ʼE Tonu Ke Feafeaʼi ʼAu Faikole?

FAIKOLE KIA SEHOVA ʼI TE HUAFA ʼO SESU

“Kapau ʼe kotou kole he meʼa ki te Tamai ʼi toku huafa, ʼe ina foaki atu anai.”​—Soane 16:23.

ʼE ha lelei mai ʼi te ʼu palalau ʼa Sesu, ʼe mole loto e Sehova ke tou faikole age kia te ia ʼaki ni fakatata, ni sagato, ni ʼaselo peʼe ko natou ʼae kua mamate. Kae ʼe ina loto ke tou faikole age kia te ia ʼi te huafa ʼo Sesu Kilisito. Ka tou faikole ki te ʼAtua ʼi te huafa ʼo Sesu, ʼe ha ai ʼe tou iloʼi te tuʼulaga maʼuhiga ʼo Sesu. Pea neʼe fakaha totonu fenei e Sesu: “ ʼE mole he tahi ʼe haʼu ki te Tamai kaʼe ʼe mole fakalaka ia te au.”—Soane 14:6.

FAKAHA TE MEʼA ʼAE ʼI TOU LOTO

“Kotou fakaha te meʼa ʼae ʼi tokotou loto kia te ia.”​—Pesalemo 62:8, MN.

Ka tou faikole kia Sehova, ʼe tonu ke tou palalau kia te ia ohage ko hatatou palalau ki he tamai ʼofa. ʼE mole tonu ke tou lau ni faikole ʼi he tohi peʼe tou lau fakaʼatamai. Kae ʼe tonu ke tou faikole kia te ia ʼaki he fakaʼapaʼapa mo fakaha te meʼa ʼae ʼi ʼotatou loto.

FAI NI KOLE ʼE ALU TAHI MO TE FINEGALO ʼO TE ʼATUA

“Ko he meʼa pe ʼe tou kole ki te ʼAtua ʼo mulimuli ki tona finegalo, ʼe fagono mai kia tatou.”​—1 Soane 5:14.

ʼE fakaha mai e Sehova ʼAtua ʼi te Tohi-Tapu, te meʼa ʼae ka ina fai maʼa tatou mo te meʼa ʼae ʼe ina loto ke tou fai maʼa ia. Kapau ʼe tou loto ke tali e te ʼAtua ʼatatou faikole pea ʼe tonu ke alu tahi mo tona finegalo. Koia la ʼae, ʼe tonu ai ke tou ako te Tohi-Tapu ke tou iloʼi lelei ai ia ia. Kapau ʼe tou fai te fahaʼi ʼaia, pea ʼe ina leleiʼia anai ʼatatou faikole.

KOTEA ʼAE ʼE FEALA KE TOU KOLE?

Tou Kole Te ʼu Meʼa ʼAe ʼe ʼAoga Kia Tatou. ʼE feala ke tou kole ki te ʼAtua te ʼu meʼa ʼae ʼe ʼaoga kia tatou ʼi te ʼaho fuli, te meʼa kai, te mutuʼi meʼa mo he nofoʼaga. ʼE feala ke tou toe kole ia te poto ke tou toʼo ni tonu ʼe lelei pea mo maʼu te malohi mo katakiʼi te ʼu ʼahiʼahi. Pea ʼe feala ke tou toe kole ke tou maʼu te tui, te fakamolemole pea mo tana tokoni.—Luka 11:3, 4, 13; Sakopo 1:5, 17.

Tou Faikole Maʼa ʼIhi. ʼE ʼoʼofa te ʼu matuʼā ʼi ʼana fanau. Pea ʼe nā fiafia moka feʼofaʼofani ʼana fanau. ʼO toe feia pe ko tatou ko te ʼu fanau ʼa Sehova. Pea ʼe ina loto ke tou tokagaʼi ʼihi pea ke tou fetokagaʼaki. ʼE lelei ke tou hufakiʼi totatou hoa, ʼatatou fanau, totatou famili pea mo ʼotatou kaumeʼa. Neʼe tohi fenei e te tisipulo ko Sakopo: “Kotou fefaikoleʼaki.”—Sakopo 5:16.

Tou Faikole Moʼo Fakaha Tatatou Lotofakafetaʼi. Ko te ʼAtua ko totatou Tupuʼaga. Pea ʼe ui fenei ʼi te Tohi-Tapu ʼo ʼuhiga mo ia: “Neʼe ina fai he ʼu meʼa ʼe lelei, ʼi tana foaki kia koutou mai te lagi te ʼua mo te ʼu temi mahu, ʼo foaki atu te meʼa kai ke kotou makokona ai pea mo fakafiafiaʼi ʼokotou loto.” (Gaue 14:17) Ka tou fakakaukauʼi te ʼu meʼa fuli ʼae neʼe fai e te ʼAtua maʼa tatou, ʼe uga ai tatou ke tou faikole kia te ia ʼo fakaha tatatou lotofakafetaʼi. Pea ʼe tonu ke tou toe fakaha tatatou lotofakafetaʼi ki te ʼAtua ʼaki hatatou fakalogo kia te ia.—Kolose 3:15.

KE KE FAʼA KATAKI MO FAIKOLE TUʼUMAʼU

ʼI ʼihi temi, ʼe tou lotovaivai he ʼe mole tali vave mai ʼatatou faikole logo la ʼe tou faikole fakamalotoloto. Ko tona fakaʼuhiga koa ʼe mole tokaga mai te ʼAtua kia tatou? Kailoa ia. ʼE lagi tonu pe ke hoko atu ʼatatou faikole. Koia ʼae ka tou vakaʼi ʼi te ʼu tala manatu ka hoa mai.

ʼE ui fenei e Steve ʼae neʼe tou talanoa ki ai ʼi te ʼuluaki alatike: “Kapau neʼe mole au haga faikole, neʼe feala pe ke mole au toe maʼu te fiafia.” Neʼe mahino feafeaʼi ia Steve ki te maʼuhiga ʼo te faikole? Neʼe ina ako leva te Tohi-Tapu ʼo ina iloʼi ai te maʼuhiga ʼo te faikole. Pea neʼe tonu ke haga kataki ai. ʼE ina ui fenei: “ ʼI ʼaku faikole, ʼe au fakamalo lahi ai ki te ʼAtua ki te tokoni ʼofa ʼae ʼe au maʼu mai ʼoku kaumeʼa. Ko taku hoki maʼu ʼae he toe fiafia lahi feia.”

ʼE ui fenei e Jenny ʼae neʼe manatu ʼe mole tuha mo ia ke fagono age te ʼAtua ki ai: “Ka au logoʼi ʼe mole hoku ʼuhiga, ʼe au faikole mamahi ki te ʼAtua ke tokoni mai ke au mahino pe koʼe ʼe au manatu feia.” Neʼe tokoni feafeaʼi ʼana faikole kia ia? ʼE ina hoko atu fenei: “Neʼe tokoni mai taku palalau ki te ʼAtua ke au maʼu tana faʼahiga manatu ʼo ʼuhiga mo au pea ke au mahino kapau ʼe tauteaʼi au e toku loto, ʼe mole manatu feia te ʼAtua ia. Pea neʼe toe tokoni mai ke ʼaua naʼa au lotovaivai.” Kotea te ako neʼe ina maʼu ai? ʼE ina ui fenei: “Neʼe tokoni mai te faikole ke au iloʼi, ʼe hage pe ia Sehova ko hoku ʼAtua, mo Tamai pea mo Kaumeʼa moʼoni mo fonu ʼi te ʼofa. Pea ʼe nofo tuʼumaʼu anai mo au mo toe tokoni mai mo kapau ʼe au haga fai tona finegalo.”

Koʼeni te aluʼaga neʼe toe tau mo Isabel. Neʼe faitama leva pea neʼe ui age e te ʼu toketa, ka tupu mai tana kiʼi tamasiʼi pea ʼe kovi anai tona maʼimoa. Neʼe lotomamahi ʼaupito. Pea neʼe ui age e ʼihi ke alu ʼo toʼo tana kiʼi tamasiʼi. ʼE ina ui fenei: “Neʼe au ui au ko taku e mate ʼi te lahi ʼo toku hoha.” Koia, kotea neʼe ina fai? ʼE ina ui fenei: “Neʼe mole au tuku taku faikole ki te ʼAtua ke tokoni mai.” Pea neʼe tupu mai tana kiʼi tamasiʼi ʼae neʼe ina fakahigoaʼi ko Gerard. Pea ʼe moʼoni, neʼe tupu maʼimoa. Neʼe manatu koa ia Isabel, neʼe tali e te ʼAtua ʼana faikole? ʼEi. ʼO feafeaʼi? ʼE ina ui fenei: “Kua taʼu 14 leva taku kiʼi tama. Ka au sio ki tana fiafia logo la tona maʼimoa, neʼe au iloʼi ai ko te maʼu ʼaia ʼo taku kiʼi tama, ko he tali ia ki ʼaku faikole. Ko he toe tapuakina lahi ia mai ia Sehova.”

ʼE fakamoʼoni e te ʼu tala manatu ʼaia, te ʼu palalau ʼaeni ʼa te tagata faipesalemo: “Oi [Sehova], logo ki te fakaamuamu a natou e mamahi! E ke fakamalohii onatou loto; ke ke tokaga tou taliga kia natou.” (Pesalemo 10:17) Ko he ʼu tupuʼaga lelei ia ke tou kataki ʼi te faikole.

ʼE lahi te ʼu faikole ʼa Sesu ʼe tou maʼu ʼi te Tohi-Tapu. Ko te faikole ʼae ʼe iloʼi e te tokolahi, ʼe ko ia ʼae neʼe ina akoʼi ki ʼana tisipulo. Kotea ʼe tou ako mai ai?