1 | Te Faikole—“Kotou Tuku Kia Te Ia ʼAkotou Tuʼania Fuli”

ʼE UI ʼI TE TOHI-TAPU: “Kotou tuku [ki te ʼAtua] ʼakotou tuʼania fuli, he ʼe tokaga ia kia koutou.”—1 PETELO 5:7.

Fakamahino

ʼE loto e Sehova ke tou fakaha age kia te ia ia kavega fuli ʼe hoha ki ai totatou fakakaukau pea mo loto. (Pesalemo 55:22) ʼE mole he meʼa ʼe faigataʼa kia Sehova. Ko te meʼa ʼae ʼe maʼuhiga kia tatou, pea ʼe toe maʼuhiga kia Sehova he ʼe tokaga kia tatou ʼo feia pe mo te ʼu meʼa ʼae ʼe tou logoʼi. Koia, kapau ʼe tou fia maʼu te tokalelei ʼo te loto, ʼe maʼuhiga ke tou faikole kia Sehova.—Filipe 4:6, 7.

Kotea ʼe Feala Ke Tou Fai?

Kapau ʼe tou tau mo te mahaki ʼulu pea ʼe lagi tou logoʼi hatatou nofo tokotahi. ʼE mole mahino tuʼumaʼu ʼihi ki te aluʼaga ʼae ʼe tou tau mo ia. (Taʼaga Lea 14:10) Kae ka tou fakaha fuli kia Sehova ʼi te faikole te ʼu meʼa ʼae ʼe tou logoʼi, pea ʼe tou fiafia he ʼe tou maʼu hotatou kaumeʼa ʼe manavaʼofa mo lotomahino. ʼE sio mai ia Sehova, ʼe ina iloʼi totatou mamahi pea mo te ʼu faʼahi ʼae ʼe tou tauʼi. Pea ʼe ina fakaafe tatou ke tou faikole age kia te ia ʼo ʼuhiga mo faʼahi fuli ʼe tou tuʼania ki ai.—2 Koloniko 6:29, 30.

Ka tou palalau kia Sehova ʼi te faikole, pea ʼe tou falala ʼe tokaga moʼoni kia tatou. Koia, ʼe tou hage anai ko te tagata faipesalemo, ʼae neʼe ina ui fenei: “Neʼe ke sio ki te lahi ʼo toku mamahi. ʼE ke iloʼi ʼoku tuʼania.” (Pesalemo 31:7) Koia, ko tatatou iloʼi ʼae ʼe tokagaʼi e Sehova te aluʼaga ʼe tou tau mo ia, ʼe fakalotofimalie kia tatou pea ʼe toe tokoni ke tou faʼa kataki ʼi te ʼu lakaga ʼe tou mamahi ai. Kae ʼe mole gata pe ki te tokagaʼi e Sehova totatou mamahi. ʼE mahino lelei age ia ki te aluʼaga ʼe tou tau mo ia pea ʼe ina foaki mai he fakalotofimalie mo he ʼu fakalotomalohi ʼi te Tohi-Tapu.

Te Tokoni Mai Te Tohi-Tapu Julian

Te ʼu Koga ʼe Hoko Moka Au Hoha

“ ʼE au kau ʼi te mahaki ʼae ko te lotohoha pea mo te mahaki ʼaeni un trouble obsessionnel compulsif (TOC). ʼE feala ke hoko kia au ʼi he temi pe. ʼI te tahi temi, ʼe au lelei pe au pea hili ia, kua lahi leva te ʼu meʼa ʼe au hoha ki ai kae mole au iloʼi pe la hona tupuʼaga. ʼE hoko tafito te faʼahi ʼaia moka ʼe hahaʼi he ʼe au tokaga tafito au ki te manatu ʼa ʼihi ʼo ʼuhiga mo au.

“ ʼE tokoni lahi mai ʼosi ia natou ʼae ʼe natou iloʼi siʼoku mahaki. ʼI ʼihi temi ʼe mole natou ui tuʼumaʼu mai te meʼa ʼae ʼe au fia logo ki ai. Kae ʼe malave ʼosi kia au tanatou fia tokoni mai mo tokaga lelei kia au.

“ ʼI ʼihi temi, ʼe faigataʼa kia au taku faikole ʼuhi ko taku lotohoha mo toku mahaki ʼaeni ko te TOC. ʼE tonu ke au faiga malohi ʼo tokaga tafito ki taku faikole kia Sehova he ʼe lahi te ʼu meʼa ʼe haʼu leva ki taku fakakaukau, ʼo au pulinoa ai. Ka mole au lolomi ʼaku manatu pea ʼe faigataʼa ʼosi taku fakamahino kia Sehova te ʼu meʼa ʼe au manatu ki ai pea mo logoʼi.”

ʼE Tokoni Mai Te Tohi-Tapu

“Neʼe au mahino ʼi taku ako te Tohi-Tapu ʼe mole ʼaoga ke loaloaga peʼe ke matalelei feafeaʼi takita faikole ke leleiʼia e Sehova. ʼI ʼihi temi, ka mole au lava fakaha te ʼu meʼa ʼe au logoʼi, ʼe au ui fenei pe au: “Sehova e, fakalelei siʼou loto, tokoni mai.” Ka au faikole feia, ʼe au logoʼi ʼe lotomahino mai ia Sehova pea ʼe tali mai ʼi te lakaga pe ʼaia. Neʼe mole gata pe ki taku faikole. Neʼe au toe kumi hoku faitoʼo. Pea ʼe au fiafia ʼosi he ʼe ʼaki te ʼu faʼahi ʼaia ʼe lua neʼe au fai, neʼe lelei leva siʼoku mahaki. Neʼe au tokagaʼi ia te maʼuhiga ʼae ke au faiga malohi ʼo faikole ki taku Tamai ʼae ʼe ʼi selo he ʼe au logoʼi moʼoni ia tana tokaga ʼofa.”