Fai He Fakamanatu ʼo Te ʼu Faʼahi Maʼuhiga Neʼe Ke Ako

ʼE faigataʼa koa kia koe ʼi ʼihi temi hau manatuʼi te ʼu faʼahi ʼae neʼe hoki ke ako age pe? Neʼe kua hoko kia tatou fuli te faʼahi ʼaia. Kotea ʼae ʼe feala ke tokoni atu? Fai he fakamanatu ʼo te ʼu faʼahi maʼuhiga neʼe ke ako.

Ka ke fai tau ako tokotahi, toʼo he temi ke ke fakakaukauʼi ai te ʼu faʼahi maʼuhiga ʼae neʼe ke ako. Neʼe fakalotomalohiʼi e te apositolo ko Paulo ʼona tehina mo tuagaʼane ke natou fai te faʼahi ʼaia moka natou vakavakaʼi tana tohi. Neʼe ina ui fenei: “Koʼeni te manatu tafito.” (Hep. 8:⁠1) Neʼe tokoni ai kia natou ke natou mahino ki te fakaʼuhiga ʼo ʼana palalau pea mo te manatu tafito ʼae neʼe palalau ki ai.

ʼE feala ke ke toʼo hou kiʼi temi ʼi te ʼosi ʼo tau ako tokotahi lagi minuta hogofulu, ke ke fakakaukauʼi ai te ʼu manatu tafito ʼae neʼe ke ako. Kapau ʼe mole kei ke manatuʼi, vakaʼi te ʼu kupu taki peʼe ko te kamataʼaga ʼo te ʼu palakalafe takitahi. ʼE feala ai anai hau toe manatuʼi te ʼu meʼa ʼae neʼe ke ako. Kapau neʼe ke mahino ki he manatu, faiga ʼo fakamahino ʼaki ʼau palalau totonu. Ka ke fai he fakamanatu ʼo te ʼu faʼahi maʼuhiga neʼe ke ako, ʼe tokoni atu anai ke mole ke galoʼi. ʼE toe tokoni atu anai ke ke mahino lelei age pe ʼe feafeaʼi tona maʼuliʼi.