ʼE Kotou Mahino Koa Ki Te ʼu Kalitate Fakapulipuli ʼo Te ʼAtua?

Ka tou sisio ki he fisiʼi teu matalelei, peʼe ko te lagi fetuʼuʼia peʼe ko he vai tafe ʼe hifo mai he moʼuga, ʼe tou tokagaʼi ai koa te gaue ʼa te Tupu’aga? ʼE ha lelei mai ʼi te fakatupu te ʼu kalitate fakapulipuli ʼo Sehova. (Lom 1:20) Ka tou ʼai muʼa he kiʼi tuʼu ʼo metitasio ki te ʼu meʼa ʼae ʼe tou mamata ki ai, ʼe tou mahino ai ki te malohi mo te ʼofa, te poto mo te faitotonu pea mo te lotofoaki ʼa te ʼAtua.—Pes 104:24.

Ko te ʼu meʼa fea ʼo te fakatupu ʼa Sehova ʼae ʼe kotou tokagaʼi ʼi te ʼaho fuli? Tatau aipe pe ʼe kotou maʼuʼuli ʼi he loto kolo, ʼe kotou sisio aipe ki he ʼu manulele peʼe ko he ʼu fuʼu ʼakau. Ka tou vakavakaʼi lelei te fakatupu ʼa Sehova, pea ʼe ko he tokoni ke tou fakamaʼamaʼa ai te lotohoha mo tokaga tafito ki te ʼu meʼa maʼuhiga pea mo falala ʼe heʼe gata te tokoni ʼa Sehova. (Mat 6:25-32) Kapau ʼe ʼi ai hakotou ʼu fanau, tokoni kia natou ke natou mahino ki te ʼu kalitate fakaofoofo ʼo Sehova. ʼI tatatou ʼofolele ʼi te taulekaleka ʼo te fakatupu, ʼe tou fakaovi lahi ai anai ki te Tupuʼaga.—Pes 8:3, 4, MN.

VAKAʼI TE ʼATA VITEO ʼE HA TE KOLOLIA ʼO TE ʼATUA ʼI TE TAULEKALEKA ʼO TANA FAKATUPU—TE MALAMA MO TE ʼU LANU, PEA MO TALI KI TE ʼU FEHUʼI ʼAENI:

• Kotea ʼae ʼe feala ai ke tou tokagaʼi te ʼu lanu?

• Kotea ʼae ʼe tupu ai te fetogitogi ʼo te ʼu lanu?

• He koʼe ʼe kehe te lanu ʼo te lagi ʼi ʼihi temi?

• Kotea te ʼu lanu matalelei ʼe kotou sisio ki ai ʼi te fakatupu, ʼi te koga meʼa ʼae ʼe kotou nonofo ai?

• He koʼe ʼe tonu ke tou toʼo he temi moʼo vakavakaʼi lelei ia te natula?