“ ʼE Matou Fia Olo Mo Koutou”

1, 2. (1) Kotea ʼae neʼe ui e Sehova ʼo ʼuhiga mo totatou temi? (2) Kotea te ʼu fehuʼi ka tali anai ki ai te alatike ʼaeni? (Vakaʼi te ʼuluaki pāki.)

NEʼE ui e Sehova ʼo ʼuhiga mo totatou temi, “ko te ʼu tagata ʼe toko hogofulu mai te ʼu lea kehekehe ʼo te ʼu puleʼaga ʼe natou puke anai te tapaʼi kofu ʼo te tagata Sutea, ʼo natou ui fenei: ‘ ʼE matou fia olo mo koutou, koteʼuhi neʼe matou logo ko te ʼAtua ʼe nofo mo koutou.’” (Sakalia 8:23, MN) Ko te “tagata Sutea,” ʼe ina fakata ia natou ʼae neʼe fakanofo e te ʼAtua ʼaki tona laumalie maʼoniʼoni. ʼE toe fakahigoaʼi natou ko “te Iselaele a te Atua.” (Kalate 6:16) Ko te ʼu “tagata ʼe toko hogofulu,” ʼe natou fakata ia natou ʼae ka maʼuʼuli anai ʼo heʼe gata ʼi te kele. ʼE natou iloʼi ʼe tapuakiʼi e Sehova te kiʼi kutuga ʼaia ʼo te kau fakanofo. Pea ko he pilivilesio kia natou ia tanatou tauhi fakatahi mo te kau fakanofo kia Sehova.

² Ohage ko te polofeta ko Sakalia, neʼe ui e Sesu ko te hahaʼi ʼa te ʼAtua ʼe logotahi anai. Neʼe ina ui, ko natou ʼae ʼe ʼamanaki hake ki selo, ko te “kii fagaovi,” pea ko natou ʼae ʼe ʼamanaki maʼuʼuli ʼi te kele, ko te ‘tahi ʼu ovi.’ Kaʼe neʼe ui e Sesu ʼe natou liliu anai ko “he faga ovi e tahi” pea ʼe natou muliʼi anai ia ia, ko tonatou “tauhi ovi” pe ʼaia ʼe tahi. (Luka 12:32; Soane 10:16) Mai tona aluʼaga ʼae ko kutuga ʼe lua, ʼe feala ke fai e ʼihi te ʼu fehuʼi ʼaeni: (1) ʼE tonu koa ke iloʼi e te ‘tahi ʼu ovi’ te ʼu higoa fuli ʼo te toe ʼo te kau fakanofo? (2) Kotea te manatu ʼe tonu ke maʼu e te kau fakanofo kia natou totonu? (3) Kapau ko he tahi ʼi toku kokelekasio, ʼe ina kamata kai te pane mo inu te vino ʼi te ʼAho Fakamanatu, ʼe feafeaʼi anai taku aga kia ia? (4) ʼE tonu koa ke au tuʼaniaʼi te tuputupu ʼo natou ʼae ʼe kai ki te pane mo inu ki te vino ʼi te ʼAho Fakamanatu? ʼE tou maʼu anai ʼona tali ʼi te alatike ʼaeni.

ʼE TONU KOA KE TOU ILOʼI TE ʼU HIGOA FULI ʼO TE KAU FAKANOFO ʼAE ʼE KEI TOE ʼI TE KELE?

3. He koʼe ʼe mole feala ke tou iloʼi papau pe ʼe ko ai ʼe kau anai ki te toko 144 000?

³ ʼE ʼaoga koa ke iloʼi e te tahi ʼu ovi te ʼu higoa fuli ʼo te toe ʼo te kau fakanofo? Kailoa. Kotea tona tupuʼaga? Koteʼuhi ʼe mole feala ke iloʼi papau e he tahi pe ʼe natou maʼu anai tonatou fakapale.^[1] (Vakaʼi te nota ʼi te fakaʼosi ʼo te alatike.) Logo la neʼe fakaafe natou e te ʼAtua ke natou hahake ki selo, kaʼe ʼe hoki natou maʼu anai tonatou fakapale mo kapau foki ʼe natou nonofo agatonu. ʼE iloʼi e Satana te faʼahi ʼaia, koia ʼe ina fakaʼaogaʼi ai te ʼu “polofeta loi” moʼo ‘fakaheʼi’ ʼo natou. (Mateo 24:24) ʼE iloʼi papau pe anai e te kau fakanofo ia tanatou kua maʼu tonatou fakapale ʼi te temi ʼae ka fakaha age ai e Sehova kua tuha mo natou te fakapale. ʼE foaki e Sehova ia te fakailoga fakaʼosi ʼaia, ʼi muʼa ʼo tanatou mamate peʼe ʼi muʼa ʼo te kamata ʼo te “mamahi lahi.”—Apokalipisi 2:10; 7:3, 14.

4. Kapau ʼe mole feala ke iloʼi te ʼu higoa fuli ʼo te kau fakanofo ʼae ʼe kei maʼuʼuli ʼi te kele, ʼe tou “olo” feafeaʼi anai mo natou?

⁴ Kapau ʼe mole feala ke iloʼi te ʼu higoa fuli ʼo te kau fakanofo ʼae ʼe kei maʼuʼuli ʼi te kele, ʼe “olo” feafeaʼi anai te tahi ʼu ovi mo natou? ʼE ui ʼi te Tohi-Tapu ko te ʼu “tagata ʼe toko hogofulu,” “ ʼe natou puke anai te tapaʼi kofu ʼo te tagata Sutea, ʼo natou ui fenei: ‘ ʼE matou fia olo mo koutou, koteʼuhi neʼe matou logo ko te ʼAtua ʼe nofo mo koutou.’ ” ʼE moʼoni, ʼe talanoa te vaega ki te tagata Sutea ʼe tokotahi, kaʼe ʼi te ui ʼae “koutou,” ʼe fakaʼuhiga ia ki he tokolahi. Koia ko te tagata Sutea ʼe mole fakaʼuhiga pe ki te tokotahi, kaʼe ʼe ina fakata te kiʼi kutuga ʼo te kau fakanofo fuli. ʼE iloʼi te aluʼaga ʼaia e te tahi ʼu ovi pea ʼe natou tauhi fakatahi mo te kiʼi kutuga ʼaia kia Sehova. ʼE mole ʼaoga ke natou iloʼi te ʼu higoa fuli ʼo te kau fakanofo. Pea ʼe mole ʼaoga ke natou muliʼi te kau fakanofo takitokotahi. Koteʼuhi ko totatou Takitaki, ko Sesu pea ʼe ui ʼi te Tohi-Tapu ʼe tonu ke tou muliʼi ia ia tokotahi pe.—Mateo 23:10.

KOTEA TE MANATU ʼE TONU KE MAʼU E TE KAU FAKANOFO KIA NATOU TOTONU?

5. Kotea te fakatokaga ʼae ʼe tonu ke fakakaukauʼi lelei e te kau fakanofo? Kotea tona tupuʼaga?

⁵ ʼE tonu ke fakakaukauʼi lelei e te kau fakanofo te fakatokaga ʼae ʼe tou maʼu ia 1 Kolinito 11:27-29. (Lau.) ʼE feala ke “hee fakaapaapa” feafeaʼi he tahi kua fakanofo moka ina kai ki te pane mo inu ki te vino ʼi te ʼAho Fakamanatu? ʼE mole fakaʼapaʼapa mo kapau ʼe ina hoko atu tana kai te pane mo inu te vino, kaʼe ʼe mole kei ina maʼu he ʼu felogoʼi lelei mo Sehova pea mo talagataʼa kia te ia. (Hepeleo 6:4-6; 10:26-29) Ko te fakatokaga maʼuhiga ʼaia, ʼe ina fakamanatuʼi age ki te kau fakanofo ʼe tonu ke natou nonofo agatonu mo kapau ʼe natou fia maʼu “te fakapale o te kalaga mai lagi a te Atua ia Sesu-Kilisito.”—Filipe 3:13-16.

6. Kotea te manatu ʼe tonu ke maʼu e te kau Kilisitiano fakanofo kia natou totonu?

⁶ Neʼe ui fenei e te apositolo ko Paulo ki te kau Kilisitiano fakanofo: “E au kole . . . kia koutou, e au, ko te tagata pilisoni i te Aliki, ke kotou haele i he haele e gali mo te paui kua fai atu kia koutou.” ʼE tonu anai ke natou fakahoko feafeaʼi te faʼahi ʼaia? Neʼe fakamahino fenei e Paulo: “Aki te agavaivai fuape mo te agamalu, fakatahi mo te kataki, o kotou fekatakiaki i te ofa, mo kotou faiga ke kotou taupau te faifaitahi o te Laumalie aki te hai o te tokalelei.” (Efeso 4:1-3) ʼE tokoni te laumalie maʼoniʼoni ʼo Sehova ki ʼana kaugana ke natou agavaivai, kaʼe ke mole natou fiatuʼu. (Kolose 3:12) Koia ʼe mole manatu ai te kau fakanofo ʼe natou maʼoluga age ʼi ʼihi. ʼE natou iloʼi ʼe foaki fakatatau e Sehova tona laumalie maʼoniʼoni ki te kau fakanofo mo te tahi ʼu ovi. Pea ʼe mole natou ui ʼe loloto age tanatou mahino ki te ʼu moʼoni ʼo te Tohi-Tapu ʼi ʼihi. ʼE mole natou ui anai ki he tahi kua toe fakanofo mo ia pea mo ui age ki ia ʼe tonu ke ina kamata kai te pane mo inu te vino ʼi te ʼAho Fakamanatu. Kaʼe ʼe natou agavaivai pea ʼe natou iloʼi ko Sehova tokotahi pe ʼe feala ke ina fakaafe te hahaʼi ki selo.

7, 8. Kotea ʼae ʼe mole fakaatalitali e te kau Kilisitiano fakanofo ki ʼihi? Kotea tona tupuʼaga?

⁷ Logo la ko he pilivilesio ki te kau fakanofo tonatou fakaafe ki selo, kaʼe ʼe mole natou fakaatalitali ke vikiʼi natou. (Efeso 1:18, 19; lau ia Filipe 2:2, 3.) ʼE natou iloʼi, ʼi te temi ʼae neʼe fakanofo ai natou e Sehova, neʼe mole iloʼi e he tahi. Koia ʼe mole punamaʼuli ai he tahi kua fakanofo mo kapau ʼe mole tui atu aipe ʼihi ki tona kua fakanofo. ʼE mahino ia, ʼe ui ʼi te Tohi-Tapu ke ʼaua tatatou hoko tui ki he tahi ʼe ina fakaha mai kua fakanofo ia e te ʼAtua ki he gaue makehe. (Apokalipisi 2:2) ʼE mole ina fakaha anai ki he tahi pe ko ia kua fakanofo, koteʼuhi ʼe mole loto ke tokagaʼi fau ia ia. ʼI tona fakahagatonu, ʼe mole loto anai ke iloʼi e he tahi. Pea ʼe mole laupisi anai ʼo ʼuhiga mo te ʼu gaue fakaofoofo ʼae ka ina fakahoko ʼi selo.—1 Kolinito 1:28, 29; lau ia 1 Kolinito 4:6-8.

⁸ ʼE mole manatu te kau Kilisitiano fakanofo ke natou fakatahi pe mo ʼonatou tehina fakanofo, ohage ko he kiʼi kutuga ʼe makehe. ʼE mole natou faiga pe ke natou palalau mo ʼihi fakanofo ki tonatou kua filifili, peʼe ke natou ako fakatahi te Tohi-Tapu. (Kalate 1:15-17) Ko te kokelekasio ʼe mole logotahi anai mo kapau ʼe natou fai feia. Koteʼuhi ʼe natou fakafeagai anai ki te laumalie maʼoniʼoni ʼae ʼe tokoni ki te hahaʼi ʼa te ʼAtua ke natou tokalelei mo logotahi.—Lau ia Loma 16:17, 18.

ʼE FEAFEAʼI TATATOU AGA KIA NATOU?

9. He koʼe ʼe tonu ke tou tokakaga ki tatatou aga ki te ʼu tehina mo tuagaʼane fakanofo? (Vakaʼi te fakamatala ʼae ʼi te ʼa takai “Ko Te ʼOfa ‘ ʼe Mole Ina Fai Ni Aga ʼe Mole Tau Mo Feʼauga.’”)

⁹ ʼE tonu ke feafeaʼi takotou aga ki te ʼu tehina mo tuagaʼane fakanofo? Neʼe ui fenei e Sesu ki ʼana tisipulo: “Ko te u tehina fuli koutou.” ʼE ina hoko atu fenei: “Ko ae e fia malaga anai ki oluga e tuku anai ia ia ki lalo, pea ko ae e fakamalalo e hiki anai ia ia ki oluga.” (Mateo 23:8-12) Koia ʼe mole lelei ke tou fakamaʼuhigaʼi fau he tahi, tatau aipe pe ko te tehina fakanofo ʼo Kilisito. Ka talanoa te Tohi-Tapu ki te kau tagata ʼafeā, ʼe fakalotomalohi ai tatou ke tou faʼifaʼitakiʼi tanatou tui. Kaʼe ʼe mole ui mai ai ʼe feala ke liliu he tagata ko hotatou takitaki. (Hepeleo 13:7) ʼE moʼoni, ʼe ui mai ʼi te Tohi-Tapu ko ʼihi “e tua lua tanatou tuha mo te fakaapaapa.” Koteʼuhi “e lelei tanatou takitaki” pea ʼe natou gaue kinakina ʼi “te folafola mo te faiakonaki,” kaʼe mole ʼuhi ko natou ko te kau fakanofo. (1 Timoteo 5:17) Kapau ʼe tou vikiʼi mo tokagaʼi fau te kau fakanofo, ʼe natou ufiufi ai anai peʼe feala ai ke natou liliu ʼo fiatuʼu. (Loma 12:3) ʼE mole tou loto anai ke tou fai he meʼa ke tupu ai he agahala mamafa ʼo te ʼu tehina fakanofo ʼo Kilisito.—Luka 17:2.

10. ʼE feafeaʼi hakotou fakaha ʼe kotou fakaʼapaʼapa ki te kau Kilisitiano fakanofo?

¹⁰ ʼE feafeaʼi hatatou fakaha ʼe tou fakaʼapaʼapa kia natou ʼae neʼe fakanofo e Sehova? ʼE mole tou fehuʼi anai kia natou pe neʼe natou liliu feafeaʼi ko he kau fakanofo. Ko te aluʼaga ʼaia ʼe mole tonu ke tou iloʼi. (1 Tesalonika 4:11; 2 Tesalonika 3:11) Pea ʼaua naʼa tou manatu kua toe fakanofo mo ʼonatou ʼohoana, mo ʼanatou matuʼā, peʼe ko he tahi age ʼo tonatou famili. ʼE mole maʼu e he tahi te ʼamanaki ʼaia mai tona famili. (1 Tesalonika 2:12) ʼAua naʼa tou fai ni fehuʼi ʼe fakatupu lavea ki ʼihi. Ohage la, ʼe mole tou fehuʼi anai ki te ʼohoana ʼo he tehina fakanofo pe kotea tana manatu ki tana maʼuli ʼo heʼe gata ʼi te kele kaʼe hake tona ʼohoana ki selo. ʼE tou iloʼi papau, ʼe ‘fafaga anai e Sehova te loto ʼo te ʼu meʼa maʼuli fuli’ ʼi te malama foʼou.—Pesalemo 145:16.

11. ʼE tou puipui feafeaʼi ia tatou mo kapau ʼe mole tou ‘vikiʼi te tagata’?

¹¹ Kapau ʼe mole tou fakamaʼuhigaʼi fau te kau fakanofo, ʼe tou puipui ai ia tatou totonu. ʼO feafeaʼi? ʼE ui ʼi te Tohi-Tapu ʼe feala ke maʼu ʼi te kokelekasio ni “tehina loi” ʼe natou lau ko natou ko te kau fakanofo. (Kalate 2:4, 5; 1 Soane 2:19) Pea tahi, ʼe feala pe ke mole nonofo agatonu ʼihi fakanofo. (Mateo 25:10-12; 2 Petelo 2:20, 21) Koia ʼe mole tonu ke tou ‘vikiʼi te tagata,’ he ʼe feala ai anai ke tou muliʼi he tehina kua fakanofo peʼe kua fualoa tana tauhi kia Sehova. Koteʼuhi kapau ʼe mole nofo agatonu peʼe mavae ʼi te kokelekasio, ʼe vaivai ai anai tatatou tui kia Sehova pea tou taʼofi ai tatatou tauhi kia te ia.—Suta 16.

ʼE TONU KOA KE TOU TUʼANIAʼI TONATOU TUPUTUPU?

12, 13. He koʼe ʼe mole tonu ke tou tuʼaniaʼi te tuputupu ʼo natou ʼae ʼe kai ki te pane mo inu ki te vino ʼi te ʼAho Fakamanatu?

¹² Lolotoga ni taʼu, neʼe hifo te lahi ʼo natou ʼae ʼe kai ki te pane mo inu ki te vino ʼi te ʼAho Fakamanatu. Kaʼe ʼi te ʼu taʼu pe ʼae kua hili, ʼe tuputupu pe tonatou hahaʼi ʼi te taʼu fuli. ʼE tonu koa ke tou tuʼania ki te aluʼaga ʼaia? Kailoa. Tou vakaʼi pe kotea tona tupuʼaga.

¹³ “ ʼE iloʼi e Sehova ia natou ʼae ʼaʼana.” (2 Timoteo 2:19, MN) ʼE fakaau e te ʼu tehina ia te hahaʼi ʼae ʼe kai ki te pane mo inu ki te vino ʼi te ʼAho Fakamanatu. Kaʼe ʼe mole natou iloʼi pe ko ai ʼae kua fakanofo moʼoni, gata pe kia Sehova. Koia ʼe toe kau ʼi te hahaʼi ʼaia, ia natou ʼae ʼe lagi manatu kua fakanofo natou kaʼe ʼe natou fai hala. Ohage la, ko ʼihi neʼe natou kai ki te pane mo inu ki te vino kaʼe ki muli age neʼe mole kei natou fai. Pea ko ʼihi, ʼe lagi mahahaki ʼi te fakakaukau peʼe ʼi te loto, ʼe natou manatu ʼe kaugā ʼafio anai mo Kilisito ʼi selo. Koia ʼe ha lelei ai, ʼe mole tou iloʼi pe ʼe ko te toko fia ʼo te kau fakanofo ʼe kei maʼuʼuli ʼi te kele.

14. Kotea ʼe ui ʼi te Tohi-Tapu ʼo ʼuhiga mo te kau fakanofo ʼae ʼe kei maʼuʼuli anai ʼi te kele moka kamata te mamahi lahi?

¹⁴ ʼE maʼu pe anai ʼi te potu fuli ʼo te kele te kau fakanofo ʼi te temi ʼae ʼe haʼu ai Sesu ʼo ʼave natou ki te lagi. ʼE ui ʼi te Tohi-Tapu, ʼe “fekaui anai [e Sesu] ana aselo mo te fakatagi pupuhi malohi, pea e natou tanaki anai tana kau filifiliia maia fahai matagi e fa, mai ae potupotu o te lagi ki ae potupotu.” (Mateo 24:31) ʼE toe fakaha ʼi te Tohi-Tapu ʼi te ʼu ʼaho fakaʼosi, ʼe tokosiʼi te kau fakanofo ʼae ʼe maʼuʼuli ʼi te kele. (Apokalipisi 12:17) Kaʼe ʼe mole ui mai pe ʼe natou toko fia anai moka kamata te mamahi lahi.

15, 16. Kotea ʼe tonu ke tou mahino ki ai ʼo ʼuhiga mo te toko 144 000 ʼae neʼe filifili e Sehova?

¹⁵ Ko Sehova ʼae ʼe ina filifili te temi ʼae ka ina fakanofo ai he tahi. (Loma 8:28-30) Neʼe kamata filifili e Sehova te kau fakanofo ʼi tana ʼosi fakatuʼuake ia Sesu. Neʼe hage ia ko te kau Kilisitiano moʼoni fuli ʼo te temi ʼo te kau apositolo, neʼe ko te kau fakanofo. Lolotoga taʼu ʼe lauʼi teau hili te aluʼaga ʼaia, neʼe ui e te tokolahi ko natou ko te kau Kilisitiano, kaʼe neʼe mole natou mulimuli moʼoni ia Kilisito. ʼI te ʼu taʼu pe ʼaia, neʼe fakanofo e Sehova ia te kau Kilisitiano moʼoni. Neʼe natou hage ko te fulumeto ʼae neʼe ui e Sesu, ʼe natou hohomo fakatahi ake anai mo te vao kovi peʼe ko te sisania. (Mateo 13:24-30) Lolotoga te ʼu ʼaho fakaʼosi ʼaeni, ʼe kei hoko atu pe e Sehova tana filifili te hahaʼi ʼae ʼe kau anai ki te toko 144 000. ^[2] (Vakaʼi te nota ʼi te fakaʼosi ʼo te alatike.) Koia kapau ʼe fakatotonu e Sehova ke ina filifili ʼihi ʼi muʼa pe ʼo te hoko mai ʼo te fakaʼosi, ʼe tou tui papau anai ʼe ina fai te meʼa ʼae ʼe totonu. (Esaia 45:9; Taniela 4:35; lau ia Loma 9:11, 16.) ^[3] (Vakaʼi te nota ʼi te fakaʼosi ʼo te alatike.) ʼE tonu ke tou tokakaga naʼa tou hage ko te kau gaue ʼae neʼe meo, koteʼuhi neʼe mole fakakehekeheʼi natou mo te kau gaue ʼo te hola fakaʼosi e tonatou pule.—Lau ia Mateo 20:8-15.

¹⁶ Ko natou ʼae ʼe ʼamanaki maʼuʼuli ʼi selo, ʼe mole natou faʼufaʼu fuli ia “te tagata faifekau agatonu mo poto.” (Mateo 24:45-47) Ohage pe ko te temi ʼo te kau apositolo, ʼe fakaʼaogaʼi e Sehova mo Sesu ia ʼaho nei te tokosiʼi moʼo fafaga peʼe ke natou akoʼi te kaugā malie. Ko te tokosiʼi pe ʼo te kau Kilisitiano fakanofo ʼae neʼe fakaʼaogaʼi ʼi te temi muʼa ke natou tohi te Koga Tohi-Tapu Fakakeleka. Pea ia ʼaho nei, ko te tokosiʼi pe ʼo te kau fakanofo ko tonatou maʼua ʼae ke natou foaki ki te hahaʼi ʼa te ʼAtua “te meakai i tona temi totonu.”

17. Kotea ʼae neʼe tou ako ʼi te alatike ʼaeni?

¹⁷ Kotea ʼae neʼe tou ako ʼi te alatike ʼaeni? Neʼe fakatotonu e Sehova ke ina foaki te maʼuli heʼe gata ʼi te kele, ki te tahi ʼu ovi pea ko te maʼuli ʼi selo kia natou ʼae ka kaugā ʼafio anai mo Sesu. ʼE fakapale e Sehova ʼana kaugana fuli, ia “te tagata Sutea” mo “te ʼu tagata ʼe toko hogofulu.” Pea ʼe ina fakamaʼua age ke natou fakalogo ki te ʼu lao fuli mo nonofo agatonu. ʼE tonu ke tou agavaivai fuli. ʼE tonu ke tou tauhi fakatahi fuli kia Sehova ʼi te logotahi. Pea ʼe tonu ke tou gaue fuli ki te taupau ʼo te tokalelei ʼi te kokelekasio. Koia ʼi te kua ovi mai ʼo te ʼaho fakaʼosi, tou haga tauhi fuli kia Sehova pea mo tou muliʼi ia Kilisito ohage he faga ovi ʼe tahi.