Neʼe Ke “Ako” Koa Te Maʼuli Fakafeʼauga?

1. Kotea te fakaʼuhiga ʼo te ui ʼae ke tou maʼuli fakafeʼauga?

ʼE KE fiafia koa ʼi te ʼu meʼa ʼae ʼe ke maʼu? Ko he tahi ʼe fiafia ʼi te ʼu meʼa ʼae ʼe ina maʼu, ʼe ina logoʼi hona toe fiafia pea mo te tokalelei ʼo te loto, he ʼe tokaga tafito ki te ʼu tapuakina ʼe ina maʼu. ʼE mole meo peʼe ita he ʼe mole ʼi ai he ʼu meʼa ʼe ina maʼu. ʼE mole fakaʼuhiga leva ʼe mole tou tuʼania ki he ʼu meʼa ʼe ʼaoga mai kia tatou. Ohage la, ʼe ko he fakatuʼutuʼu lelei ki he tehina peʼe ko he tuagaʼane hana kumi he ʼu faigamalie ke lahi age tana ʼu gaue kia Sehova. (Loma 12:1; 1 Tim. 3:1) Koia, ka maʼuli fakafeʼauga he tehina, ʼe ina taupau tuʼumaʼu pe anai tona fiafia, maʼia pe ʼe mole foaki fakavilivili age hona ʼu pilivilesio ʼe loto ki ai.

2. Kotea te ʼu fua kovi moka ʼe mole tou fiafia ʼi te ʼu meʼa ʼae ʼe tou maʼu?

² ʼE feala ke ʼi ʼai he ʼu fua kovi moka ʼe mole tou fiafia ʼi te ʼu meʼa ʼae ʼe tou maʼu. Ka mole fiafia ʼihi ʼi te ʼu meʼa ʼae ʼe natou maʼu, ʼe feala ke natou fai ni hola fakalaka ke natou totogi honatou ʼu koloa ʼe mole ʼaoga moʼoni kia natou. Kae meʼa fakaʼofaʼofa, neʼe kaihaʼa e ʼihi tehina mo tuagaʼane he falā peʼe ko he ʼu meʼa neʼe natou fia fai ki ai. Lagi neʼe natou feuiʼaki fenei: ‘ ʼE tonu pe ke au maʼu te foʼi falā ʼaia,’ ‘ ʼE ʼaoga mai neinei te foʼi falā ʼaia,’ ‘Pea hoki au huʼi anai ʼi he tahi ʼaho.’ Kae, ʼe tou iloʼi ko he faʼahiga kaihaʼa pe ʼe tou fai, ʼe mole leleiʼia e Sehova pea ʼe fakalainoaʼi ai ia ia. (Taag. 30:9) Neʼe iita ʼihi ʼi te mole foaki age honatou ʼu pilivilesio ʼi te kokelekasio. (Kal. 6:9) Koia ʼae neʼe natou fia fakagata ai tanatou tauhi ʼae kia Sehova. Kotea ʼe tupu ai ʼo te aga feia ʼa he kaugana ʼa Sehova? ʼE feala ke hoko te faʼahi ʼaia mo kapau ʼe manatu tuʼumaʼu ʼe mole fiafia ia ʼi te ʼu meʼa ʼae ʼe ina maʼu.

3. Kotea te ʼu palalau fakalotomalohi ʼe tou maʼu ia Filipe 4:11, 12?

³ ʼE feala kia tatou fuli ke tou fiafia pe ʼi te ʼu meʼa ʼae ʼe tou maʼu. Neʼe tohi e te apositolo ko Paulo, neʼe “au ako te maʼuli fakafeʼauga ʼi he ʼu aluʼaga pe ʼe au maʼuli ai.” (Lau ia Filipe 4:11, 12.) Neʼe tohi e Paulo te ʼu palalau ʼaia kae neʼe pilisoni. Kae, neʼe fiafia tuʼumaʼu pe. Neʼe “ina ako te maʼuli fakafeʼauga.” Kapau ʼe faigataʼa hatatou fiafia ʼi te ʼu meʼa ʼae ʼe tou maʼu, ʼe tokoni mai anai ʼana palalau mo te ʼu aluʼaga ʼae neʼe hoko ki ai, ke tou toe ako ai pe kotea te maʼuli fakafeʼauga. Pea ʼe tou mahino ai ʼe ʼaoga ki ai he ʼu faiga malohi. Koia, ʼe tonu ke tou ako ke tou fiafia pe ʼi te ʼu meʼa ʼae ʼe tou maʼu. ʼO feafeaʼi?

KE KE LOTOFAKAFETAʼI TUʼUMAʼU

4. He koʼe ʼe maʼuhiga ke tou lotofakafetaʼi lahi ki te ʼu meʼa ʼae ʼe ʼaoga tafito mai? (1 Tesalonika 5:18)

⁴ Ka lotofakafetaʼi he tahi, pea ʼe fiafia tuʼumaʼu pe ʼi te ʼu meʼa ʼae ʼe ina maʼu. (Lau ia 1 Tesalonika 5:18.) Ohage la, kapau ʼe tou lotofakafetaʼi lahi ki te ʼu meʼa ʼae ʼe ʼaoga tafito kia tatou, pea ʼe mahino ia ʼe mole tou manatuʼi tuʼumaʼu anai te ʼu meʼa ʼae ʼe tou fia fai ki ai. Kae, kapau ʼe tou fakakaukauʼi te ʼu gaue ʼe tou fai ʼi te temi nei maʼa Sehova, ʼe tou faiga anai ke tou fakahoko lelei, kae ke mole tou kumi ke tou fai he tahi ʼu gaue. Koia, ʼe fakalotomalohiʼi tatou e te Tohi-Tapu ke tou fakaha kia Sehova tatatou lotofakafetaʼi ʼi te faikole. Ka tou fai feia, ʼe tokoni mai anai ke tou logoʼi “te tokalelei ʼo te ʼAtua ʼae ʼe maʼoluga age ia meʼa fuli ʼae ʼe mahino ki ai te tagata.”—Flp. 4:6, 7.

5. He koʼe neʼe tonu ke lotofakafetaʼi ia te kau Iselaele? (Vakaʼi mo te pāki.)

⁵ Tou vakaʼi te aluʼaga ʼae neʼe hoko ki te kau Iselaele. Neʼe tuʼa lahi tanatou meo kia Sehova, he neʼe natou manatuʼi te meʼa kai ʼae neʼe natou kai ʼi Esipito. (Num. 11:4-6) ʼE moʼoni, neʼe mole faigafua te maʼuli ʼi te toafa. Kotea neʼe feala ke tokoni kia natou ke natou fiafia pe ʼi te ʼu meʼa ʼae neʼe natou maʼu? Neʼe tonu ke natou fakakaukauʼi ki te ʼu meʼa ʼae neʼe kua fai e Sehova maʼa natou pea ke natou lotofakafetaʼi. ʼI tanatou maʼuli popula ʼi Esipito pea mo tonatou gaohi koviʼi, neʼe fakato e Sehova he ʼu malaʼia ʼe hogofulu ki te fenua ʼaia. Hili tonatou fakaʼateainaʼi, neʼe natou ‘toʼo te siliva, mo te aulo pea mo te ʼu mutuʼi meʼa ʼa te kau Esipito.’ (Eke. 12:35, 36) Neʼe natou tau atu ki te Tai Kula pea neʼe mole ke ʼi ai honatou holaʼaga. Neʼe fai leva e Sehova he milakulo ʼo ina vaeluaʼi te tai. Pea ʼi te toafa, neʼe ina fafaga natou ʼi te ʼaho fuli ʼaki te mane. Kae he koʼe neʼe mole natou fiafia? Koteʼuhi neʼe mole natou lotofakafetaʼi ki te ʼu meʼa ʼae neʼe foaki age e Sehova, kae mole ʼuhi ko te mole ʼi ai hanatou meʼa kai.

6. ʼE feafeaʼi hatatou fakaha ʼe tou lotofakafetaʼi?

⁶ ʼE feafeaʼi hau fakaha ʼe ke lotofakafetaʼi? ʼUluaki, ke ke toʼo he temi ʼo fakakaukauʼi te ʼu lelei ʼae ʼe ke maʼu ʼi te ʼaho fuli pea mo fiafia ai. ʼE feala pe hau tohi he ʼu aluʼaga ʼe lua peʼe tolu ʼe ke lotofakafetaʼi lahi ai. (Tgl. 3:22, 23) Lua, ke ke fakaha tau lotofakafetaʼi. Ke ke fakamalo ki ʼihi ki te ʼu meʼa ʼae neʼe natou fai maʼa koe. Kae manatuʼi ʼo fakamalo tuʼumaʼu kia Sehova. (Pes. 75:1) Tolu, filifili hou ʼu kaumeʼa ʼe lotofakafetaʼi. Kapau ʼe ke maʼu hou ʼu kaumeʼa ʼe lotofakafetaʼi tuʼumaʼu, pea ʼe ke hage anai ko natou. ʼE toe feia pe moka ʼe mole tou fia maʼuli fakafeʼauga. (Tet. 1:26-28; 2 Tim. 3:1, 2, 5) Kapau ʼe tou kumi he ʼu faigamalie ke tou lotofakafetaʼi ai, pea ʼe mole tou iita anai.

7. Kotea ʼae neʼe fai e Aci ke tupu ai hana logoʼi hona fiafia moʼoni ʼi te ʼu meʼa ʼae ʼe ina maʼu?

⁷ Tou vakaʼi te faʼifaʼitaki ʼa te tuagaʼane ko Aci, ʼae ʼe maʼuli ʼi Indonésie. ʼE ina ui fenei: “Lolotoga te taʼi mahaki COVID-19, neʼe au fakatatau toku aluʼaga ki ʼae ʼo ʼoku tehina mo tuagaʼane. Pea neʼe mole au fiafia ai.” (Kal. 6:4) Kotea neʼe tokoni kia Aci ke ina fetogi tana faʼahiga sio? ʼE ina tali fenei: “Neʼe au kamata tokagaʼi tafito te ʼu tapuakina neʼe au maʼu ʼi te ʼaho fuli. Pea neʼe au fakakaukauʼi te ʼu meʼa taulekaleka neʼe au maʼu talu taku kau ki te kautahi ʼa Sehova. Koia, neʼe liliu leva ko haku agamahani taku lotofakafetaʼi kia Sehova. Neʼe au logoʼi ai hoku fiafia moʼoni ʼi te ʼu meʼa pe ʼe au maʼu.” Kapau ʼe ke nofo pe mo he ʼu manatu fakalotovaivai, ʼe feala koa ke ke fai ohage ko Aci?

TOKAGA TAFITO KI TE ʼU MEʼA ʼAE ʼE MAʼUHIGA PEA MO AGAVAIVAI

8. Kotea te hele ʼae neʼe to ki ai ia Paluke?

⁸ Neʼe mole fiafia ia te sikalaipe ʼa te polofeta ko Selemia ko Paluke, ʼi te ʼu meʼa ʼae ʼe ina maʼu. Neʼe to ki te hele ʼaia kae neʼe mole fualoa. Neʼe tonu ke tala e Selemia ia he logo fakamataku ʼo ʼuhiga mo he puleʼaga maʼuli galo. Pea neʼe tonu kia Paluke ke lagolago ki ai kae neʼe mole faigafua. ʼI te tahi temi, neʼe mole kei tokaga tafito ia Paluke ki te ʼu meʼa ʼae ʼe maʼuhiga. Neʼe mole tokaga ia ki te ʼu meʼa ʼae neʼe loto e Sehova ke ina fai, kae neʼe kamata manatu pe ia kia ia totonu pea mo te meʼa ʼae neʼe ina fia fai. Neʼe ui fenei e Sehova kia Paluke, ʼaki ia Selemia: “ ʼE ke kumi pe maʼa koe ni meʼa lalahi.” (Sel. 45:3-5) ʼE hage pe neʼe ui fenei age e Sehova: “Fakafetaʼi pe koe ki te ʼu meʼa ʼae ʼe ke maʼu ʼi te temi nei.” Neʼe tali e Paluke tona fakatonutonuʼi e Sehova, pea neʼe hoko atu pe tana ʼu felogoi lelei mo Sehova.

9. Ka tou lau ia 1 Kolonito 4:6, 7, kotea ʼe uga tatou ke tou mahino ki ai moka tou agavaivai? (Vakaʼi mo te ʼu pāki.)

⁹ ʼI ʼihi temi, ʼe feala ke manatu he tehina ʼe tonu ke ina maʼu he pilivilesio. ʼE lagi ko he tehina ʼe ʼatamai, mo faʼa gaue pea mo faiva. Kae lagi ko te gaue ʼae ʼe fia fai ki ai ʼe tuku age ia ki he tahi. ʼI te lakaga ʼaia, kotea ʼae ʼe tonu ke ina manatuʼi? ʼE feala ke ina fakakaukauʼi te ʼu palalau ʼa Paulo ʼae ia 1 Kolonito 4:6, 7. (Lau.) ʼEi, ʼe haʼu mai ia Sehova te ʼu gaue mo faiva fuli ʼe tou maʼu. ʼE ha ʼi te ʼu meʼa ʼofa ʼaia ia tona ʼofa makehe kia tatou. ʼE mole foaki mai e Sehova te ʼu fealagia ʼaia he ʼe tou kehe age tatou ʼi ʼihi.—Loma 12:3, 6; Efe. 2:8, 9.

10. ʼE feafeaʼi hatatou agavaivai?

¹⁰ ʼE tonu ke tou agavaivai ʼo fakakaukauʼi te faʼifaʼitaki ʼae neʼe tuku mai e Sesu. ʼI te po ʼi muʼa ʼo tana mate, neʼe ina fufulu te ʼu vaʼe ʼo ʼana apositolo. Neʼe tohi fenei e te apositolo ko Soane: ‘Ko Sesu, ʼi tana iloʼi ʼae [1] kua tuku age e te Tamai ki ʼona nima ia meʼa fuli pe, pea [2] neʼe haʼu ia mai te ʼAtua pea [3] ʼi tana alu ki te ʼAtua, neʼe ina fufulu leva te ʼu vaʼe ʼo te kau tisipulo.’ (Soa. 13:3-5) Neʼe feala pe ke fakatotonu age e Sesu ke natou fufulu ʼona vaʼe. Kae ʼi tana maʼuli ʼi te kele, neʼe mole he temi neʼe manatu ai ʼe tuha mo ia ke maʼuli fimalie pea mo maʼu koloa. (Luka 9:58) Neʼe agavaivai ia pea mo fiafia pe ʼi te ʼu meʼa ʼae neʼe ina maʼu. Koia, neʼe ina tuku mai ai he faʼifaʼitaki lelei maʼa tatou.—Soa. 13:15.

11. Neʼe tokoni feafeaʼi te agavaivai kia Dennis ke fiafia pe ʼi te meʼa ʼae ʼe ina maʼu?

¹¹ Tou vakaʼi te faʼifaʼitaki ʼo Dennis, ʼae ʼe maʼuli ʼi Pays-Bas. Neʼe faiga ke ina faʼifaʼitakiʼi te agavaivai ʼa Sesu, tatau aipe pe neʼe mole faigafua tuʼumaʼu ki ai. ʼE ina ui fenei: “ ʼI ʼihi temi, ʼe hake ia au toku kiʼi foʼi loto, peʼe ko taku mole fiafia ʼi te ʼu meʼa ʼae ʼe au maʼu. ʼE hoko te fahaʼi ʼaia tafito la moka au logo neʼe maʼu e he tahi ia he pilivilesio. Ka hoko te fahaʼi ʼaia, pea ʼe au toe fai he ʼu fekumi ki te kalitate ʼae ko te agavaivai. ʼI te JW Library^®, ʼe au tohi ai he ʼu vaega ʼe palalau ai ki te agavaivai ke feala ai haku maʼu vave pea mo toe lau. Neʼe au toe puke ki taku telefoni he ʼu akonaki ʼe talanoa ai ki te agavaivai, pea neʼe au fakalogo tuʼumaʼu.a Neʼe au mahino ai ko te ʼu meʼa fuli ʼae ʼe tou fai maʼa Sehova, ʼe tonu ke tou fai ke vikiʼi ai ia ia kae ke mole vikiʼi ai tatou. ʼE foaki mai e Sehova kia tatou takitokotahi he ʼu kiʼi gaue ke tou fai, kae ʼe tou iloʼi ʼe lava lelei pe ʼuhi ko ia.” Kapau ʼe ke ita he ʼe mole ke maʼu he pilivilesio, fai hau ʼu fakatuʼutuʼu ke ke gaueʼi te agavaivai. Ka ke fai feia, ʼe ke fakamalohiʼi anai tau ʼu felogoi lelei mo Sehova pea mo fiafia pe anai ʼi te ʼu meʼa ʼae ʼe ke maʼu.—Sakp. 4:6, 8.

METITASIO KI TAU ʼAMANAKI

12. ʼE tokoni feafeaʼi mai tatatou ʼamanaki ke tou fiafia pe ʼi te ʼu meʼa ʼae ʼe tou maʼu? (Esaia 65:21-25)

¹² Ka tou metitasio ki tatatou ʼamanaki taulekaleka, pea ʼe tou logoʼi ai hotatou fiafia lahi ʼi te ʼu meʼa pe ʼe tou maʼu. ʼE iloʼi e Sehova ʼe lahi te ʼu mamahi ʼe tou tau mo ia ia ʼaho nei. Pea ʼe ina fakapapauʼi mai ʼe ina pulihi anai. Pea ko te aluʼaga ʼaia neʼe tohi e te polofeta ko Esaia. (Lau ia Esaia 65:21-25.) ʼE tou maʼuʼuli fimalie anai ʼi he ʼu ʼapi lelei. ʼE tou fiafia anai ʼi te ʼu gaue ʼe tou fakahoko. ʼE mahu anai te meʼa kai, pea ʼe tou kai anai he ʼu meʼa kai kano lelei. Pea ʼe mole tou tuʼania anai naʼa hoko he ʼu tuʼutamaki ki ʼatatou fanau peʼe ko tatou totonu. (Esa. 32:17, 18; Esk. 34:25) Koia, ʼe taulekaleka anai totatou ka haʼu, he ʼe hoko moʼoni anai te ʼu fakapapau ʼaia.

13. Kotea te ʼu aluʼaga ʼe tonu ai ke tou manatuʼi tuʼumaʼu tatatou ʼamanaki?

¹³ Ia ʼaho nei, ʼe tonu ke tou metitasio ki tatatou ʼamanaki. Kotea tona tupuʼaga? Koteʼuhi ʼe tou maʼuʼuli nei ʼi “te ʼu ʼaho fakamuli,” pea ʼe tou tau fuli mo ni fihifihia “ ʼe faigataʼa” tona katakiʼi. (2 Tim. 3:1) ʼI te ʼaho fuli, ʼe tokoni mai ia Sehova ke tou faʼa kataki, ʼo ina foaki mai he ʼu tokoni, mo te malohi, pea mo te tokoni ʼae ʼe ʼaoga mai. (Pes. 145:14) Pea tahi, ka tou metitasio ki tatatou ʼamanaki, pea ʼe tokoni mai ke tou faʼa kataki ʼi te ʼu temi faigataʼa. ʼE lagi faigataʼa kia koe hau tokaga ke maʼu e tou kiʼi famili te ʼu meʼa ʼae ʼe ʼaoga kia natou ʼi te faʼahi fakasino. Ko tona fakaʼuhiga koa, ʼe tonu ke ke gaue kinakina tuʼumaʼu ki tou maʼuli? Kailoa ia! Neʼe fakapapau e Sehova ʼe ina foaki atu anai te ʼu meʼa ʼae ʼe ʼaoga kia koe, pea ʼe toe kehe age la moka ke nofo ʼi te Palatiso. (Pes. 9:18; 72:12-14) ʼE lagi ke tau mo ni mahaki kehekehe, ohage la ko te mamahiʼia ʼo tou ʼu kakano, peʼe ko te maʼu ʼo he ʼu manatu fakalotomamahi, peʼe ko te lotogalogalo pea mo ʼihi atu mahaki. ʼE ʼi ai koa he puleʼaki ki te ʼu mamahi ʼaia? ʼEi. ʼE pulihi anai te mahaki mo te mate ʼi te malama foʼou ʼa te ʼAtua. (Fkha. 21:3, 4) ʼE tokoni mai tatatou ʼamanaki ke tou maʼuʼuli fakafeʼauga ʼi te temi nei, pea ke mole tou nofo tuʼumaʼu mo hotatou ita pea mo te lotokovi. Kotea tona tupuʼaga? Koteʼuhi logo la te faigataʼa ʼo te ʼu fihifihia ʼae ʼe tou tau mo ia, kae ʼe tou iloʼi ʼe “fakatemi” pe ia, pea kua tou vave maʼuli fimalie ʼi te malama foʼou ʼo talu ai.—2 Ko. 4:17, 18.

14. ʼE feafeaʼi hatatou fakamalohiʼi tatatou ʼamanaki?

¹⁴ ʼE tou iloʼi ʼe tokoni mai tatatou ʼamanaki ke tou maʼuli fakafeʼauga. Koia ʼe tonu ai ke tou haga ʼo fakamalohiʼi. ʼO feafeaʼi? Tou toʼo he faʼifaʼitaki. Ohage la, kapau ʼe tou fia sio lelei ki he ʼu meʼa ʼe tuku mamaʼo, ʼe ʼaoga anai ke tou ʼai he mata sioʼata ke tou sio lelei ki ai. ʼO toe feia pe, kapau ʼe tou loto ke moʼoni kia tatou te Palatiso, pea ʼe ʼaoga anai ke tou fai he ʼu fakatuʼutuʼu moʼo fakamalohiʼi tatatou ʼamanaki. Kapau ʼe hake ia tatou te hoha, ʼuhi he ʼe faigataʼa hatatou maʼu he puleʼaki ki ʼotatou fihifihia, tou fakakaukauʼi totatou maʼuli ʼi te ka haʼu. Ohage la, ʼe mole kei ʼaoga anai he foʼi falā, ʼe mole kei ʼi ai he ʼu maʼua ke huʼi, pea ʼe mole kei masiva he tahi. Kapau ʼe tou iita pea mo tuʼania he ʼe mole heʼeki foaki mai he ʼu pilivilesio kia tatou, tou manatuʼi ʼe mole kei he ʼuhiga ʼo te ʼu tuʼania ʼaia moka tou haohaoa pea hili ki ai ni taʼu ʼe afe ki tatatou tauhi ʼae kia Sehova. (1 Tim. 6:19) ʼE lahi te ʼu fahaʼi ʼe tou tuʼania ki ai ʼi te temi nei ʼo feala ke faigataʼa ai hatatou fakakaukauʼi te ka haʼu. Kae tou haga sioʼi te ka haʼu ohage ko tona fakapapauʼi mai e Sehova. Pea ʼaki te temi, ʼe liliu anai ko hatatou agamahani te fai ʼo te fahaʼi ʼaia.

15. Kotea ʼe ke ako mai te faʼifaʼitaki ʼo Christa?

¹⁵ Tou vakaʼi pe neʼe tokoni feafeaʼi ki te tuagaʼane ko Christa ia te ʼamanaki. ʼE ko te ʼohoana ʼo Dennis ʼae neʼe tou palalau ki ai ʼi ʼoluga. ʼE ina ui fenei: “ ʼE au tau mo he mahaki faigataʼa. ʼE mamahi ʼoku logoʼaga sino, mole kei au logoʼi hoku malohi. ʼE maʼua leva ke au heka saliote pea ʼe lahi pe toku temi ʼae ʼe au takoto ai ʼi toku palepale. Mole fualoa ki ai, neʼe fakaha mai e te toketa ʼe mole kei he faitoʼo mo he puleʼaki ki toku mahaki. Kae neʼe au ʼaho pe maʼa ʼaku, ʼe ko tana ia ʼaia sio ʼo ʼuhiga mo toku ka haʼu. Ko au ia ʼe au manatuʼi tuʼumaʼu pe taku ʼamanaki, he ʼe au maʼu ai te tokalelei ʼo te loto. ʼE moʼoni ʼi te temi nei ʼe au tali mamahi ʼi te malama ʼaeni, kae ʼe au iloʼi kua au vave maʼuli fiafia pe ʼi te malama foʼou.”

“KO NATOU ʼAE ʼE MANAVASIʼI KIA TE IA, ʼE MOLE NATOU MASIVA ʼI HE MEʼA”

16. He koʼe neʼe ui e te Hau ko Tavite ko natou ʼae ʼe manavasiʼi kia Sehova, “ ʼe mole natou masiva ʼi he meʼa”?

¹⁶ Tatau aipe pe ʼe tou maʼuli fakafeʼauga, kae ʼe tou tau pe anai mo he ʼu faigataʼaʼia. Neʼe mate te ʼu fanau ʼe toko tolu ʼa te Hau ko Tavite. Neʼe tukugakoviʼi hala ia ia pea mo kakaʼi. Neʼe maʼuli feholaʼaki lolotoga ni taʼu. Kae, logo la tona ʼu faigataʼaʼia ʼaia, neʼe ina ui fenei: ‘Ko natou ʼae ʼe manavasiʼi kia Sehova, ʼe mole natou masiva ʼi he meʼa.’ (Pes. 34:9, 10) Kotea ʼae neʼe ina fia ui? Ko tona fakaʼuhiga, ʼe maʼu tuʼumaʼu pe anai e te ʼu kaugana ʼa Sehova te ʼu meʼa ʼae ʼe ʼaoga moʼoni kia natou. ʼE mole natou masiva anai ʼi he meʼa. (Pes. 145:16) ʼE mahino ia, ʼe mole tou hao anai mai te ʼu fihifihia, kae ʼe tou tui papau ʼe tokoni mai anai ia Sehova ke tou katakiʼi ʼotatou ʼahiʼahi fuli pe. Koia, ʼe tou fiafia pe mo maʼu te tokalelei tatau aipe pe kotea totatou aluʼaga.

17. He koʼe ʼe ke fakatotonu ke ke ako te maʼuli fakafeʼauga?

¹⁷ ʼE loto e Sehova ke tou fiafia. (Pes. 131:1, 2) Koia, ke ke fakatotonu ke ke ako te maʼuli fakafeʼauga. Faiga tuʼumaʼu ke ke lotofakafetaʼi, mo tokaga tafito ki te ʼu meʼa ʼae ʼe maʼuhiga, mo agavaivai pea mo fakakaukauʼi tau ʼamanaki. Koia, ʼe feala anai ke ke ui fenei: “ ʼEi, ʼe au fiafia.”—Pes. 16:5, 6.