Tokoni Ki ʼAu Ako Ke Natou Tauhi Kia Sehova

1-2. (1) He koʼe ʼe lotolotolua ʼihi kau ako ke natou tauhi kia Sehova? (2) Kotea ʼae ka tou vakaʼi ʼi te alatike ʼaeni?

NEʼE ke lotolotolua koa ke ke liliu ko he Fakamoʼoni ʼa Sehova? Neʼe ke tuʼania koa naʼa fakafeagai atu ʼou kauga gaue, mo ʼou kaumeʼa peʼe ko tou famili? Neʼe ke manatu koa ʼe mole feala hau muliʼi te ʼu lekula ʼa te ʼAtua? Kapau ʼe ke ʼio ki te ʼu fehuʼi ʼaia, pea ʼe feala hau mahino ki te kau ako ʼae ʼe lotolotolua ke natou tauhi kia Sehova.

² Neʼe iloʼi e Sesu ʼe mole tuputupu he tahi ʼi te faʼahi fakalaumalie ʼuhi ko te taʼi ʼu tuʼania ʼaia. (Mat. 13:20-22) Kae neʼe mole ina tuku feiaʼi ia natou ʼae ʼe lotolotolua ke natou muliʼi ia ia. Neʼe ina fakaha ki ʼana tisipulo pe ʼe feafeaʼi hanatou tokoni kia natou, (1)  ke natou mahino pe koʼe ʼe mole natou tuputupu, (2) ke natou fakamalohiʼi tonatou ʼofa kia Sehova, (3) ke natou toe fakasiosio te ʼu meʼa ʼae ʼe tonu ke natou fakamuʼamuʼa, pea (4) ke natou katakiʼi te fakafehagai. ʼI te alatike ʼaeni, ʼe tou vakaʼi anai pe ʼe feafeaʼi hatatou tokoni ki ʼatatou ako ke natou tauhi kia Sehova. Koia, ʼe tou vakaʼi anai pe ʼe feafeaʼi hatatou muliʼi te faʼifaʼitaki ʼae neʼe tuku e Sesu ki ʼana tisipulo moka tou faiako ʼaki te tohi Ke Ke Fiafia ʼo Heʼe Gata.

TOKONI KI TAU AKO KE MAHINO PE KOʼE ʼE MOLE TUPUTUPU

3. Kotea te aluʼaga neʼe faigataʼa ai kia Nikotemo ke liliu ko he tisipulo ʼa Sesu?

³ Ko Nikotemo, neʼe ko he pule Sutea mo maʼu tuʼulaga. Neʼe fia liliu ko he tisipulo ʼa Sesu, kae neʼe ʼi ai te aluʼaga neʼe faigataʼa kia ia. Hili pe ki ai teitei mahina ʼe ono ki te kamata e Sesu tana minisitelio, neʼe mahino ia Nikotemo ko Sesu, neʼe ko te fakafofoga ʼo te ʼAtua. (Soa. 3:1, 2) Kae neʼe ‘mataku ʼi te kau Sutea,’ koia neʼe alu fakafufu ai kia Sesu. (Soa. 7:13; 12:42) Neʼe lagi mataku naʼa toʼo tona tuʼulaga moka neʼe liliu ko he tisipulo ʼa Sesu.a

4. Neʼe tokoni feafeaʼi ia Sesu kia Nikotemo ke mahino ki te meʼa ʼae ʼe loto e Sehova ke ina fai?

⁴ Neʼe iloʼi e Nikotemo te Lao, kae neʼe ʼaoga ke tokoni age he tahi ke mahino ki te meʼa ʼae ʼe loto e Sehova ke ina fai. Kotea ʼae neʼe fai e Sesu? Neʼe lahi te temi ʼae neʼe ina fakaʼaogaʼi maʼa Nikotemo. Neʼe ina tali pe ke nā faipalalau ʼi te poʼuli. Pea neʼe ina fakamahino lelei age te meʼa ʼae ʼe tonu ke ina fai ke liliu ai ko hana tisipulo. Neʼe tonu ke fakahemala ki ʼana agahala mo papitema ʼi te vai pea ke tui kia te ia.—Soa. 3:5, 14-21.

5. Kotea ʼe feala ke tou fai moʼo tokoni ki he ako ke mahino pe koʼe ʼe mole tuputupu?

⁵ Logo la neʼe kua mahino ia ia ʼae ʼe ako ki te ʼu moʼoni Fakatohi-tapu, kae ʼe ʼaoga ki ai he tokoni ke mahino pe koʼe ʼe mole tuputupu. ʼE lagi mole ina lava fakahoko ʼana fakatuʼutuʼu fakalaumalie ʼuhi ko tana gaue, peʼe ko te fakafehagai age ʼo tona famili. Koia, ke ke toʼo he temi ke ke fakatahi ai mo tau ako. Ohage la, ʼe feala hakolua olo ʼo kakai fakatahi, peʼe olo ʼo haʼele. Kapau ʼe ke fai feia, ʼe feala anai hau uga ia ia ke ina fakaha atu tona ʼu faigataʼaʼia. Ke ke toe fakalotomalohiʼi ke ina fai ia fetogi fuli pe ʼe ʼaoga ʼi tona maʼuli, pea ke ina fai moʼo fakaha ʼe ʼofa ia Sehova, kae ʼe mole ina fia fakafiafiaʼi koe.

6. ʼE feafeaʼi hau tokoni ki hau ako ke lotomalohi ʼo tauhi kia Sehova? (1 Kolonito 16:13)

⁶ Kapau ʼe tui papau ia ia ʼae ʼe ako ʼe tokoni age anai ia Sehova ke fakalogo ki ʼana lekula, ʼe lotomalohi anai ke ina maʼuliʼi te ʼu meʼa ʼae ʼe ina ako. (Lau ia 1 Kolonito 16:13.) ʼE feala ke fakatatau koe ki he tagata faiako. Kei ke manatuʼi la te temi ʼae neʼe ke alu ai ʼo ako? Neʼe ko te faiako fea ʼae neʼe ke leleiʼia? ʼE lagi ke manatuʼi he faiako neʼe faʼa kataki ʼo ʼuhiga mo koe, pea neʼe tokoni atu ke lava lelei tau ako. Pea ʼe toe feia pe mo ia ʼae ʼe ina fai te ako Tohi-Tapu. ʼE mole ina akoʼi pe ki tana ako te meʼa ʼae ʼe loto e Sehova ke ina fai. ʼE ina toe fakalotomalohiʼi ia ia ʼe tokoni age anai te ʼAtua ke ina lava fai te ʼu fetogi fuli ʼi tona maʼuli. ʼE feafeaʼi hau liliu ko he faiako feia?

TOKONI KI TAU AKO KE INA FAKAMALOHIʼI TONA ʼOFA KIA SEHOVA

7. Kotea neʼe fai e Sesu moʼo tokoni kia natou ʼae neʼe fagono age ke natou fakatuputupu tonatou ʼofa kia Sehova?

⁷ Neʼe iloʼi e Sesu kapau ʼe maʼuliʼi e ʼana tisipulo te ʼu meʼa ʼae ʼe natou ako, pea ʼe natou fai pe ʼuhi ko tonatou ʼofa ki te ʼAtua. Koia ʼae, neʼe ina akoʼi tuʼumaʼu age kia natou he ʼu manatu ke fakatuputupu ai tonatou ʼofa ki tanatou Tamai ʼae ʼe ʼi selo. Ohage la, neʼe ina fakatatau ia Sehova ki he tamai ʼe ina foaki he ʼu meʼa lelei ki hana fanau. (Mat. 7:9-11) Neʼe ʼi ai ʼihi ia natou ʼae neʼe fagono age neʼe mole ʼi ai hanatou tamai neʼe ʼofa ia natou. Pea ʼe mahino ia, neʼe malave ʼaupito kia natou te faʼifaʼitaki ʼa Sesu ʼo ʼuhiga mo he tamai neʼe manavaʼofa ki hona foha neʼe agatuʼu. Neʼe ina fakatalitali leleiʼi ia ia ʼi tana toe liliu mai ki fale. Neʼe feala ke natou logoʼi ai te manavaʼofa lahi ʼo Sehova ki ʼana fanau agahala.—Luka 15:20-24.

8. ʼE feafeaʼi hau tokoni ki tau ako ke ina fakamalohiʼi tona ʼofa kia Sehova?

⁸ ʼE lelei ke ke fakamaʼuhigaʼi te ʼu kalitate ʼo Sehova ʼi tau faiako. Kapau ʼe ke fai feia, ʼe ke tokoni anai ki tau ako ke ina fakamalohiʼi tona ʼofa kia te ia. Ka kolua faiako, tokoni ki ai ke mahino ki te pikipikiga ʼo te meʼa ʼae ʼe ina ako mo tona ʼofa kia Sehova. Ohage la, ka kolua vakaʼi te manatu ʼae ʼo ʼuhiga mo te totogi, fakamahino age ki ai neʼe toe mate ia Sesu maʼa ia. (Loma 5:8; 1 Soa. 4:10) Kapau ʼe metitasio tau ako ki te ʼofa ʼo Sehova kia ia totonu, ʼe uga ai anai ia ia ke ʼofa kia Sehova.—Kal. 2:20.

9. Kotea neʼe ina uga ia Mickael ke ina fetogi ia tona faʼahiga maʼuli?

⁹ Tou vakaʼi te faʼifaʼitaki ʼo Mickael, ʼae ko he Savane. Neʼe akoʼi age te moʼoni kei tupulaga, kae neʼe mole papitema. ʼI tona taʼu 18, neʼe alu ki tuʼa puleʼaga, pea neʼe ko tana gaue ko te sofea kamio. Ki muli age, neʼe toe liliu ki Indonésie ʼo ʼohoana ai. Kae neʼe hoko atu pe tana gaue ki tuʼa puleʼaga, ʼo mamaʼo mai tona kiʼi famili. Neʼe ako leva e tona ʼohoana mo tona ʼofafine te Tohi-Tapu pea neʼe nā tuputupu. Hili te mate ʼo tana faʼe, neʼe ina fakatotonu ke toe liliu ki Indonésie ʼo tokaga ki tana Tamai. Pea neʼe ina tali leva mo ia ke fai hana ako. Neʼe malave ʼaupito kia ia te ʼu manatu ʼae ʼi te “Ta Fakaloloto” ʼi te kapite 27 ʼo te tohi Ke Ke Fiafia ʼo Heʼe Gata. Neʼe tagi ʼi tana mahino ʼae ki te meʼa ʼae neʼe logoʼi e Sehova ʼi tana sio ifo ki te tali mamahi ʼo Siʼona ʼAlo. Neʼe lotofakafetaʼi lahi kia Sehova ki te totogi, koia neʼe uga ai ia ia ke ina fetogi tona faʼahiga maʼuli pea mo papitema.

TOKONI KI TAU AKO KE INA TOE FAKASIOSIO TE ʼU MEʼA ʼAE KE INA FAKAMUʼAMUʼA

10. Neʼe tokoni feafeaʼi ia Sesu ki ʼana ʼuluaki tisipulo ke nā toe fakasiosio te ʼu meʼa ʼae ke nā fakamuʼamuʼa? (Luka 5:5-11) (Vakaʼi mo te pāki.)

¹⁰ Neʼe iloʼi vave e te ʼu tisipulo ʼa Sesu ko ia te Mesia ʼae neʼe fakapapauʼi mai. Kae neʼe ʼaoga kia natou he tokoni ke natou fakamuʼamuʼa te minisitelio. Neʼe kua fualoa te liliu ʼa Petelo mo Atelea ko ʼana tisipulo ʼi tana fakaafe naua ke nā muliʼi tuʼumaʼu ia ia. (Mat. 4:18, 19) Neʼe nā gaue fakatahi ʼi te gelu pea neʼe haʼele lelei tanā gaue ʼaia. Pea neʼe toe gaue fakatahi mo naua ia Sakopo mo Soane. (Mko. 1:16-20) Neʼe tuku e Petelo mo Atelea ʼonā kupega kae nā muliʼi ia Sesu. ʼE mahino ia, neʼe nā fai he ʼu fakatuʼutuʼu ke hoko atu pe tana tokakaga ki ʼonā kiʼi famili. Kotea ʼae neʼe ina uga naua ke nā toe fakasiosio te ʼu meʼa ʼae ke nā fakamuʼamuʼa? ʼE talanoa te Evaselio ʼo Luka ki he milakulo neʼe fakahoko e Sesu. Neʼe tokoni ai kia naua ke nā tui papau neʼe lava tokoni Sehova kia naua ʼi te faʼahi fakasino.—Lau ia Luka 5:5-11.

11. Kotea ʼae ʼe hoko moka tou fakamatala age ki tatatou ako te ʼu aluʼaga neʼe hoko ʼi totatou maʼuli?

¹¹ ʼE mole feala ke tou fakahoko he ʼu milakulo ohage ko Sesu. Kae ʼe feala ke tou fakamatala age ki ʼatatou ako he ʼu aluʼaga neʼe hoko ʼi totatou maʼuli pea mo ʼae neʼe hoko ki ʼihi. Ka tou fai feia, ʼe tou fakaha ai ʼe tokoni Sehova kia natou ʼae ʼe natou fakamuʼamuʼa ia Ia ʼi tonatou maʼuli. Ohage la, neʼe tokoni feafeaʼi atu ia Sehova ʼi tau kau ki te ʼu fono? Neʼe ke palalau koa mo tou patolo ʼo fakamahino age pe koʼe mole feala ke ke fai he ʼu hola fakalaka ʼi te ʼu ʼaho fono? Ke ke fakamatala age ki tau ako te fahaʼi ʼaia, ʼo fakamahino age neʼe malohi tau tui ʼi tau sio ki te tokoni atu ʼa Sehova ʼi tau fakamuʼamuʼa ia te tauhi kia te ia.

12. (1) He koʼe ʼe tonu ke tou fakaafe ʼihi tehina mo tuagaʼane ke kau ki tatatou ako? (2) Kotea ʼe feala ke ke fakaʼaogaʼi moʼo uga tau ako ke fai hana ʼu fakatuʼutuʼu? Tuku mai he faʼifaʼitaki.

¹² ʼE toe fua lelei anai ki tau ako moka ina iloʼi pe neʼe toe fakasiosio feafeaʼi e ʼihi tehina te ʼu meʼa ʼae ke natou fakamuʼamuʼa. Koia, fakaafe he ʼu tehina mo tuagaʼane ʼe mole tatau ʼonatou aluʼaga ʼae neʼe hoko ʼi ʼonatou maʼuli ʼi muʼa atu, ke natou kau ki tana ako. Kole age ke natou fakamatala atu pe neʼe natou iloʼi feafeaʼi te moʼoni, pea kotea ʼae neʼe natou fai ke natou fakamuʼamuʼa ia tanatou tauhi kia Sehova. Pea tahi, toʼo he temi ke ke sio mo tau ako ki te ʼu ʼata ʼae ʼi te “Ta Fakaloloto” pea mo “Te Tahi ʼu Manatu” ʼo te tohi Ke Ke Fiafia ʼo Heʼe Gata. Ohage la, ka kolua vakaʼi te kapite 37, fakamaʼuhigaʼi te ʼu pelesepeto ʼae ʼe talanoa ki ai te ʼata viteo ʼE Tokaga Ia Sehova Ki Te ʼu Meʼa ʼAe ʼe ʼAoga Kia Tatou.

TOKONI KI TAU AKO KE INA LAVA TAUʼI IA TE FAKAFEHAGAI

13. Neʼe teuteuʼi feafeaʼi e Sesu ʼana tisipulo ke natou lava tauʼi te fakafehagai?

¹³ Neʼe fakatokaga tuʼa lahi e Sesu ʼana tisipulo ʼe fakatagaʼi anai natou. Pea ʼe feala ke haʼu te fakataga ʼaia mai ʼonatou famili. (Mat. 5:11; 10:22, 36) Pea ʼi te fakaovi mai ʼo te fakaʼosi ʼo te minisitelio ʼa Sesu, neʼe ina fakatokaga age ʼe feala pe anai ke matehi natou. (Mat. 24:9; Soa. 15:20; 16:2) Koia ʼae neʼe ina fakalotomalohiʼi ai natou ke natou fakapotopoto ʼi tanatou faifakamafola. Neʼe ina toe tokoniʼi natou ke ʼaua naʼa natou fihi mo natou ʼae ʼe fakafehagai age kia natou. Kae ke natou fakapotopoto ke feala hanatou hoko atu tanatou faifakamafola.

14. ʼE feafeaʼi hatatou teuteuʼi tatatou ako ke ina lava tauʼi te fakafehagai? (2 Timoteo 3:12)

¹⁴ ʼE feala ke tou tokoni ki he ako ke nofo teuteu ki te fakafehagai. ʼO feafeaʼi? ʼAki hatatou fakamahino age pe ʼe feafeaʼi anai te aga ʼo tona ʼu kauga gaue, mo tona ʼu kaumeʼa, peʼe ko tona famili kia ia. (Lau ia 2 Timoteo 3:12.) ʼE feala anai ki ʼihi ʼo tona ʼu kauga gaue ke natou vaʼi te maʼuli ʼae kua alu ai. Peʼe feala ki ʼihi hahaʼi, maʼia mo ʼona famili totonu, ke natou valoki te ʼu akonaki ʼae ʼe tui ki ai. Ka tou teuteuʼi fakatomuʼa tatatou ako ke ina lava tauʼi te fakafehagai, pea ʼe faigafua anai ki ai hana tauʼi moka felaveʼi mo he fakafehagai.

15. Kotea ka tokoni anai ki tau ako ke lelei tana aga moka fakafehagai age te famili?

¹⁵ Kapau ʼe fakafeagai ʼihi ʼo tona famili ki ai, tokoni ki tau ako ke ina fakakaukauʼi te ʼu tupuʼaga ʼo tanatou aga feia. ʼE natou manatu koa neʼe kakaʼi koe? Pe ʼe nofo pe koa natou mo he ʼu manatu ʼe mole lelei ʼo ʼuhiga mo te kau Fakamoʼoni ʼa Sehova? Maʼia pe la mo Sesu neʼe tau mo he ʼu aluʼaga feia mai tona famili totonu. (Mko. 3:21; Soa. 7:5) Fakalotomalohiʼi tau ako ke faʼa kataki pea ke aga fakaʼeteʼete ki te hahaʼi fuli, kae tafito ki ʼona famili totonu.

16. ʼE feafeaʼi hatatou tokoni ki tatatou ako ke palalau ki tana tui ʼaki he aga fakaʼeteʼete?

¹⁶ Tatau aipe pe ʼe fia logo ʼihi ʼo te famili ʼo tau ako ki te moʼoni, kae ʼe lelei age ke ʼaua naʼa ina foimo fakamahino fuli age kia natou. ʼE maʼuhiga te fahaʼi ʼaia naʼa fokifa kua natou fiu pea mole kei fia palalau mo koe ki te moʼoni. Koia, fakalotomalohiʼi tau ako ke palalau ki tana tui. Kae ʼe tonu ke ina manatuʼi ʼe tonu ke hoko atu pe tanatou fia logo pea mo faipalalau ki te moʼoni. (Kol. 4:6) ʼE feala ke fakaafe natou ke natou olo ʼo vakaʼi tatatou tuʼasila jw.org. ʼE tokoni ai kia natou ke lahi age tanatou mahino ki te kau Fakamoʼoni ʼa Sehova.

17. ʼE feafeaʼi hau tokoni ki tau ako ke ina tali kia natou ʼae ʼe nonofo mo he ʼu manatu hala ki te kau Fakamoʼoni ʼa Sehova? (Vakaʼi mo te pāki.)

¹⁷ ʼE feala hau fakaʼaogaʼi te ʼu alatike ʼae ʼi te “Fehuʼi ʼe Fai Tuʼumaʼu” ʼi te jw.org. ʼE ke tokoni ai ki tau ako ke ina teuteu he ʼu tali ki he ʼu fehuʼi ʼe fai age e tona famili, peʼe ko tona ʼu kauga gaue. (2 Tim. 2:24, 25) Ka ʼosi he kapite, kolua vakaʼi te manatu “ ʼE Ui ʼe ʼIhi” ʼi te tohi Ke Ke Fiafia ʼo Heʼe Gata. Fakalotomalohiʼi tau ako ke ina akoako ke ina tali ʼaki pe ʼana palalau totonu. Kapau ʼe ke tokagaʼi ʼe tonu ke fetogi tana faʼahiga tali, pea ke foaki age he ʼu tokoni. ʼE tokoni age anai ki ai te faʼahiga fai ʼaia ke ina tauʼi tana tui ʼaki he lotofalala.

18. ʼE feafeaʼi hau fakalotomalohiʼi tau ako ke kau ki te minisitelio? (Mateo 10:27)

¹⁸ Neʼe fakatotonu e Sesu ke tala ʼe ʼana tisipulo te logo lelei ki te hahaʼi. (Lau ia Mateo 10:27.) Ka kamata palalau ia ia ʼae ʼe ako ki tana tui, pea ʼe toe lahi age anai tana ako ʼae ke falala kia Sehova. ʼE feafeaʼi hau tokoni ki tau ako ke ina fakatuʼutuʼu ke lagolago ki te minisitelio? Ka fakatuʼutuʼu he tufa makehe, fakalotomalohiʼi ia ia ke ina fakakaukauʼi ʼe feala ke liliu ko he kauga fagona. ʼE feala hau toe fakaha age te ʼu meʼa ʼae ʼe tonu ke ina fai ke faifakamafola. Fakamahino age ki ai pe koʼe ʼe faigafua ki te tokolahi tanatou kamata faifakamafola lolotoga he temi tufa feia. ʼE ina toe maʼu anai he ʼu fua lelei mai te ako ʼae ʼe fai ʼi ʼatatou fono ʼi te vahaʼa. ʼE ina ako ai anai pe ʼe feafeaʼi hana palalau ia muʼa ʼo te hahaʼi, ʼo feia mo te ʼu akonaki ʼae ʼe tui ki ai ʼaki he lotofalala. Koia, toe fakalotomalohiʼi ia ia ke ina fai te fakatuʼutuʼu ʼae ke ina fai hana ʼu kiʼi akonaki, peʼe faipalalau ʼi te ʼu fono ʼaia.

FAKAHA ʼE KE FALALA KI TAU AKO

19. Neʼe fakaha feafeaʼi e Sesu tana falala ki ʼana tisipulo? Pea ʼe feafeaʼi hatatou faʼifaʼitakiʼi ia ia?

¹⁹ ʼI muʼa ʼo te hake ʼa Sesu ki selo, neʼe ina ui ki ʼana tisipulo ʼe natou toe fakatahi fuli anai ʼi he ʼaho. Neʼe mole mahino ʼana tisipulo neʼe ina ui age ʼe natou olo anai ki selo. Kae neʼe tokagaʼi tafito pe e Sesu ia tanatou agatonu, kae mole ki tanatou lotolotolua. (Soa. 14:1-5, 8) Neʼe iloʼi e Sesu neʼe ʼaoga he temi kia natou ke natou mahino ki ʼihi moʼoni Fakatohi-tapu, ohage ko te ʼamanaki ʼae ke maʼuʼuli ʼi selo. (Soa. 16:12) ʼO toe feia pe mo tatou, tou falala ʼe fia fakafiafiaʼi anai e tatatou ako ia Sehova pea tou fakaha ʼe tou falala ki ai.

20. Neʼe fakaha feafeaʼi e te tuagaʼane mai Malawi ia tana falala ki tana ako?

²⁰ Tou falala tuʼumaʼu ʼe fai anai e tatatou ako te meʼa ʼae ʼe lelei. Tou vakaʼi te faʼifaʼitaki ʼo Chifundo, ko he tuagaʼane mai Malawi. Neʼe ina kamata he ako Tohi-Tapu ʼa he fafine Katolika ʼe higoa ko Alinafe, ʼaki te tohi Ke Ke Fiafia ʼo Heʼe Gata. Hili tanā vakaʼi te kapite 14, neʼe ina fehuʼi age pe kotea tana manatu ki te fakaʼaogaʼi ʼo te ʼu fakatata ʼi te tauhi ki te ʼAtua. Neʼe ui fenei e Alinafe: “Ko te koga ʼaia ʼe tahi fakalogo pe ia ki te tagata takitokotahi!” Neʼe feuiʼaki leva e Chifundo ʼe lagi tuʼu anai te fai ʼo tana ako, ʼaki te temi. Kae ʼaki he kataki fualoa, neʼe ina hoko atu pe te fai ʼo te ako ʼa Alinafe. Pea neʼe falala ʼe mahino anai ʼaki te temi ki te manatu ʼa Sehova. Hili ki ai ni kiʼi mahina, neʼe fai age e Chifundo te fehuʼi ʼaeni ʼe tuʼu ʼi te kapite 34: “Kotea te ʼu lelei neʼe ke maʼu talu tau ako te Tohi-Tapu pea mo tau iloʼi ia te ʼAtua moʼoni ko Sehova?” Kotea te tali ʼa Alinafe? Neʼe ui fenei e Chifundo: “Neʼe lahi te ʼu manatu lelei neʼe palalau ki ai kae tafito neʼe ina ui ʼe mole fai e te kau Fakamoʼoni ʼa Sehova te ʼu meʼa ʼae ʼe tapuʼi ʼi te Tohi-Tapu.” Mole fualoa ki ai, neʼe liʼaki e Alinafe tana tauhi ki te ʼu fakatata pea neʼe papitema leva.

21. ʼE feafeaʼi hatatou tokoni ki tatatou ako ke ina toʼo ia te tonu ʼae ke tauhi kia Sehova?

²¹ Logo la ʼe moʼoni “ko te ʼAtua ʼae ʼe ina haga fakatuputupu,” ke tuputupu ai ia tatatou ako, kae ʼe ʼi ai te gaue maʼuhiga ʼe tonu ke tou fai. (1 Ko. 3:7) ʼAua naʼa tou akoʼi age pe kia ia te meʼa ʼae ʼe loto e Sehova ke ina fai. Tou tokoni ki ai ke ina fakaha ʼe ʼofa mamahi ia Sehova. Tou toe fakalotomalohiʼi ia ia ke ina fakaha tona ʼofa kia te ia ʼaki hana toe fakasiosio te ʼu meʼa ʼae ʼe tonu ke ina fakamuʼamuʼa. Pea ʼe tou akoʼi age ki ai ke tuku tana falala kia Sehova moka tau mo te fakafeagai. Ka tou fakaha ʼe tou falala ki tatatou ako, ʼe tou fakamalohiʼi ai tana tui ʼae ʼe feala mo ia ke toe fakaʼapaʼapa ki te ʼu lekula ʼa Sehova, pea mo filifili ke tauhi kia te ia.