Tou Faifakamafola ʼAki He Faʼafai Ohage Ko Sesu

1. Kotea ʼae ʼe kehekehe ai te ʼu kaugana ʼa Sehova mo natou ʼae ʼe natou ui ʼe natou muliʼi ia Kilisito?

ʼE ILOʼI ia te ʼu kaugana ʼa Sehova ʼuhi ko tanatou faʼafaia ʼi te minisitelio. Koia ʼae ʼe kehekehe ai natou mo natou ʼae ʼe natou ui ʼe natou muliʼi ia Kilisito. (Tito 2:​14) Kae ʼe faigataʼa koa kia koe tau taupau tuʼumaʼu tou fiafia ʼi te gaue ʼaia? Neʼe ui fenei e he tagata ʼafeā faʼafai: “ ʼI ʼihi temi neʼe mole pe au fia alu au ʼo faifakamafola.” ʼE toe feia koa mo koe? ʼE ʼi ai koa ʼihi temi ʼe mole ke fia alu ai ʼo faifakamafola?

2. Kotea ʼe feala ke ina fakavaivaiʼi tatatou faʼafai ʼi te faifakamafola?

² ʼE feala ke tou leleiʼia ʼihi age gaue kia Sehova ʼi te faifakamafola. Kotea tona tupuʼaga? Koteʼuhi ʼe tou sio atu aipe ki te ʼu fua lelei ʼo ʼatatou faiga mo tou logoʼi ai ʼe ʼi ai totatou ʼaoga. Ohage la moka tou fai te ʼu gaue ʼaeni: ʼE tou kau ki te laga mo te taupau lelei ʼo te ʼu fale ʼae ʼe fai ai tatatou tauhi, peʼe ko te tokoni moka hoko he tuʼutamaki fakanatula, peʼe ko te fakalotomalohiʼi ʼo te ʼu tehina mo tuagaʼane. ʼE tou gaue ʼi te tokalelei mo te ʼofa fakatahi mo ʼotatou tehina mo tuagaʼane. Pea ʼe tou iloʼi ʼe natou fiafia ʼi te ʼu meʼa ʼae ʼe tou fai maʼa natou. Pea tahi, ʼe lagi kua fualoa tatatou faifakamafola ʼi te telituale pe ʼaia, kae ʼe mole tou sio ki hona ʼu fua, peʼe lagi mole fia logo ʼihi ki te logo ʼae ʼe tou tala. Pea ʼe tou iloʼi ka tou fakaovi atu ki te fakaʼosi, pea ʼe toe asili age te mole fia logo ʼa te hahaʼi ki te logo lelei. (Mat. 10:22) Kotea ka tokoni mai ke tou taupau pea mo fakamalohiʼi tatatou faʼafai ʼi te faifakamafola?

3. ʼE ha feafeaʼi te faʼafai ʼa Sesu ʼi te lea fakata ʼae ʼo ʼuhiga mo te tagata gaue vite, ʼae ia Luka 13:​6-9?

³ ʼE feala ke tou toʼo mai he ako mai te faʼafai ʼa Sesu. Neʼe faʼafai tuʼumaʼu pe ʼi tana faifakamafola. ʼI te fakalaka ʼo te temi, neʼe ina toe fakamalohiʼi ia tana fai te gaue ʼaia. (Lau ia Luka 13:​6-9.) Neʼe talanoa ia Sesu ki he tagata gaue vite. Neʼe taʼu tolu tana tokaga lelei ki he fuʼu fiku kae neʼe mole fua. Pea neʼe toe feia pe mo te faifakamafola ʼa Sesu ki te kau Sutea ia taʼu ʼe tolu. Tokolahi neʼe mole natou tali lelei ia te logo ʼae neʼe ina tala. Neʼe mole tuʼusi e te tagata gaue vite te fuʼu fiku. Koia, neʼe mole tuku e Sesu tana faifakamafola ki te kau Sutea peʼe ko tana faʼafai ʼi tana minisitelio. Kae neʼe faiga malohi ia ke malave te logo ki ʼonatou loto.

4. Kotea te ʼu tupuʼaga ʼe fa ʼo te faʼafai ʼa Sesu ka tou vakaʼi ʼi te alatike ʼaeni?

⁴ ʼI te alatike ʼaeni, ʼe tou vakaʼi anai te faʼafai ʼae neʼe fakaha e Sesu, lolotoga te ʼu mahina fakaʼosi ʼe ono ʼo tana minisitelio. Neʼe faʼafai ia Sesu ʼuhi ko te ʼu tupuʼaga ʼe fa ʼaeni: (1) Neʼe ina manatuʼi tuʼumaʼu ia te finegalo ʼo Sehova, (2) neʼe mahino pea mo mulimuli ki te lea fakapolofeta, (3) neʼe falala kia Sehova, pea (4) neʼe ina taupau he ʼu manatu ʼe lelei he neʼe falala ʼe fagono age anai ʼihi. Koia ʼe feala ke tou taupau tatatou faʼafai mo kapau ʼe tou fakalogo ki ʼana akonaki pea mo faʼifaʼitakiʼi ia ia.

NEʼE INA MANATUʼI TUʼUMAʼU TE FINEGALO ʼO SEHOVA

5. Neʼe fakaha feafeaʼi e Sesu neʼe ina manatuʼi tuʼumaʼu te finegalo ʼo Sehova?

⁵ Neʼe fakamafola e Sesu “te logo lelei ʼo te Puleʼaga” ʼaki he faʼafai, koteʼuhi neʼe ina iloʼi neʼe ko te tupuʼaga ʼaia ʼo tona fekauʼi mai e Sehova ki te kele. (Luka 4:​43) Neʼe ina fakamuʼamuʼa tuʼumaʼu ia te faifakamafola. ʼI te fakaʼosi ʼo tana minisitelio, neʼe hoko atu pe e Sesu ia tana faifagona “ ʼi te ʼu kolo lalahi mo te ʼu kolo liliki,” ʼo faiakonaki. (Luka 13:22) Pea neʼe ina toe akoako he tahi ʼu tisipulo ke natou hage ko ia ʼo liliu ko he kau faifakamafola.​—Luka 10:1.

6. Logo la ʼe lahi te ʼu faʼahiga gaue fakalaumalie ʼe tou fai maʼa Sehova, kae kotea ʼe ina loto ke tou manatu ʼo ʼuhiga mo te faifakamafola? (Vakaʼi mo te pāki.)

⁶ Neʼe fakamuʼamuʼa e te kau Kilisitiano ʼo te ʼuluaki sekulo ia te fakamafola ʼo te logo lelei. Pea ia ʼaho nei, ʼe loto e Sehova mo Sesu ke toe fakamuʼamuʼa e te kau Kilisitiano ia te gaue ʼaia. (Mat. 24:14; 28:​19, 20) Ko te ʼu faʼahiga gaue fuli ʼae ʼe fai kia Sehova ʼe ʼi ai tonatou pikipikiga mo te gaue ʼaia. Ohage la, ʼe tou laga he ʼu fale fono ke feala ki te hahaʼi ʼae ʼe tou faifakamafola ki ai ke omai ʼo tauhi ai kia Sehova, pea ʼe toe tokoni te ʼu gaue ʼae ʼe tou fai ʼi te ʼu Petele pea mo ʼihi atu koga meʼa ki te gaue faifakamafola. Ka hoko he ʼu tuʼutamaki fakanatula, ʼe mole tou fakatuʼutuʼu pe ke tou olo ʼo tokoni ki ʼotatou tehina mo tuagaʼane. Kae ʼe tou toe tokoni ke natou toe toʼo ʼanatou gaue fakalaumalie, ʼae ʼe kau ai ia te gaue faifakamafola. Kapau ʼe tou mahino ki te maʼuhiga ʼae ʼo te faifakamafola pea mo manatuʼi ʼe loto e Sehova ke tou haga ʼo fakamuʼamuʼa, ʼe uga ai anai tatou ke tou kau tuʼumaʼu ki ai. ʼE ui fenei e János, ko he tagata ʼafeā ʼi Hongrie, ʼo ʼuhiga mo te faʼahi ʼaia: “ ʼE au faiga ke au manatuʼi tuʼumaʼu ko te faifakamafola ʼe ko tatatou gaue tafito ʼaia. ʼE mole feala ke tou fetogi ʼaki he tahi age gaue fakalaumalie.”

7. He koʼe ʼe loto e Sehova ke hoko atu pe tatatou faifakamafola? (1 Timoteo 2:​3, 4)

⁷ ʼE feala ke tou fakamalohiʼi tatatou faʼafai ki te faifakamafola ʼo tou maʼu ia te faʼahiga sio ʼa Sehova ki te hahaʼi. ʼE ina loto ke tokolahi te hahaʼi ʼe natou logo ki te logo lelei pea mo tali. (Lau ia 1 Timoteo 2:​3, 4.) Koia ʼae ʼe ina akoʼi ai tatou ke tou faiva ʼi te fakaha ʼo te logo ʼaia ʼe ina haofaki ai te maʼuli ʼa te tokolahi. Ohage la, ʼe tou maʼu he ʼu tokoni ʼaoga ʼi te kaupepa ʼOfa Ki Te Hahaʼi​—Fai Ni Tisipulo. ʼE tokoni mai ai ke tou kamata he ʼu faipalalau pea mo he ʼu ako Tohi-Tapu. Logo la ʼe mole fia logo ʼihi ki te logo lelei, kae ko ai ʼe ina iloʼi ʼe feala anai ke natou fetogi tanatou aga ʼi muʼa ʼo te fakaʼosi ʼo te mamahi lahi. ʼE feala pe ki te ʼu palalau ʼae neʼe tou fai age kia natou ʼi te temi nei ke uga ai natou ke natou tali te moʼoni ki ʼamuli. Kae ʼe feala anai ke hoko te aluʼaga ʼaia mo kapau ʼe tou hoko atu pe tatatou faifakamafola.

NEʼE MAHINO PEA MO MULIMULI KI TE ʼU LEA FAKAPOLOFETA

8. Kotea te ʼu lea fakapolofeta neʼe tokoni kia Sesu ke ina fakaʼaogaʼi lelei tona temi?

⁸ Neʼe iloʼi e Sesu pe ʼe hoko moʼoni feafeaʼi anai te ʼu lea fakapolofeta. Ohage la, neʼe ina iloʼi lelei pe ʼe taʼu tolu vaelua anai tana minisitelio. (Tan. 9:​26, 27) Neʼe toe iloʼi e Sesu mo te temi ʼae ka mate ai, pea mo te faʼahiga mate ʼae ka hoko kia ia. (Luka 18:​31-​34) ʼEi, neʼe ina iloʼi te ʼu lea fakapolofeta ka hoko, koia neʼe ina fakaʼaogaʼi lelei ai tona temi. Neʼe uga ai ia ia ke faʼafai ʼi te faifakamafola pea mo fakahoko te gaue ʼae neʼe tuku age.

9. He koʼe ʼe tokoni mai te ʼu lea fakapolofeta ke tou faifakamafola ʼaki he faʼafai?

⁹ Ka tou mahino ki te ʼu lea fakapolofeta, ʼe toe uga ai tatou ke tou faifakamafola ʼaki he faʼafai. ʼE tou iloʼi kua vave pulihi pe ia te malama ʼaeni. ʼE tou tokagaʼi ʼe alu tahi te ʼu aluʼaga ʼae ʼe hoko ʼi te malamanei mo te aga ʼa te hahaʼi pea mo te ʼu lea fakapolofeta ʼi te Tohi-Tapu ʼo ʼuhiga mo te ʼu ʼaho fakamuli. Neʼe fakakikite ʼi te Tohi-Tapu ʼe fetauʼaki anai te Malohi Fakamalamanei ʼo Pilitania Mo Amelika pea mo Lusia mo te ʼu puleʼaga ʼe lagolago ki ai. Pea ʼe fakaʼuhiga ki te lea fakapolofeta ʼo ʼuhiga mo te ʼu hau ʼo te potu noleto mo te potu saute “ ʼi te temi fakaʼosi.” (Tan. 11:40) Pea ʼe tou toe mahino ʼe fakata te ʼu vaʼe ʼo te fakatata ʼae ʼe talanoa ki ai ia Taniela 2:​43-​45 ki te Malohi Fakamalamanei ʼo Pilitania Mo Amelika. Koia, ʼe tou tui papau kua vave pulihi pe e te Puleʼaga ʼo te ʼAtua ia te ʼu puleʼaga fakatagata, ohage pe ko tona fakaha ʼi te ʼu lea fakapolofeta fuli ʼaia. ʼE ha ʼi te ʼu lea fakapolofeta ʼaia kua ovi mai pe te fakaʼosi, koia ʼe tonu ai ke tou fakaʼaogaʼi lelei totatou temi moʼo fakamafola te logo lelei.

10. Kotea te tahi ʼu tupuʼaga ʼe uga ai tatou ʼaki te ʼu lea fakapolofeta ke tou faifakamafola ʼaki he faʼafai?

¹⁰ Pea tahi, ʼe maʼu ʼi te ʼu lea fakapolofeta he logo ʼe tou fia fakaha ki te hahaʼi. ʼE ui fenei e Carrie, ko he tuagaʼane ʼe faifakamafola ʼi République dominicaine: “ ʼE tupu taku fia fakaha te moʼoni ki te hahaʼi ko te ʼu fakapapau fakalotofimalie ʼa Sehova ʼae ʼo ʼuhiga mo he ka haʼu taulekaleka.” ʼE ina toe ui fenei: “Ka au sio ki te ʼu fihifihia ʼae ʼe tau mo te hahaʼi ia ʼaho nei, pea ʼe au mahino ʼe mole ʼaoga pe kia au te ʼu fakapapau ʼaia kae ʼe toe ʼaoga foki kia natou.” ʼE ha ʼi te ʼu lea fakapolofeta ʼaia ʼe lagolago mai ia Sehova ki tatatou faifakamafola pea ʼe fakalotomalohiʼi ai tatou ke tou faʼafai. ʼE ui fenei e Leila, ʼae ʼe maʼuli ʼi Hongrie ʼo ʼuhiga mo te faʼahi ʼaia: “ ʼE fakaha ia Esaia 11:​6-9 ʼaki te tokoni ʼa Sehova ʼe feala ki te hahaʼi fuli ke fetogi. Koia, ʼe uga ai au ke au fakaha te logo lelei ki te hahaʼi fuli, maʼia mo natou ʼae ʼe au manatu ʼe mole natou tali anai.” Kae ʼe ui fenei e Christopher, ko he tehina mai Zambie: “ ʼE mafola te logo lelei ʼi te malamanei katoa ohage ko tona fakakikite ia Maleko 13:10. Pea ko he pilivilesio kia au taku kau ki te fakahoko ʼo te lea fakapolofeta ʼaia.” Kae ʼe feafeaʼi kia koe? Kotea te ʼu lea fakapolofeta ʼe uga ai koe ke ke hoko atu tau faifakamafola?

NEʼE FALALA KIA SEHOVA

11. He koʼe neʼe tonu ke falala ia Sesu kia Sehova? (Luka 12:​49, 53)

¹¹ Neʼe falala ia Sesu kia Sehova ʼo hoko atu pe ia tana faifakamafola ʼaki he faʼafai. Neʼe tokaga tuʼumaʼu pe ki te ʼu palalau ʼae ʼe ina fai. Kae neʼe ina iloʼi ʼe mole fia logo anai ʼihi ki te logo lelei ʼo te Puleʼaga, pea ʼe natou fakafeagai malohi anai ki ai. (Lau ia Luka 12:​49, 53.) Pea tahi, neʼe faiga tuʼa lahi te kau takitaki lotu ke natou matehi ia ia. (Soa. 8:​59; 10:​31, 39) Kae neʼe hoko atu pe tana faifakamafola koteʼuhi neʼe ina iloʼi ʼe nofo ia Sehova mo ia. Neʼe ina ui fenei: “ ʼE mole au tokotahi, kae ʼe fakatahi mo au ia te Tamai ʼae neʼe ina fekauʼi mai au. . . . Neʼe mole ina liʼaki au koteʼuhi ʼe au fai tuʼumaʼu pe te ʼu meʼa ʼae ʼe ina leleiʼia.”​—Soa. 8:​16, 29.

12. Kotea te ʼu tokoni neʼe foaki e Sesu ki ʼana tisipulo ke hoko atu tanatou faifakamafola moka fakatagaʼi natou?

¹² Neʼe fakamanatuʼi e Sesu ki ʼana tisipulo ʼe feala ke natou falala kia Sehova. Neʼe tuʼa lahi tana ui age kia natou ʼe tokoni age anai tonatou ʼAtua moka fakatagaʼi natou. (Mat. 10:​18-​20; Luka 12:​11, 12) Pea neʼe ina fakalotomalohiʼi natou ke natou nonofo tokakaga. (Mat. 10:16; Luka 10:3) Neʼe fakamahino age e Sesu ʼe mole tonu ke natou fakakinauʼi ia natou ʼae ʼe mole fia logo ki te logo lelei ke natou tali. (Luka 10:​10, 11) Pea neʼe ina ui age ʼe tonu ke natou feholaki moka ʼe fakatagaʼi natou. (Mat. 10:23) Logo la neʼe faʼafai ia Sesu mo falala kia Sehova, kae neʼe mole ina fai he meʼa ke tuʼutamaki ai tona maʼuli.​—Soa. 11:​53, 54.

13. He koʼe ʼe ke tui papau ʼe tokoni atu anai ia Sehova?

¹³ Ia ʼaho nei, ʼe toe ʼaoga kia tatou ia te tokoni ʼa Sehova ke hoko atu tatatou faifakamafola ʼaki he faʼafai logo la te fakafeagai. (Fkha. 12:17) He koʼe ʼe ke tui papau ʼe tokoni atu anai ia Sehova? Ke ke fakakaukauʼi ia te faikole ʼa Sesu ʼae ʼe tuʼu ia Soane kapite 17. Neʼe kole e Sesu kia Sehova ke tokaga ki te kau apositolo. Pea neʼe tali e Sehova ia tana kole. Koia, ʼe fakamahino ʼi te tohi ʼo Gaue pe neʼe tokoni feafeaʼi ki te kau apositolo ke natou faifakamafola ʼaki he faʼafai, logo la te fakataga. ʼI tana faikole, neʼe toe kole ai e Sesu ki tana tamai ke tokaga kia natou ʼae ka tui ki te logo ʼae ʼe fakamafola e te kau apositolo. Koia, ʼe ke kau ia natou ʼaia. Pea ʼe hoko atu pe te tali ʼa Sehova ki te faikole ʼa Sesu. Koia, ʼe tokoni atu anai ohage pe ko Tana fai ki te kau apositolo.​—Soa. 17:​11, 15, 20.

14. ʼE tou iloʼi feafeaʼi ʼe tou hoko atu pe anai tatatou faifakamafola ʼaki he faʼafai? (Vakaʼi mo te pāki.)

¹⁴ ʼI te kua ovi mai ʼo te fakaʼosi, ʼe lagi mole faigafua anai te fakamafola ʼo te logo lelei ʼaki he faʼafai. Kae ʼe tou falala ʼe tou maʼu anai te tokoni ʼae ʼe ʼaoga mai kia tatou. (Luka 21:​12-​15) ʼE tou faʼifaʼitakiʼi anai ia Sesu mo ʼana tisipulo. ʼE mole tou fakakinauʼi anai te hahaʼi ke natou fakalogo ki te logo lelei, pea ʼe mole tou faiga anai ke tou fihi mo natou. Logo la ʼe tapuʼi ʼatatou gaue ʼi ʼihi fenua, kae ʼe lava fakamafola e ʼotatou tehina mo tuagaʼane te logo lelei. Kotea tona tupuʼaga? Koteʼuhi ʼe natou falala kia Sehova kae mole ki ʼonatou malohi fakatagata. Neʼe foaki e Sehova tona malohi ki te kau ʼuluaki Kilisitiano. Pea ʼe toe feia pe ia ʼaho nei, ʼe ina foaki te malohi ki ʼana kaugana ‘ke natou fakahoko katoa tanatou fakamafola te logo lelei’ ʼo mulimuli ki tona finegalo. (2 Tim. 4:​17) Koia, kapau ʼe ke falala kia Sehova, pea ʼe ke hoko atu pe anai tau faifakamafola ʼaki he faʼafai.

NEʼE INA TAUPAU HE ʼU MANATU ʼE LELEI

15. Kotea ʼae ʼe ha ai neʼe taupau pe e Sesu he ʼu manatu ʼe lelei ʼo ʼuhiga mo te faifakamafola?

¹⁵ Neʼe taupau tuʼumaʼu pe e Sesu he ʼu manatu ʼe lelei ʼo ʼuhiga mo te faifakamafola. Neʼe tokoni ai kia ia ke ina taupau maʼu tona fiafia. Ohage la, ʼi te fakaʼosi ʼo te taʼu 30 H.T.S., neʼe ina tokagaʼi tokolahi neʼe natou tali te logo ʼae neʼe ina fakamafola. Pea neʼe ina fakatatau ia natou ʼaia ki he gaueʼaga ka ʼamanaki ʼutu. (Soa. 4:​35) Hili ki ai te teitei taʼu katoa, neʼe ina ui fenei: “ ʼE lahi te taʼukai.” (Mat. 9:​37, 38) Pea ki ʼamuli, neʼe ina toe ui fenei ki ʼana tisipulo: “ ʼE lahi te taʼukai . . . Koia, kotou kole ki te Pule ʼo te taʼukai ke ina fekauʼi mai he kau gaue ki tana taʼukai.” (Luka 10:​2) Neʼe falala pe Sesu ia ʼe ʼi ai anai he ʼu hahaʼi ʼe natou tali lelei anai ia te logo lelei, pea neʼe fiafia moka tali e ʼihi.​—Luka 10:21.

16. Kotea te ʼu lea fakatata neʼe fakaʼaogaʼi e Sesu moʼo fakaha te ʼu fua lelei ʼe tou maʼu ʼi te faifakamafola? (Luka 13:​18-​21) (Vakaʼi mo te pāki.)

¹⁶ Neʼe tokoni ia Sesu ki ʼana tisipulo ke natou taupau maʼu ia tanatou faʼafai. Koia, neʼe ina fakalotomalohiʼi natou ke natou manatuʼi te ʼu fua lelei ʼe natou maʼu anai moka natou faifakamafola. ʼO feafeaʼi? Neʼe ina fakaʼaogaʼi ia lea fakatata ʼe lua. (Lau ia Luka 13:​18-​21.) ʼE ha ʼi te lea fakatata ʼo te tegaʼi sinapi ʼe mafola anai te logo lelei ʼo te Puleʼaga ʼi hona aluʼaga fakaofoofo, pea ʼe mole he meʼa ʼe ina taʼofi. Kae ʼe ha ʼi te lea fakatata ʼo te meʼa fakatupu ʼe lahi te ʼu fenua ʼe mafola ai anai te logo lelei ʼo te Puleʼaga. Pea ʼe uga ai anai te hahaʼi ʼae ʼe natou tali te logo ke natou fai he ʼu fetogi, logo la ʼe mole tou sisio atu aipe ki ai. Koia, neʼe fakaʼaogaʼi e Sesu ia te ʼu lea fakatata ʼaia moʼo tokoni ki ʼana tisipulo ke natou mahino ki te ʼu fua lelei ʼe natou maʼu anai moka natou faifakamafola.

17. He koʼe ʼe maʼuhiga ke tou taupau he ʼu manatu ʼe lelei ʼo ʼuhiga mo tatatou faifakamafola?

¹⁷ Kapau ʼe tou fakakaukauʼi ia te ʼu fua lelei ʼe tou maʼu ʼi tatatou faifakamafola ia ʼaho nei, ʼi te malamanei, ʼe uga ai tatou ke tou haga faifakamafola ʼaki he faʼafai. ʼI te taʼu fuli ko te toko lauʼi miliona hahaʼi neʼe natou tali ia te logo lelei. Pea ʼe natou kau ki te ʼAho Fakamanatu mo ako te Tohi-Tapu mo tatou. Pea ko te toko lauʼi afe ia natou ʼe faifakamafola fakatahi mo tatou pea mo papitema. ʼE mole tou iloʼi pe ko te toko fia anai ka natou tali ia te logo lelei. Kae ʼe tou iloʼi ʼe fakatahiʼi e Sehova he toe hahaʼi kauga malie, ʼae ka hao ʼi te mamahi lahi ʼaeni kua ovi mai. (Fkha. 7:​9, 14) Koia, kapau ʼe manatu ia te Pule ʼo te taʼukai ʼe kei ʼi ai he ʼu hahaʼi ka natou tali anai ia te logo lelei, koia ʼe ko he tupuʼaga lelei ʼaia ke tou hoko atu tatatou faifakamafola.

18. Kotea ʼae ʼe tou loto ke tokagaʼi e te hahaʼi pea mo mahino ki ai?

¹⁸ Neʼe iloa tuʼumaʼu pe te ʼu tisipulo ʼa Sesu ʼuhi ko tanatou faʼafai ʼi te faifakamafola. ʼI te ʼuluaki sekulo, neʼe tokagaʼi e te hahaʼi te palalau fakahagatonu ʼa te kau apositolo, pea “neʼe natou mahino ai neʼe natou fakatahi mo Sesu.” (Gaue 4:​13) Ia ʼaho nei, ʼe tou loto ke tokagaʼi e te hahaʼi tatatou faʼafai pea mo mahino ʼe tou toe muliʼi ia te faʼifaʼitaki ʼo Sesu.