ʼE Fakavikiviki Te Hahaʼi Tokolahi Ki Te ʼAtua Pea Mo Kilisito

1. Neʼe malave feafeaʼi ki he tupulaga te akonaki neʼe fai ʼi te fakatahi fakafenua ʼo te 1935?

NEʼE taʼu 18 te tupulaga ʼi te temi ʼae neʼe papitema ai ʼi te 1926. Neʼe kau ʼana matuʼā ki te kutuga Ako ʼo Te Tohi-Tapu, te higoa ʼafeā ʼo te kau Fakamoʼoni ʼa Sehova. Neʼe nā akoʼi ki ʼanā tama ʼe tolu mo taʼahine ʼe lua te tauhi kia Sehova pea mo te faʼifaʼitaki ʼo Sesu Kilisito. Ohage ko te kau Ako ʼo Te Tohi-Tapu fuli ʼo te temi ʼaia, ʼi te taʼu fuli neʼe kai mo inu te tupulaga ʼaia ki te pane mo te vino ʼo te Taumafa ʼa Te ʼAliki. Kae neʼe fetogi leva te fakatuʼutuʼu ʼo tona maʼuli ʼi te ʼaho ʼae neʼe logo ai ki te akonaki makehe “Te hahaʼi Tokolahi,” neʼe fakahoko e Joseph Rutherford ʼi te 1935 ʼi te fakatahi fakafenua ʼi Washington, ʼi Amelika. Kotea ʼae neʼe tala ʼi te fakatahi ʼaia?

2. Kotea te moʼoni fakafiafia neʼe tala e te tehina ko Rutherford ʼi tana akonaki?

² ʼI tana akonaki, neʼe fakamahino e te tehina ko Rutherford pe ko ai te “hahaʼi tokolahi” ʼae ia Fakaha 7:9. ʼI te temi ʼaia, neʼe natou manatu ʼe ko he tahi kutuga ʼe olo ki selo, ʼe mole natou faʼa agatonu ohage ko te kau fakanofo. Neʼe fakaha ai e te tehina ko Rutherford ʼi te Tohi-Tapu ʼe mole olo anai te hahaʼi tokolahi ki selo, pea ʼe ko natou te tahi ʼu ovib ʼo Kilisito ʼae ka fakalaka maʼuli ʼi te “mamahi lahi” pea mo maʼuʼuli ʼo talu ai ʼi te kele. (Fkha. 7:14) Neʼe fakapapau e Sesu: “ ʼE ʼi ai ʼaku ʼihi atu ovi, ʼe mole natou kau ki te lotoʼa ʼaeni. Mo natou foki ʼe tonu ke au taki mai, pea ʼe natou fakalogo anai ki toku leʼo. ʼE natou liliu anai ko he faga ovi ʼe tahi, pea ʼe ʼi ai anai he tagata tauhi ovi ʼe tahi.” (Soa. 10:16) Ko te ʼu ovi ʼaia ʼe ko te kau Fakamoʼoni ʼa Sehova agatonu ʼae ʼe natou maʼu te ʼamanaki ki te maʼuli heʼe gata ʼi te Palatiso ʼi te kele. (Mat. 25:31-33, 46) Tou vakaʼi pe neʼe malave feafeaʼi te fakamahino foʼou ʼaia ki te maʼuli ʼa te tokolahi ʼo te kau Fakamoʼoni ʼa Sehova, ʼo kau ai te tehina ʼae ʼe taʼu 18.—Pes. 97:11; Taag. 4:18.

KO HE FAKAMAHINO FOʼOU ʼE INA FETOGI TE MAʼULI ʼO TE TOKO LAUʼI AFE

3-4. ʼI te fakatahi fakafenua ʼo te 1935, kotea ʼae neʼe mahino ki ai e te toko lauʼi afe kau Fakamoʼoni ʼo ʼuhiga mo tanatou ʼamanaki?

³ Lolotoga tana akonaki, neʼe ui fenei e te tehina ko Rutherford ki te nofoʼaki: “ ʼE kole atu kia koutou fuli ʼae ʼe fakaʼamu ki te maʼuli heʼe gata ʼi te kele, ke kotou tutuʼu.” Neʼe fakamatala e te tehina neʼe ʼi ai, neʼe fakalaka ʼi te vaelua ʼo te toko 20 afe ʼae neʼe tutuʼu. Neʼe tali leva e te tehina ko Rutherford: “Koʼeni te hahaʼi tokolahi!” ʼO iku ai ki he pasipasi mo he kalaga fiafia. Neʼe mahino kia natou ʼae neʼe tutuʼu neʼe mole filifili natou ki te maʼuli ʼi selo. Neʼe mole fakanofo natou e te laumalie ʼa te ʼAtua. ʼI te uhu ake, ko te toko 840 neʼe papitema. Ko te tokolahi ia natou ʼe kau ki te tahi ʼu ovi.

⁴ Hili te akonaki, ko te tupulaga ʼae neʼe tou talanoa ki ai pea mo te toko lauʼi afe neʼe natou fakagata te kai mo inu ʼo te pane mo te vino lolotoga te Taumafa ʼa Te ʼAliki. Tokolahi neʼe natou manatu tahi mo te ui ʼae ʼa te tehina agavaivai: “Hili te ʼAho Fakamanatu ʼo te 1935, neʼe mole au toe kai mo inu ki te pane mo te vino ʼi te Fakamanatu. Neʼe au mahino ai neʼe mole fakatupu e Sehova ia au te ʼamanaki ʼae ki te maʼuli ʼi selo ʼaki tona laumalie maʼoniʼoni. Ko toku ia ʼamanaki ʼe ko te maʼuli ʼi te kele pea ke au tokoni ki tona fakaliliu ko he palatiso.” (Loma 8:16, 17; 2 Ko. 1:21, 22) Talu mai ai mo te tuputupu ʼo kaugā malie ia te hahaʼi tokolahi pea mo tanatou gaue fakatahi mo te toegac ʼo te kau fakanofo.

5. Kotea te manatu ʼa Sehova ʼo ʼuhiga mo natou ʼae neʼe natou fakagata te kai mo inu ki te pane mo te vino ʼi te ʼAho Fakamanatu?

⁵ Neʼe kotea te manatu ʼa Sehova ʼo ʼuhiga mo natou ʼaia neʼe natou fakagata te kai mo inu ki te pane mo te vino hili te 1935? Ia ʼaho nei, kotea tana manatu ʼo ʼuhiga mo he tehina neʼe ina fakaʼaoga te pane mo te vino ʼi muʼa atu, pea kua mahino neʼe mole fakanofo? (1 Ko. 11:28) Ko ʼihi neʼe natou fakaʼaoga he neʼe faihala ki tonatou ʼamanaki. Kapau ʼe natou mahino ki tonatou faihala, ʼo fakagata tona fakaʼaogaʼi pea mo tauhi agatonu, ʼe mahino ia ʼe tali lelei anai natou e Sehova ko ʼana tahi ʼu ovi. Logo la ʼe mole kei natou kai mo inu te pane mo te vino, kae ʼe hoko atu tanatou kau ki te ʼAho Fakamanatu. Ko tanatou fakafetaʼi lahi ʼaia ki te ʼu meʼa neʼe fai e Sehova mo Sesu maʼa natou.

KO HE ʼAMANAKI TAULEKALEKA

6. Kotea neʼe fakatotonu e Sesu ke fai e te kau ʼaselo?

⁶ Ka heni hoko mai pe te mamahi lahi. Koia ʼe ʼaoga kia tatou ke tou toe vakaʼi te meʼa ʼae ʼe ui ʼi te kapite 7 ʼo Fakaha ʼo ʼuhiga mo te kau Kilisitiano fakanofo pea mo te hahaʼi tokolahi. ʼI te kapite ʼaia, ʼe fakatotonu e Sesu ki te kau ʼaselo ke hoko atu tanatou taʼofi te ʼu matagi ʼe fa ʼo te fakaʼauha ʼo kaku ki te kua ʼosi fakailoga ʼo te kau Kilisitiano fakanofo, ko tona fakaʼuhiga ʼo kaku ki tona fakagafua fakaʼosi mai e Sehova. (Fkha. 7:1-4) Ko te fakapale ʼo te agatonu ʼa te ʼu tehina ʼo Kilisito ʼe ko tanatou kauga hau mo pelepitelo pea mo ia ʼi selo. (Fkha. 20:6) ʼE mahino ia, ko te koga ʼo te famili ʼo te ʼAtua ʼae ʼi te lagi ʼe natou fiafia anai moka foaki anai te fakapale ki te katoa ʼo te kau 144 000 fakanofo.

7. Ia Fakaha 7:9, 10, kotea neʼe sio ki ai ia Soane, pea kotea ka fai e te kutuga ʼaia? (Vakaʼi te pāki ʼo te takafi.)

⁷ Hili tana talanoa ki te kau 144 000 hau mo pelepitelo, ʼe fakamahino e Soane neʼe sio ki he meʼa fakaofoofo, ko he “hahaʼi tokolahi” ʼe natou fakalaka maʼuli ʼi Alamaketone. ʼE natou kaugā malie age ʼi te ʼuluaki kutuga pea ʼe mole feala hona lau. (Lau ia Fakaha 7:9, 10.) ʼE natou “tui he ʼu teu hina,” he neʼe natou “fakamamaʼo mai te ʼu aga ʼuli” ʼo te malama ʼo Satana pea mo nonofo agatonu ki te ʼAtua pea mo Kilisito. (Sakp. 1:27) ʼE natou kalaga leʼo lahi neʼe haofaki natou ʼuhi ko Sehova pea mo Sesu. Pea tahi, ʼe natou toʼo ʼi ʼonatou nima te ʼu palema, ʼo fakaha tanatou tali fiafia ia Sesu, te Hau neʼe fakanofo e Sehova.—Vaka’i ia Soane 12:12, 13.

8. Kotea ʼae ʼe ui ia Fakaha 7:11, 12 ʼo ʼuhiga mo te koga ʼo te famili ʼo Sehova ʼae ʼi te lagi?

⁸ Lau ia Fakaha 7:11, 12. Kotea ʼae neʼe fai e natou ʼae ʼi selo ʼi tanatou sisio ki te hahaʼi tokolahi? Neʼe sio Soane ki tanatou fakafiafia pea mo tanatou fakavikiviki ki te ʼAtua. ʼEi, ʼe fiafia lahi anai te koga ʼo te famili ʼo Sehova ʼae ʼi te lagi moka natou sisio ki te fakalaka maʼuli ʼo te hahaʼi tokolahi ʼi te mamahi lahi.

9. ʼO mulimuli kia Fakaha 7:13-15, kotea ʼae ʼe lolotoga fai nei e te hahaʼi tokolahi?

⁹ Lau ia Fakaha 7:13-15. ʼE ui e Soane ko te hahaʼi tokolahi “neʼe natou fo ʼonatou teu pea mo fakahihina ʼi te taʼataʼa ʼo te Akeno.” Ko tona fakaʼuhiga ʼe lelei tonatou leʼo loto mo tanatou aga ia muʼa ʼo Sehova. (Esa. 1:18) Neʼe natou foaki ʼonatou maʼuli, tui malohi ki te sakilifisio ʼa Sesu pea maʼu he ʼu felogoi lelei mo Sehova. (Soa. 3:36; 1 Pet. 3:21) Koia la ʼae ʼe feala hanatou tutuʼu ʼi muʼa ʼo te hekaʼaga fakahau ʼo te ʼAtua pea mo foaki kia te ia “he tauhi taputapu ʼi te ʼaho mo te po” ʼi te kele, mo faʼafai ʼi te faifakamafola pea mo fakamuʼamuʼa te Puleʼaga ʼi tonatou maʼuli.—Mat. 6:33; 24:14; 28:19, 20.

10. Kotea ʼae ʼe tui papau ki ai te hahaʼi tokolahi? Kotea te fakapapau ʼae ʼe natou sisio anai ki tona fakahoko?

¹⁰ ʼE tui papau te hahaʼi tokolahi ʼe hoko atu anai te tokoni mo te taupau ʼo natou e te ʼAtua hili te mamahi lahi, ʼuhi “ko Ia ʼae ʼe heka ʼi te hekaʼaga fakahau ʼe ina fakamalumaluʼi anai natou ʼi tona fale la.” ʼE natou sisio anai ki te fakahoko ʼo te fakapapau ʼaeni: “ ʼE ina holoholoʼi anai [e te ʼAtua] te ʼu loʼimata fuli mai ʼonatou mata, ʼe mole toe ʼi ai anai te mate, mo te putu, mo te lauga pea mo te mamahi.”—Fkha. 21:3, 4.

11-12. (1) Ohage ko tona ui ia Fakaha 7:16, 17, kotea te ʼu tapuakina ka maʼu anai e te hahaʼi tokolahi? (2) Kotea ʼae ka ina uga te tahi ʼu ovi ke natou kau ki te ʼAho Fakamanatu?

¹¹ Lau ia Fakaha 7:16, 17. Ia ʼaho nei, ko ʼihi kaugana ʼa Sehova ʼe natou pakupaku ʼuhi ko te kovi ʼo te maʼuli fakaekonomika, te ʼu tokakovi peʼe ko te tau ʼae ʼe hoko ʼi tonatou fenua. ʼE pilisoniʼi ʼihi ʼuhi ko tanatou tui. Kae ʼe fiafia te hahaʼi tokolahi ʼi tanatou iloʼi ʼae hili te fakaʼauha ʼo te malama agakovi ʼaeni, ʼe mahu tuʼumaʼu anai te meʼa kai fakasino pea mo fakalaumalie. Pea ka tuku age anai te ʼu matagi ʼo te fakaʼauha ki te malama ʼa Satana, ʼe mole natou logoʼi anai “te momofi ʼo te vevela” ʼo te hauhau ʼo Sehova. Hili te mamahi lahi, ʼe taki anai e Sesu ia natou ʼae neʼe haofaki “ki te ʼu matapuna vai ʼo te maʼuli [heʼe gata].” Fakakaukauʼi age muʼa tonatou ʼamanaki taulekaleka: ʼO kehe ia mai te kau miliale ʼae kua mamate, ko te hahaʼi tokolahi ʼe mole natou mamate anai ʼi he temi!—Soa. 11:26.

¹² ʼE fakafetaʼi lahi te tahi ʼu ovi kia Sehova pea mo Sesu ʼuhi ko tonatou ʼamanaki taulekaleka. Neʼe mole filifili natou ki te maʼuli ʼi selo, kae ʼe mole fakaʼuhiga leva ʼe mole natou maʼuhiga kia Sehova. Koia, pe ʼe tou kau ki te kau fakafono peʼe ki te tahi ʼu ovi, ʼe lahi te ʼu tupuʼaga ke tou fakavikiviki ai ki te ʼAtua pea mo Kilisito. ʼE tou fai feia moka ʼe tou olo ki te ʼAho Fakamanatu.

FAKAVIKIVIKI KI TE ʼATUA PEA MO KILISITO ʼI TOU LOTO KATOA

13-14. He koʼe ʼe tonu ke olo te kau fakanofo pea mo te tahi ʼu ovi ki te ʼAho Fakamanatu?

¹³ Kua lauʼi taʼu nei, ʼe fakafuafua ʼe ko te toko 1 ʼi te toko afe ʼe ina kai mo inu te pane mo te vino ʼi te ʼAho Fakamanatu. Ki te lahi ʼo te ʼu kokelekasio, ʼe mole kei ʼi ai he tahi ʼe kai mo inu ki te pane mo te vino. Koia tokolahi ia natou ʼae ʼe fakatahitahi ki te ʼAho Fakamanatu ʼe natou maʼu te ʼamanaki ki te maʼuli ʼi te kele. Kae he koʼe ʼe natou olo ki ai? ʼE hage pe ko te kau ʼa he tahi ki te ʼohoana ʼo hona kaumeʼa. ʼE alu ki ai he ʼe ina fia fakaha tona ʼofa mo tana lagolago ki te taumatuʼa ʼae ʼe ʼohoana. ʼO toe feia pe, ʼe olo te tahi ʼu ovi ki te ʼAho Fakamanatu koteʼuhi ʼe natou fia fakaha tonatou ʼofa pea mo fia lagolago kia Kilisito pea mo te kau Kilisitiano fakafono. Ko te fakaha ʼaia ʼo tanatou fakafetaʼi ki te sakilifisio ʼa Sesu, ʼae ʼe ina fakafealagia te maʼuli heʼe gata ʼi te kele.

¹⁴ Ko te tahi tupuʼaga ʼo te olo ʼa te tahi ʼu ovi ki te ʼAho Fakamanatu ʼe ko tanatou fakalogo ki te fakatotonu ʼa Sesu. ʼI te temi ʼae neʼe ina fakatuʼutuʼu ai te taumafa pea mo tana kau apositolo agatonu, neʼe ina ui age: “Kotou haga fai te faʼahi ʼaeni moʼoku fakamanatu.” (1 Ko. 11:23-26) Koia ʼe hoko atu anai e te tahi ʼu ovi te Fakamanatu ʼo Te Taumafa ʼo Te ʼAliki lolotoga te temi ʼae kei maʼuli ai he fakanofo ʼi te kele. Pea mo fakaafe ia natou fuli ʼae ʼe loto ki ai ke natou kau ki te ʼAho Fakamanatu.

15. ʼE tou fakaha feafeaʼi anai tatatou lotofakafetaʼi ki te ʼAtua pea mo Kilisito ʼi te ʼAho Fakamanatu?

¹⁵ ʼI te ʼAho Fakamanatu, ʼe tou maʼu te faigamalie ʼae ke tou fakavikiviki ki te ʼAtua pea mo Kilisito ʼaki te hiva pea mo te faikole. Koʼeni te kupu tafito ʼo te akonaki ʼo te taʼu ʼaeni: “Tou Lotofakafetaʼi Ki Te Meʼa ʼAe Neʼe Fai e Sesu Maʼa Tatou.” ʼE ina fakamalohi anai tatatou lotofakafetaʼi kia Sehova pea mo Sesu. ʼI te temi ʼae ka feʼaveʼaki ai te pane mo te vino, ʼe tou fakakaukauʼi anai te meʼa ʼae ʼe fakata ki ai: te sino pea mo te taʼataʼa ʼo Sesu. ʼE toe feala ke tou manatuʼi te ʼofa ʼo Sehova kia tatou ʼi tana tali ʼae ke mate tona ʼAlo ke tou maʼuli ai. (Mat. 20:28) Ko natou fuli ʼae ʼe ʼoʼofa ia Sehova pea mo tona ʼAlo ʼe natou loto moʼoni anai ke olo ki te ʼAho Fakamanatu.

FAKAFETAʼI KIA SEHOVA KI TE ʼAMANAKI NEʼE INA FOAKI MAI

16. Kotea ʼae ʼe tatau ai te kau fakanofo pea mo te tahi ʼu ovi?

¹⁶ Ko te kau fakanofo pea mo te tahi ʼu ovi, ʼe natou maʼuhiga tatau ki te ʼAtua. ʼE ʼofa tatau ia Sehova kia natou. ʼE tou iloʼi he neʼe ina foaki totogi ʼe tahi, te maʼuli ʼo tona ʼAlo ʼofaina, moʼo haofaki te ʼu kutuga ʼaia ʼe lua. ʼE moʼoni ʼe mole tatau te ʼamanaki ʼa te kau fakanofo pea mo ʼae ʼa te tahi ʼu ovi. Kae ʼe tonu ke natou agatonu fuli ki te ʼAtua pea mo Kilisito. (Pes. 31:24) Tou manatuʼi ʼe toe tatau mo te gaue ʼo te laumalie ʼo te ʼAtua kia natou. ʼE foaki e Sehova tona laumalie maʼoniʼoni ʼo mulimuli ki te meʼa ʼae ʼe ʼaoga kia natou takitokotahi.

17. Kotea ʼae kua fakaʼamu ki ai te kau fakanofo?

¹⁷ ʼE mole tutupu ake te kau Kilisitiano fakanofo mo te ʼamanaki ki te maʼuli ʼi selo. ʼE ko te ʼAtua ʼae ʼe ina fakatupu te ʼamanaki ʼaia ʼi tonatou loto. ʼE natou manatu tuʼumaʼu ki ai, mo fakaha kia Sehova ʼi te faikole pea ʼe natou fakaʼamu ke hoko mai la. ʼE mahino ia, ʼe faigataʼa tanatou iloʼi pe ʼe feafeaʼi anai tonatou sino fakalaumalie. (Flp. 3:20, 21; 1 Soa. 3:2) Kae kua natou fia fakafelaveʼi mo Sehova, Sesu, te kau ʼaselo pea mo te kau Kilisitiano fakanofo, pea mo toʼo te tuʼulaga ʼae neʼe teuteuʼi maʼa natou ʼi te Puleʼaga ʼi selo.

18. Kotea ʼae kua fakaʼamu ki ai te tahi ʼu ovi?

¹⁸ Ko te tahi ʼu ovi ʼe natou fia maʼuʼuli ʼo heʼe gata ʼi te kele; ʼe ko he fakaʼamu neʼe tuku e te ʼAtua ki te loto ʼo te tagata. (Ekl. 3:11) Kua natou loto la ke natou kau ki te fakaliliu ʼo te kele ko he palatiso. Kua natou fia laga honatou ʼapi, gaueʼi honatou oloto pea mo maʼu honatou ʼu fanau haohaoa. (Esa. 65:21-23) ʼE natou fia foli te kele, te ʼu moʼuga, te ʼu vao matuʼa pea mo te ʼu tai, ke natou akoʼi ai te ʼu meʼa fuli neʼe fakatupu e Sehova. Kae tafito, ko te meʼa ʼae ʼe natou fiafia lahi ai ʼe ko tanatou fakaovi lahi age kia Sehova.

19. Kotea te faigamalie ʼe foaki mai e te ʼAho Fakamanatu kia tatou takitokotahi, pea ʼe hoko anai ʼafea ʼi te taʼu ʼaeni?

¹⁹ ʼE foaki e Sehova he ʼamanaki taulekaleka ki tana ʼu kaugana fuli. (Sel. 29:11) ʼI te ʼAho Fakamanatu ʼo te mate ʼo Kilisito ko he faigamalie ke tou fakavikiviki ki te ʼAtua pea mo Kilisito, ki te meʼa neʼe nā fai ke tou maʼu ai te maʼuli heʼe gata. Ko te toʼotoʼoga ʼaia ʼe maʼuhiga ʼaupito ki te kau Kilisitiano moʼoni ʼo natou fakatahitahi ai ʼi te taʼu fuli. ʼI te 2021, ʼe fakahoko anai ʼi te Moeaki ʼaho 27 ʼo Malesio hili te to ʼo te laʼa. Ki te tokolahi ʼe faigafua anai te olo ki ai. Ko ʼihi ʼe natou kau anai ki ai logo la te fakafeagai. Ko ʼihi leva ʼe natou fakamanatu anai ʼi te fale pilisoni. Peʼe tou tokotahi, peʼe mo he kutuga, peʼe mo te kokelekasio, ʼaua naʼa galo kia tatou ʼe sisio fiafia mai Sehova, Sesu, te kau ʼaselo pea mo te kau fakanofo. Koia, tou fakafiafia ʼi te ʼAho Fakamanatu!