“Kotou Haga Vakaʼi Te ʼu Meʼa ʼAeni”

Kotea te ʼu meʼa ʼe tonu ke tou haga vakaʼi? Ko te ʼu meʼa ʼae ʼe talanoa ki ai ia Filipe 4:8 ʼae ʼe moʼoni, mo maʼuhiga, mo faitotonu, mo maʼa, ʼe tuha mo te ʼofa, ke fakaʼapaʼapaʼi, mo lelei, pea ʼae ʼe tuha ke vikiʼi. ʼE mole fakaʼuhiga leva ke tou manatu tuʼumaʼu pe ki te Tohi-Tapu ʼi te temi fuli. Kailoa ia. ʼE tonu ke tou maʼu ni manatu ʼe leleiʼia e Sehova, kae mole ko he ʼu manatu ʼe fakafeagai ki tatatou nonofo agatonu kia te ia.—Pes 19:14, MN.

ʼE mole ko he meʼa ʼe faigafua te tekeʼi ʼo te ʼu manatu kovi. Koteʼuhi ʼe tou tauʼi totatou kakano agahala pea mo Satana foki, “te ʼatua ʼo te tuʼu ʼo te ʼu faʼahiga meʼa ʼaeni.” (2Ko 4:4) Kua mafola te ʼu aga heʼe ʼaoga ʼi te televisio, mo te latio, ʼi te Neti pea mo te ʼu tohi mo nusipepa, ʼuhi ko te puleʼi e Satana te ʼu faʼahiga logo ʼaia ʼo te malama ʼaeni. Koia, kapau ʼe mole tou filifili lelei te ʼu meʼa ʼae ʼe tou fafaga ʼaki tatatou fakakaukau, ʼe tou manatu anai ki he ʼu meʼa heʼe maʼa pea mo toe fai te aga ʼae ʼe kovi.—Skp 1:14, 15.

VAKAʼI TE ʼATA VITEO KE ʼAUA NAʼA VAIVAI TATATOU AGATONU—TOU LIAKI TE ʼU FAKAFIAFIA ʼAE ʼE MOLE LELEI, PEA MO TALI KI TE ʼU FEHUʼI ʼAENI:

• 

  Neʼe kotea ʼae neʼe sioʼi e te tehina ʼi tana telefoni? Neʼe kotea te ʼu fua kovi kia ia?

• 

  Neʼe tokoni feafeaʼi te ʼu vaega ʼo Kalate 6:7, 8 pea mo Pesalemo 119:37 ki te tehina?