʼe ina taki ki te maʼuli. (Mt 7:13, 14) Kapau ʼe tou palalau mo te hahaʼi ʼo te ʼu lotu kehekehe pea mo te ʼu agaʼi fenua kehekehe, ʼe tonu ke tou mahino ki te ʼu moʼoni ʼo te Tohi-Tapu ʼae ka ʼaoga anai kia natou. (1Ti 2:4) ʼE lahi anai totatou fiafia pea ʼe iku lelei anai tatatou akoʼi te moʼoni ki te hahaʼi, koteʼuhi kua tou faiva ʼi te palalau ki te ʼu manatu kehekehe ʼo te Tohi-Tapu pea kua lelei age tatatou “ave fakahagatotonu te folafola o te mooni.”—2Ti 2:15.