ʼAua Naʼa Ke Fakatuatuai Ke Ke Papitema

1. He koʼe ʼe lelei ke ke papitema?

ʼE KE ʼofa koa ia Sehova ʼae ʼe ina foaki atu ia meʼa ʼofa lelei fuli pe, ohage ko te maʼuli? ʼE ke fia fakaha koa kia te ia ʼe ke ʼofa ai? Kapau koia ʼaia, pea ʼe lelei ke ke foaki tou maʼuli kia te ia pea mo papitema, pea ʼe ke kau anai ki tona famili. Koia, ʼe takitaki mo tokaga lelei anai kia koe ia tau Tamai ʼaia pea mo Kaumeʼa. (Pes. 73:24; Esa. 43:​1, 2) Kapau neʼe ke fakapapau ke ke tauhi kia te ia ʼo talu ai pea mo papitema, ʼe ke toe maʼu anai te fealagia ʼae ke ke maʼuli ʼo heʼe gata.​—1 Pet. 3:​21.

2. Kotea ka tou vakaʼi ʼi te alatike ʼaeni?

² ʼE ʼi ai koa he aluʼaga ʼe tupu ai ia tau mole papitema? Kapau koia, ʼe mole ko koe pe ʼe hoko ki ai te faʼahi ʼaia. Neʼe kua ʼi ai he toko miliona hahaʼi ʼi muʼa atu ia koe, neʼe natou fai he ʼu fetogi ʼi tanatou aga mo tanatou faʼahiga manatu ke feala ai hanatou papitema. Ia ʼaho nei, ʼe natou tauhi kia Sehova ʼaki he fiafia pea mo he faʼafai. Kotea ʼe feala ke ke ako mai ia natou ʼae neʼe papitema ʼi te ʼuluaki sekulo? Tou vakaʼi he ʼu fihifihia neʼe natou tau mo ia, pea mo te ako ʼe feala ke tou maʼu mai tanatou faʼifaʼitaki.

NEʼE PAPITEMA TE KAU SAMALITANA

3. Kotea te ʼu faigataʼaʼia neʼe tonu ke tauʼi e te kau Samalitana ʼi muʼa ʼo tanatou papitema?

³ ʼI te temi ʼo Sesu, ko te kupu kau Samalitana neʼe fakaʼuhiga ki he hahaʼi ʼe kau ki he magaʼi lotu. Neʼe natou maʼuʼuli ʼi te ʼu tafaʼaki ʼo te kolo ko Sekemi, pea mo Samalia ʼi te potu noleto ʼo Sutea. ʼI muʼa ʼo te papitema ʼa te kau Samalitana, neʼe tonu ke natou maʼu ia he ʼatamai malama katoa ʼo ʼuhiga mo te Folafola ʼa te ʼAtua. Koia, neʼe tui pe te kau Samalitana ia, neʼe haʼu mai te ʼAtua te ʼu ʼuluaki tohi ʼe nima ʼo te Tohi-Tapu, mai ia Senesi kia Tetelonome, pea lagi feia pe mo te tohi ʼo Sosue. ʼE moʼoni, neʼe natou fakatalitali ki te ha mai ʼa te Mesia, ʼae ʼe talanoa ki ai ia Tetelonome 18:​18, 19. (Soa. 4:​25) Kae, ke feala hanatou papitema, neʼe tonu leva ke natou tui ko te Mesia ʼae neʼe fakapapauʼi mai neʼe ko Sesu. Pea tou tokagaʼi “tokolahi te kau Samalitana” neʼe natou tui kia te ia. (Soa. 4:​39) Pea neʼe tonu leva ke natou tauʼi ia te ʼu manatu fakapalatahi ʼae neʼe tauaka ia natou ʼo ʼuhiga mo te kau Sutea.​—Luka 9:​52-​54.

4. Ka tou lau ia Gaue 8:​5, 6, 14, neʼe tali feafeaʼi e ʼihi Samalitana ia te faifakamafola ʼa Filipo?

⁴ Kotea te tokoni neʼe maʼu e te kau Samalitana? ʼI te faifakamafola ʼa Filipo “kia natou ʼo ʼuhiga mo Kilisito,” ko ʼihi kau Samalitana neʼe natou ‘tali ia te folafola ʼa te ʼAtua.’ (Lau ia Gaue 8:​5, 6, 14.) Ko Filipo neʼe ko te Sutea. Kae, neʼe natou fakalogo ki ai. Neʼe lagi natou toe manatuʼi he ʼu vaega ʼi te ʼu ʼuluaki tohi ʼe nima ʼo te Tohi-Tapu ʼe ha ai ko te ʼAtua ʼe mole fakapalatahi. (Tet. 10:​17-​19) Tatau aipe pe kotea tona tupuʼaga, kae neʼe natou tokagaʼi ‘fakalelei te ʼu meʼa ʼae neʼe ui e Filipo ʼo ʼuhiga mo Kilisito,’ pea neʼe natou fakamoʼoni neʼe maʼu e Filipo te laumalie maʼoniʼoni ʼo te ʼAtua. Neʼe toe lahi te ʼu milakulo neʼe fai e Filipo. Neʼe ina fakamalolo he ʼu mahaki pea mo kapu he kau temonio.​—Gaue 8:7.

5. Kotea te ʼu ako ʼe ke taʼofi mai te faʼifaʼitaki ʼa te kau Samalitana?

⁵ Neʼe feala pe ke tuku e te kau Samalitana ʼaia ʼanatou manatu fakapalatahi, peʼe ko tanatou mole maʼu he ʼatamai malama ʼo ʼuhiga mo te Tohi-Tapu ke mole natou tuputupu ai. Kae neʼe mole ko te aluʼaga ʼaia neʼe hoko. ʼI tanatou tui papau ʼae neʼe akoʼi age e Filipo ia te moʼoni, neʼe mole toe fakatuatuai te kau Samalitana ke natou papitema. ʼE ui fenei ʼi te Tohi-Tapu: “ ʼI te temi ʼae neʼe natou tui ai kia Filipo, ʼae neʼe ina tala te logo lelei ʼo ʼuhiga mo te Puleʼaga ʼo te ʼAtua pea mo te huafa ʼo Sesu Kilisito, neʼe natou papitema ai, tagata mo fafine.” (Gaue 8:​12) ʼE ke tui papau koa ʼe maʼu ʼi te Folafola ʼa te ʼAtua ia te moʼoni? Pea ʼe ke toe tui papau koa ʼe tauʼi e te kau Fakamoʼoni ʼa Sehova ia manatu fakapalatahi fuli pe? Pea ʼe natou faiga ke natou fefakahaʼaki ia te ʼofa moʼoni, ia te fakailoga ʼaia ʼo te kau Kilisitiano moʼoni? (Soa. 13:35) Koia, ʼaua naʼa ke mataku ʼi te papitema. Ke ke falala ʼe tapuakinaʼi anai koe e Sehova.

6. Kotea ʼe ke ako mai te faʼifaʼitaki ʼo Ruben?

⁶ Neʼe maʼuli ia Ruben ʼi Siamani. Pea neʼe lahilahi ake ʼi he famili ʼe tauhi kia Sehova. ʼI tana kei tupulaga, neʼe lotolotolua ʼo ʼuhiga mo te manatu ʼae ʼe maʼuli moʼoni te ʼAtua. Neʼe ina tauʼi feafeaʼi ʼana manatu fakalotolotolua ʼaia? Neʼe ina iloʼi neʼe mole mahino feʼauga ki te manatu ʼaia. Koia, neʼe ina fakatuʼutuʼu ai ke ina fai hana ʼu fekumi. Neʼe ina ui fenei: “ ʼI taku fai taku ako tokotahi, neʼe au faiga ke au iloʼi te meʼa ʼae ʼe moʼoni mo te meʼa ʼae ʼe hala. Neʼe au fai he ʼu fekumi ʼo ʼuhiga mo te evolisio. Pea neʼe tonu ke au fakaloloto tuʼumaʼu pe ia taku fia mahino ki te manatu ʼaia.” Neʼe toe lau e Ruben ia te tohi Y a-t-il un Créateur qui se soucie de vous ? Neʼe tokoni lahi kia ia te ʼu manatu ʼae neʼe maʼu ʼi loto. Neʼe ina ui fenei: “ ʼE ʼa koa ia! Ta ʼe maʼuli moʼoni ʼosi pe ia Sehova ia.” Pea tahi, ʼi tana alu ʼae ʼo mamata ʼotatou pilo lalahi, neʼe toe malohi age ai tona ʼofa ki totatou famili fakamalamanei logo tahi. Neʼe ko he aluʼaga fakaofoofo ia. ʼI tana toe liliu ki Siamani, neʼe papitema leva, neʼe ko tona taʼu 17 ʼaia. Kapau ʼe ke maʼu he ʼu manatu fakalotolotolua ʼo ʼuhiga mo he fehuʼi peʼe ko he manatu, fai he ʼu fekumi ʼi ʼatatou tohi. ʼE tokoni lahi atu anai te “ ʼatamai malama totonu,” ke ke liʼaki ʼau manatu fakalotolotolua ʼaia. (Efe. 4:​13, 14) Pea kapau ʼe ke logo ki te feʼofaʼofani mo te logo tahi ʼa te ʼu kaugana ʼa Sehova ʼi te malamanei katoa, pea mo ke sio ʼe toe maʼu te faʼahi ʼaia ʼi tau kokelekasio, ʼe malohi age anai tou ʼofa ki totatou famili fakamalamanei.

NEʼE PAPITEMA IA SAULO MAI TALESI

7. Kotea te ʼu fetogi neʼe tonu leva ke fai e Saulo ʼo ʼuhiga mo tana faʼahiga manatu?

⁷ Tou talanoa leva kia Saulo mai Talesi. Neʼe ina fai he ʼu toe faiga lahi ʼi te lotu Sutea. Pea neʼe fakaofoofo ʼosi te ʼatamai malama ʼae neʼe ina maʼu ʼo ʼuhiga mo te lao Fakasutea. (Kal. 1:​13, 14; Flp. 3:5) ʼI tona temi, tokolahi te kau Sutea neʼe natou fakaʼuhiga ia te kau Kilisitiano ko he kau aposita. Kae neʼe kovi ʼosi ia tonatou fakatagaʼi ʼae e Saulo. Neʼe nofo mo he manatu hala ʼo ina ui neʼe ko te finegalo ʼaia ʼo te ʼAtua. (Gaue 8:3; 9:​1, 2; 26:​9-​11) Koia, kapau neʼe fia liliu ia Saulo ko he tisipulo ʼa Sesu pea mo papitema, neʼe tonu leva ke ina tali ke fakatagaʼi ia ia.

8. (1) Kotea te tokoni neʼe maʼu e Saulo? (2) Ka tou lau ia Gaue 22:​12-​16, neʼe tokoni feafeaʼi ia Ananiasi kia Saulo? (Vakaʼi mo te pāki.)

⁸ Kotea te tokoni neʼe maʼu e Saulo? ʼI te palalau ʼa te ʼAliki ko Sesu kia Saulo mai te lagi, neʼe liliu ai ʼo kivi ʼuhi ko te malama ʼo tona kololia. (Gaue 9:​3-9) ʼI te ʼu ʼaho ʼe tolu ʼae neʼe hoa mai ki ai, neʼe sesunio ia Saulo. Pea ʼe mahino ia, neʼe ina fakakaukauʼi ia te aluʼaga ʼae neʼe hoko kia ia. Neʼe tui papau ai ko Sesu, neʼe ko te Mesia pea neʼe maʼuliʼi e ʼana tisipulo ia te lotu moʼoni. ʼE mahino ia, neʼe fakahemala ʼi tana manatuʼi ʼae neʼe kau ki te matehi ʼae ʼo Setefano. (Gaue 22:20) Kae hili te ʼu ʼaho ʼaia ʼe tolu, neʼe alu te tisipulo ko Ananiasi ki ai, ʼo ina fakamalolo ʼo toe sio ai. Pea neʼe ina fakalotomalohiʼi ke ʼaua naʼa fakatuatuai ke papitema. (Lau ia Gaue 22:​12-​16.) ʼAki he agavaivai, neʼe tali leva e Saulo tana tokoni. Pea neʼe mulimuli leva ki te faʼahiga maʼuli ʼo he tisipulo ʼa Kilisito.​—Gaue 9:​17, 18.

9. Kotea te ʼu ako ʼe feala ke tou taʼofi mai te faʼifaʼitaki ʼo Saulo?

⁹ ʼE feala ke tou taʼofi he ʼu ako mai te faʼifaʼitaki ʼo Saulo. Neʼe feala pe ke lotolahi peʼe ke mataku ki te tagata ke mole papitema ai. Kae neʼe mole ko te aluʼaga ʼaia neʼe hoko. ʼAki he agavaivai, neʼe ina tali te moʼoni ʼo ʼuhiga mo Kilisito, pea neʼe ina fetogi tana aga mo tana faʼahiga manatu. (Gaue 26:​14, 19) Neʼe liliu leva ia Saulo ko te tisipulo ʼa Kilisito. Kae neʼe ina iloʼi ʼe fakatagaʼi anai. (Gaue 9:​15, 16; 20:​22, 23) Pea hili tana papitema, neʼe hoko atu pe tana falala ki te malohi ʼo Sehova ke ina lava katakiʼi ia ʼahiʼahi kehekehe. (2 Ko. 4:​7-​10) Kapau ʼe ke papitema ke ke liliu ko he Fakamoʼoni ʼa Sehova, ʼe mahino ia ʼe ʼahiʼahiʼi anai tau tui. Kae ke ke tui papau, ʼe tokoni tuʼumaʼu atu anai ia te ʼAtua pea mo Kilisito kia koe.​—Flp. 4:​13.

10. Kotea ʼe ke ako mai te faʼifaʼitaki ʼo Anna?

¹⁰ Neʼe lahilahi ake ia Anna ʼi he famili Kurde ʼi he fenua ʼo te potu Esite ʼo Eulopa. Hili te papitema ʼo tana faʼe, neʼe ina kole ki tana tamai pe ʼe feala hana ako te Tohi-Tapu. Neʼe ko tona taʼu 9 ʼaia. Pea neʼe tali e tana tamai. Kae neʼe neʼe natou maʼuʼuli fakatahi mo tonatou ʼu famili pea neʼe natou fakafeagai kia Anna. Neʼe natou manatu neʼe ina fakalainoaʼi te famili, he neʼe ina liʼaki te lotu ʼo tana ʼu kui. ʼI tona taʼu 12, neʼe ina kole ki tana tamai pe ʼe feala ke papitema. Neʼe ina fia iloʼi pe neʼe ko ia totonu ʼae neʼe ina fai te tonu ʼaia, pe neʼe uga ia ia e he tahi. Neʼe tali fenei age e Anna: “ ʼE au ʼofa ia Sehova.” Koia, neʼe tali ai e tana tamai ke papitema. Kae hili te papitema ʼa Anna, neʼe vaʼi pea mo gaohi koviʼi ia ia. Neʼe ui fenei age e he tahi ʼo tona famili: “Neʼe lelei age pe hau filifili he faʼahiga maʼuli ʼe kovi pea mo suluka, ʼi hau liliu ko he Fakamoʼoni ʼa Sehova.” Neʼe lava katakiʼi feafeaʼi e Anna te ʼu ʼahiʼahi ʼaia? ʼE ina ui fenei: “Neʼe foaki mai e Sehova te malohi, pea neʼe tokoni lahi mai siʼaku faʼe pea mo siʼaku tamai.” Neʼe tohi e Anna ia te ʼu aluʼaga fuli ʼae neʼe sio ai neʼe tokoni age ia Sehova ʼi tona maʼuli, pea neʼe ina taupau lelei. Pea ʼe ina tau vakaʼi ke ʼaua naʼa galo kia ia te meʼa ʼae neʼe fai e Sehova maʼa ia. Kapau ʼe ke mataku ʼi te tau mo te fakafeagai, ʼaua naʼa galo kia koe, ʼe toe tokoni atu anai ia Sehova.​—Hep. 13:6.

NEʼE PAPITEMA IA KOLONELIO

11. He koʼe neʼe feala pe ke lotolotolua ia Kolonelio ke papitema?

¹¹ ʼE toe palalau ʼi te Tohi-Tapu ki te faʼifaʼitaki ʼo Kolonelio. Neʼe ko “he pule solia” Loma, pea neʼe pule ki he kau solia ʼe teitei toko 100. (Gaue 10:​1, nota) Koia, neʼe ko he tahi neʼe maʼu tuʼulaga ʼi te fenua pea mo te solia. Pea neʼe “lahi te ʼu meʼa ʼofa neʼe ina fai ki te kau masiva.” (Gaue 10:2) Neʼe fekauʼi e Sehova ia te apositolo ko Petelo ke ina tala age ia te logo lelei. Neʼe maʼuhiga age koa kia Kolonelio ia tona tuʼulaga ke mole papitema ai?

12. Kotea te tokoni neʼe maʼu e Kolonelio?

¹² Kotea te tokoni neʼe maʼu e Kolonelio? ʼE ui ʼi te Tohi-Tapu, “neʼe manavasiʼi ki te ʼAtua fakatahi mo tona loto fale katoa.” Pea tahi, neʼe faikole mamahi tuʼumaʼu ki te ʼAtua. (Gaue 10:2) ʼI te fakaha age e Petelo ia te logo lelei , neʼe mole toe fakatuatuai ia ia mo tona kiʼi famili ki tanatou tali ia Kilisito pea mo papitema. (Gaue 10:​47, 48) ʼE mahino ia, neʼe lotolelei ia Kolonelio ke ina fai mo tona kiʼi famili ia fetogi fuli ke feala ai hanatou tauhi kia Sehova.​—Sos. 24:15; Gaue 10:​24, 33.

13. Kotea te ʼu ako ʼe feala ke ke taʼofi mai te faʼifaʼitaki ʼo Kolonelio?

¹³ Ohage ko Saulo, neʼe feala pe kia Kolonelio ke maʼuhiga age tona tuʼulaga ke mole liliu ai ko he tisipulo ʼa Kilisito. Kae neʼe mole ko te aluʼaga ʼaia neʼe hoko. ʼE tonu koa ke ke fai he ʼu toe fetogi ʼi tou maʼuli ke ke tali ia te moʼoni? Kapau ko ia, ʼe tokoni lahi atu anai ia Sehova. ʼE ina tapuakiʼi anai ʼau faiga, ke ke tauhi kia te ia pea ke ke maʼuliʼi te ʼu pelesepeto.

14. Kotea te ako ʼe ke taʼofi mai te faʼifaʼitaki ʼo Tsuyoshi?

¹⁴ ʼE maʼuli ia Tsuyoshi ʼi Saponia. Neʼe ina tuku te fai ʼo ʼihi gaue neʼe fakamaʼua age ʼi tana gaue fakamalama ke feala hana papitema. Neʼe ko ia ʼae neʼe hoa ki te pule lahi ʼo te fale ako ʼae ʼe tokaga ki te ʼu matalaʼi ʼakau ʼi Ikenobo. Ka mole feala ki te pule ke kau ki he ʼavaifo, neʼe ko Tsuyoshi ʼae neʼe ina fakafofoga ia ia moka fai he ʼu toʼotoʼoga ʼo te lotu bouddhiste. Kae, neʼe ina iloʼi leva te moʼoni ʼo ʼuhiga mo te mate. Koia, neʼe mahino leva ki ai kapau ʼe hoko atu pe tana kau ki te ʼu toʼotoʼoga ʼaia, ʼe mole feala anai ke papitema. Neʼe ina toʼo leva te tonu ke mole kei kau ki ai. (2 Ko. 6:​15, 16) Pea neʼe fakaha e Tsuyoshi ki te pule lahi tana ʼu fakatuʼutuʼu. Kotea ʼona fua? Neʼe ina tali ke mole toe kau ki te ʼu toʼotoʼoga ʼaia ʼo te lotu bouddhiste, kae neʼe mavae mai tona gaue. Hili ki ai te taʼu katoa ki tana ako te Tohi-Tapu, neʼe papitema leva.a Kapau ʼe tonu ke ke fai he ʼu fetogi ʼi tau gaue fakamalama ke ke fakafiafiaʼi ai ia Sehova, ke ke tui papau ʼe ina foaki atu anai te ʼu meʼa ʼae ʼe ʼaoga kia koe pea mo tou kiʼi famili.​—Pes. 127:2; Mat. 6:​33.

NEʼE PAPITEMA IA TE KAU KOLONITO

15. Kotea te ʼu faigataʼa neʼe tonu ke tauʼi e te kau Kolonito ʼi muʼa ʼo tanatou papitema?

¹⁵ Neʼe iloa te hahaʼi ʼo te Kolonito ʼafeā, ʼuhi ko tanatou manumanū koloa pea mo te ʼu aga heʼe ʼaoga mo fakalialia neʼe natou fai. Tokolahi neʼe natou maʼu ia he faʼahiga maʼuli ʼe mole leleiʼia e te ʼAtua. Koia, neʼe ko he aluʼaga faigataʼa ʼaupito ki te hahaʼi ʼae neʼe maʼuʼuli ʼi te kolo ʼaia hanatou kamata tauhi kia Sehova. Kae, neʼe fakamafola leva e te apositolo ko Paulo ʼi te kolo ʼaia ia te logo lelei ʼo ʼuhiga mo Kilisito. Pea “tokolahi te kau Kolonito ʼae neʼe fagono ki te logo lelei, neʼe natou tui mo papitema.” (Gaue 18:​7-​11) Hili ʼaia, neʼe ui fenei e te ʼAliki ko Sesu Kilisito kia Paulo ʼi he meʼa neʼe ha age ki ai: “ ʼE lahi taku hahaʼi ʼi te kolo ʼaia ʼe kei toe ke fakatahiʼi.” Koia, neʼe hoko atu pe te faifakamafola ʼa Paulo ʼi Kolonito lolotoga he taʼu katoa vaelua.

16. Kotea ʼae neʼe tokoni ki te kau Kolonito ke natou lava tauʼi te ʼu faigataʼaʼia ʼae neʼe natou mo ia? (2 Kolonito 10:​4, 5)

¹⁶ Kotea te tokoni neʼe maʼu e te kau Kolonito? (Lau ia 2 Kolonito 10:​4, 5.) Neʼe natou lava fai he ʼu toe fetogi lahi ʼi tonatou faʼahiga maʼuli, ʼaki te Folafola ʼa te ʼAtua pea mo tona laumalie maʼoniʼoni. (Hep. 4:​12) Neʼe natou tali te logo lelei ʼo ʼuhiga mo Kilisito. Koia, neʼe natou lava liʼaki ai te ʼu holi ʼe kovi pea mo liʼaki te ʼu aga ʼaeni ohage ko te inu kava fakavale, te kaihaʼa pea mo te faifafine mo faitagata.​—1 Ko. 6:​9-​11.b

17. Kotea te ʼu ako ʼe feala ke ke taʼofi mai te faʼifaʼitaki ʼo te kau Kolonito?

¹⁷ Ke ke tokagaʼi neʼe mole ui e te kau Kolonito ʼe mole natou lava tauʼi ʼonatou holi kovi ʼaia, pea ʼe mole feala anai ke natou liliu ko ni tisipulo ʼa Sesu. Neʼe natou faiga malohi ke natou haʼele ʼi te ala faveliveli ʼae ʼe ina taki ki te maʼuli heʼe gata. (Mat. 7:​13, 14) ʼE ke tauʼi koa ia he aga ʼe kovi ʼe ina taʼofi ai tau papitema? ʼAua naʼa ke lotovaivai ʼo liʼaki ʼau faiga! Kole mamahi kia Sehova ke ina foaki atu tona laumalie maʼoniʼoni, pea ke tokoni atu ke ke lava tauʼi ʼou holi ʼae ʼe kovi.

18. Kotea te ako ʼe ke taʼofi mai te faʼifaʼitaki ʼo Monika?

¹⁸ Tou talanoa ki te faʼifaʼitaki ʼo Monika ʼae ʼe maʼuli ʼi Géorgie. Neʼe gutu tauvele pea neʼe mole lelei te ʼu fakafiafia ʼae neʼe ina fai. Kae neʼe faiga malohi ke fetogi ke feala hana papitema. Neʼe ina ui fenei: “ ʼI taku kei tupulaga, neʼe tokoni lahi mai kia au ia te faikole ʼo au lotomalohi ai. Neʼe iloʼi pe Sehova ʼe au fia fai te meʼa ʼae ʼe lelei, pea neʼe tokoni mai mo ina takitaki tuʼumaʼu pe ia au.” Neʼe papitema leva ia Monika ʼi tona taʼu 16. ʼE tonu koa ke ke liʼaki he ʼu aga ke ke tauhi ai kia Sehova pea mo ke fakafiafiaʼi ai tona loto? Kapau ko ia, haga kole kia te ia ke ina foaki atu te malohi ʼae ʼe ʼaoga atu ke ke fai he ʼu fetogi. ʼE foaki lahi e Sehova ia tona laumalie maʼoniʼoni.​—Soa. 3:​34.

ʼE FEALA HAU HIKI KI HE FAʼAHI HE ʼU MOʼUGA ʼUHI KO TAU TUI

19. Kapau ʼe tou fia tauʼi he ʼu faigataʼaʼia ʼae ʼe hage ko he ʼu moʼuga, kotea ʼe tonu ke ke faiga ʼo fai? (Vakaʼi mo te pāki.)

¹⁹ Ke ke tui papau ʼe ʼofa Sehova ia koe, pea ʼe ina loto ke ke kau ki tona famili. ʼE moʼoni te faʼahi ʼaia tatau aipe pe kotea te ʼu faigataʼaʼia ʼe tonu ke ke tauʼi ke ke papitema. Neʼe ui fenei e Sesu ki ʼihi ʼo ʼana tisipulo: “Kapau ʼe hage takotou tui ko he kiʼi tegaʼi sinapi, ʼe kotou ui anai ki te moʼuga ʼaeni: ‘Hiki mai hena ki he,’ pea ʼe hiki anai. Pea ʼe mole faigataʼa anai he meʼa kia koutou.” (Mat. 17:20) Logo la neʼe heʼeki fualoa tana fakatahi mo natou ʼae neʼe ina fai ki ai te ʼu palalau ʼaia, kae neʼe ʼaoga pe kia natou ke natou fakamalohiʼi tanatou tui. Neʼe ui age e Sesu, kapau ʼe natou faiga ʼo fakamalohiʼi tanatou tui, ʼe tokoni age anai tonatou ʼAtua ke natou lava tauʼi ʼonatou faigataʼaʼia ʼae ʼe hage ko he ʼu moʼuga. Koia, ʼe toe fai feia pe anai tou ʼAtua ko Sehova kia koe.

20. Kotea te fakalotomalohi neʼe ke maʼu ʼi te ʼu faʼifaʼitaki ʼo te kau Kilisitiano ʼo te ʼuluaki sekulo pea mo natou ʼo te temi nei ʼae neʼe talanoa ki ai ʼi te alatike ʼaeni?

²⁰ Kapau ʼe ke tokagaʼi ʼe ʼi ai he meʼa ʼe ina taʼofi koe ke ke papitema, ke ke foimo tauʼi kae ʼaua neʼe ke fakatuatuai. ʼE ke maʼu anai he fakafimalie pea mo he malohi moka ke ako te faʼifaʼitaki ʼo te ʼu Kilisitiano ʼo te ʼuluaki sekulo pea mo te temi nei. ʼOfa pe ke liliu tanatou faʼifaʼitaki ko he fakalotomalohi kia koe pea mo uga koe ke ke foaki tou maʼuli kia Sehova pea mo papitema. Koia, ko te tonu lelei pe ʼaia ke ke fai!