ʼE Feala Ke Tou Fakagata Te Fehiʼa

Kapau neʼe heʼeki hoko te aluʼaga ʼaia kia koe, kae lagi neʼe kua ke tokagaʼi pe te faʼahi ʼaia. ʼE tou tokagaʼi ʼi te ʼu logo, ʼe palalau pe ki te fakapalatahi, mo te fehiʼa kia natou ʼe maʼuʼuli tagata mo te tagata pea fafine mo te fafine pea mo te fehiʼa ki te hahaʼi matapule, mo te ʼu palalau ʼe ha ai te fehiʼa ki he lanu, ki he tahi peʼe ki he puleʼaga. Koia, ʼe lahi te ʼu puleʼaga ʼe natou fakatuʼu ni lao moʼo tauʼi te ʼu faʼahiga aga kehekehe ʼaia ʼe ha ai te fehiʼa.

ʼE faigafua ia te mafola ʼo te fehiʼa. ʼI te agamahani, ʼe lagavaka ia natou ʼae ʼe fehiʼaʼinaʼi pea mo natou taupau ia te fehiʼa ʼaia.

Neʼe lagi kua palalau kovi he tahi kia koe, peʼe ina faʼu hou hisitolia, peʼe ina vaʼi koe, mo leakoviʼi koe pea mo fakamatakuʼi koe. Kae ko te fehiʼa ʼe feala ke hoko ai he ʼu aluʼaga fakamataku. ʼI te agamahani, ʼe ha ʼi te gaohi koviʼi ʼo he tahi e he tahi peʼe ko he kiʼi kutuga, ʼi te ʼu maumau, ʼi te ʼu fakahoko agatuʼu, ʼi te ʼu fakaʼalikiʼi, ʼi te ʼu fakapo peʼe ko te ʼu mateā.

ʼE talanoa anai te nusipepa ʼaeni ki te ʼu fehuʼi ʼaeni pea mo ina fakaha mai pe ʼe tou lava fakagata feafeaʼi ia te fehiʼa:

• He koʼe ʼe malohi feia te fehiʼa?

• ʼE tou lava fakagata feafeaʼi te fehiʼa?

• ʼE feala koa ke pulihi ia te fehiʼa ʼo talu ai?