Te Tohi Mai Te Kolesi Pule
Naʼi Kaugā Fakamoʼoni ʼa Sehova:
ʼE ko he ʼu temi maʼuhiga ʼaenī! Pea ʼe tou toe maʼu foki mo he toe fiafia lahi! ʼE matou fiafia moʼoni ʼi te gāue fakatahi mo koutou, naʼi tehina mo tuagaʼane, ʼi te fakahoko ʼo te toe fagonogono ʼe lahi tokotahi ʼo te ʼu temi ʼo ʼuhiga mo tatatou Tamai ʼe ʼi selō, ko Sehova.—Sofo. 3:9; Soa. 14:12.
Ko tatatou fiafia ʼi te tauhi kiā Sehova ʼe mole fakaʼuhiga leva ʼe mole kei tou tau mo he ʼu fihifihia lalahi. Lolotoga te taʼu gāue kua hili, neʼe ʼi ai ʼihi iā koutou neʼe kotou maʼuli mamahi ʼuhi ko te ʼu mafuike, mo te ʼu lōmaki, mo te ʼu ʼafā, pea mo ʼihi atu ʼu tuʼutāmaki fakanātulā. (Mat. 24:7) Tokolahi ʼe natou tau ʼi te ʼaho fuli mo te ʼu fua ʼo te mahaki kovi pea mo te mātutuʼa. ʼE toe hoko kiā tātou fuli “te ʼu mamahi” ʼaē ʼe ʼāʼāsili age. (Mat. 24:8) ʼE lahi te ʼu fenua, ohagē lā ko Alamenia, mo Elitelea, pea mo Kolea Sautē, ʼe pilisoniʼi ai totatou ʼu tehina e tokolahi ʼuhi ko tanatou tui.—Mat. 24:9.
Koteā ʼaē ʼe tokoni mai kiā tātou ke tou falala logolā te ʼu faigataʼaʼia ʼaia? Ko te vaega Tohi-Tapu ki te taʼu 2010 neʼe ina fakamanatuʼi mai kiā tātou fuli te faʼahi maʼuhiga ʼaenī: ‘Ko te ʼofa ʼe ina kātakiʼi ia meʼa fuli. Ko te ʼofa ʼe molemo puli ia ʼi he lakaga.’ (1 Ko. 13:7, 8) ʼEī, ko tatatou feʼofaniʼaki, pea mo totatou ʼofa kiā Sehova, ʼe tou maʼu ai te mālohi ke tou lava kātakiʼi te ʼu mamahi.
Tokolahi iā nātou ʼe natou ʼui ko nātou ko te kau Kilisitiano, ʼe natou punamaʼuli ki te lahi ʼo tatatou gāue fai fakamafola pea mo tatatou fakahoko tuʼumaʼu pē te gāue ʼaia. Logolā ʼe lagi mole natou tali tatatou ʼu akonaki, kae ʼe ʼui fēnei e ʼihi: “ ʼE kotou fai koutou te gāue ʼaē ʼe tonu ke mātou fai!” Koteā lā he faʼahi ʼe tokoni ki te kau Fakamoʼoni ʼa Sehova ke natou haga fai fakamafola ʼi te ʼaho fuli pē? ʼE ko te ʼofa. Ohagē ko tatatou Tamai ʼe ʼi selō, ʼe mole tou loto ke fakaʼauha he tahi. (2 Pet. 3:9) Ko totatou loto ʼaē ke liliu te hahaʼi fuli ʼo fakahemala, ʼe hā ʼi te laka foʼou ʼo te kau fai fakamafola ʼi te taʼu gāue ʼaenī kua hili, neʼe tou toko 7 508 050. ʼE ʼi ai koa he tahi age lotu ʼe kaugamālie fēia tana ʼu minisi ʼaē ʼe natou kau ki te gāue ʼofa ʼaia, ʼo natou lotolelei ke natou tokoni ki te hahaʼi ʼi te faʼahi fakalaumālie?
ʼE fakalotomālohiʼi ia tātou ʼi tatatou sio ki te lolotoga fakahoko ʼo te lea fakapolofetā ʼaenī neʼe tohi e Isaia: “ ʼE hoko moʼoni anai, ʼi te temi fakaʼosi ʼo te ʼu ʼaho, ko te moʼuga ʼo te fale ʼo Sehova ʼe fakatuʼu maʼu anai ʼi te tumutumu ʼo te ʼu moʼuga, pea ʼe mahino papau ia ʼe māʼoluga ake anai ia ʼi te ʼu moʼuga liliki; pea ko te ʼu fenua fuli ʼe natou ʼolo anai kiai.” (Isa. 2:2-4) ʼI te toe hahaʼi tokolahi ʼaupitō ʼaē ʼe natou ʼolo ki te ʼapi ʼo Sehova, ʼe kau ai te toko 294 368 ʼaē neʼe papitema lolotoga te taʼu gāue kua hili. ʼE tou tali leleiʼi ia nātou ʼaia ʼi totatou fāmili. ʼOfa pē ke uga tātou e totatou ʼofa Fakakilisitiano, ke tou tokoni kiā nātou ke natou tauʼi te ʼu ʼohofi ʼo totatou fili, ia Satana te Tēvolo.—1 Pet. 5:8, 9.
Ko te laka foʼou ʼo nātou ʼaē neʼe kau ki te ʼAho Fakamanatu ʼo te Mate ʼa Sesu ʼi te Feliatolu, ʼaho 30 ʼo Malesio 2010, ʼaē neʼe ko te toko 18 706 895, ʼe fakahā ai ʼe kei ʼi ai te ʼu toko lauʼi miliona hahaʼi ʼe kei feala hanatou fakatahi mai kiā tātou moʼo tauhi kiā Sehova. ʼE feala ke tou fiafia lahi ʼi te mole heʼeki fakaʼauha e Sehova te tuʼu agakovi ʼaenī! ʼI muʼa ʼo te hoko mai ʼo te ʼaho ʼaia, ʼe feala anai hatatou kātaki mo kapau ʼe tou maʼu te ʼofa.—2 Tes. 3:5.
ʼAki te Fakatahi Fakatisitilike neʼe ko tona kupu tāfito: “Kotou Nonofo Ovi Kiā Sehova!” ʼaē neʼe fai ʼi te mālamanei kātoa ʼi te taʼu 2010, neʼe toe mālohi age ai tatatou ʼu felōgoi mo tatatou Tamai ʼe ʼi selō ko Sehova. ʼE moʼoni te ʼu folafola ʼaenī ʼa te tagata fai pesalemo: “Fiafia te hahaʼi ʼaē ko tonatou ʼAtua ko Sehova!” (Pes. 144:15) Tatau aipē pe koteā he faʼahiga meʼa ʼe feala ke hoko, kae ʼe tou falala kapau ʼe nofo ia Sehova ʼi ʼotatou tafa, ʼe mole tou tuʼania anai he meʼa. (Pes. 23:4) Kua vave pē anai te ‘maumauʼi e Sehova te ʼu gāue ʼa te Tēvolo’ ʼo ina fakaʼaogaʼi tona ʼAlo. (1 Soa. 3:8) Kua tou fakaʼamu ke hoko mai lā te ʼaho ʼaia! Kae ʼi muʼa ʼo te hoko ʼo te ʼaho ʼaia, ʼe lahi ʼaupitō tatatou ʼu gāue ke tou maʼumaʼua kiai.—1 Ko. 15:58.
Ke kotou tui papau, ʼe matou hūfaki “tuʼumaʼu” koutou ʼi tamatou ʼu faikole. (Loma 1:9) ʼOfa pē ke “kotou haga nonofo ʼi te ʼofa ʼo te ʼAtua, ʼi takotou talitali ki te manavaʼofa ʼo totatou ʼAliki ko Sesu Kilisito ki te maʼuli heʼegata.”—Suta 21.
ʼE matou ʼofa atu kiā koutou fuli,
Tokotou ʼu tehina,
Te Kolesi Pule ʼa Te Kau Fakamoʼoni ʼa Sehova