Ko Tou ʼOfa Mo Tau Lotofakafetaʼi Kia Sehova ʼe Ina Uga Koe Ki Te Papitema

1-2. Ohage ko tona fakaha ia Gaue 8:27-31, 35-38, kotea ʼae neʼe ina uga te tagata Etiopea ke papitema?

ʼE KOTOU fia papitema koa ʼo kotou liliu ko he tisipulo ʼa Kilisito? Ko te ʼofa mo te lotofakafetaʼi ʼae neʼe uga ai te tokolahi ke natou papitema. Tou vakaʼi te faʼifaʼitaki ʼo te tagata neʼe gaue maʼa te fineʼaliki ʼo Etiopea.

² Neʼe fakahoko atu aipe e te Etiopea te ʼu meʼa ʼae neʼe ina lau ʼi te Tohi-Tapu. (Lau ia Gaue 8:27-31, 35-38.) Kotea ʼae neʼe ina uga ia ia ke ina fai te faʼahi ʼaia? ʼE mahino papau neʼe ina leleiʼia te Folafola ʼa te ʼAtua. Koteʼuhi ʼi tana lolotoga alu ʼi tana saliote, neʼe ina lau te tohi ʼo Esaia. Pea hili tana faipalalau mo Filipo, neʼe lotofakafetaʼi te tagata ʼaia ki te ʼu gaue ʼae neʼe fai e Sesu maʼa ia. Kae kotea te tupuʼaga ʼo te haʼu ʼa te tagata maʼu tuʼulaga ʼaia ki Selusalemi? Koteʼuhi neʼe kua ʼofa pe ia ia Sehova. ʼE tou iloʼi feafeaʼi te faʼahi ʼaia? Neʼe alu ia ʼo atolasio kia Sehova ʼi Selusalemi. Neʼe lagi mavae te tagata ʼaia ʼi te lotu ʼae neʼe tupu ake ai, ʼo alu ki te puleʼaga pe ʼe tahi ʼae kua foaki tonatou maʼuli ki te ʼAtua moʼoni. Pea ko tona ʼofa ʼaia kia Sehova ʼae neʼe ina uga leva ia ia ke papitema pea ke liliu ai ko he tisipulo ʼa Kilisito.—Mat. 28:19.

3. Kotea ʼae ʼe feala ke ina taʼofi te papitema ʼa he tahi? (Vaka’i te fakamatala ʼae ’i te ’a takai “ ʼE Feafeaʼi Tou Loto?”)

³ Ko te ʼofa kia Sehova ʼe feala pe ke ina uga koe, ke ke papitema. Kae ʼe toe feala pe ke taʼofi koe e te ʼofa ke ʼaua naʼa ke fai te faʼahi ʼaia. ʼO feafeaʼi? Koʼeni ia he ʼu aluʼaga kehekehe. ʼE feala pe ki te ʼofa ʼae ʼe ke maʼu ki tou famili ʼae ʼe mole tauhi kia Sehova peʼe ki ʼou kaumeʼa ke ina taʼofi koe. ʼE ke tuʼania anai naʼa ke papitema, kae fehihiʼa atu kia koe. (Mat. 10:37) ʼE ke lagi leleiʼia he ʼu aga ʼe fehiʼa ki ai te ʼAtua pea ke manatu ʼe faigataʼa anai hau liʼaki te ʼu aga ʼaia. (Pes. 97:10) Neʼe lagi ke lahilahi ake mo tau fakaʼapaʼapa pe ki he ʼu agaʼi fenua ʼe pipiki ki te lotu hala, pea ʼe ke taupau he ʼu suvenia lelei ʼo te ʼu temi ʼaia. Koia ʼe lagi faigataʼa ai hau tuku te ʼu agaʼi fenua ʼaia ʼe mole leleiʼia e Sehova. (1 Ko. 10:20, 21) ʼE tonu anai ke ke filifili pe ʼe ko ai ʼae ʼe ke ʼofa mamahi ai.

TE ʼOFA ʼAE ʼE MAʼUHIGA TAFITO

4. Kotea te tupuʼaga tafito ʼae ʼe ina uga koe ke ke papitema?

⁴ ʼE lahi he ʼu aluʼaga peʼe ko he ʼu meʼa ʼe tuha ke tou ʼoʼofa ki ai peʼe tou leleiʼia. Ohage la ʼi muʼa ʼo tau ako mo te Kau Fakamoʼoni ʼa Sehova, neʼe lagi ke leleiʼia te Tohi-Tapu. Pea neʼe lagi ke toe maʼu te ʼofa kia Sesu. ʼI te temi leva ʼae kua ke iloʼi ai te Kau Fakamoʼoni ʼa Sehova ʼe lagi ke fia fakatahi mo natou. Kae ko tou ʼofa ʼae ki te ʼu meʼa lelei ʼaia ʼe mole fakaʼuhiga leva ʼe ke fia foaki anai ia koe totonu kia Sehova pea mo ke papitema. Ko te aluʼaga tafito ʼae ʼe ina taki koe ki te papitema ko tou ʼofa ʼae kia Sehova ʼAtua tokotahi pe. Kapau ʼe ke ʼofa kia Sehova ʼo laka age ʼi te ʼu meʼa fuli ʼae, ʼe mole ke tuku anai he faʼahiga meʼa pe ke ina taʼofi tau tauhi kia Sehova. ʼE feala pe ke ke fakatatau te ʼofa ʼae kia Sehova ki he matapa ʼe ina taki ki te papitema, peʼe ko he ʼa ʼe tokoni atu anai ke ke nofo agatonu ki te ʼAtua.

5. Kotea te ʼu fehuʼi ʼae ka tou vakaʼi anai?

⁵ Neʼe ui e Sesu ʼe tonu ke tou ʼofa kia Sehova mo totatou loto katoa, totatou maʼuli katoa, mo totatou ʼatamai katoa pea mo totatou malohi katoa. (Mko. 12:30) ʼE feafeaʼi hatatou ako ke tou ʼofa mo fakaʼapaʼapa loloto kia Sehova? Kapau ʼe tou fakakaukauʼi te ʼofa ʼae ʼe maʼu e Sehova kia tatou, ʼe uga ai tatou ke tou toe ʼofa mo tatou kia te ia. (1 Soa. 4:19) Kapau anai ʼe tou maʼu te taʼi ʼofa ʼaia ʼe maʼuhiga tafito, kotea anai ʼae ka tou logoʼi? Pea kotea anai ʼae ka tou fai?b

6. Ohage ko tona fakaha ia Loma 1:20, kotea ʼae ʼe tonu ke tou fai ke tou iloʼi ai ia Sehova?

⁶ Tou ako ke tou iloʼi ia Sehova ʼaki tana fakatupu. (Lau ia Loma 1:20; Fkha. 4:11) Metitasio ki te poto ʼo Sehova ʼae ʼe ha lelei ʼi te vao ʼakau mo te ʼu manu. Tou taʼofi he ʼu ako mai te taulekaleka ʼo te fakatupu ʼo totatou sino. (Pes. 139:14) Fakakaukauʼi age muʼa te fakatalakitupua ʼo te malohi ʼae neʼe ʼai e Sehova ki te laʼa, kae ko te tahi pe ia fetuʼu ʼaia ʼi te ʼu lauʼi miliale fetuʼu.c (Esa. 40:26) Kapau ʼe tou fai feia pea ko tatatou fakaʼapaʼapa kia Sehova ʼe liliu anai ʼo loloto age. Kae ko tatatou iloʼi ʼae ʼe poto pea mo malohi ia Sehova ko te kamataʼaga pe ʼaia ʼo ʼatatou felogoi mo ia.

7. Ke loloto age totatou ʼofa ʼae kia Sehova, kotea ʼae ʼe ʼaoga ke tou tui papau ki ai?

⁷ ʼE ʼaoga ke tou tui papau ʼe tokaga Sehova kia tatou takitokotahi. ʼE faigataʼa koa hatatou tui ʼe iloʼi tatou e te Tupuʼaga ʼo te lagi mo te kele, pea ʼe tokaga kia tatou? Kapau koia, manatuʼi ko Sehova “ ʼe mole mamaʼo ia tatou takitokotahi.” (Gaue 17:26-28) ʼE ina “iloi . . . te u loto fuli,” pea neʼe ina fai te fakapapau ʼaeni neʼe ui e Tavite kia Salomone: “Kapau e ke kumi ia ia, e ina tuku anai ke ke mau ia ia.” (1 Klk. 28:9) Ko te tupuʼaga la ʼaia ʼo tatatou ako te Tohi-Tapu koteʼuhi neʼe ui fenei e Sehova: “Neʼe au taki mai koe kia te au.” (Sel. 31:3, MN) Kapau ʼe tuputupu tatatou lotofakafetaʼi kia Sehova pea ʼe toe loloto ai mo totatou ʼofa ʼae kia te ia.

8. ʼE feafeaʼi hatatou fakaha tatatou lotofakafetaʼi ki te ʼofa ʼo Sehova?

⁸ ʼE feala ke tou fakaha tatatou lotofakafetaʼi ki te ʼofa ʼo Sehova moka tou faipalalau kia te ia ʼi te faikole. ʼE tuputupu anai totatou ʼofa ki te ʼAtua mo kapau ʼe tou fakaha kia te ia ʼotatou mamahi fuli, pea mo tou fakamalo ki te ʼu meʼa fuli pe ʼe ina fai maʼa tatou. Ko tatatou pipiki ʼateaina kia Sehova, ʼe tuputupu anai ʼo malohi age koteʼuhi ʼe tou sio anai ki tana faʼahiga tali mai ki ʼatatou faikole. (Pes. 116:1) Pea ʼe tou tui papau ai leva ʼe lotomahino kia tatou. Kae ke feala hatatou fakaovi kia Sehova, ʼe tonu ke tou mahino ki ʼana faʼahiga manatu. ʼE tonu ke tou iloʼi te meʼa ʼae ʼe ina loto ke tou fai. Ko te puleʼaki pe ʼe tahi ke tou iloʼi ai te faʼahi ʼaia ʼe ko te ako ʼo tana Folafola, te Tohi-Tapu.

9. ʼE feafeaʼi hatatou fakaha ʼe tou ʼofa ki te Tohi-Tapu?

⁹ Tou ako ke tou ʼofa ki te Folafola ʼa te ʼAtua, te Tohi-Tapu. ʼE gata pe ki te Tohi-Tapu ʼe feala ke tou maʼu ai te moʼoni ʼo ʼuhiga mo Sehova pea mo ʼana fakatuʼutuʼu maʼa tatou. ʼE tou fakaha ʼe tou ʼofa ki te Tohi-Tapu mo kapau ʼe tou lau ʼi te ʼaho fuli, mo tou teuteuʼi tatatou ako Tohi-Tapu, pea mo tou maʼuliʼi te ʼu meʼa ʼae ʼe tou ako. (Pes. 119:97, 99; Soa. 17:17) Koia neʼe kua tou fai koa hatatou polokalama ke tou lau te Tohi-Tapu? Pea ʼe tou muliʼi koa te polokalama ʼaia ʼo tou tokakaga ke tou lau te Tohi-Tapu ʼi te ʼaho fuli?

10. Kotea te tahi faʼahi ʼae ʼe makehe ai te Tohi-Tapu?

¹⁰ Ko te tahi faʼahi ʼe makehe ai te Tohi-Tapu he ʼe tou maʼu ʼi loto te ʼu fakamatala ʼo ni hahaʼi neʼe sisio tonu kia Sesu. Ko te tohi pe ʼaia ʼe tahi ʼe moʼoni pea ʼe fakamahino ai pe kotea ʼae neʼe fai e Sesu maʼa tatou. ʼI tatatou iloʼi te ʼu gaue mo te ʼu palalau ʼae neʼe fai e Sesu ʼe tou ʼoʼofa anai ia ia.

11. ʼE feafeaʼi hatatou ako ke tou ʼofa kia Sehova?

¹¹ Tou ako ke tou ʼofa kia Sesu, ke tuputupu ai totatou ʼofa kia Sehova. Kotea tona tupuʼaga? Koteʼuhi neʼe ha lelei ia Sesu te ʼu kalitate ʼo tana Tamai. (Soa. 14:9) Koia kapau ʼe lahi tatatou ako ʼae ke tou iloʼi ia Sesu pea ʼe toe lahi age anai tatatou mahino mo totatou ʼofa kia Sehova. Manatuʼi te manavaʼofa ʼae neʼe maʼu e Sesu kia natou ʼae neʼe fehiʼaʼinaʼi: te kau masisiva, te kau mahahaki, pea mo natou ʼae neʼe vaivai. Manatuʼi mo te ʼu tokoni ʼaoga ʼae neʼe toe foaki e Sesu, pea neʼe feafeaʼi te fetogi ʼo totatou maʼuli ʼo lelei age he neʼe tou mulimuli ki ai.—Mat. 5:1-11; 7:24-27.

12. ʼI tau iloʼi ʼae pe ko ai ia Sesu, kotea ʼae ʼe ina ʼekenaki anai koe ke ke fai?

¹² ʼE tuputupu anai totatou ʼofa kia Sesu ʼo lahi age, mo kapau ʼe tou fakakaukauʼi te sakilifisio ʼae neʼe ina fai moʼo fakamolemole ʼo ʼatatou agahala. (Mat. 20:28) Pea ka tou mahino neʼe tali e Sesu ke mate maʼa tatou, ʼe tou fia fakahemala anai pea mo kumi te fakamolemole ʼa Sehova. (Gaue 3:19, 20; 1 Soa. 1:9) ʼI tau logoʼi leva tou ʼofa kia Sesu mo Sehova, pea ʼe ke fia fakatahi anai mo natou ʼae ʼe ʼoʼofa kia naua.

13. Kotea ʼae ʼe foaki mai e Sehova kia tatou?

¹³ Tou ako ke tou ʼofa ki te famili ʼo Sehova. Ko totatou famili ʼae mole tauhi kia Sehova pea mo ʼotatou kaumeʼa ʼafeā, ʼe mole natou mahino anai pe koʼe neʼe tou foaki ia totatou totonu kia Sehova. ʼE feala pe ke natou fakafeagai mai kia tatou. Kae ʼe tokoni mai anai ia Sehova ʼo ina foaki mai hotatou famili fakalaumalie. Pea ʼe tou maʼu anai te ʼofa mo te tokoni ʼae ʼe ʼaoga mai, mo kapau ʼe tou pipiki tuʼumaʼu ki te famili fakalaumalie ʼaia kua foaki mai e Sehova. (Mko. 10:29, 30; Hep. 10:24, 25) ʼAki te temi, ʼe feala anai ke fakatahi totatou famili mo tatou ʼo tauhi kia Sehova pea mo mulimuli ki ʼana pelesepeto.—1 Pet. 2:12.

14. Ohage ko tona fakaha ia 1 Soane 5:3, kotea ʼae neʼe tou mahino leva ki ai ʼo ʼuhiga mo te ʼu pelesepeto ʼa Sehova?

¹⁴ Tou ako ke tou leleiʼia mo maʼuliʼi te ʼu pelesepeto ʼa Sehova. ʼI muʼa ʼo tatatou iloʼi ia Sehova, neʼe tou fai pe tatou te meʼa ʼae ʼe tou loto ki ai. Kae ʼi te temi leva ʼaeni, kua tou iloʼi ʼe lelei age te ʼu pelesepeto ʼa Sehova. (Pes. 1:1-3; lau ia 1 Soane 5:3.) Fakakaukauʼi te ʼu tokoni ʼa te Tohi-Tapu ki te ʼu tagata ʼohoana, mo te ʼu fafine, pea mo te ʼu fanau mo ʼanatou matuʼā. (Efe. 5:22–6:4) Neʼe tou tokagaʼi koa te fetogi ʼo te maʼuli ʼo totatou famili ʼuhi ko tatatou maʼuliʼi te ʼu pelesepeto Fakatohi-tapu ʼaia? ʼI tatatou fakalogo ki te ʼu tokoni ʼa Sehova ʼo ʼuhiga mo te filifili ʼo hotatou ʼu kaumeʼa, kua fetogi ai koa ʼo lelei ʼatatou agamahani? ʼE tou fiafia ai koa? (Taag. 13:20; 1 Ko. 15:33) ʼE mahino papau ʼe tou ʼio fuli anai ki te ʼu fehuʼi ʼaia.

15. Kotea ʼae ʼe tonu ke tou fai ke feala ai hatatou maʼuliʼi te ʼu pelesepeto Fakatohi-tapu?

¹⁵ ʼE faigataʼa ʼi ʼihi temi hatatou iloʼi pe ʼe feafeaʼi te maʼuliʼi ʼo te ʼu pelesepeto Fakatohi-tapu ʼae ʼe tou ako. Koia la ʼae ʼe fakaʼaogaʼi ai e Sehova tana kautahi moʼo tufaki mai he ʼu tohi ʼe fakatafito ki te Tohi-Tapu, ke feala ai hatatou iloʼi te meʼa ʼae ʼe kovi mo te meʼa ʼae ʼe lelei. (Hep. 5:13, 14) Ka tou lau pea mo ako te ʼu tohi ʼaia, ʼe tou mahino ai ki tona lelei pea mo tona ʼaoga. Pea ʼe tou fakaovi ai ki te kautahi ʼa Sehova.

16. Neʼe fakatuʼutuʼu feafeaʼi e Sehova tana hahaʼi?

¹⁶ Tou ako ke tou ʼofa mo tou lagolago ki te kautahi ʼa Sehova. Neʼe fakatuʼutuʼu e Sehova tana hahaʼi ko he ʼu kokelekasio. Ko tona ʼAlo ia Sesu ʼae ʼe pule ki te ʼu kokelekasio fuli ʼaia. (Efe. 1:22; 5:23) Neʼe filifili e Sesu te kiʼi kutuga ko he ʼu tagata neʼe fakanofo ʼaki te laumalie, ke natou takitaki. Ko te kiʼi kutuga ʼaia ʼe ina fakatuʼutuʼu te gaue ʼae ʼe loto e Sesu ke fakahoko ʼi te temi nei. Neʼe fakahigoaʼi e Sesu te kiʼi kutuga ʼaia ko “te tagata faifekau agatonu mo poto,” pea ʼe natou fakahoko tonatou maʼua ʼae ko te fafaga mo puipui fakalaumalie ʼo tatou. (Mat. 24:45-47) ʼE toe tokaga te tagata faifekau ʼaia kia tatou ʼaki te fakanofo ʼo he ʼu tagata ʼafeā ʼe faiva ke natou fafaga te faga ovi. (Esa. 32:1, 2; Hep. 13:17; 1 Pet. 5:2, 3) Ko te kau tagata ʼafeā ʼaia ʼe natou gaue maʼa tatou, mo fakalotomalohiʼi ʼo tatou, pea mo tokoni mai ke tou nofo ovi tuʼumaʼu kia Sehova. Kae ko te faʼahi maʼuhiga ʼae ʼe feala ke toe fai e te tagata faifekau agatonu mo poto, ko tana tokoni mai ke tou popoto ʼi te akoʼi ʼo ʼihi ke natou toe iloʼi mo natou ia Sehova.—Efe. 4:11-13.

17. Ka tou lau ia Loma 10:10, 13, 14, he koʼe ʼe tou palalau ki ʼihi ʼo ʼuhiga mo Sehova?

¹⁷ Tou tokoni ki ʼihi ke natou ʼofa kia Sehova. Neʼe ui e Sesu ki ʼana tisipulo ke natou akoʼi te hahaʼi fuli pe ke natou iloʼi ia Sehova. (Mat. 28:19, 20) ʼE feala pe ke tou fakalogo ki te fakatotonu ʼaia he ʼe ko te maʼua. Kae kapau kua tuputupu totatou ʼofa kia Sehova, ʼe tatau anai ʼatatou manatu mo te ʼu apositolo ko Petelo mo Soane ʼi tana ui fenei: “ ʼE mole feala ke ma tuku tamā palalau ki te ʼu meʼa ʼae neʼe ma sisio mo logo ki ai.” (Gaue 4:20) ʼE tou fiafia lahi moka feala ke tou tokoni ki he tahi ke ʼofa kia Sehova. Fakakaukauʼi age muʼa te fiafia ʼae neʼe maʼu e te tagata fakamafola evaselio ko Filipo. Neʼe tokoni ki te tagata Etiopea ke ina iloʼi te moʼoni ʼae ʼi te Folafola ʼa te ʼAtua pea neʼe papitema ai. Ka tou faʼifaʼitakiʼi ia Filipo pea mo tou fakalogo ki te fakatotonu ʼa Sesu ke faifakamafola, ʼe tou fakaha ai ʼe tou fia liliu ko he Fakamoʼoni ʼa Sehova. (Lau ia Loma 10:10, 13, 14.) ʼE feala anai ke tou fai te fehuʼi ʼaeni ohage ko te tagata Etiopea: “Kotea ʼae ʼe ina taʼofi toku papitemaʼi?”—Gaue 8:36.

18. Kotea te ʼu fehuʼi ʼae ka tou vakaʼi ʼi te alatike ka hoa mai?

¹⁸ Ko te fakatuʼutuʼu ʼae ʼe maʼuhiga ʼaupito anai ʼi totatou maʼuli ko tatatou fakatotonu ʼae ke tou papitema. Koia ʼae ʼe tonu ai ke tou fakakaukauʼi fakalelei te faʼahi ʼaia. Kotea ʼae ʼe tonu ke tou iloʼi ʼo ʼuhiga mo te papitema? Kotea ʼae ʼe tonu ke tou fai ʼi muʼa mo te hili ʼo te papitema? ʼE tou palalau anai ki te ʼu fehuʼi ʼaia ʼi te alatike ka hoa mai.