ʼE ʼIo Anai Ia “Natou Fuli ʼAe Neʼe Lelei ʼOnatou Loto”

1. ʼE tali feafeaʼi e te hahaʼi ia te logo lelei? (Gaue 13:​47, 48; 16:​14, 15)

TOKOLAHI ʼi te ʼuluaki sekulo neʼe natou tali atu aipe ia te moʼoni ʼi tanatou logo ki te logo ʼo te Puleʼaga. (Lau ia Gaue 13:​47, 48; 16:​14, 15.) ʼO toe feia pe ia ʼaho nei, ʼe fakafiafia ʼihi ʼi tanatou hoki logo ʼaia ki te logo lelei. Maʼia mo te hahaʼi ʼae ʼe mole fia logo, ʼe feala ki ʼamuli ke natou avahi ʼonatou loto ki te logo ʼae ʼe tou tala. Koia, kotea ʼe tonu anai ke tou fai moka tou felaveʼi mo ni hahaʼi ʼi te minisitelio ʼe “lelei ʼonatou loto”?

2. He koʼe ʼe feala ke tou fakatatau ia te fai ʼo ni tisipulo ki te gaue ʼa he tagata faiʼoloto?

² Tou toʼo he faʼifaʼitaki. ʼE feala ke fakatatau te fai ʼo ni tisipulo ki te gaue ʼe fai e he tagata faiʼoloto. Ka momoho he ʼu fuaʼi ʼakau, ʼe toli e te tagata faiʼoloto. Kae mole gata ai, ʼe feala ke ina fuli te kele ʼi te temi pe ʼaia peʼe to he ʼu fuʼu ʼakau ʼi he tahi age faʼahi ʼo tona ʼoloto. ʼO toe feia pe, ka fia logo atu aipe he tahi ki te logo ʼe tou tala, tou foimo tokoni ki ai ke liliu ko he tisipulo ʼa Kilisito. Pea ʼe feala ke tou toe tokoni ʼi te lakaga pe ʼaia ki te hahaʼi ʼae ʼe ʼaoga kia natou he temi, ke natou mahino ki te maʼuhiga ʼo te logo lelei. (Soa. 4:​35, 36) ʼE tokoni mai anai te fakasiosio tonu ke tou iloʼi pe kotea ʼe tou fai moka tali peʼe kailoa e te hahaʼi ia te logo ʼae ʼe tou tala. Tou vakaʼi pe kotea ʼe feala ke tou fai ʼi hatatou ʼuluaki faipalalau mo he tahi ʼe fia logo atu aipe ki tatatou logo. ʼE tou toe vakaʼi anai pe ʼe feafeaʼi hatatou tokoni ki ai ke hoko atu pe tana fakaovi kia Sehova.

ʼE FIA LOGO TE HAHAʼI

3. Kotea ʼe tonu ke tou fai moka fia logo he tahi ki te logo lelei? (1 Kolonito 9:​26)

³ Ka fia logo he tahi ki te logo lelei, ʼe tonu ke tou foimo tokoni ki ai ke haʼele ʼi te ala ʼae ʼe ina taki ki te maʼuli. Tou kole ki ai ke fai hana ako pea mo fakaafe ki ʼatatou fono ʼi tatatou ʼuluaki faipalalau mo ia.​—Lau ia 1 Kolonito 9:​26.

4. Fakamatala te faʼifaʼitaki ʼo he fafine neʼe ina tali atu aipe ke fai hana ako.

⁴ Tou kole ki he tahi ke fai hana ako. ʼE tali e ʼihi ke natou foimo ako atu aipe ia te Tohi-Tapu. Ko te aluʼaga ʼaia neʼe hoko ʼi Kanata. Neʼe ko te Felianima pea neʼe tuʼu te fafine ʼi te laupapa ʼo toʼo tana kaupepa Ke Ke Fiafia ʼo Heʼe Gata. Neʼe ui age e te tuagaʼane ʼae neʼe tuʼu ai, ʼe feala ke fai hana ako ʼaki te kaupepa ʼaia kae mole totogi. Neʼe tali e te fafine koia neʼe ina ʼavage ai tona numelo ki te tuagaʼane. Ki muli age ʼi te ʼaho pe ʼaia, neʼe faitohi te fafine ki ai ʼo ui age pe ko te temi fea ʼe feala ke kamata ai tana ako. Neʼe ui age e te tuagaʼane pe ʼe feala ke nā fai ʼi te fakaʼosi vahaʼa, kae neʼe ui age e te fafine: “He koʼe ʼe mole fai ia apogipogi, he ʼe au ava?” Koia, neʼe kamata ai tana ako ʼi te Feliaono. Pea ʼi te fakaʼosi vahaʼa, neʼe ko te hoki kau ʼae ʼa te fafine ʼaia ki ʼatatou fono. Pea neʼe mole fakatuatuai ia tana tuputupu.

5. Kotea ʼae ʼe tokoni mai ke tou kamata ai he ako Tohi-Tapu? (Vakaʼi mo te ʼu pāki.)

⁵ ʼE mahino ia, ʼe mole hage anai te hahaʼi fuli ʼae ʼe natou tali te logo ko te fafine ʼaia, ʼo natou ako atu aipe te Tohi-Tapu. ʼE ʼaoga anai kia natou he temi. ʼE feala ke tou kamata te faipalalau ki he aluʼaga ʼe fia palalau ki ai he tahi. Kotea pe te aluʼaga ʼae ʼe hoko, kapau ʼe tou taupau he manatu ʼe lelei mo hoko atu tatatou tokagaʼi ia ia, ʼe tou kamata vave anai he ako Tohi-Tapu. Koia, kotea ʼe feala ke tou fai ke kamata ai he ako? Neʼe fai te fehuʼi ʼaia ki he ʼu tehina mo tuagaʼane neʼe faigafua tanatou kamata he ʼu ako Tohi-Tapu.

6. Kotea te ʼu palalau ʼae ʼe feala ke tou fai ke tupu ai he fia ako ʼa he tahi?

⁶ Neʼe fakafehuʼi he ʼu tehina mo tuagaʼane pea mo he ʼu pionie ʼo ʼuhiga mo te kamata ʼo he ʼu ako. ʼE natou ui ʼi ʼihi fenua, ka tou kole ki he tahi ke fai hana ako, ʼe lelei age ke mole tou fai age te ʼu palalau ʼaeni “ta ako te Tohi-Tapu,” peʼe “tuku ke au akoʼi atu.” ʼE natou maʼu he ʼu fua lelei moka natou fakaʼaogaʼi te ʼu palalau ʼaeni “ta faipalalau ki te Tohi-Tapu,” peʼe “ta vakaʼi te meʼa ʼae ʼe ui ʼi te Tohi-Tapu.” ʼE feala ke hoko atu te faipalalau ʼaki hau ui fenei age: “ ʼE fakaofoofo tatatou sio ki te maʼu ʼi te Tohi-Tapu te ʼu tali ki te ʼu fehuʼi maʼuhiga ʼo te maʼuli,” peʼe “Ko te Tohi-Tapu ʼe mole ko he tohi lotu pe, he ʼe tou maʼu ai he ʼu tokoni ki te maʼuli ʼo te ʼaho fuli.” ʼE feala ke ke toe ui fenei: “ ʼE mole fualoa anai. ʼE feala ke ta faipalalau minuta ʼe 10 peʼe 15 ki he ʼu manatu maʼuhiga ʼo te Tohi-Tapu.” ʼI ʼihi temi ʼe lelei age ke ʼaua naʼa ke fai he ʼu palalau fenei “ta fakatuʼutuʼu ʼi te vahaʼa fuli,” he ʼe feala leva ke ina logoʼi kua fakamaʼua age ia.

7. Ko te temi fea ʼae neʼe hoki mahino ai ʼihi ki te ʼu moʼoni Fakatohi-tapu? (1 Kolonito 14:​23-​25)

⁷ Tou fakaafe ia ia ki he fono. ʼI te temi ʼo te apositolo ko Paulo, ʼe lagi neʼe hoki mahino ʼihi ki te ʼu moʼoni Fakatohi-tapu ʼi tanatou kau ki he fono. (Lau ia 1 Kolonito 14:​23-​25.) Pea ʼe toe feia pe ia ʼaho nei. Koia, tokolahi ʼe foʼofoʼou mai ki ʼatatou fono, ʼe natou tuputupu vave moka natou kau ki ai. Ko te temi fea ʼe lelei ai ke tou fakaafe ai natou? Logo la ʼi te kapite 10 ʼo te tohi Ke Ke Fiafia ʼo Heʼe Gata ʼe fakaafe ai natou ki te ʼu fono, kae ʼe mole maʼua ke ke atali ki te kapite ʼaia ke ke fakaafe ai ia ia ki te ʼu fono. ʼE feala pe hau fakaafe ia ia ʼi takolua ʼuluaki faipalalau ki te fono ʼo te fakaʼosi vahaʼa. ʼE feala ke ke palalau age ki te kupu tafito ʼo te akonaki ki te kauga malie peʼe ki he manatu ka vakaʼi ʼi te Ako ʼo Te Tule Leʼo.

8. Kotea ʼe feala ke tou ui age ki he tahi moka tou fakaafe ki ʼatatou fono? (Esaia 54:13)

⁸ Ka ke fakaafe he tahi ki ʼatatou fono, fakamahino age ki ai te kehekehe mo te faʼahiga fai ʼo ʼihi lotu ʼae ʼe kau mahani ki ai. Neʼe ʼi ai he fafine neʼe ina ako te Tohi-Tapu pea ko tana hoki kau e ki te ako ʼo Te Tule Leʼo. Neʼe ina fehuʼi fenei ki tana fafine faiako: “Ko te tagata ʼae ʼe palalau mai muʼa, ʼe kua ina iloʼi ia te ʼu higoa ʼo te hahaʼi fuli?” Neʼe tali fenei age e te tuagaʼane ʼe tou faiga fuli ke tou iloʼi te ʼu higoa ʼo natou ʼo te kokelekasio, ohage pe ko tatatou iloʼi te ʼu higoa ʼo natou ʼo totatou famili. Neʼe ui age e tana ako ʼe mole ko te aluʼaga ʼaia ʼe hoko ʼi tana ʼekelesia. ʼE toe mata foʼou ki te tokolahi ia te fakatuʼutuʼu ʼo ʼatatou ʼu fono. (Lau ia Esaia 54:13.) ʼE tou fakatahitahi ke tou tauhi kia Sehova, mo ina akoʼi tatou pea ke tou fefakalotomalohiʼaki. (Hep. 2:​12; 10:​24, 25) Koia, ʼe mole fai ʼi ʼatatou fono he ʼu toʼotoʼoga fakalotu. ʼE fakatuʼutuʼu lelei ʼatatou fono ke mahino ai te hahaʼi fuli ki te ʼu moʼoni Fakatohi-tapu. (1 Ko. 14:40) ʼE malama lelei ʼotatou Fale Fono he ʼe feala ai ke tou ako lelei te Tohi-Tapu. Pea tahi, ʼe mole tou kau ki te ʼu fihi fakapolitike, koia ʼe mole tou palalau politike anai. Pea ʼe mole tou fihi anai ki he ʼu manatu peʼe faiga ke tuʼu ʼatatou manatu. Koia, ʼe lelei anai ke tou fakaha ki tatatou ako ia te ʼata viteo ʼaeni Kotea ʼAe ʼe Fai ʼi Te Fale Fono? ʼE tokoni anai ki ai ke ina iloʼi pe kotea ka hoko ai.

9-10. Ka tou fakaafe he tahi ki he fono, kotea ʼe feala ke tou fai ke mole tuʼania? (Vakaʼi mo te pāki.)

⁹ ʼE lotolotolua ʼihi ʼi te kau ki hatatou fono he ʼe natou tuʼania naʼa natou fetogi lotu. Koia, fakamahino age kia natou ʼe tou fiafia ke ʼomai te hahaʼi ʼo fakalogo pea ʼe mole tou fakakinauʼi natou ke natou fai he meʼa. ʼE tou fiafia ʼi te fakatalitali he ʼu famili mo ʼanatou fanau ʼi ʼatatou fono. ʼE mole akoʼi kehe te ʼu fanau mo te ʼu matuʼā. ʼE heheka fakatahi te ʼu matuʼā mo ʼanatou fanau pea ʼe natou ako fakatahi. Koia, ʼe iloʼi ai e te ʼu matuʼā pe ko ai ʼae ʼe nonofo mo ʼanatou fanau pea mo te meʼa ʼae ʼe akoʼi kia natou. (Tet. 31:12) ʼE mole fai he tae falā. Kae ʼe tou mulimuli ki te fakatotonu ʼaeni ʼa Sesu: “Neʼe kotou maʼu noa, kotou foaki noa.” (Mat. 10:8) ʼE feala hau toe ui age kia ia ʼae ʼe haʼu ʼo fono, ʼe mole ʼaoga anai ke ina tui he ʼu mutuʼi meʼa ʼe totogi kovi. ʼE mole sio te ʼAtua ki te meʼa ʼae ʼe ha ki tuʼa kae ʼe sio ia ki te loto.​—1 Sam. 16:7.

¹⁰ Ka haʼu he tahi ʼo fono, fai ia meʼa fuli ke ina logoʼi hona fakatalitali leleiʼi. Alu ʼo fakaha ia ia ki te kau tagata ʼafeā pea mo ʼihi tehina mo tuagaʼane. Kapau ʼe ina logoʼi hona fakatalitali leleiʼi, ʼe feala pe anai ke toe fia liliu mai ʼo fono. Lolotoga te fono, kapau ʼe mole hana Tohi-Tapu, fakaha age ki ai te ʼu vaega ʼi tau Tohi-Tapu ke feala hana muliʼi te manatu ʼae ʼe talanoa ki ai ia ia ʼae ʼe faiakonaki mo ʼae ʼe tou ako.

ʼE KAMATA HE AKO TOHI-TAPU

11. ʼE ke fakaha feafeaʼi anai ʼe ke fakaʼapaʼapa ki te temi ʼo ia ʼae ʼe ako?

¹¹ Kotea ʼae ʼe tonu ke tou manatuʼi moka fai he ako ʼa he tahi? Fakaʼapaʼapa ki te temi ʼo ia ʼaia ʼe ako. Ohage la, ka kolua fakatuʼutuʼu ke kolua toe felaveʼi, ke ke haʼu tautonu, tatau aipe pe ʼe ko te agamahani ʼa te hahaʼi ʼo tou fenua te mole ʼomai tautonu. Pea tahi, ʼe lagi ke fakatuʼutuʼu anai ke mole loaloaga takolua ʼuluaki faiako. ʼE ui e he ʼu tehina mo tuagaʼane faiva, ʼe lelei ke mole fualoa fau te ako, tatau aipe pe ʼe fia mahino lahi ia ia ʼaia ʼe ako. ʼAua naʼa lahi fau tau palalau. Tuku ia ia ke ina fakaha te ʼu meʼa ʼae ʼe ina logoʼi.​—Taag. 10:19.

12. Kotea anai te fakatuʼutuʼu ʼo tatatou kamata he ako ʼa he tahi?

¹² ʼE ko tau fakatuʼutuʼu ʼi te kamata ʼe ko tau tokoni ki tau ako ke ina iloʼi ia Sehova mo Sesu pea mo ʼofa kia naua. ʼO feafeaʼi? ʼAki hau tokoni ki ai ke ina tokagaʼi tafito te manatu ʼae ʼi te Folafola ʼa Te ʼAtua, kae mole ki tau manatu peʼe ko te ʼu meʼa ʼae ʼe ke iloʼi ʼi te Tohi-Tapu. (Gaue 10:​25, 26) Neʼe fakatafito pe te akonaki ʼa te apositolo ko Paulo kia Sesu Kilisito, ʼae neʼe fekauʼi ifo e Sehova ke haʼu ʼo tokoni ki te hahaʼi ke natou iloʼi pea mo ʼoʼofa ia te Ia. (1 Ko. 2:​1, 2) Pea neʼe toe fakaha lelei e Paulo te maʼuhiga ʼae ke tokoni ki te ʼu tisipulo foʼou ke natou gaueʼi he ʼu kalitate ʼe tatau mo te aulo, mo te paʼaga, pea mo he ʼu maka maʼuhiga. (1 Ko. 3:​11-​15) Ohage la ko te tui, mo te poto, mo te fakasiosio tonu pea mo te manavasiʼi kia Sehova. (Pes. 19:​9, 10; Taag. 3:​13-​15; 1 Pet. 1:7) Ke ke faʼifaʼitakiʼi te faʼahiga fai ʼa Paulo. Ke ke tokoni ki tau ʼu ako ke natou maʼu he tui ʼe malohi pea mo he ʼu felogoi lelei mo tanatou Tamai ʼofa ʼae ʼe ʼi selo.​—2 Ko. 1:​24.

13. ʼE tou fakaha feafeaʼi ʼe tou faʼa kataki mo lotomahino ki ʼatatou ako? (2 Kolonito 10:​4, 5) (Vakaʼi mo te pāki.)

¹³ ʼE tou faʼifaʼitakiʼi ia Sesu ʼo tou faʼa kataki mo lotomahino moka tou faiako. ʼAua naʼa ke fai he ʼu fehuʼi ki tau ako ke tupu ai tana ufiufi. Kapau ʼe ʼaoga, tuku keheʼi muʼa te ʼu manatu ʼae ʼe faigataʼa tana mahino ki ai, pea hoki kolua toe vakaʼi ki ʼamuli. ʼE mole ʼaoga ke ke fakakinauʼi ke ina tali he manatu Fakatohi-tapu, kae ʼe heʼeki tokalelei ki ai. Tuku he temi ke tauaka te moʼoni ʼi tona loto. (Soa. 16:12; Kol. 2:​6, 7) ʼE fakatatau ʼi te Tohi-Tapu te ʼu akonaki hala ʼae ʼe tou faiga ke tou tekeʼi ki he ʼu tule. (Lau ia 2 Kolonito 10:​4, 5.) Koia, ʼaua naʼa ke maumauʼi te tule ʼae ʼe kei tuʼu ai tau ako, kae tokoni ki ai ke liliu ia Sehova ko hona Holaʼaga, mo hona Tule.​—Pes. 91:9.

ʼE KAU TE HAHAʼI KI TE ʼU FONO

14. Kotea ʼe tonu ke tou fai kia natou ʼae ʼe foʼofoʼou mai ki ʼatatou fono?

¹⁴ ʼE loto e Sehova ke mole tou fakapalatahi, tatau aipe pe kotea te agaʼi fenua ʼa te hahaʼi, mo tonatou tuʼulaga, mo haʼuʼaga peʼe ko tonatou lanu. (Sakp. 2:​1-4, 9) Koia, ʼe tou fakaha feafeaʼi ʼe tou ʼoʼofa ki te hahaʼi ʼae ʼe ʼomai ki ʼatatou fono?

15-16. ʼE tou tokoni feafeaʼi kia natou ʼae ʼe foʼofoʼou mai ki ʼatatou fono ʼe natou logoʼi honatou fakatalitali leleiʼi?

¹⁵ ʼE ʼomai pe ʼihi ki ʼatatou fono he ʼe natou fia iloʼi meʼa fuli, peʼe ko he tahi ʼo ʼonatou feilo ʼe nofo ʼi he tahi fenua, ʼe ina fakalotomalohiʼi ia ia ke kau ki ai. Koia, alu ʼo faipalalau mo he tahi ʼe foʼofoʼou mai ki ʼatatou fono. Ke ke tali kaiga lelei ki ai, kae ʼaua naʼa ke palalau leʼo lahi ʼe ha ai ʼe ke fiafia, kae ʼe feala ke ufiufi ai. Fakaafe ia ia ke heka fakatahi mo koe. Ke ke muliʼi fakatahi mo ia ʼi tau Tohi-Tapu, peʼe ko ʼau tohi ako, peʼe ke foaki age hana ʼu tohi. Pea tahi, ke ke tokagaʼi te ʼu meʼa ʼae ʼe ina logoʼi mo ui. Neʼe ui e he tagata ki te tehina ʼae ʼe tali kaiga ʼi te Fale Fono neʼe ufiufi ʼi tana haʼu mo ʼona teu mahani. Neʼe tali age e te tehina ko te kau Fakamoʼoni ʼa Sehova ʼe hage pe ko te hahaʼi fuli, ʼo ina logoʼi ai hona fiafia. Neʼe mole galo ki te tagata ʼaia kua liliu ko he tehina, te tali ʼae neʼe fai age e te tehina. Koia, ʼe lelei ke tou tokagaʼi moʼoni ia natou ʼae ʼe foʼofoʼou mai ki ʼatatou fono, ʼi muʼa peʼe hili ʼo te fono. Kae tokaga naʼa ke fia iloʼi meʼa fuli ki ʼonatou maʼuli.​—1 Pet. 4:​15.

¹⁶ ʼE feala ke tou toe tokoni kia natou ʼaia ke natou logoʼi ʼe mole valokiʼi natou. ʼO feafeaʼi? ʼAki hatatou fakaha ʼi ʼatatou faipalalau mo ʼatatou tali, pea mo akonaki, ʼe tou fakaʼapaʼapa moka tou talanoa kia natou ʼae mole ko he kau Fakamoʼoni peʼe ko tanatou lotu. ʼAua naʼa tou fai he ʼu palalau ke natou mamahi ai pea tupu ai hanatou mole toe fia liliu mai ʼo fono. (Tito 2:8; 3:2) Ohage la, tou tokaga naʼa tou meʼa noaʼi te tui ʼa natou ʼae ʼe mole tauhi fakatahi mo tatou kia Sehova. (2 Ko. 6:3) Koia, ʼe tonu ki te ʼu tehina ʼae ʼe faiakonaki ki te kaugamalie ke natou tokaga tafito ki te faʼahi ʼaia. Pea tahi, ʼe natou tokagaʼi te hahaʼi ʼae ʼe mole tauhi kia Sehova ʼo natou fakamahino te ʼu kupu mo te ʼu manatu ʼae ʼe mole natou mahani ki ai.

17. Kotea tatatou fakatuʼutuʼu moka tou kumi he ʼu hahaʼi ʼe “lelei ʼonatou loto ke natou maʼu te maʼuli heʼe gata”?

¹⁷ ʼE fakalaka pe te ʼaho mo te maʼuhiga ʼaupito ʼae ke tou fai ni tisipulo. Pea ʼe hoko atu pe tatatou kumi he ʼu hahaʼi ʼe “lelei ʼonatou loto ke natou maʼu te maʼuli heʼe gata.” (Gaue 13:48) Koia, tou ui age pe ʼe mole natou fia ako te Tohi-Tapu pea mo fakaafe natou ki ʼatatou fono. Ka tou fai feia, pea ʼe tou tokoni anai kia natou ke natou kamata haʼele ʼi “te ala ʼae ʼe ina taki ki te maʼuli.”​—Mat. 7:​14.