Esekiele
24 Neʼe toe palalau mai ia Sehova ʼi te hiva taʼu, ʼi te ʼaho hogofulu ʼo te mahina hogofulu, ʼo ina ui: 2 “Foha ʼo te tagata, tohi te ʼaho ʼaeni. Neʼe kamata tauʼi e te hau ʼo Papiloni ʼi te ʼaho ʼaeni ia Selusalemi.+ 3 Pea fakamatala he hisitolia* ʼo ʼuhiga mo te hahaʼi agatuʼu, ʼo ke ui:
“ ‘Koʼeni te folafola ʼa te Tuʼi ʼAliki ko Sehova:
“Fakatuʼu te kulo, fakatuʼu ki te afi pea mo huaʼi ki ai te vai.+
4 Laku ki ai ni kanoʼi manu,+ te ʼu koga fuli ʼae ʼe lelei,
Te alaga muli mo te alaga muʼa. Toe laku ki ai te ʼu hui ʼae ʼe lelei.
5 Toʼo te ʼu ovi ʼae ʼe lelei ʼi tau faga manu.+ Tanaki te ʼu fafie ʼi te lalo kulo pea mo ʼona tafaʼaki.
Fakapula te ʼu kanoʼi manu pea mo te ʼu hui ʼae ʼi te kulo.” ’
6 “Koia koʼeni te folafola ʼa te Tuʼi ʼAliki ko Sehova:
‘Malaʼia ki te kolo faifakapo,+ te kulo ukaukamea ʼae neʼe mole toʼo tona ukaukamea!
Ke toʼo takitahi mai ai te ʼu kanoʼi manu,+ ke mole fai he toho moʼonatou filifili.
7 ʼE maʼu ia ia te toto ʼae neʼe ina liligi,+ neʼe ina liligi leva ki te fuga maka.
Neʼe mole ina liligi ki te kele naʼa ʼuʼufi ʼaki te efu.+
8 Neʼe au liligi te toto ʼo ʼana mate ki te fuʼu maka,
Ke ʼaua naʼa ʼuʼufi,
Ke tupu ai toku hauhau ʼo fakahoko te lagavaka.’+
9 “Koia koʼeni te folafola ʼa te Tuʼi ʼAliki ko Sehova:
‘Malaʼia ki te kolo faifakapo!+
ʼE au fakatuʼuga anai he toe fafie.
10 Ke tanaki te fafie pea ke tafu te afi,
Ke moho lelei te kanoʼi manu, ke huaʼi te huhuʼa pea ke gosigosi te ʼu hui.
11 Ke hili te kulo gaʼasi ki te ʼu mamala ke vela ai,
Ke kula momoho tona kapa.
ʼE puli ai anai tona ʼuli+ pea mo tona ukaukamea.
12 ʼE fakakinakina mo fakapiko,
He ʼe mole to te matolu ʼo te ukaukamea ʼaia.+
Li te kulo ukaukamea ki te afi!’
13 “ ‘Neʼe ke heʼe maʼa ʼuhi ko tau aga fakalialia.+ Neʼe au faigaʼi ke au fakamaʼa koe, kae neʼe mole feala ke fakamaʼa koe mai tou heʼe maʼa. ʼE mole ke maʼa anai ʼi muʼa ʼo taku fakafimalieʼi toku hauhau kia koe.+ 14 Ko au ia Sehova ʼae neʼe palalau. ʼE hoko anai. ʼEi, ʼe au fakahoko fakamalotoloto anai, ʼe mole au fakahemala anai.+ ʼE fakamauʼi anai koe ʼo mulimuli pe ki tau aga mo ʼau gaue,’ ko te ui ʼaia ʼa te Tuʼi ʼAliki ko Sehova.”
15 Neʼe toe palalau mai ia Sehova, ʼo ina ui: 16 “Foha ʼo te tagata, ʼe au toʼo fakapunamaʼuli anai ia ia ʼae ʼe ke ʼofa ai.+ ʼE mole tonu anai ke ke putu mo tagi loʼimata. 17 Lauga fakalogologo pea ʼaua naʼa ke fakahoko te ʼu agaʼi fenua ki te putu.+ Takai tou ʼulu ʼaki te kie,+ pea tui ʼou sulie.+ ʼAua naʼa ke ʼuʼufi tou kava+ pea ʼaua naʼa ke kai te pane ʼae ka foaki atu.”+
18 Neʼe au palalau ki te hahaʼi ʼi te uhu, pea neʼe mate toku ʼohoana ʼi te afiafi. Koia ʼi te ʼala uhu ake, neʼe au fai te meʼa ʼae neʼe fakatotonu mai. 19 Neʼe fehuʼi mai e te hahaʼi: “Fakamahino mai te meʼa ʼae ʼe ke fai. Kotea koa tomatou pikipikiga mo te ʼu meʼa ʼaia?” 20 Neʼe au tali age kia natou: “Neʼe palalau mai ia Sehova, ʼo ina ui: 21 ‘Tala age ki te hahaʼi ʼo Iselaele: “Koʼeni te folafola ʼa te Tuʼi ʼAliki ko Sehova: ‘ ʼE au ʼulihi anai toku sagatualio,+ ʼae ʼe kotou fiameʼameʼa ai, ʼae ʼe maʼuhiga kia koutou pea ʼe fakaʼamuʼamu ki ai tokotou loto. ʼE matehi anai ʼaki te heleta ʼokotou foha mo ʼokotou ʼofafine ʼae neʼe mole ʼomai mo koutou.+ 22 Pea ʼe tonu anai ke kotou fai ohage ko au. ʼE mole tonu anai ke kotou ʼuʼufi ʼokotou kava mo kotou kai te pane ʼae ka foaki atu.+ 23 ʼE takai anai ʼokotou ʼulu ʼaki te kie mo kotou tui ʼokotou sulie. ʼE mole kotou putu anai pea mo fetagihi. Kae ʼe kotou pala anai ʼuhi ko ʼakotou hala,+ pea ʼe kotou felaugaʼaki anai. 24 Kua liliu ia Esekiele ko he fakailoga maʼa koutou.+ ʼE kotou fai pe anai ohage ko ia. Ka hoko mai, ʼe kotou iloʼi moʼoni anai ko au ia te Tuʼi ʼAliki ko Sehova.’ ” ’ ”
25 “Pea ko koe foha ʼo te tagata, ʼi te ʼaho ʼae ʼe au toʼo ai anai tonatou kolo tau, tonatou fiafiaʼaga ʼae ʼe maʼuhiga kia natou, ʼae ʼe fakaʼamuʼamu ki ai tonatou loto, ʼi te temi pe ʼaia, ʼe au toe toʼo anai ʼonatou foha mo ʼonatou ʼofafine.+ 26 ʼE fakaha atu anai e he tahi neʼe hao.+ 27 ʼI te ʼaho ʼaia, ʼe mole ke toe nofo fakalogologo anai, ʼe ke avahi anai tou gutu+ mo palalau kia ia ʼae neʼe hao. ʼE ke liliu anai ko he fakailoga maʼa natou, pea ʼe natou iloʼi moʼoni anai ko au ia Sehova.”