Vaevae Mo ʼIhi Te ʼu Meʼa ʼAe ʼe Ke Ako

ʼE fakalotomalohi kia tatou moka tou fai tatatou ako tokotahi. Kae ʼe toe fakalotomalohiʼi age anai, moka ʼe tou vaevae mo ʼihi te ʼu koloa fakalaumalie ʼae neʼe tou maʼu. ʼE ui fenei ia Taʼaga Lea 11:25: “Ko ia ʼae ʼe ina foaki he meʼa inu ki ʼihi ʼe toe malie anai mo ia.”

Ka tou vaevae mo ʼihi te ʼu meʼa ʼae neʼe tou ako, ʼe tokoni mai anai ke tou manatuʼi vave pea mo mahino lelei ai. Pea tahi, ʼe tou toe fiafia, he ʼe feala ke toe tokoni kia natou ia te ʼu koloa ʼae neʼe tou maʼu.—Gaue 20:35.

ʼAhiʼahi fai te faʼahi ʼaeni: ʼI te vahaʼa ʼae ka hoa mai, faiga ke ke vaevae mo he tahi te ʼu meʼa ʼae neʼe ke ako. ʼE lagi ko he tahi ʼo tou famili, peʼe ʼo tou kokelekasio, peʼe ko hou kauga gaue, peʼe kauga ako, peʼe ko hou vahaʼa fale, peʼe ko he tahi ʼe ke felaveʼi mo ia ʼi te faifakamafola. Faiga ke mahino gafua mo tasilo te ʼu manatu ʼae ʼe ke vaevae mo ia.

Manatuʼi: Ka ke vaevae te ʼu meʼa ʼae ʼe ke ako mo ʼihi, ke ke fai moʼonatou fakalotomalohiʼi, kae mole ke natou logoʼi ʼe kita fia poto mo iloʼi ia meʼa fuli.​—1 Ko. 8:1.