ʼE Feafeaʼi Hau Toe Manatuʼi He ʼu Vaega Tohi-Tapu?

Neʼe faigataʼa koa kia koe tau manatuʼi he vaega ʼe ke leleiʼia? ʼE lagi ko he vaega ʼe ina fakalotofimalieʼi koe, peʼe tokoni atu ke ke tauʼi he ʼu manatu ʼe kovi, peʼe ke fia vaevae mo he tahi. (Pes. 119:11, 111) Ka ke fakaʼaogaʼi te ʼu manatu ʼaeni, ʼe tokoni atu anai ke ke manatuʼi he ʼu vaega.

• Fakaʼaogaʼi te faʼahi ʼae ʼe feala hau fakailoga ʼaki he kupu ʼi te JW Library^®. Ke ke fai he fakailoga ʼo tohi ai “Vaega Tohi-Tapu ʼe Ke Leleiʼia,” pea ke tohi fuli leva ki ai te ʼu vaega ʼae ʼe ke loto ke ke toe manatuʼi.

• Fakatuʼu te vaega ʼi te faʼahi ʼae ʼe feala tau sio ki ai. Tohi ki he moʼi pepa te vaega ʼae ʼe ke fia manatuʼi, pea ke ʼai ki he fahaʼi ʼe feala tau sio tuʼumaʼu anai ki ai. Neʼe fakatuʼu ovi e ʼihi ki ʼanatou sioʼata pea fakatuʼu e ʼihi ʼi tanatou ʼaisi. ʼE toho e ʼihi te pāki ʼo te vaega ʼo fakatuʼu ʼi tanatou olotinatea peʼe ʼi tanatou kiʼi telefoni.

• Fakaʼaogaʼi he ʼu kiʼi moʼi pepa. Tohi te higoa ʼo te tohi, mo te kapite, mo te vaega ʼi te tahi faʼahi ʼo te moʼi pepa. Kae ke ke tohi ʼi te tahi faʼahi ʼo te moʼi pepa ia te manatu ʼo te vaega. Pea ka ke lau ʼi te tahi faʼahi te manatu ʼo te vaega, faiga ke ke manatuʼi pe ʼe tuʼu ʼi te vaega Tohi-Tapu fea.