ʼE Mole Tou Nofo Tokotahi Anai ʼi He Temi

1-2. (1) He koʼe ʼe mole tonu ke tou ui ʼe mole feala ke tou tauʼi tokotahi ʼotatou fihifihia? (2) Kotea ka tou vakaʼi ʼi te alatike ʼaeni?

KA TOU tau mo he ʼu ʼahiʼahi, ʼe hage pe ʼe tou nofo tokotahi ʼi he kiʼi vaka kae ʼe hou te tai. Kae, ʼe mole tou tauʼi tokotahi pe ʼotatou ʼahiʼahi. ʼE mole sio pe tatatou Tamai ʼofa ʼae ʼe ʼi selo ki ʼotatou fihifihia, kae ʼe ina toe fakapapauʼi mai ʼe tokoni mai ke tou lava tauʼi. ʼE fai e Sehova te fakapapau fakalotofimalie ʼaeni ki ʼana kaugana agatonu: “ʼE au tokoni atu anai.”—Esa. 41:10.

² ʼI te alatike ʼaeni, ʼe tou vakaʼi anai ʼe tokoni mai ia Sehova (1) ʼaki tana takitaki tatou, (2) mo tana foaki mai te ʼu meʼa ʼae ʼe ʼaoga kia tatou, (3) ʼe ina puipui tatou, pea (4) mo ina fakalotofimalieʼi tatou. ʼE fakapapauʼi mai e Sehova, kotea pe te ʼu ʼahiʼahi ʼae ʼe tou tau mo ia, kae ʼe mole ina galoʼi anai tatou ʼi he temi. ʼE mole ina liʼaki anai tatou. Koia, ʼe mole tou nofo tokotahi anai ʼi he temi.

ʼE TAKITAKI TATOU E SEHOVA

3-4. ʼE takitaki feafeaʼi tatou e Sehova? (Pesalemo 48:14)

³ Lau ia Pesalemo 48:14. ʼE iloʼi e Sehova ʼe mole feala hatatou takitaki ia tatou totonu. Kae ʼe ʼaoga kia tatou tana takitaki. ʼE ina takitaki feafeaʼi ʼana kaugana agatonu ia ʼaho nei? ʼAki te Tohi-Tapu. (Pes. 119:105) ʼEi, ʼe fakaʼaogaʼi e Sehova tana Folafola moʼo tokoni mai ke tou toʼo he ʼu tonu pea mo gaueʼi ʼona kalitate. Ka tou fakalogo ki te ʼu meʼa ʼae ʼe ina ui mai ʼi te Tohi-Tapu, ʼe tou maʼuli fiafia anai pea mo maʼu te ʼamanaki ʼae ke tou maʼuʼuli ʼo heʼe gata.a Ohage la, ʼe ina akoʼi mai ke tou liʼaki ia te loto kovi, pea ke tou aga fakahagatonu ia meʼa fuli pea mo feʼofamamahiʼaki. (Pes. 37:8; Hep. 13:18; 1 Pet. 1:22) Ka tou fakaha he ʼu kalitate feia, pea ʼe tou liliu anai ko he ʼu matuʼā, peʼe ko he ʼu tagata peʼe fafine ʼohoana, pea mo kaumeʼa ʼe lelei.

⁴ Pea tahi, neʼe fakatuʼu e Sehova ʼi tana Folafola he ʼu hisitolia ʼo ni hahaʼi neʼe natou tau mo ni ʼahiʼahi. Pea neʼe hage pe te ʼu meʼa ʼae neʼe natou logoʼi ko tatou. (1 Ko. 10:13; Sakp. 5:17) Ka tou lau te ʼu hisitolia ʼaia, ʼe tou maʼu ai he ʼu ako ʼe lua. ʼUluaki, ʼe tou mahino ai ʼe mole ko tatou pe ʼae ʼe tau mo he ʼu fihifihia feia. Neʼe natou lava tauʼi pe la mo natou te ʼu fihifihia ʼaia. (1 Pet. 5:9) Pea lua, ʼe toe tokoni mai ke tou lava ʼutakiʼi ʼotatou ʼahiʼahi.—Loma 15:4.

5. Ko ai ʼae ʼe fakaʼaogaʼi e Sehova moʼotatou takitaki ʼi te ala ʼae ʼe ina ʼave tatou ki te maʼuli?

⁵ ʼE toe fakaʼaogaʼi e Sehova ʼotatou tehina mo tuagaʼane moʼotatou takitaki.b Ohage la, ʼe ʼaʼahi e te ʼu taupau ʼo te siliko ia te ʼu kokelekasio moʼo fakalotomalohiʼi natou. ʼE tokoni mai ʼanatou akonaki ke tou fakamalohiʼi tatatou tui pea ke tou taupau maʼu tatatou logo tahi. (Gaue 15:40–16:5) ʼE toe tokaga fakamalotoloto ia te kau tagata ʼafeā ki te ʼu tehina mo tuagaʼane takitokotahi. (1 Pet. 5:2, 3) ʼE tokoni te ʼu matuʼā ki ʼanatou fanau ʼi te faʼahi fakalaumalie. ʼO feafeaʼi? ʼO natou tokoni kia natou ke natou fakaʼaogaʼi ʼonatou fealagia fakakaukau pea mo maʼu he ʼu agamahani ʼe lelei. (Taag. 22:6) Pea ʼe toe tokoni te ʼu tuagaʼane fakapotopoto ki te ʼu tuagaʼane kei finemui. ʼE natou fai te faʼahi ʼaia ʼaki hanatou tuku he faʼifaʼitaki lelei, pea mo foaki he ʼu tokoni ʼaoga pea mo fakalotomalohi.—Tito 2:3-5.

6. Kotea ʼae ʼe tonu ke tou fai ke fua lelei kia tatou te takitaki ʼa Sehova?

⁶ ʼE takitaki tatou e Sehova ʼaki tana foaki mai te ʼu tokoni ʼae ʼe ʼaoga ki totatou maʼuli. ʼE feafeaʼi hatatou lotofakafetaʼi kia te ia ki te ʼu fakatuʼutuʼu ʼaia? ʼE tali fenei ia Taʼaga Lea 3:5, 6: “Falala kia Sehova ʼi tou loto katoa, kae ʼaua naʼa ke falala ki tou ʼatamai.” Ka tou fai feia, ‘ʼe ina fakatotonu anai ʼotatou ala,’ ko tona fakaʼuhiga, ʼaki tana tokoni, ʼe mole tou tau anai mo ni tuʼuga fihifihia, kae, ʼe tou fiafia lahi anai. ʼE tou lotofakafetaʼi lahi kia Sehova ʼi tana tokagaʼi totatou aluʼaga pea mo foaki mai te ʼu tokoni ʼae ʼe ʼaoga ki ai.—Pes. 32:8.

ʼE FOAKI MAI E SEHOVA TE ʼU MEʼA ʼAE ʼE ʼAOGA KIA TATOU

7. ʼE foaki feafeaʼi mai e Sehova te ʼu meʼa ʼae ʼe ʼaoga kia tatou? (Filipe 4:19)

⁷ Lau ia Filipe 4:19. ʼE mole gata pe ki totatou takitaki e Sehova ʼi te faʼahi fakalaumalie, kae ʼe ina toe tapuakinaʼi ʼatatou faiga ʼae ke tou maʼu hatatou meʼa kai, mo hatatou meʼa laofi pea mo hotatou nofoʼaga. (Mat. 6:33; 2 Tes. 3:12) ʼE mole kovi hatatou tuʼania ki te ʼu meʼa ʼae ʼe ʼaoga kia tatou ʼi te faʼahi fakasino. Kae ʼe fakalotomalohiʼi tatou e Sehova ke ʼaua naʼa tou tuʼania fau ki te ʼu faʼahi ʼaia. (Mat. 6:25) Kotea tona tupuʼaga? Koteʼuhi ʼe mole ina liʼaki anai ʼi he temi ʼana kaugana agatonu moka natou nofo ʼi te mamahi. (Mat. 6:8; Hep. 13:5) Koia, ʼe tou tui papau ʼe ina foaki mai anai te ʼu meʼa ʼae ʼe ʼaoga kia tatou, koteʼuhi ʼe ina fakahoko moʼoni anai.

8. Neʼe tokoni feafeaʼi ia Sehova kia Tavite?

⁸ Tou vakaʼi pe neʼe tokoni feafeaʼi ia Sehova kia Tavite. ʼI te temi ʼae neʼe maʼuli feholaʼaki ai ia Tavite, neʼe foaki age e Sehova kia ia mo ʼana tagata te ʼu meʼa ʼae neʼe ʼaoga ki tonatou maʼuli. Neʼe toe fakakaukauʼi e Tavite ia te tokaga lelei ʼa Sehova kia ia ʼi te temi ʼaia. Koia neʼe ina tohi fenei ai: “Neʼe au tupulaga kae ʼi te temi nei kua au matuʼa, kae neʼe heʼeki au sio kua liʼakina te tagata faitotonu, peʼe kumi moʼi pane ʼana fanau.” (Pes. 37:25) ʼE mahino ia, neʼe ke toe sio mo koe ki te tokaga lelei ʼa Sehova ki ʼana kaugana agatonu ʼi te ʼu temi faigataʼa.

9. ʼE foaki feafeaʼi e Sehova te ʼu meʼa ʼae ʼe ʼaoga ki ʼana kaugana ʼae neʼe tau mo ni tuʼutamaki fakanatula? (Vakaʼi mo te ʼu pāki.)

⁹ ʼE toe foaki e Sehova te ʼu meʼa ʼae ʼe ʼaoga ki ʼana kaugana ʼae neʼe tau mo ni tuʼutamaki fakanatula. ʼI te ʼuluaki sekulo, neʼe hoko te hoge ʼi Sutea, pea neʼe momoli e he ʼu tehina mai te ʼu fenua kehekehe ia he tokoni kia ʼonatou tehina mo tuagaʼane. (Gaue 11:27-30; Loma 15:25, 26) Ia ʼaho nei, ʼe toe lotofoaki feia ia te ʼu kaugana ʼa te ʼAtua. Ka hoko he ʼu tuʼutamaki, ʼe fakaha e Sehova ia tona ʼofa. ʼE ina uga ʼana kaugana ke natou momoli te ʼu meʼa ʼae ʼe ʼaoga tafito ki te ʼu fenua ʼae neʼe hoko ai he tuʼutamaki. Ohage la ko te meʼa kai, mo te vai mo te ʼu mutuʼi meʼa pea mo te ʼu faitoʼo. Ka maumau he ʼu ʼapi pea mo he ʼu Fale Fono, ʼe olo he ʼu kutuga laga fale ʼo toe faʼu. Pea ʼe foimo tokoni atu aipe ia te ʼu kaugana ʼa Sehova kia natou ʼaia neʼe maumau ʼonatou ʼapi, peʼe neʼe mate he tahi neʼe natou ʼofa mamahi ai. ʼE natou foaki he ʼu fakalotofimalie mo he ʼu fakalotomalohi ke malohi tuʼumaʼu pe ia tanatou tui.c

10-11. Kotea ʼe tou ako mai te faʼifaʼitaki ʼo Borys?

¹⁰ ʼE toe fiafia ia Sehova ʼi te tokoni kia natou ʼae ʼe heʼeki tauhi age kia te ia. Kapau ʼe tou fia faʼifaʼitakiʼi ia ia, tou kumi he ʼu faigamalie ke tou agalelei kia natou ʼae ʼe mole tauhi fakatahi mo tatou kia Sehova. (Kal. 6:10) ʼE feala ke tou tuku ai ia he faʼifaʼitaki lelei. Tou vakaʼi ia te faʼifaʼitaki ʼo Borys. Neʼe ko te pule faiako pea neʼe maʼuli ʼi Ukraine. Neʼe mole ko he Fakamoʼoni ʼa Sehova, kae neʼe agalelei tuʼumaʼu mo tana kau tamaliki ako ʼae neʼe tauhi kia Sehova. Pea neʼe fakaʼapaʼapa ki tanatou tauhi. Neʼe hoko te tau ʼi te kolo ʼae neʼe maʼuli ai, pea neʼe tonu ke hola ki he tahi age kolo ke mole hoko he meʼa ki ai. Pea neʼe tokoni ki ai ʼotatou tehina mo tuagaʼane. Ki muli age, neʼe kau ia Borys ki te ʼAho Fakamanatu ʼo te mate ʼo Kilisito. Neʼe ina toe fakakaukauʼi te aga ʼae neʼe fai age e te kau Fakamoʼoni ʼa Sehova kia ia. Koia neʼe ina ui fenei: “Neʼe natou tokakaga lelei kia au, pea mo natou fakapelepeleʼi au. Koia, ʼe au lotofakafetaʼi lahi kia natou.”

¹¹ ʼE feala ke tou faʼifaʼitakiʼi te manavaʼofa ʼo tatatou Tamai ʼae ʼe ʼi selo. ʼO feafeaʼi? ʼAki hatatou ʼoʼofa kia natou ʼae ʼe nofo ʼi te mamahi, tatau aipe pe ʼe natou tauhi fakatahi mo tatou kia Sehova peʼe kailoa. (Luka 6:31, 36) Ka tou fakaha te ʼofa ʼaia ki te hahaʼi, ʼe tou fakaʼamu ʼe uga ai anai natou ke natou liliu ko he ʼu tisipulo ʼa Kilisito. (1 Pet. 2:12) Pe ʼe natou liliu ko ni tisipulo peʼe kailoa, kae ʼe tou fiafia anai, koteʼuhi ʼe lahi age tatatou fiafia moka ʼe tou foaki.—Gaue 20:35.

ʼE PUIPUI TATOU E SEHOVA

12. Kotea ka fai e Sehova ki tana hahaʼi? (Pesalemo 91:1, 2, 14)

¹² Lau ia Pesalemo 91:1, 2, 14. ʼE fakapapauʼi mai e Sehova ʼe ina puipui anai tatou ʼi te faʼahi fakalaumalie. ʼE mole ina tuku anai ia Satana ke ina taʼofi te tauhi age ʼa te hahaʼi kia te ia. (Soa. 17:15) Pea ʼe tou tui papau ka hoko anai “te toe mamahi lahi,” ʼe puipui anai e Sehova tana hahaʼi ʼi te faʼahi fakalaumalie pea mo te faʼahi fakasino.—Fkha. 7:9, 14.

13. ʼE puipui feafeaʼi ia tatou takitokotahi e Sehova?

¹³ ʼE puipui feafeaʼi ia tatou takitokotahi e Sehova? ʼE ina foaki mai tana Folafola moʼo akoʼi ʼaki tatou ke tou iloʼi te meʼa ʼae ʼe lelei mo ʼae ʼe kovi. (Hep. 5:14) Ka tou maʼuliʼi te ʼu pelesepeto ʼae ʼe tuʼu ai, ʼe tou puipui ai ia tatou mai te ʼu tuʼutamaki ʼe feala ke hoko kia tatou ʼi te faʼahi fakalaumalie mo te faʼahi fakasino. (Pes. 91:4) Pea tahi, ʼe fakaʼaogaʼi e Sehova te kokelekasio moʼo puipui ʼo tatou. (Esa. 32:1, 2) ʼE lelei ke tou fakatahi mo natou ʼae ʼe ʼoʼofa ia Sehova pea mo maʼuliʼi ʼana pelesepeto. Ka tou fakatahi mo natou, ʼe tou maʼu ai he ʼu fakalotomalohi pea mo tou lava tekeʼi ai ia te ʼu fakaneke ʼae ʼe kovi.—Taag. 13:20.

14. (1) He koʼe ʼe mole puipui tuʼumaʼu tatou e Sehova ia aluʼaga fuli? (2) Kotea ʼae ʼe fakapapauʼi mai ia Pesalemo 9:10? (Vakaʼi mo te nota.)

¹⁴ ʼI te temi muʼa, neʼe puipui e Sehova ʼana kaugana ke ʼaua naʼa natou lavevea peʼe ke matehi natou. Kae neʼe mole ina fai tuʼumaʼu te faʼahi ʼaia. ʼE ui ʼi te Tohi-Tapu, ʼe feala ke hoko kia tatou fuli he ʼu “aluʼaga fakapunamaʼuli.” (Ekl. 9:11) Pea tahi, neʼe tuku e Sehova ʼihi ʼo ʼana kaugana ke fakatagaʼi, peʼe ke matehi ke fakamoʼoni ai ko Satana ʼe gutu loi. (Sopo 2:4-6; Mat. 23:34) Pea ʼe toe feia pe ia ʼaho nei. Logo la ʼe mole toʼo e Sehova ʼotatou ʼahiʼahi, kae ʼe tou tui papau ʼe mole ina liʼaki anai ʼi he temi ia natou ʼae ʼe ʼofa ai.d—Pes. 9:10.

ʼE FAKALOTOFIMALIEʼI TATOU E SEHOVA

15. ʼE fakalotofimalieʼi feafeaʼi tatou e Sehova? (2 Kolonito 1:3, 4)

¹⁵ Lau ia 2 Kolonito 1:3, 4. ʼI ʼihi temi, ʼe tou lotomamahi pea mo tuʼania. ʼE ke tau koa mo he aluʼaga ʼe ke tuʼania ai pea mo ke logoʼi ai tau nofo tokotahi? ʼE ʼi ai koa he tahi ʼe mahino ki te ʼu meʼa ʼae ʼe ke logoʼi? ʼEi, ʼe ko Sehova. ʼE mole gata pe ki tana mahino ki totatou mamahi, kae ʼe ina toe “fakafimalieʼi tatou ʼi ʼotatou ʼahiʼahi fuli.” ʼO feafeaʼi? Ka tou fakaha age kia te ia te ʼu meʼa ʼae ʼi ʼotatou loto, ʼe ina foaki mai anai tona ‘tokalelei ʼae ʼe maʼoluga age ia meʼa fuli ʼae ʼe mahino ki ai te tagata.’ (Flp. 4:6, 7) ʼE tou toe maʼu ʼi te Tohi-Tapu he fakafimalie, he ʼe ina fai mai ai he ʼu palalau fakalotofimalie. ʼE fakaha mai ai e Sehova ʼe ʼofa mamahi ia tatou, mo ina akoʼi mai pe ʼe feafeaʼi hatatou maʼu te poto, pea mo ina foaki mai ai he ʼamanaki. ʼI tatatou iloʼi te faʼahi ʼaia, ʼe tou toe maʼu ai ia te fiafia. Pea tahi, ʼe fakalotomalohi kia tatou ia te ʼu fono, he ʼe tou fakatahi ai mo hotatou ʼu tehina mo tuagaʼane ʼe ʼoʼofa ia tatou. Pea ʼe tou toe maʼu ai he ʼu fakalotomalohi ʼi te Tohi-Tapu.

16. Kotea te ako ʼe ke maʼu mai te faʼifaʼitaki ʼo Nathan pea mo Priscilla?

¹⁶ Tou vakaʼi te faʼifaʼitaki ʼo Nathan mo Priscilla, ko he taumatuʼa mai Amelika. ʼE ha ʼi te aluʼaga ʼae neʼe hoko kia naua, ʼe tou maʼu he ʼu fakalotofimalie mai ia Sehova pea mo he ʼu fakalotomalohi mai tana Folafola. ʼI ni taʼu ki muʼa atu, neʼe nā fakatuʼutuʼu ke nā maʼuʼuli ʼi he koga meʼa ʼe ʼaoga lahi ai he kau faifakamafola. ʼE ui fenei e Nathan: “Neʼe mā tui papau ʼe tapuakinaʼi anai e Sehova te tonu ʼae neʼe mā fai.” Kae ʼi tanā taua atu ki te koga meʼa ʼaia, neʼe nā tau mo he ʼu mahaki pea mo he ʼu fihifihia fakapaʼaga neʼe mole nā ʼamanaki ki ai. Neʼe nā toe liliu leva ki tonā fenua, kae neʼe hoko atu pe tanā tau mo te ʼu fihifihia fakapaʼaga. ʼE ui fenei e Nathan: “Neʼe mā feuiʼaki pe koʼe neʼe mole tapuakinaʼi maua e Sehova ohage ko tamā fakaʼamu ki ai. Pea neʼe au manatu lagi neʼe au fai he meʼa ʼe kovi.” Kae ʼaki te temi, neʼe mahino leva ia Nathan mo Priscilla, neʼe mole liʼaki naua e te ʼAtua. ʼE ui fenei e Nathan: “ʼI te ʼu temi faigataʼa ʼaia, neʼe tokoni lahi mai te Tohi-Tapu kia maua, he neʼe mā maʼu ai he ʼu tokoni fakapotopoto, mo lelei pea mo fakalotomalohi. Neʼe mā ako ke mā tokakaga tafito ki te tokoni mai ʼa Sehova ke mā faʼa kataki, kae mole ki tomā ʼu fihifihia. ʼI te temi ʼaeni, ʼe mā falala kia Sehova ʼe tokoni mai ke mā lava tauʼi te ʼu fihifihia ka hoko mai.”

17. Neʼe fakalotofimalieʼi feafeaʼi ia Helga? (Vakaʼi mo te pāki.)

¹⁷ ʼE feala ke toe fakalotofimalieʼi tatou e ʼotatou tehina mo tuagaʼane. Ko te aluʼaga ʼaia neʼe tokagaʼi e Helga, ʼae ʼe maʼuli ʼi Hongrie. Lolotoga ni taʼu, neʼe tau mo ni fihifihia kehekehe ʼo tupu ai tana lotohoha mo tana manatu ʼae ʼe mole hona ʼaoga. Kae ia ʼaho nei, ʼe ina iloʼi neʼe fakalotofimalieʼi tuʼumaʼu ia ia e Sehova ʼaki ia te kokelekasio. Neʼe ina tohi fenei: “Neʼe au taʼomia ʼuhi ko taku gaue, mo taku tokaga ki taku fanau ʼae ʼe mahaki pea mo ʼihi atu faigataʼaʼia. Kae neʼe sio ifo ia Sehova pea mo tokoni mai. Neʼe mole he ʼaho neʼe liʼaki ai au e Sehova. ʼI te ʼu taʼu ʼaia e 30, neʼe ina fakalotofimalieʼi tuʼumaʼu pe ia au. ʼE ina fakaʼaogaʼi tuʼumaʼu pe ia te ʼu tehina mo tuagaʼane moʼo fakalotomalohiʼi au. ʼE au logoʼi ai hoku ʼofainaʼi moka natou fai mai he ʼu palalau lelei pea mo tokagaʼi au. ʼE faitohi tuʼumaʼu mai he tahi mo momoli mai he kiʼi kate, peʼe fakamalo mai ʼi te temi tonu pe ʼae neʼe au mamahi ai.”

18. ʼE feafeaʼi hatatou fakalotofimalieʼi ʼihi?

¹⁸ ʼE tou maʼu te pilivilesio ʼae ke tou faʼifaʼitakiʼi totatou ʼAtua. Koia, ʼe feafeaʼi hatatou faʼifaʼitakiʼi ia ia pea mo fakalotofimalieʼi ʼihi? ʼAki hatatou fagono lelei kia natou mo he kataki fualoa, mo tou fai age he ʼu palalau fakalotofimalie pea mo tokoni kia natou. (Taag. 3:27) Tou faiga malohi ke tou fakalotofimalieʼi ia natou fuli ʼae ʼe mamahi, ʼo kau ai mo natou ʼae ʼe heʼeki tauhi kia Sehova. Pea ka tau te hahaʼi mo te mamahi, peʼe ko te mahaki, peʼe ko te hoha, tou olo ʼo fakasiosio natou, mo fagono lelei kia natou pea mo vaevae mo natou he ʼu manatu fakalotomalohi ʼi te Tohi-Tapu. Kotea te ʼu fua lelei ka tou maʼu moka ʼe tou faʼifaʼitaki ia Sehova, “te ʼAtua ʼae ʼe ina fakafimalieʼi te hahaʼi ʼi te ʼu aluʼaga kehekehe”? ʼE tou tokoni anai ki ʼotatou tehina mo tuagaʼane ke natou katakiʼi ʼonatou ʼahiʼahi. Pea ʼe tou feala ke tou toe fakafimalieʼi te loto ʼo natou ʼae ʼe heʼeki tauhi kia Sehova, mo fakatupu ai ia natou hanatou fia iloʼi ia ia.—Mat. 5:16.

ʼE NOFO TUʼUMAʼU PE IA SEHOVA MO TATOU

19. Kotea ʼae ʼe fai e Sehova maʼa tatou? Pea ʼe feafeaʼi hatatou faʼifaʼitakiʼi ia ia?

¹⁹ ʼE tokaga moʼoni ia Sehova kia natou fuli ʼae ʼe ʼoʼofa ia ia. ʼE mole liʼaki anai tatou moka tou tau mo ni fihifihia. ʼE tokaga he tamai fonu ʼi te ʼofa ki hana fanau. Pea ʼe toe feia pe mo Sehova ʼe tokaga lelei ki ʼana kaugana agatonu. ʼE ina takitaki tatou, mo foaki mai te ʼu meʼa ʼae ʼe ʼaoga kia tatou, mo ina puipui pea mo fakalotofimalieʼi tatou. ʼE tou faʼifaʼitakiʼi anai tatatou Tamai ʼae ʼe ʼi selo moka tou tokoni mo fakalotomalohiʼi ia natou ʼae ʼe tau mo ni fihifihia. Tatau aipe pe ʼe tou tau mo ni fihifihia peʼe tou lotomamahi, kae ʼe tou falala ʼe nofo Sehova mo tatou, koteʼuhi neʼe ina fakapapauʼi mai: “ʼAua naʼa ke mataku he ʼe au nofo mo koe.” (Esa. 41:10) ʼE fakalotofimalie mo fakalotomalohi ia te fakapapau ʼaia! Koia, ʼe mole tou nofo tokotahi anai ʼi he temi.