Kotea ʼe Tonu Ke Ke Fai Moka Hoko He ʼu Aluʼaga Heʼe Faitotonu?

1-2. Kotea ʼe fai e te tokolahi moka hoko he ʼu aluʼaga heʼe faitotonu? Pea kotea te ʼu fehuʼi ʼe tonu ke tou fai?

ʼE TOU maʼuʼuli ʼi he malama heʼe faitotonu. ʼE lahi te ʼu tupuʼaga ʼe tau ai te hahaʼi mo he ʼu aluʼaga heʼe faitotonu. Ohage la, ʼe tupu ʼuhi ko tonatou aluʼaga fakaekonomika, peʼe ko natou ko he ʼu tagata peʼe fafine, peʼe ko tonatou haʼuʼaga, peʼe ko tonatou lanu. Tokolahi ʼe natou tali te ʼu nunuʼa ʼo te ʼulihi ʼo te ulufenua e te tagata, pea mo maʼuli mamahi ʼuhi ko te agakaka ʼa te kau taki politike, peʼe ko te kau maʼu koloa ʼae ʼe manumanū. ʼE tou tau fuli mo te ʼu nunuʼa ʼo te ʼu aluʼaga heʼe faitotonu ʼaia. Pea ʼe feala ke hoko kia tatou totonu peʼe tou sisio ʼe hoko ki ʼihi.

² ʼE mole tou punamaʼuli ki te iita ʼa te tokolahi ʼi tanatou sisio ki te ʼu aluʼaga heʼe faitotonu ʼae ʼe hoko ʼi te malama ʼaeni. ʼE tou fia maʼuʼuli ʼi he malama ʼe tou maʼuʼuli fimalie ai pea mo gaohi lelei ai tatou. ʼE faiga ʼihi ke natou fakatokatoka te ʼu fihifihia ʼe natou sisio ki ai ʼi te malama ʼaeni peʼe ʼi tonatou fenua. Ohage la, ʼe natou sinie he ʼu pepa, mo kau ki he ʼu laka, pea mo lagolago ki te kau taki politike, ʼae ʼe natou fakapapau ke natou tauʼi te ʼu aluʼaga heʼe faitotonu. Kae, ʼi totatou ʼuhiga kau Fakamoʼoni ʼa Sehova, ʼe akoʼi tatou ke ‘mole tou kau ʼi te malama ʼaeni,’ pea ke tou fakatalitali ki te pulihi e te Puleʼaga ʼo te ʼAtua ia aluʼaga heʼe faitotonu fuape. Pea ko te aluʼaga pe ʼaia neʼe kole mai e Sesu ke tou fai. (Soa. 17:16) Kae, ʼe mole faigafua hakita mole ita moka tou sisio ki he tahi ʼe tau mo he aluʼaga heʼe faitotonu. ʼE feala ke tou fai te ʼu fehuʼi ʼaeni: ‘Kotea ʼe tonu ke au fai? ʼE ʼi ai koa he meʼa ʼe feala ke au fai ʼi te temi ʼaia ke au tauʼi te ʼu aluʼaga heʼe faitotonu?’ Kapau ʼe tou fia maʼu te ʼu tali ki te ʼu fehuʼi ʼaia, tou vakaʼi muʼa te ʼu meʼa ʼae ʼe logoʼi e Sehova mo Sesu ki te ʼu aluʼaga heʼe faitotonu.

ʼE FEHIʼA IA SEHOVA MO SESU KI TE ʼU ALUʼAGA HEʼE FAITOTONU

3. Heʼe koʼe ʼe mole ʼaoga ke tou punamaʼuli moka tou iita ki he ʼu aluʼaga heʼe faitotonu ʼe tou tau mo ia peʼe hoko ki ʼihi? (Esaia 5:7)

³ ʼE fakaha mai ʼi te Tohi-Tapu pe koʼe ʼe mole ʼaoga ke tou punamaʼuli moka tou iita ki he ʼu aluʼaga heʼe faitotonu ʼe tou tau mo ia peʼe hoko ki ʼihi. ʼE fakamahino ai neʼe fakatupu tatou e Sehova ki tona pāki, pea “ ʼe ʼofa ki te faitotonu pea mo te meʼa ʼae ʼe totonu.” (Pes. 33:5; Sen. 1:​26) ʼE mole heʼe faitotonu ia, pea ʼe mole ina loto ia ke aga feia he tahi. (Tet. 32:​3, 4; Mik. 6:8; Sakl. 7:9) Ohage la, ʼi te temi ʼo te polofeta ko Esaia, neʼe logoʼi e Sehova te “tagi mamahi” ʼa te tokolahi ʼo te kau Iselaele, ʼae neʼe gaohi koviʼi e ʼihi kau Iselaele. Pea neʼe tokoni kia natou. (Lau ia Esaia 5:7.) Neʼe fakatuʼā natou e Sehova he neʼe tuʼa lahi tanatou meʼa noaʼi tana Lao mo fakahoko he ʼu aga heʼe faitotonu ki ʼihi.​—Esa. 5:​5, 13.

4. Kotea ʼe logoʼi e Sesu moka ʼe tau he tahi mo he aluʼaga heʼe faitotonu? (Vakaʼi mo te pāki.)

⁴ ʼE ʼofa ia Sesu ki te faitotonu pea mo fehiʼa ki te heʼe faitotonu, ohage pe ko Sehova. ʼI te tahi ʼaho, lolotoga tana faifakamafola neʼe sio ki he tagata neʼe palalisia tona nima. Neʼe fia tokoni Sesu ki ai, kae neʼe mole loto ki ai ia te kau takitaki lotu ʼae neʼe lotofefeka. Neʼe maʼuhiga age kia natou tanatou mulimuli fakalelei ki te Lao ʼo ʼuhiga mo te Sapato, ʼi te tokoni ki te tagata fakaʼofaʼofa ʼaia. Kotea ʼae neʼe logoʼi e Sesu ʼi tana sio ki tanatou aga feia? Neʼe “lotomamahi ʼaupito ʼuhi ko tanatou lotofefeka.”​—Mko. 3:​1-6.

5. Kotea ʼe tonu ke tou manatuʼi moka tou iita ʼuhi ko he aluʼaga heʼe faitotonu?

⁵ ʼE tou iloʼi e iita ia Sehova mo Sesu moka hoko he ʼu aluʼaga heʼe faitotonu. Koia ʼae ʼe mole kovi ai hatatou toe logoʼi mo tatou te faʼahi ʼaia. (Efe. 4:​26) Kae ʼe tonu ke tou manatuʼi ka tou iita, ʼe mole pulihi ai te ʼu aluʼaga heʼe faitotonu, tatau aipe pe ʼe tonu totatou ita. Ka tou iita fualoa peʼe mole tou lava lolomi, ʼe feala ke tou tuʼutamaki ai ʼi te faʼahi ʼo te loto mo te faʼahi fakasino. (Pes. 37:​1, 8; Sakp. 1:​20) Koia, kotea ʼe tonu ke tou fai moka tou tau mo he aluʼaga heʼe faitotonu? ʼE feala ke tou taʼofi he ʼu ako mai te faʼifaʼitaki ʼo Sesu.

NEʼE TAUʼI FEAFEAʼI E SESU TE ʼU ALUʼAGA HEʼE FAITOTONU?

6. Kotea te ʼu aluʼaga heʼe faitotonu neʼe sio ki ai ia Sesu ʼi tana ʼi te kele? (Vakaʼi mo te pāki.)

⁶ Neʼe lahi te ʼu aluʼaga heʼe faitotonu neʼe sio ki ai ia Sesu ʼi tana ʼi te kele. Neʼe sio mata ki te fakamamahiʼi ʼo te hahaʼi e te kau takitaki lotu. (Mat. 23:​2-4) Neʼe ina iloʼi te agafefeka ʼa te kau takitaki Loma ki te hahaʼi. Tokolahi te kau Sutea neʼe fia ʼateaina mai te kau Loma. Ohage la, neʼe fetau te kau Selote ke natou maʼu te ʼateaina ʼaia. Kae, neʼe mole fakatuʼu mo lagolago ia Sesu ki he ʼu kutuga moʼo fetogi he puleʼaga fakatagata. ʼI tana iloʼi ʼae neʼe loto e te hahaʼi ke fakanofo ia ia ko he hau, neʼe mavae ia.​—Soa. 6:​15.

7-8. He koʼe neʼe mole faiga ia Sesu ke ina pulihi te heʼe faitotonu ʼi tana ʼi te kele? (Soane 18:36)

⁷ ʼI te nofo ʼa Sesu ʼi te kele, neʼe mole faiga ke gaue fakatahi mo te kau taki politike ʼo te temi ʼaia ke natou pulihi te ʼu aluʼaga heʼe faitotonu. Kotea tona tupuʼaga? Koteʼuhi neʼe ina iloʼi ʼe mole feala ki te tagata hana takitaki ia ia totonu, pea ʼe mole tuha ia mo ia. (Pes. 146:3; Sel. 10:23) Neʼe ina toe iloʼi ʼe mole natou toe lava tauʼi pe la te ʼu tupuʼaga ʼo te hoko ʼo te ʼu aluʼaga heʼe faitotonu. ʼE puleʼi ia te malamanei e Satana te Tevolo, ʼae ko he laumalie faifakapo. ʼE ina fakaʼaogaʼi tana pule moʼo uga ʼihi ʼaselo pea mo te hahaʼi ke natou fakahoko he ʼu aluʼaga heʼe faitotonu. (Soa. 8:​44; Efe. 2:2) Pea logo la ʼe ʼi ai ni hahaʼi agalelei, kae ʼe mole feala ke natou fakatokatoka te ʼu fihifihia ʼo te malama ʼaeni, ʼuhi pe ko tonatou ʼuhiga agahala.​—Ekl. 7:​20.

⁸ Neʼe iloʼi e Sesu ʼe ko te Puleʼaga pe ʼo te ʼAtua ʼae ka ina pulihi te tupuʼaga moʼoni ʼo te ʼu aluʼaga heʼe faitotonu. Koia ʼae neʼe ina fakaʼaogaʼi lahi ai tona temi mo tona malohi ki te ‘fakamafola mo te tala ʼo te logo lelei ʼo te Puleʼaga ʼo te ʼAtua.’ (Luka 8:1) Neʼe ina fakapapau kia “natou ʼae ʼe fia kakai pea mo fia iinu ki te faitotonu,” ʼe ʼi ai anai he ʼaho ka fakagata ai te ʼu agakaka mo te heʼe faitotonu. (Mat. 5:6; Luka 18:​7, 8) ʼE mole ʼi ai anai he puleʼaga fakatagata ʼe ina fetogi anai te ʼu aluʼaga ʼaia. Kae ʼe ko te Puleʼaga pe anai ʼo te ʼAtua, ‘ ʼae ʼe mole kau ʼi te malama ʼaeni,’ ka ina fakahoko te faʼahi ʼaia.​—Lau ia Soane 18:36.

FAʼIFAʼITAKIʼI IA SESU MOKA KE TAU MO HE ʼU ALUʼAGA HEʼE FAITOTONU

9. He koʼe ʼe ke tui papau ʼe ko te Puleʼaga pe ʼo te ʼAtua ka ina pulihi te ʼu aluʼaga heʼe faitotonu fuli pe?

⁹ Ia ʼaho nei, kua lahi age te aga heʼe faitotonu ʼi te temi ʼae neʼe nofo ai ia Sesu ʼi te kele. Kae ko ia ʼae ʼe ina fakatupu te ʼu aluʼaga heʼe faitotonu ʼi “te ʼu ʼaho fakamuli” ʼaeni, ʼe ko Satana pe mo te hahaʼi agahala ʼae ʼe ina puleʼi. (2 Tim. 3:​1-5, 13; Fkha. 12:12) Ohage ko Sesu, ʼe tou iloʼi ʼe ko te Puleʼaga pe ʼo te ʼAtua ka ina pulihi anai te ʼu tupuʼaga ʼae ʼe hoko ai te ʼu aluʼaga heʼe faitotonu. ʼE tou lagolago malohi ki te Puleʼaga ʼaia, koia ʼe tou fakafisi ai ki te kau ki te ʼu laka, mo ʼihi atu aluʼaga ʼe fai e te malama ʼaeni moʼo tauʼi te heʼe faitotonu. Tou vakaʼi te faʼifaʼitaki ʼo te tuagaʼane ʼaeni ko Stacy.a ʼI muʼa ʼo tana iloʼi te moʼoni, neʼe kau tuʼumaʼu ki te ʼu laka ki te tauʼi ʼo te heʼe faitotonu. Kae, neʼe kamata lotolotolua leva ʼi te meʼa ʼae neʼe ina fai. Neʼe ina ui fenei: “ ʼI taku kau ki te ʼu laka ʼaia, neʼe au feuiʼaki pe ʼe lelei koa te meʼa ʼaeni ʼe au lolotoga fai. ʼI te temi nei, kua au lagolago ki te Puleʼaga ʼo te ʼAtua. Koia ʼe au iloʼi ko te puleʼaki pe ʼaia ki te ʼu fihifihia fuli. ʼEi, ʼe au tui papau, ʼe ko te Puleʼaga pe ʼaia ʼo te ʼAtua ka ina fakatokatoka te ʼu faʼahi ʼaia.”​—Pes. 72:​1, 4.

10. Ka tou lau ia Mateo 5:​43-​48, he koʼe ʼe mole tou faiga ke tou fetogi te lao mo te ʼu puleʼaga? (Vakaʼi mo te pāki.)

¹⁰ Tokolahi ia ʼaho nei ʼe kau ki he ʼu kutuga ke natou faiga ʼo fetogi te ʼu puleʼaga. Kae tokolahi ia natou ʼe iita, ʼe mole natou fia fakalogo ki te lao pea ʼe natou fakamamahiʼi ʼihi. ʼE mole ko te fahaʼi ʼaia neʼe akoʼi mai e Sesu ke tou fai. (Efe. 4:​31) Koʼeni te aluʼaga ʼe tokagaʼi e te tehina ko Jeffrey: “ ʼE au iloʼi ʼe kamata lelei pe anai he laka, kae ʼe feala pe ʼi te lakaga ʼaia ke fakaʼosiʼosi age ʼe hoko ai he ʼu agamalohi, mo he ʼu maumau pea mo he ʼu kaihaʼa.” Kae, ʼe akoʼi mai e Sesu ke tou ʼoʼofa ki te hahaʼi, maʼia mo natou ʼae ʼe mole manatu tahi mo tatou, peʼe natou fakatagaʼi tatou. (Lau ia Mateo 5:​43-​48.) Pea ʼi totatou ʼuhiga kaugana kia Sehova, ʼe tou fai anai ia meʼa fuli ke tou faʼifaʼitakiʼi ia Sesu.

11. He koʼe ʼe feala ʼi ʼihi temi ke faigataʼa tatatou faʼifaʼitakiʼi ia Sesu?

¹¹ ʼE tou iloʼi ko te Puleʼaga ʼo te ʼAtua ka ina pulihi te heʼe faitotonu ʼo talu ai. Kae ʼe feala pe ke faigataʼa kia tatou hatatou faʼifaʼitakiʼi ia Sesu, tafito la moka hoko kia tatou he ʼu aluʼaga heʼe faitotonu. Tou vakaʼi te aluʼaga ʼae neʼe hoko kia Janiya, ʼae neʼe hoko kia ia he ʼu aluʼaga heʼe faitotonu ʼuhi ko tona lanu. ʼE ina ui fenei: “Neʼe au ita ʼosi. Neʼe au lotomamahi ʼi te ʼu palalau ʼae neʼe fai mai e te hahaʼi, pea neʼe au ʼamusia age ke fakatuʼā natou. Koia neʼe au manatu ai ke au kau ki he kutuga ʼe fakafeagai ki te fehiʼa ki te ʼu lanu pea mo te ʼu aluʼaga heʼe faitotonu. Pea neʼe au ʼaho maʼaku mole he meʼa ʼe kovi haku fakaha feia toku ita.” Kae ʼaki te temi, neʼe mahino leva ia Janiya ʼe tonu ke ina fai he ʼu fetogi. ʼE ina ui fenei: “Neʼe au kamata tui au ki te ʼu meʼa ʼae ʼe lau e te hahaʼi pea mo falala kia natou, kae mole au falala au kia Sehova. Koia, neʼe au fakatotonu ai ke au fakagata taku felogoi mo te ʼu kutuga ʼaia.” ʼE moʼoni, ʼe tou iita moka gaohi koviʼi tatou peʼe moka tou sisio ʼe gaohi koviʼi ʼihi. Kae ʼe tonu ke tou tokaga ʼo lolomi totatou ita pea mo fakaha ʼi te temi fuli pe ʼe mole tou kau ʼi te malama ʼaeni.​—Soa. 15:19.

12. He koʼe ʼe lelei ke tou tokakaga ki te ʼu logo ʼae ʼe tou maʼu?

¹² Kotea ka tokoni mai ke tou lolomi totatou ita moka hoko kia tatou he ʼu aluʼaga heʼe faitotonu? Tokolahi neʼe natou fakatuʼutuʼu ke natou tokaga ki te ʼu meʼa ʼae ʼe natou lau, mo sioʼi pea mo fakalogo. ʼE fakalalahi e ʼihi te ʼu aluʼaga heʼe faitotonu ʼi te ʼu fakatahiʼaga ʼi te neti, pea mo uga te hahaʼi ke natou kau ki he ʼu laka ʼe fakafeagai ki he puleʼaga fakatagata. ʼE mole fakaha tuʼumaʼu ʼi te ʼu talalogo ia te moʼoni. Pea ʼe ʼi ai ʼihi pilo talalogo kua natou kau ki he faʼahi politike, koia ʼe feala ai ke natou uga te hahaʼi ke natou lagolago ki ai ʼi te ʼu logo ʼae ʼe natou tala. Tatau aipe pe ʼe moʼoni te logo, kae ʼe mole feala ke tou fakatokatoka te ʼu fihifihia moka hoko atu pe tatatou lau te aluʼaga ʼae neʼe hoko. Kapau ʼe tou sioʼi tuʼumaʼu he ʼu logo feia, ʼe feala pe ke tou hoʼi iita noa, peʼe lotovaivai, peʼe hoha. (Taag. 24:10) Kae ʼe toe kovi age la ia, he ʼe feala pe ke galo kia tatou ko te puleʼaki pe ʼe tahi ki te ʼu aluʼaga heʼe faitotonu fuli ʼe ko te Puleʼaga ʼo te ʼAtua.

13. ʼE tokoni feafeaʼi mai tatatou lau tuʼumaʼu te Tohi-Tapu moka hoko kia tatou peʼe ki ʼihi he ʼu aluʼaga heʼe faitotonu?

¹³ Ka tou lau tuʼumaʼu te Tohi-Tapu mo metitasio ki ai, ʼe tokoni mai anai ke tou iloʼi te meʼa ʼe tonu ke tou fai moka hoko kia tatou peʼe ki ʼihi he ʼu aluʼaga heʼe faitotonu. Neʼe lotomamahi ʼosi te tuagaʼane ko Alia ʼi tana sio ʼae ki te gaohi koviʼi ʼo te hahaʼi ʼo tona fenua. Neʼe kovi ʼosi tona ita he ʼe ko natou ʼaia neʼe natou fai te ʼu aga ʼe kovi neʼe mole fakatuʼā. ʼE ina fakamatala fenei: “Neʼe au nofo ifo muʼa ki lalo ʼo fakakaukau, mo fai kia au te fehuʼi ʼaeni: ‘ ʼE au tui moʼoni koa ʼe fakatokatoka anai e Sehova te ʼu fihifihia fuli ʼaia?’ ʼI te temi ʼaia, neʼe au lau ai ia Sopo 34:​22-​29. ʼI taku lau te ʼu vaega ʼaia, neʼe fakamanatuʼi mai ai ʼe sio ia Sehova kia meʼa fuli. ʼE ko ia tokotahi pe ʼe ina iloʼi pe ʼe feafeaʼi te fakamauʼi ʼo te hahaʼi, pea mo te fakatokatoka ʼo te ʼu fihifihia fuli ʼo te tagata takitokotahi ʼo talu ai.” ʼE tou iloʼi kua vave fakatuʼu e te Puleʼaga ʼo te ʼAtua ia te faitotonu moʼoni. Koia, ʼi tatatou fakatalitali ki ai, tou tauʼi ʼi te temi nei te ʼu aluʼaga heʼe faitotonu ʼe hoko kia tatou peʼe ki ʼihi. ʼO feafeaʼi?

KOTEA ʼE FEALA KE TOU FAI ʼI TE TEMI NEI MOKA HOKO HE ʼU ALUʼAGA HEʼE FAITOTONU?

14. Kotea ʼe feala ke tou fai ke ʼaua naʼa tou kau ki te ʼu aluʼaga heʼe faitotonu ʼi te malama ʼaeni? (Kolose 3:​10, 11)

¹⁴ ʼE mole feala ke tou fetogi te ʼu aga heʼe faitotonu ʼe fai e te hahaʼi ki ʼihi. Kae ʼe feala ke tou iloʼi te meʼa ʼae ʼe tonu ke tou fai. Neʼe tou vakaʼi ʼi muʼa atu, ʼe tou faʼifaʼitakiʼi ia Sesu ʼo tou ʼoʼofa ki te hahaʼi. Koia, ka tou ʼoʼofa ki te hahaʼi, ʼe uga ai tatou ke tou fakaʼapaʼapa ki te hahaʼi, maʼia kia natou ʼae ʼe natou fai he ʼu aluʼaga heʼe faitotonu. (Mat. 7:​12; Loma 12:17) ʼE fiafia ia Sehova moka tou agalelei mo fai te meʼa ʼae ʼe totonu ki te hahaʼi fuli.​—Lau ia Kolose 3:​10, 11.

15. Kotea ʼe hoko moka tou vaevae mo ʼihi te ʼu moʼoni Fakatohi-tapu?

¹⁵ ʼE ʼi ai te faʼahi maʼuhiga ʼaupito ʼe tonu ke tou fai moka hoko kia tatou peʼe ki ʼihi he ʼu aluʼaga heʼe faitotonu. ʼE ko tatatou vaevae mo ʼihi ia te ʼu moʼoni Fakatohi-tapu. Kotea tona tupuʼaga? Koteʼuhi ʼe feala ʼaki “te ʼatamai malama ʼo ʼuhiga mo Sehova” ke ina fetogi he tahi neʼe agakovi mo agamalohi ʼi muʼa atu ko he tahi ʼe agamalū mo ina kumi te tokalelei. (Esa. 11:​6, 7, 9) ʼI muʼa ʼo te iloʼi e te tagata ko Jemal te moʼoni, neʼe kau ki he kutuga agatuʼu ʼe fakafehagai ki te puleʼaga ʼo tona fenua he ʼe kia ia neʼe kovi te puleʼaga ʼaia. ʼE ina ui fenei: “ ʼE mole feala hau fakamalohiʼi tau hahaʼi ke natou fetogi. Neʼe mole fakamalohiʼi au ke au fetogi, kae neʼe au fetogi ʼuhi ko te ʼu moʼoni Fakatohi-tapu ʼae neʼe au ako.” Koia, ʼaki te ʼu fahaʼi ʼae neʼe ako e Jemal, neʼe tokoni ki ai ke tuku tana fetau ki te ʼu aluʼaga ʼaia. Koia, ka hahaʼi natou ʼe fetogi ʼonatou maʼuli ʼuhi ko te ʼu moʼoni Fakatohi-tapu, pea ʼe tokosiʼi anai natou ʼe natou fakahoko he ʼu aga heʼe faitotonu ʼi te temi nei.

16. He koʼe ʼe ke fia fakaha ki te hahaʼi te meʼa ʼae ka fai e te Puleʼaga ʼo te ʼAtua?

¹⁶ Ohage ko Sesu, ʼe tou fiafia ʼi te fakaha ki te hahaʼi ʼe ko te Puleʼaga pe ʼo te ʼAtua ka ina pulihi te ʼu aluʼaga heʼe faitotonu ʼo talu ai. Pea ʼe feala ke fakalotomalohiʼi ai ia natou ʼae neʼe gaohi koviʼi. (Sel. 29:11) ʼE ui fenei e Stacy, ʼae neʼe tou talanoa ki ai ʼi ʼoluga: “ ʼI taku ako te moʼoni, neʼe tokoni mai kia au ke mole au ita moka hoko kia au peʼe ki ʼihi he ʼu aluʼaga heʼe faitotonu. ʼE fakaʼaogaʼi e Sehova te logo ʼo te Tohi-Tapu moʼo fakafimalieʼi tatou.” Koia, kapau ʼe ke fia vaevae te logo fakafimalie ʼae ʼi te Tohi-Tapu ʼo ʼuhiga mo te puleʼaki ki te ʼu aluʼaga heʼe faitotonu, ʼe tonu ke ke teuteu lelei. Ka ke tui papau ki te moʼoni ʼo te ʼu manatu Fakatohi-tapu neʼe tou vakaʼi ʼi te alatike ʼaeni, pea ʼe ke iloʼi lelei age anai te meʼa ʼae ʼe ke palalau ki ai. Pea ʼe feala anai hau faipalalau mo ʼihi ʼaki he aga fakaʼeteʼete ki te ʼu aluʼaga ʼaia ʼi te fale akob peʼe ʼi te fale gaue.c

17. ʼE tokoni feafeaʼi mai ia Sehova moka hoko he ʼu aluʼaga heʼe faitotonu kia tatou peʼe ko ʼihi?

¹⁷ ʼE tou iloʼi e tou tau pe anai mo te ʼu aluʼaga heʼe faitotonu moka kei ‘pule pe ia Satana ʼi te malama ʼaeni.’ Kae ʼe tou falala mo lotomalohi he ʼe kua vave pe tona ‘li e Sehova ki tuʼa.’ (Soa. 12:31) ʼAki te Tohi-Tapu, ʼe fakaha mai ai e Sehova pe koʼe ʼe lahi te ʼu aluʼaga heʼe faitotonu ʼe hoko. Kae ʼe mole gata ai, ʼe ina toe fakaha ai pe kotea ʼe ina logoʼi moka sio mai ʼe tou mamahi ʼuhi ko te ʼu aluʼaga ʼaia. (Pes. 34:​17-​19) Pea ʼaki tona ʼAlo, ʼe akoʼi tatou e Sehova pe kotea ʼe tonu ke tou fai moka hoko he aluʼaga heʼe faitotonu kia tatou ʼo feia pe ki ʼihi. Pea ʼe ina toe akoʼi mai pe kua vave pulihi feafeaʼi e tona Puleʼaga ia aluʼaga heʼe faitotonu fuape ʼo talu ai. (2 Pet. 3:​13) Koia, tou haga fakamafola te logo lelei ʼo te Puleʼaga ʼaia ʼaki he faʼafai, mo fakatalitali ki te temi ʼae ka fonu ai te kele ʼi “te agatonu mo te faitotonu.”​—Esa. 9:7.