Selemia
14 Koʼeni te folafola ʼa Sehova kia Selemia ʼo ʼuhiga mo te ʼu taʼi laʼa:+
2 Kua putu ia Suta+ pea kua maumau te ʼu matapa ʼo ʼona kolo.
Kua natou to ki te kele, kua natou lotovaivai,
Pea ʼe hake ake he kalaga ʼi Selusalemi.
3 ʼE fekauʼi e te ʼu pule ʼanatou kaugana* ke olo ʼo ohu vai.
ʼE olo te ʼu kaugana ki te ʼu foʼi vai,* kae ʼe mole ʼi ai he vai.
ʼE natou toe liliu mai mo ʼanatou ʼaiʼaga vai ʼe ʼago.
ʼE natou ufiufi mo lotovaivai,
Pea ʼe natou pulouʼi ʼonatou ʼulu.
4 ʼE lotomamahi te kau gaue kele ʼo natou pulouʼi ʼonatou ʼulu,
Koteʼuhi kua makafaʼafaʼa te kele,
He ʼe mole kei to he ʼua ʼi te fenua.+
5 ʼI te vao matuʼa, maʼiape la mo te tia fafine ʼae neʼe hoki fanau neʼe ina siʼaki tona ʼuhi
He ʼe mole kei ʼi ai he luna.
6 ʼE tutuʼu te ʼu asino vao ʼi te ʼu kiʼi moʼuga lauʼatea,
ʼE natou fakahelahela ohage ko ni kuli vao.
Kua gaʼegaʼe ʼonatou mata ʼi te kumi meʼa kai.+
7 Sehova e, gaue ʼuhi ko tou huafa,+
Tatau aipe pe ʼe tukugakoviʼi matou e ʼamatou hala.
Kua tuʼa lahi tamatou heʼe agatonu,+
Pea ʼe matou agahala kia te koe.
8 Siʼi koe, te ʼamanakiʼaga ʼo Iselaele, ia Ia ʼae ʼe ina haofaki+ ʼi te ʼu temi mamahi,
He koʼe ʼe ke hage ko he matapule ʼi te fenua,
Ohage ko he tagata faifolau ʼe tuʼu pe ia ʼo malolo ʼi te poʼuli?
9 He koʼe ʼe ke hage ko he tagata ʼe punamaʼuli,
Ohage ko he tagata toʼa ʼe mole feala ke ina haofaki?
ʼAua naʼa ke lituʼa kia matou.
10 Koʼeni te folafola ʼa Sehova ʼo ʼuhiga mo te hahaʼi ʼaeni: “ ʼE natou leleiʼia tanatou feoloʼaki ʼi he mo he,+ kae ʼe mole natou taʼofi pe la ʼonatou vaʼe.+ Pea ʼe mole leleiʼia e Sehova te faʼahi ʼaia.+ Koia ʼi te temi nei ʼe ina manatuʼi anai ʼanatou hala pea ʼe ina fakamauʼi anai natou ʼuhi ko ʼanatou agahala.”+
11 Pea neʼe ui mai e Sehova: “ ʼAua naʼa ke hufakiʼi te hahaʼi ʼaeni ke au fai age he meʼa ʼe lelei.+ 12 Ka natou sesunio, ʼe mole au fakalogo ki ʼanatou tagi,+ pea ka natou momoli mai ni holokoseta mo ni molaga meʼa kai, ʼe mole au tokagaʼi natou.+ ʼE au pulihi anai natou ʼaki te tau, mo te hoge pea mo te ʼu taʼi mahaki.”*+
13 Kae neʼe au ui: “Oiaue, siʼoku Tuʼi ʼAliki ko Sehova! ʼE ui age ia e te kau polofeta: ‘ ʼE mole hoko anai kia koutou te tau peʼe ko te hoge, he ʼe au foaki atu anai te tokalelei moʼoni ʼi te koga meʼa ʼaeni.’ ”+
14 Pea neʼe toe ui mai e Sehova: “ ʼE faifakakikite loi te kau polofeta ʼi toku huafa.+ Neʼe mole au fekauʼi natou, neʼe mole au fakatotonu age he meʼa pea neʼe mole au palalau mo natou.+ ʼE natou tala atu he meʼa kaka neʼe ha kia natou. ʼE vaʼiganoa ʼanatou faifakakikite pea ʼe natou faʼufaʼu ni loi.+ 15 Koia koʼeni te folafola ʼa Sehova: ‘Ki te kau polofeta ʼae ʼe natou faifakakikite ʼi toku huafa kae neʼe mole au fekauʼi, pea ʼe natou ui ʼe mole hoko anai ni tau mo ni hoge ʼi te fenua ʼaeni, ʼe natou mamate anai ʼi te tau mo te hoge.+ 16 Pea ʼe mamate anai te hahaʼi ʼae ʼe natou faifakakikite ki ai, ʼi te hoge mo te tau. ʼE laku anai natou ʼi te ʼu ala ʼo Selusalemi, pea ʼe mole ʼi ai he tahi ke ina tanu natou,+ mo ʼonatou ʼohoana, mo ʼonatou foha pea mo ʼonatou ʼofafine. ʼE au fakahoko anai kia natou te malaʼia ʼae ʼe tuha mo natou.’+
17 “ ʼE ke tala age anai te folafola ʼaeni:
‘Ke tafe tuʼumaʼu ʼoku loʼimata ʼi te po mo te ʼaho.+
Neʼe kovi te ta ʼo te taʼahine taupoʼou ʼo taku hahaʼi.+
Kua kovi ʼosi tona lavea.
18 Ka au mavae ʼi te kolo,
ʼE au sio ki te hahaʼi kua mamate ʼi te heleta!+
Pea ka au ulu ki te kolo,
ʼE au sio ki te hahaʼi ʼe mahahaki ʼuhi ko te hoge!+
Neʼe feoloʼaki te polofeta mo te pelepitelo ʼi he fenua ʼe mole nā iloʼi.’ ”+
19 Neʼe ke liʼaki katoa koa ia Suta, pe neʼe ke fakalialia koa ki Sione?+
He koʼe neʼe ke taʼi matou, ʼo mole kei feala ke faitoʼo ʼomatou lavea?+
Neʼe fakaʼamu ki te tokalelei, kae neʼe mole hoko mai he meʼa ʼe lelei.
Neʼe fakaʼamu ki he temi ʼo te fakamalolo, kae ko te mataku pe ia!+
20 Sehova e, ʼe matou iloʼi tamatou agakovi,
Pea mo te hala ʼo ʼamatou kui,
He neʼe matou agahala kia te koe.+
21 ʼAua naʼa ke situʼa kia matou ʼuhi ko tou huafa.+
ʼAua naʼa ke meʼa noaʼi tou hekaʼaga fakahau fakakololia.
Manatuʼi tau fuakava mo matou pea ʼaua naʼa ke maumauʼi.+
22 ʼE feala koa ke fakato te ʼua e he fakatata vaʼiganoa ʼe tahi ʼo te ʼu puleʼaga?
Peʼe feala koa ke fakatotonu pe e te lagi ke to ni ʼua?
Sehova e, tomatou ʼAtua, ko koe tokotahi pe ʼe ke lavaʼi!+
ʼE matou falala kia te koe,
He ʼe ko koe tokotahi pe ʼae neʼe ke fakatupu te ʼu meʼa fuli ʼaia.