‘Kotou Filifili e Koutou Totonu Pe Ko Ai Ka Kotou Tauhi Ki Ai’

1. Kapau ʼe tou fia maʼuli fiafia moʼoni, kotea ʼae ʼe tonu ke tou fai? Pea kotea tona tupuʼaga? (Esaia 48:17, 18)

ʼE ʼOFA tatatou Tamai ʼe ʼi selo ia tatou, pea ʼe ina loto ke tou maʼuli fiafia ʼi te temi nei pea ʼi te ka haʼu. (Ekl. 3:12, 13) Neʼe ina foaki mai totatou ʼu faiva taulekaleka. Kae neʼe mole tuku mai te fealagia ʼae ke tou takitaki ia tatou totonu, peʼe ke tou filifili maʼa tatou te meʼa ʼae ʼe lelei mo ʼae ʼe kovi. (Ekl. 8:9; Sel. 10:23) ʼE ina iloʼi kapau ʼe tou fia maʼuli fiafia moʼoni, ʼe tonu ke tou tauhi kia te ia pea mo fakalogo ki ʼana lao.—Lau ia Esaia 48:17, 18.

2. Kotea ʼae ʼe loto e Satana ke tou tui ki ai? Pea kotea neʼe fai e Sehova moʼo fakaha ʼe gutuloi?

² ʼE loto e Satana ke tou tui ʼe feala ke tou maʼuli fiafia kae mole tou tauhi kia Sehova, pea ʼe feala pe ke tou takitaki ia tatou totonu. (Sen. 3:4, 5) Koia, neʼe tuku e Sehova ke takitaki e te tagata ia totonu lolotoga he kiʼi temi moʼo fakaha ko Satana ʼe gutuloi. ʼE feala ke tou tokagaʼi ia te ʼu fua kovi ʼo te haga ʼa te tagata ʼo takitaki ia ia totonu. Kae ʼe lahi te ʼu faʼifaʼitaki ʼo ni hahaʼi ʼi te Tohi-Tapu ʼe natou maʼuli fiafia ʼi tanatou tauhi kia Sehova. Pea ko te faʼifaʼitaki ʼae ʼe lelei tukupau ʼe ko Sesu Kilisito. Tou vakaʼi muʼa ia te ʼu tupuʼaga ʼae neʼe ina filifili ai ke tauhi kia Sehova. Pea ʼe tou vakaʼi anai pe koʼe ʼe tuha mo tatatou Tamai ʼae ʼe ʼi selo ke tou tauhi kia te ia. Pea ʼe tou manatuʼi ai anai ʼihi tupuʼaga ʼae neʼe tupu ai tatatou filifili ke tou tauhi kia Sehova.

HE KOʼE NEʼE FILIFILI E SESU KE TAUHI KIA SEHOVA?

3. Kotea ʼae neʼe fakaha age e Satana kia Sesu? Pea kotea te tonu ʼae neʼe fai e Sesu?

³ ʼI te nofo ʼa Sesu ʼi te kele, neʼe tonu ke ina filifili pe ko ai ʼae ka tauhi anai ki ai. Hili pe tana papitema, neʼe fakaha age e Satana te ʼu puleʼaga fuli ʼo te malamanei kia ia ke ina maʼu, kae ke kehe pe ke tuʼutuli ifo ʼo atolasio kia ia. Kae neʼe tali fenei age e Sesu: “Alu Satana! Koteʼuhi kua tohi: ‘ʼE tonu ke ke atolasio kia Sehova tou ʼAtua pea mo foaki kia te ia tokotahi pe he tauhi taputapu.’ ” (Mat. 4:8-10) Tou vakaʼi ʼihi tupuʼaga ʼo te fai e Sesu ia te tonu ʼaia.

4-5. Kotea ʼihi tupuʼaga ʼo te filifili e Sesu ke tauhi ai kia Sehova?

⁴ Neʼe filifili e Sesu ke tauhi kia Sehova ʼuhi tafito ʼae neʼe ʼofa ia ia. Neʼe ʼofa mamahi ʼosi ia Sehova, pea neʼe heʼe gata ia tona ʼofa ʼaia kia te ia. (Soa. 14:31) Neʼe toe tauhi ia Sesu kia te ia koteʼuhi neʼe tonu ke ina fai te faʼahi ʼaia. (Soa. 8:28, 29; Fkha. 4:11) ʼE ina iloʼi ko tana Tamai ʼe ko te Matapuna ʼo te maʼuli, ʼe tuha mo te falala pea ʼe lotofoaki. (Pes. 33:4; 36:9; Sakp. 1:17) Neʼe ui tuʼumaʼu age e Sehova ia te moʼoni, pea ko ia ʼae neʼe ina foaki age ia meʼa fuli ʼe ina maʼu. (Soa. 1:14) Kae ko Satana ʼe gutuloi koteʼuhi ʼe manūmanū pea ʼe manatu pe kia ia totonu. ʼE tupu la tatatou mamate ʼuhi pe ko ia. (Soa. 8:44) Neʼe mahino ia Sesu ki te faʼahi ʼaia, koia neʼe mole he temi neʼe ina fia faʼifaʼitakiʼi ai ia Satana, ʼo agatuʼu kia Sehova.—Flp. 2:5-8.

⁵ Kapau neʼe filifili e Sesu ke tauhi kia Sehova he neʼe ina iloʼi te ʼu fua lelei ka ina maʼu moka tauhi agatonu kia te ia. (Hep. 12:2) Neʼe mahino kia ia kapau ʼe nofo agatonu, ʼe ina fakatapuha anai te huafa ʼo tana Tamai. Pea ʼe ina foaki anai te puleʼaki ʼae moʼo fakagata te ʼu mamahi fuli ʼae neʼe tupu mai te Tevolo.

HE KOʼE ʼE TUHA MO SEHOVA KE TOU ATOLASIO KIA TE IA?

6-7. He koʼe tokolahi ia ʼaho nei ʼe mole tauhi kia Sehova? He koʼe ʼe tuha mo Sehova ke tou atolasio age kia te ia?

⁶ Ia ʼaho nei, tokolahi ʼe mole natou tauhi kia Sehova. Kotea tona tupuʼaga? Koteʼuhi ʼe heʼeki natou iloʼi ʼona kalitate taulekaleka, pea mo meʼa fuli neʼe ina fai maʼa natou. Neʼe ko te aluʼaga ʼaia, neʼe hoko kia natou ʼae neʼe faifakamafola ki ai te apositolo ko Paulo ʼi Ateni.—Gaue 17:19, 20, 30, 34.

⁷ Neʼe fakamahino fenei age e Paulo ko te ʼAtua moʼoni “ʼe ina foaki ki te hahaʼi fuli te maʼuli, mo te manava pea mo te ʼu meʼa fuli pe.” Pea neʼe ina toe ui fenei: “ʼAki ia ia, ʼe tou maʼuʼuli, mo gaugaue pea mo tou ʼi heni.” ʼEi, ko Sehova ʼe ko totatou Tupuʼaga. ʼE ui ʼi te Tohi-Tapu: “Mai te tagata ʼe tahi neʼe ina fakatupu te ʼu puleʼaga fuli.” Koia ʼe tuha mo ia ke tou atolasio age kia te ia.—Gaue 17:25, 26, 28.

8. Kotea ʼe mole fakahoko anai e Sehova? Fakamahino.

⁸ Neʼe feala pe kia Sehova ke ina fakakinauʼi te hahaʼi ke tauhi age kia te ia, he ʼe ko ia te Tupuʼaga mo te Tuʼi ʼAliki ʼo te ʼatulaulau. Kae ʼe mole ina fakahoko anai te faʼahi ʼaia. ʼE ina foaki ki te tagata he ʼu fakamoʼoni ʼe maʼuli moʼoni, pea ʼe ʼofa mamahi ia tatou takitokotahi. ʼE ina loto ke hahaʼi ia natou ʼe kaumeʼa mo ia ʼo talu ai. (1 Tim. 2:3, 4) Koia, ʼe ina akoako tatou ke tou akoʼi age kia natou ʼana fakatuʼutuʼu, pea mo fakamahino age pe ʼe feafeaʼi hana fakahoko. (Mat. 10:11-13; 28:19, 20) ʼE ina fakatuʼutuʼu he ʼu kokelekasio, pea mo fakanofo he ʼu tagata taupau agaʼofa, ʼe tokakaga lelei kia tatou.—Gaue 20:28.

9. ʼE fakaha feafeaʼi mai e Sehova ia tona ʼofa?

⁹ ʼE fakaofoofo ʼaupito ia te ʼofa ʼo Sehova ki te tagata. Pea ʼe ina fakaha tafito ʼi tana faʼahiga tokaga kia natou ʼae ʼe mole fia tui kia te ia. Fakakaukauʼi age muʼa te aluʼaga ʼaeni: Talu mai te tupu ʼa te tagata, neʼe ina filifili e ia totonu ke ina fai te meʼa ʼae ʼe lelei mo ʼae ʼe kovi, kae mole fakalogo ia kia Sehova. Logo la te faʼahi ʼaia, kae neʼe ʼofa pe ia Sehova kia natou. ʼO feafeaʼi? ʼAki tana foaki te ʼu meʼa ʼae neʼe ʼaoga kia natou pea ke natou fiafia ai. (Mat. 5:44, 45; Gaue 14:16, 17) Neʼe ina foaki kia natou te fealagia ʼae ke ʼi ai honatou ʼu kaumeʼa, mo honatou kiʼi famili ʼe ʼofa ia natou, mo maʼu fanau pea mo sisio ki te ʼu fua lelei ʼo tanatou gaue kinakina. (Pes. 127:3; Ekl. 2:24) Koia, ʼe ha lelei mai ai te ʼofa ʼo tatatou Tamai ʼe ʼi selo ʼi te tagata. (Eke. 34:6) ʼE tou talanoa anai ki ʼihi tupuʼaga ʼe uga ai tatou ke tou tauhi kia Sehova, pea mo te ʼu fua lelei ka ina foaki anai kia tatou.

HE KOʼE ʼE TOU FILIFILI KE TOU TAUHI KIA SEHOVA?

10. (1) Kotea te tupuʼaga tafito ʼo tatatou tauhi kia Sehova? (Mateo 22:37) (2) Neʼe kataki fualoa feafeaʼi ia Sehova ʼo ʼuhiga mo koe? (Pesalemo 103:13, 14)

¹⁰ ʼE tou hage ko Sesu, ʼe tou tauhi kia Sehova ʼuhi tafito ʼae ʼe tou ʼofa mamahi ia te ia. (Lau ia Mateo 22:37.) ʼE tou leleiʼia ʼona kalitate. Ohage la, tou talanoa ki tana kataki fualoa ʼo ʼuhiga mo tatou. ʼI te talagataʼa ʼa te kau Iselaele kia te ia, neʼe ina kole mamahi fenei age: “Fakalelei siʼokotou ʼu loto, kotou tafoki mai pea kotou liʼaki ʼakotou aga ʼae ʼe kovi.” (Sel. 18:11) Koia, ʼe ina manatuʼi ʼe tou heʼe haohaoa, pea ʼe tou efu. (Lau ia Pesalemo 103:13, 14.) Ka ke metitasio ki te kataki fualoa ʼa Sehova pea mo ʼona ʼihi age kalitate taulekaleka, ʼe mole uga ai koa la koe ke ke tauhi kia te ia ʼo talu ai?

11. Kotea te tahi ʼu tupuʼaga ʼe tou filifili ai ke tou tauhi kia Sehova?

¹¹ Kapau ʼe tou fia tauhi kia Sehova he ʼe tou iloʼi ʼe ko te meʼa ʼaia ʼe tonu ke tou fai. (Mat. 4:10) Pea tahi, ʼe tou iloʼi ka tou tauhi agatonu kia Sehova pea ʼe fua lelei anai. ʼE tou fakafiafiaʼi te loto ʼo tatatou Tamai, mo kau ki te fakatapuha ʼo tona huafa, pea mo fakamoʼoni ko te Tevolo ʼe gutuloi. Koia, ka tou filifili ke tou tauhi kia Sehova ʼi te temi nei, ʼe tou maʼu anai te fealagia ʼae ke tou tauhi kia te ia ʼo talu ai.—Soa. 17:3.

12-13. Kotea te ako ʼe tou taʼofi mai te faʼifaʼitaki ʼo Jane mo Pam?

¹² ʼE feala ke malohi tou ʼofa kia Sehova moka kei ke veliveli. Pea ʼe feala ke haga tuputupu tou ʼofa ʼaia ʼaki te temi. Tou talanoa ki te faʼifaʼitaki ʼo te tautehina ko Jane mo Pam.a Neʼe nā taʼu 11 mo 10 ʼi te temi ʼae neʼe nā ako ai te Tohi-Tapu. Neʼe mole fia ako ʼanā matuʼā kae neʼe nā fakagafua ke nā fakatahi mo te kau Fakamoʼoni ʼa Sehova. Kae ʼe nā olo pe anai ʼo misa mo naua ʼi te fakaʼosi vahaʼa. ʼE ui fenei e Jane: “Neʼe tokoni mai kia au te ʼu moʼoni Fakatohi-tapu, ʼae neʼe akoʼi mai e te kau Fakamoʼoni ʼa Sehova, ke au tekeʼi te ʼu fakaneke ʼae neʼe fai mai ʼi te fale ako. Pea neʼe mole au fāfā ki te toloke pea mo fai he ʼu aga heʼe ʼaoga.”

¹³ Hili ki ai ni kiʼi taʼu, neʼe kamata faifakamafola leva te tautehina. Ki muli age, neʼe nā pionie pea mo tokakaga pe ki ʼanā matuʼā, ʼae kua vaivavai. Neʼe fakakaukauʼi e Jane te ʼu aluʼaga ʼae neʼe hoko kia naua, ʼo ina ui fenei: “Neʼe au sio tonu ki te tokaga lelei ʼa Sehova ki ʼona kaumeʼa, pea ohage ko tona ui ia 2 Timoteo 2:19, ‘ʼe ina iloʼi ia natou ʼae ʼaʼana.’ ” ʼEi, ʼe tokaga lelei ia Sehova kia natou ʼae ʼe ʼoʼofa pea mo fia tauhi kia te ia.

14. ʼE tou lagolago feafeaʼi ki te fakamaʼa ʼo te huafa ʼo Sehova mai te ʼu tukugakovi fuli ʼe fai kia te ia? (Vakaʼi mo te ʼu pāki.)

¹⁴ ʼE tou fia lagolago ki te fakamaʼa ʼo te huafa ʼo Sehova mai te ʼu tukugakovi fuli pe ʼe fai kia te ia. Fakakaukauʼi age muʼa ia te aluʼaga ʼaeni: ʼE ke maʼu hou kaumeʼa lelei, ʼe agalelei, mo lotofoaki pea mo manavaʼofa. ʼE ke logo leva ʼi he aho ki he tahi ʼe ina ui ʼo ʼuhiga mo ia ʼe agakovi pea mo agakaka. Kotea ka ke fai anai? ʼE mahino ia, ʼe mole ke tuku anai ke hoko atu tana palalau feia ki tou kaumeʼa. ʼO toe feia pe, ʼe faiga ia Satana mo natou ʼae ʼe ina fakahalaʼi ke natou ʼuluhi te huafa ʼo Sehova, ʼo fakamafola ni loi ʼo ʼuhiga mo Ia. Koia, ʼaua naʼa tou tuku ke hoko atu tanatou fai te faʼahi ʼaia. Kae tou foimo tala te moʼoni ʼo ʼuhiga mo Ia. (Pes. 34:1; Esa. 43:10) ʼE tou fakaha anai ʼe tou fia tauhi kia Sehova mo totatou maʼuli katoa ʼaki ʼatatou palalau pea mo aga.

15. Kotea te ʼu tapuakina ʼae neʼe maʼu e te apositolo ko Paulo ʼi tana ʼosi fai he ʼu fetogi ʼi tona maʼuli? (Filipe 3:7, 8)

¹⁵ ʼE tou lotolelei ke tou fai he ʼu fetogi ʼi totatou maʼuli ke tou fakafiafiaʼi ai te loto ʼo Sehova, pea ke lahi age te ʼu gaue ʼe tou fai maʼa ia. Pea ko te aluʼaga ʼaia neʼe fai e te apositolo ko Paulo. Neʼe lituʼa ki hona tuʼulaga neʼe feala ke iloa ai, pea neʼe mulimuli kia Kilisito pea mo tauhi kia Sehova. (Kal. 1:14) Neʼe lahi te ʼu tapuakina neʼe ina maʼu, pea neʼe ina maʼu te pilivilesio ʼae ke kauga hau mo Kilisito ʼi selo. Neʼe mole fakahemala ʼi he temi ʼi tana toʼo te tonu ʼae ke tauhi kia Sehova. Pea kapau neʼe tou toe fai mo te tonu ʼaia, ʼe mole tou fakahemala anai ʼi he temi.—Lau ia Filipe 3:7, 8.

16. Kotea ʼe tou ako mai te faʼifaʼitaki ʼo Julia? (Vakaʼi mo te ʼu pāki.)

¹⁶ Kapau ʼe tou fakamuʼamuʼa tatatou tauhi kia Sehova ʼi totatou maʼuli, ʼe lahi anai te ʼu tapuakina ʼe tou maʼu ʼi te temi nei pea mo te ka haʼu. Tou vakaʼi te faʼifaʼitaki ʼo he tuagaʼane ʼe higoa ko Julia. ʼI tana kei veliveli, neʼe hiva ʼi he kauhiva ʼi tana ʼekelesia. Neʼe tokagaʼi e he tagata ʼe faiva ʼi te fai hiva ia tona faiva ʼaia neʼe nofo mo ia. Pea neʼe fai ako hiva mo ia. Neʼe logona atu aipe ia Julia, pea neʼe alu ʼo hiva ʼi he ʼu fale ʼe iloʼi e te hahaʼi. ʼI tana kau ki he ʼu ako hiva ʼi he fale ako iloa, neʼe palalau age hona kauga ako ki te ʼAtua, pea mo ina fakaha age ko tona huafa ʼe ko Sehova. Neʼe mole faʼa fualoa ki ai neʼe ina ako leva te Tohi-Tapu, pea neʼe fai tuʼa lua ʼi te vahaʼa. Ki muli age, neʼe ina filifili ke tauhi kia Sehova mo tona maʼuli katoa ʼi hana hoko atu ʼi te faimaholo. ʼE mahino ia, neʼe mole ko he tonu ʼe faigafua. ʼE ina ui fenei: “Tokolahi neʼe natou ui fenei mai, ‘maumau foki te faiva ʼe ke nofo mo ia,’ kae neʼe au fia fakaʼaogaʼi lahi age toku temi ki taku tauhi ʼae kia Sehova.” Kotea te manatu ʼe ina maʼu ia ʼaho nei ʼi te tonu ʼaia neʼe ina fai kua hili nei ki ai taʼu ʼe 30 tupu? ʼE ina tali fenei: “ʼE au logoʼi te tokalelei ʼo te loto, pea mo au tui papau ʼe foaki mai anai e Sehova ʼi te ka haʼu te ʼu meʼa fuli ʼae ʼe fakaʼamu ki ai toku loto.”—Pes. 145:16.

KE KE HAGA TAUHI KIA SEHOVA

17. Kotea te fakaʼuhiga ʼo te ʼu palalau ʼa Paulo ʼo ʼuhiga mo te fakaʼosi ʼo te malama ʼaeni?

¹⁷ ʼE kua ovi mai pe te fakaʼosi ʼo te malama ʼaeni. Neʼe tohi fenei e Paulo: “ʼE kei toe ‘he kiʼi temi veliveli,’ pea ‘ko ia ʼae ʼe haʼu ʼe haʼu moʼoni anai pea ʼe mole tuai anai.’ ” (Hep. 10:37) Kotea tona fakaʼuhiga? ʼE kei toe pe he kiʼi temi siʼi kia natou ʼae ʼe mole tauhi kia Sehova ke natou filifili ke natou tauhi kia te ia. (1 Ko. 7:29) Pea kapau neʼe kua tou fai ia te tonu ʼaia ke tou tauhi kia Sehova, ʼe tou iloʼi ʼe “ko he kiʼi temi veliveli” pe ʼae ʼe tou tau ai mo ʼotatou ʼahiʼahi.

18. Kotea ʼae ʼe loto e Sesu mo Sehova ke tou fai?

¹⁸ Neʼe fakalotomalohiʼi e Sesu ʼana tisipulo ke mole gata pe ki tanatou mulimuli ia te ia, kae ʼe tonu ke natou toe haga hoko atu. (Mat. 16:24) Koia ʼae kapau neʼe tou tauhi kia Sehova talu mai fualoa, tou fakatotonu ke tou haga kataki. Tou fai he ʼu faiga malohi ke tou mulimuli tuʼumaʼu ki te tonu ʼae neʼe tou fai ke tou tauhi kia te ia. ʼE mahino ia, ʼe mole faigafua anai, kae ʼe tou maʼu anai he ʼu toe tapuakina lahi ʼi te temi nei.—Pes. 35:27.

19. Kotea ʼe tou ako mai te faʼifaʼitaki ʼo Gene?

¹⁹ ʼE manatu ʼihi ka tou tauhi kia Sehova, ʼe lahi fau anai te ʼu sakilifisio ʼae ʼe tonu ke tou fai. Kapau ko koe ko he tupulaga, ʼe ke manatu koa ka ke tauhi kia Sehova ʼe mole ke fiafia anai? ʼE ui fenei e te tehina tupulaga ʼaeni ko Gene: “Neʼe au manatu kapau ʼe au liliu ko he Fakamoʼoni ʼa Sehova, ʼe mole feala ke au fiafia ʼi toku maʼuli. Tokolahi te kau tupulaga neʼe au lahilahi ake mo natou, neʼe fai lafeti natou, mo faifakatahi mo te tamaliki fafine, pea mo gaoʼi ʼi ni ʼata viteo agamalohi kae au alu au ʼo fono mo faifakamafola.” ʼI te maʼu e Gene te faʼahiga manatu ʼaia, kotea ʼae neʼe ina fai? ʼE ina ui fenei: “Neʼe mole moʼoni taku tauhi kia Sehova. Neʼe au fai leva he ʼu aga ʼe kovi, ohage ko ʼihi tupulaga pea mo au alu pe ʼo fono mo faifakamafola. Kae neʼe au fiafia lolotoga he kiʼi temi. Neʼe mole au logoʼi hoku fiafia moʼoni. Neʼe au toe manatuʼi leva te ʼu moʼoni Fakatohi-tapu, ʼae neʼe au tuku keheʼi, pea mo au toʼo leva te tonu ʼae ke au tauhi kia Sehova ʼi toku maʼuli katoa. Pea talu mai te temi ʼaia, ʼe au logoʼi ʼe tali e Sehova ʼaku kole fuli.”

20. Kotea ʼae ʼe tonu ke tou fakatotonu ke tou fai?

²⁰ Neʼe hiva fenei he tagata faipesalemo kia Sehova: “Manuʼia ia ia ʼae ʼe ke filifili mo ke taki mai ke nofo ʼi ʼou malaʼe.” (Pes. 65:4) Koia, tou fakatotonu ke tou tauhi kia Sehova. Tou hage ko Sosue, ʼo tou ui fenei: “Ko au mo toku famili, ʼe matou tauhi anai kia Sehova.”—Sos. 24:15.