‘Pauʼi Te Kau Tagata ʼAfeā’

1. Neʼe fakaha feafeaʼi e Sehova ʼe maʼuhiga ʼaupito kia te ia ʼana ovi?

ʼE MAʼUHIGA ʼaupito kia Sehova ʼana ovi. Neʼe ina totogi natou ʼaki te taʼataʼa ʼo Sesu, pea neʼe ina tuku ki te kau tagata ʼafeā ke natou tokakaga lelei ki Tana faga ovi. (Gaue 20:28) ʼE loto e te ʼAtua ke tokakaga lelei ki tana ʼu ovi. Koia ʼae ʼaki te takitaki ʼa Kilisito, ʼe fakalotofimalieʼi e te kau tagata ʼafeā ia te ʼu ovi, pea mo puipui natou mai te ʼu tuʼutamaki fakalaumalie.​—Esa. 32:​1, 2.

2. Ko ai ʼae ʼe makehe age te tokoni ʼa Sehova ki ai? (Esekiele 34:​15, 16)

² ʼE tokaga moʼoni ia Sehova ki ʼana ovi fuli. Kae ʼe makehe age tana tokaga kia natou ʼae ʼe mamahi. ʼE ina fakaʼaogaʼi te kau tagata ʼafeā moʼo tokoni kia natou ʼe mahahaki ʼi te faʼahi fakalaumalie. (Lau ia Esekiele 34:​15, 16.) Kae, ʼe ina loto ke tou kumi tokoni moka ʼe ʼaoga kia tatou. ʼI te lakaga ʼaia ʼe tou faikole malohi ki te ʼAtua ʼo kole tana tokoni. Kae ʼe mole gata ai, ʼe tou toe kole te tokoni ʼa “he ʼu tagata tauhi ovi pea mo faiako” ʼo te kokelekasio.​—Efe. 4:​11, 12.

3. Kotea ka tou vakaʼi ʼi te alatike ʼaeni? Pea kotea te ʼu fua lelei ʼe tou maʼu ai anai?

³ ʼI te alatike ʼaeni, ʼe tou vakaʼi anai te fakatuʼutuʼu ʼa te ʼAtua ke tou maʼu ai he tokoni fakalaumalie ʼaki te kau tagata ʼafeā. ʼE tou tali anai ki te ʼu fehuʼi ʼaeni: Ko te temi fea ʼe tonu ai ke tou kole tokoni ki te kau tagata ʼafeā? He koʼe ʼe tonu ke tou fai te fahaʼi ʼaia? Pea ʼe tokoni feafeaʼi mai anai te kau tagata ʼafeā kia tatou? Tatau aipe pe ʼe mole tou tau mo he ʼu toe ʼahiʼahi ʼi te temi nei, kae ka tou maʼu te tali ki te ʼu fehuʼi ʼaia, ʼe malohi age anai tatatou lotofakafetaʼi ki te fakatuʼutuʼu ʼaia neʼe fai e Sehova. Pea tahi, ʼe feala anai ʼi he ʼaho ke haofaki ai totatou maʼuli.

KO TE TEMI FEA ʼE TONU AI KE TOU ‘PAUʼI TE KAU TAGATA ʼAFEĀ’?

4. Ka tou lau ia Sakopo 5:​14-​16, 19, 20, he koʼe ʼe tou ui ʼe talanoa ai ki he tahi ʼe mahaki ʼi te faʼahi fakalaumalie? (Vakaʼi mo te ʼu pāki.)

⁴ Neʼe fakamahino e te tisipulo ko Sakopo pe ʼe fakaʼaogaʼi feafeaʼi e Sehova te kau tagata ʼafeā moʼo tokoni mai ʼi te faʼahi fakalaumalie. Neʼe ina tohi fenei: “ ʼE ʼi ai koa he tahi ia koutou ʼe mahaki? Ke ina pauʼi mai kia ia te ʼu tagata ʼafeā ʼo te kokelekasio.” (Lau ia Sakopo 5:​14-​16, 19, 20.) ʼE ha ʼi ʼihi vaega neʼe talanoa ia Sakopo ki he tahi ʼe mahaki ʼi te fahaʼi fakalaumalie. Ohage la, ʼe ui ko ʼae ʼe mahaki ʼe mole tonu ke ina pauʼi he toketa, kae ke ina pauʼi te kau tagata ʼafeā. Pea tahi, ʼe fakamahino e Sakopo ʼe hoki malolo he tahi ʼe mahaki moka kua fakamolemole ʼana agahala. ʼE tatau pe te ʼu aluʼaga ʼe tonu ke fai e he tahi ʼe mahaki ʼi te faʼahi fakalaumalie mo ʼae ʼe mahaki ʼi te faʼahi fakasino. Ka tou mahaki ʼi te faʼahi fakasino, ʼe tou olo ki te toketa ʼo tou fakamahino age te agaaga ʼo totatou mahaki, pea ʼe tou mulimuli pe ki ʼana tokoni. ʼO toe feia pe, ka tou mahaki ʼi te faʼahi fakalaumalie, ʼe tonu ke tou olo ki he tagata ʼafeā, ʼo tou fakamahino age totatou aluʼaga, pea mo muliʼi te ʼu tokoni ʼe ina foaki mai ʼi te Tohi-Tapu.

5. ʼE tou iloʼi feafeaʼi kua tou mahahaki ʼi te faʼahi fakalaumalie?

⁵ ʼI te kapite 5 ʼo Sakopo, ʼe fakalotomalohiʼi ai tatou ke tou fakaovi ki te kau tagata ʼafeā moka ʼe tou logoʼi ʼe tou tuʼutamakiʼia ʼi te faʼahi fakalaumalie. Kae, ʼe maʼuhiga tafito ke tou kumi tokoni ʼi muʼa ʼo hatatou fai he ʼu aluʼaga ʼe maumauʼi ai ʼatatou felogoi mo Sehova. Koia, ʼe lelei ke tou mahino ʼe ʼaoga kia tatou he tokoni. ʼE fakatokaga mai ʼi te Tohi-Tapu, ʼe feala ke tou faihala ʼo ʼuhiga mo totatou aluʼaga fakalaumalie. (Sakp. 1:​22) Neʼe hoko te aluʼaga ʼaia ki ʼihi Kilisitiano ʼo Sate. Pea neʼe fakatokaga age e Sesu ʼe natou mahahaki ʼi te faʼahi fakalaumalie. (Fkha. 3:​1, 2) ʼE feafeaʼi hatatou iloʼi pe ʼe lelei totatou maʼuli fakalaumalie? ʼAki hatatou fakatatau totatou fiafia ʼi te temi nei ʼi tatatou tauhi kia Sehova mo ʼae ʼi te kamata. (Fkha. 2:​4, 5) ʼE feala pe ke tou fai te ʼu fehuʼi ʼaeni: ‘ ʼE kei au leleiʼia koa te lau ʼo te Tohi-Tapu pea mo te metitasio ki ai ohage ko ʼaho, peʼe kua siʼisiʼi ia? ʼE kua au kamata toto koa ʼi te ʼu fono? ʼE au teuteuʼi mo lagolago pe koa ki te ʼu fono moka ʼe au lotolelei pe ki ai? ʼE mole kei au faʼafai koa ʼi te minisitelio? ʼE lahi age koa te temi ʼe au fakaʼaogaʼi ki te ʼu fakafiafia mo te kumi ʼo te ʼu koloa? ʼE au manatu tuʼumaʼu koa ki ai?’ Kapau ʼe tou ʼio ki he fehuʼi ʼi te ʼu fehuʼi ʼaia, ʼe ha ai ʼe tou vaivai ʼi te faʼahi fakalaumalie. Pea kapau ʼe mole tou fai he puleʼaki ki ai, ʼe ʼasili kovi age anai totatou aluʼaga. Koia, kapau ʼe mole tou fai he puleʼaki ki totatou vaivaiʼaga ʼaia, peʼe kua tou maumauʼi he ʼu lekula ʼa te ʼAtua, ʼe tonu ke tou kole tokoni ki te kau tagata ʼafeā.

6. Kotea ʼae ʼe tonu ke fai e he tahi neʼe ina fai he agahala mamafa?

⁶ ʼE mahino ia, ka fai e he tahi he agahala mamafa, ʼo feala ai ke toʼo ʼi te kokelekasio, ʼe tonu anai ke palalau mo he tagata ʼafeā. (1 Ko. 5:​11-​13) ʼE ʼaoga anai kia ia he tokoni ke ina toe maʼu ai he ʼu felogoi lelei mo Sehova. Kapau ʼe ina loto ke fakamolemole ʼana agahala ʼaki te totogi, ʼe tonu ke ina fai “he ʼu gaue ʼe tuha mo te fakahemala.” (Gaue 26:20) Pea ʼe kau ʼi te ʼu gaue ʼaia ia tana fakaovi ki te kau tagata ʼafeā mo kapau neʼe ina fai he agahala mamafa.

7. Ko ai ʼae ʼe toe ʼaoga ki ai te tokoni ʼa te kau tagata ʼafeā?

⁷ ʼE mole tokoni pe ia te kau tagata ʼafeā kia natou ʼae neʼe natou fai he agahala mamafa. Kae ʼe natou toe tokoni kia natou ʼae ʼe vaivai ʼi te faʼahi fakalaumalie. (Gaue 20:35) Ohage la, ʼe feala ke ke tuʼania naʼa mole ke lava tauʼi ʼou holi ʼae ʼe kovi. ʼE lagi faigataʼa tau tauʼi mo kapau la ʼi muʼa ʼo tau iloʼi te moʼoni, neʼe ke fakaʼaogaʼi fakavale te toloke, mo sioʼi he ʼu ʼata ʼe kovi peʼe fai he ʼu aga heʼe ʼaoga. Kae ʼe mole tonu ke ke tauʼi tokotahi ʼou vaivaiʼaga ʼaia. ʼE feala hau filifili he tagata ʼafeā ke ke palalau ki ai. ʼE fagono lelei atu anai, pea mo foaki atu anai he ʼu tokoni ʼaoga. Pea ʼe ina toe fakamanatuʼi atu anai kapau ʼe ke tekeʼi ʼou holi ʼae ʼe kovi, ʼe ke fakafiafiaʼi anai te loto ʼo Sehova. (Ekl. 4:​12) ʼE lagi ke lotovaivai he ʼe ke maʼu tuʼumaʼu pe he ʼu holi kovi. Kae ʼe fakamanatuʼi atu anai e te tagata ʼafeā ʼe fiafia ia Sehova ʼi tau kole tokoni. ʼE ha ai tau agavaivai, mo tau mole falala ki tou malohi ʼo koe totonu pea mo tau fia fakafiafiaʼi ia Sehova.​—1 Ko. 10:12.

8. ʼE ʼaoga koa hatatou olo ki te kau tagata ʼafeā moka tou fai pe he lakahala?

⁸ ʼE mole ui leva ka tou fai pe he lakahala pea tonu ke tou olo ki te kau tagata ʼafeā. Ohage la, neʼe kotou fai he ʼu palalau neʼe mamahi ai he tehina peʼe ko he tuagaʼane, pe neʼe kovi ʼosi tou ita ki ai. Kapau ʼe hoko te aluʼaga ʼaia, ʼaua naʼa ke alu atu aipe ki he tagata ʼafeā. Kae ʼe lelei ke ke mulimuli ki te ʼu tokoni ʼa Sesu, pea mo kumi te tokalelei mo tou tehina peʼe ko tou tuagaʼane. (Mat. 5:​23, 24) ʼE feala ke ke fai he ʼu fekumi ʼo ʼuhiga mo te agamalū, mo te kataki fualoa pea mo te lotololomi. Kapau ʼe ke fai feia, kua ke iloʼi leva te fakaha ʼo te ʼu kalitate ʼaia moka hoko he fihifihia. ʼE mahino ia, kapau ʼe heʼeki ke lava fakatokatoka tou fihifihia, ʼe feala ke ke kole tokoni ki he tagata ʼafeā. ʼI te tohi ʼa Paulo ki te kau Filipe, neʼe ina kole ki he tehina ʼe mole tou iloʼi tona higoa, ke tokoni kia Evoti pea mo Sinitise ke nā fakatokatoka. Pea ʼe feala pe ki he tagata ʼafeā ʼo tau kokelekasio ke toe tokoni feia atu.​—Flp. 4:​2, 3.

HE KOʼE ʼE TONU KE TOU PAUʼI IA TE KAU TAGATA ʼAFEĀ?

9. He koʼe ʼe mole tonu ke tou ufiufi ʼi te pauʼi ʼo te kau tagata ʼafeā? (Taʼaga Lea 28:13)

⁹ ʼE tonu ke tou tui mo lototoʼa ʼo kole tokoni moka tou fai he agahala mamafa, peʼe moka mole kei tou lava tauʼi ʼotatou holi ʼae ʼe kovi. ʼAua naʼa tou ufiufi ʼi te pauʼi ia te kau tagata ʼafeā. Kotea tona tupuʼaga? Koteʼuhi ka tou kole tanatou tokoni, ʼe tou fakaha ai ʼe tou falala kia Sehova, pea mo te fakatuʼutuʼu neʼe ina fai ke tou malolohi tuʼumaʼu ʼi te fahaʼi fakalaumalie. ʼE tou iloʼi ʼe ʼaoga mai tana tokoni mo kapau ʼe tou ʼamanaki hehe. (Pes. 94:18) Pea kapau neʼe tou agahala, ʼe fakamolemole mai anai te ʼAtua mo kapau ʼe tou vete age ʼatatou agahala, pea mo liʼaki te fai ʼo te meʼa ʼae ʼe kovi.​—Lau ia Taʼaga Lea 28:13.

10. Kotea ʼae ka hoko moka tou faiga ke tou fufu ʼatatou agahala?

¹⁰ Ka tou kole tokoni ki te kau tagata ʼafeā moka ʼaoga mai kia tato, ʼe tou maʼu ai he ʼu fua lelei. Kae kapau ʼe tou faiga ke tou fufu ʼatatou agahala, ʼe tou fakaʼaʼasili ai pe totatou aluʼaga ʼo kovi age, pea mo tou toe ʼasili maʼuli mamahi age. ʼI te fufu e te Hau ko Tavite ʼana agahala, neʼe tuʼutamakiʼia ʼi te faʼahi fakalaumalie, mo mamahi ʼi te faʼahi ʼo te loto mo te fakakaukau pea mo te faʼahi fakasino. (Pes. 32:​3-5) Ka mole tou kumi he faitoʼo ki hotatou mahaki peʼe lavea ʼi te faʼahi fakasino, pea ʼe ʼasili age anai totatou mamahi pea mo mahahaki. Pea ko te aluʼaga pe ʼaia ʼe feala ke toe hoko ʼi te faʼahi fakalaumalie. Pea ʼe mahino lelei pe ia Sehova ki te faʼahi ʼaia. Koia ʼae ʼe ina fakaafe tatou ke tou “fakatokatoka” mo ia, ʼaki hatatou mulimuli ki tana fakatuʼutuʼu ke tou malolo ai ʼi te faʼahi fakalaumalie.​—Esa. 1:​5, 6, 18.

11. Kotea ʼe hoko mo kapau ʼe mole tou fakaha ki te kau tagata ʼafeā neʼe fai e he tahi hana agahala mamafa?

¹¹ Kapau ʼe tou fufu hatatou agahala mamafa, ʼe feala ke mamahi ai ʼihi. ʼE feala ke tou taʼofi ai te gaue ʼa te laumalie ʼo te ʼAtua ʼi te kokelekasio, pea ke puli ai te tokalelei mo ʼotatou tehina mo tuagaʼane. (Efe. 4:​30) ʼO toe feia pe, kapau ʼe tou iloʼi neʼe fai e he tahi hana agahala mamafa, ʼe tonu ke tou fakalotomalohiʼi ia ia ke alu ʼo fakaha ki te kau tagata ʼafeā.a Kapau ʼe tou fufu tana agahala, pea ʼe tou toe kau pe mo tatou ki tana agahala. (Lev. 5:1) ʼE tou ʼoʼofa ia Sehova, koia ʼe uga ai tatou ke tou fakaha te moʼoni ki te kau tagata ʼafeā mo kapau ʼe mole alu ia. Ka tou fai feia, pea ʼe tou lagolago ki te taupau ke maʼa ʼo te kokelekasio, pea mo tokoni ai kia natou ʼae neʼe agahala ke natou toe maʼu he ʼu felogoi lelei mo Sehova.

ʼE TOKONI FEAFEAʼI MAI TE KAU TAGATA ʼAFEĀ?

12. ʼE tokoni feafeaʼi te kau tagata ʼafeā kia natou ʼe vaivai ʼi te faʼahi fakalaumalie?

¹² ʼE tonu ke tokoni te kau tagata ʼafeā kia natou ʼae ʼe vaivai ʼi te faʼahi fakalaumalie. (1 Tes. 5:​14) Kapau neʼe ke agahala, ʼe feala ke natou fai atu he ʼu fehuʼi ke natou mahino ki ʼau manatu mo te ʼu meʼa ʼae ʼe ke logoʼi. (Taag. 20:5) ʼE feala hau tokoni kia natou ʼo fakaha age te ʼu meʼa ʼae ʼi tou loto, logo la ʼe faigataʼa kia koe ʼuhi ko tou agaʼi fenua, pe ʼe ke umiuminoa peʼe ufiufi ʼi te aluʼaga ʼae neʼe ke fai. ʼAua naʼa ke tuʼania mo kapau ʼe ke “hoko palalau.” (Sopo 6:3) ʼE mole foimo fakamauʼi atu ai pe anai e te kau tagata ʼafeā te ʼu palalau ʼae neʼe ke fai. Kae ʼe natou fagono lelei atu anai, ke natou iloʼi te ʼu aluʼaga fuli neʼe hoko ʼi muʼa ʼo hanatou foaki atu he ʼu tokoni ʼi te Tohi-Tapu. (Taag. 18:13) ʼE iloʼi e te kau tagata ʼafeā ʼe ʼaoga he temi moʼo foaki he tokoni ki he tahi. Koia, ʼe mole natou ʼamanaki fakatokatoka anai he ʼu fihifihia faigataʼa ʼi he faipalalau pe ʼe fai tuʼa tahi.

13. Kotea te ʼu fua lelei ʼe tou maʼu anai moka hufakiʼi tatou e te kau tagata ʼafeā pea mo natou foaki mai he ʼu tokoni Fakatohi-tapu? (Vakaʼi mo te ʼu pāki.)

¹³ Ka ke pauʼi ia te kau tagata, ʼe mole natou faiga anai ke toe ʼasili age tou mamahi ʼuhi ko te agahala ʼae neʼe ke fai. Kae ʼe natou hufakiʼi anai koe. ʼE ke lotomalohi anai ʼuhi ko te “malohi” ʼo ʼanatou faikole, pea ʼe malave anai kia koe. ʼE natou toe tokoni atu anai, ʼo natou “tākai lolo ia [koe] ʼi te huafa ʼo Sehova.” (Sakp. 5:​14-​16) ʼE fakaʼuhiga te “lolo” ʼaia ki te moʼoni ʼo te Folafola ʼa te ʼAtua. Ka fakaʼaogaʼi lelei e te kau tagata ʼafeā te Tohi-Tapu, ʼe natou fakalotofimalieʼi anai koe pea mo tokoni atu ke ke toe maʼu he ʼu felogoi lelei mo Sehova. (Esa. 57:18) ʼE feala ki te ʼu tokoni Fakatohi-tapu ʼae ʼe natou foaki atu, ke malohi age tau fakatotonu ʼae ke ke haga fai te meʼa ʼae ʼe lelei. ʼAki ia natou, ʼe hage pe ʼe ke logo ki te leʼo ʼo Sehova, ʼe ina ui fenei atu: ‘Koʼeni te ala, ke ke haʼele ai.’​—Esa. 30:21.

14. Ka tou lau ia Kalate 6:​1, ʼe tokoni feafeaʼi te kau tagata ʼafeā ki he tehina neʼe ‘faihala ʼo hehe ai’? (Vakaʼi mo te ʼu pāki.)

¹⁴ Lau ia Kalate 6:1. Ka ‘faihala he tehina ʼo hehe ai,’ ʼe mole kei mulimuli ki te ʼu lekula faitotonu ʼa Sehova. Ko he tahi ʼe faihala ʼo hehe ai, ʼe fakaʼuhiga ki he tahi neʼe ina fai he tonu ʼe mole fakapotopoto pe neʼe ina fai he agahala mamafa. ʼAki te ʼofa, ʼe ‘faiga anai te kau tagata ʼafeā ke natou fakatonutonuʼi te tagata ʼaia ʼaki he agamalū.’ Ko te kupu Fakakeleka ʼae neʼe fakaliliu ʼaki te kupu “fakatonutonuʼi,” ʼe feala ke toe fakaʼaoga moka fakatotonu e he toketa he hui neʼe mahuʼi ke feala ke toe lelei. ʼE faiga he toketa faiva ke ina faitoʼo he tahi neʼe mahuʼi hona hui, ʼo mole faiga ke toe ʼasili age tona mamahi. ʼO toe feia pe, ʼe tokaga tafito te kau tagata ʼafeā ki totatou maʼuli malolo ʼi te faʼahi fakalaumalie, kae mole natou faiga ke toe ʼasili age totatou mamahi. Pea ʼe toe ui ʼi te Tohi-Tapu ʼe tonu ke natou toe ‘tokakaga kia natou.’ Ka tokoni te kau tagata ʼafeā ki he tehina neʼe hehe, ʼe natou mahino ʼe natou toe agahala pe mo natou, pea ʼe feala ke natou fai ni lakahala. Koia, ʼe natou tokaga anai ke mole natou manatu ʼe faitotonu age natou ʼi ai. Kae ʼe natou agavaivai anai pea mo manavaʼofa kia ia.​—1 Pet. 3:8.

15. Kotea ʼe mole tonu ke tou fai?

¹⁵ ʼE feala ke tou falala ki siʼotatou kau tagata ʼafeā ʼo totatou kokelekasio. Neʼe akoako natou ke ʼaua naʼa natou fakaha ʼotatou aluʼaga ki he tahi, pea ke fakatafito ʼanatou tokoni ki te Tohi-Tapu kae mole ki ʼanatou manatu pe ʼa natou totonu. Pea ʼe tonu ke natou haga tokoni mai ke tou lava tauʼi ʼotatou fihifihia. (Taag. 11:13; Kal. 6:2) ʼE tahi alu pe te tagata ʼafeā mo tona ʼuluagaaga, pea ʼe ʼi ai ʼihi kua fualoa age tanatou ʼi te moʼoni ʼi ʼihi age. Kae ʼe feala ke tou olo ʼo palalau mo he tagata ʼafeā pe ki totatou fihifihia. ʼE mahino ia, ʼe mole tou feoloʼaki anai ʼi te kau tagata ʼafeā fuli ʼo kumi tokoni, mo fakaʼamu ke tou maʼu he tagata ʼafeā ʼe manatu tahi mo tatou. Kapau ʼe tou fai feia, ʼe tou hage anai ko natou ʼae ʼe natou loto ke “ui age te meʼa ʼae ʼe natou fia logo ki ai,” kae mole natou fia logo ki “te akonaki ʼae ʼe lelei” ʼo te Folafola ʼa Te ʼAtua. (2 Tim. 4:3) Ka tou palalau mo he tagata ʼafeā ʼo ʼuhiga mo he fihifihia, ʼe feala pe ke ina fakalavelave mai pe neʼe kua tou palalau mo he tahi ʼu tagata ʼafeā, pea kotea te ʼu tokoni neʼe natou foaki mai. ʼE feala anai ki te tagata ʼafeā ʼaia ke toe kole tokoni ki he tahi tagata ʼafeā. Kapau ʼe fai feia, ʼe ina fakaha ai ʼe fiamalalo.​—Taag. 13:10.

TE MEʼA ʼAE ʼE TONU KE TOU FAI E TATOU TAKITOKOTAHI

16. Kotea te meʼa ʼae ʼe tonu ke tou fai e tatou takitokotahi?

¹⁶ Logo la ʼe tokaga te kau tagata ʼafeā kia tatou ʼae ko te ʼu ovi ʼa te ʼAtua, kae ʼe mole natou ui mai te meʼa ʼae ʼe tonu ke tou fai. ʼE ʼa tatou takitokotahi te fakaha ʼi ʼotatou maʼuli tatatou tauhi agatonu kia Sehova. ʼE tou tahi fakaha ʼi ʼatatou aga mo palalau ʼe tou ʼoʼofa ia Sehova pea mo fakafiafiaʼi tona loto. Pea ʼe tokoni mai anai ke tou taupau maʼu tatatou agatonu, maʼia pe ʼe faigataʼa. (Loma 14:12) Koia ʼae ʼe mole ui mai anai e te kau tagata ʼafeā te meʼa ʼae ʼe tonu ke tou fai. Kae ʼe natou faiga anai ke tou maʼu te faʼahiga manatu ʼa Sehova, ʼae ʼe tuʼu ʼi te Tohi-Tapu. Ka tou fakalogo ki ʼanatou tokoni Fakatohi-tapu, ʼe tou fakaʼaogaʼi anai ʼotatou “fealagia fakakaukau” pea mo toʼo anai he ʼu tonu fakapotopoto.​—Hep. 5:​14.

17. Kotea ʼae ʼe tou fakatotonu ke tou fai?

¹⁷ ʼE ko he pilivilesio maʼuhiga tatatou kau ki te ʼu ovi ʼa Sehova. Neʼe fekauʼi mai e Sehova ia Sesu, “te tagata tauhi ovi lelei,” ke ina foaki te totogi ke feala hatatou maʼuʼuli ʼo heʼe gata. (Soa. 10:11) Pea ʼaki te kau tagata ʼafeā, neʼe fakahoko ai e Sehova tana fakapapau ʼaeni: “ ʼE au foaki atu anai ni tagata tauhi ovi ʼe natou mulimuli ki toku finegalo, pea ʼe natou fafaga anai koutou ʼaki te ʼatamai malama mo te fakasiosio poto.” (Sel. 3:​15) Ka tou vaivai peʼe mahahaki ʼi te faʼahi fakalaumalie, ʼe tonu ke tou pauʼi ia te kau tagata ʼafeā. Koia, ʼofa pe ke tou fakatotonu ʼo fakaʼaogaʼi lelei te tokoni ʼa te kau tagata ʼafeā, ʼae ko he fakatuʼutuʼu ʼofa mai ia Sehova.