Ko Te Taʼu 1914​—Ko Te Taʼu Maʼuhiga ʼi Te Lea Faka Polofeta ʼo Te Tohi-Tapu

IA TAʼU e fagofulu ia muʼa ʼo te taʼu 1914, neʼe tala e te kau ako Tohi-Tapu, ʼe hoko anai te ʼu meʼa maʼuhiga ʼi te taʼu 1914. Neʼe koteā te ʼu meʼa maʼuhiga ʼaia, pea koteā ʼaē neʼe ina fakamoʼoni ko te taʼu 1914 neʼe ko te taʼu maʼuhiga?

Iā Luka 21:24 (MN ), neʼe ʼui e Sesu: “ ʼE molomoloki anai ia Selusalemi e te ʼu puleʼaga, ʼo aʼu ki te ʼosi fakahoko ʼo te ʼu temi ʼaē kua fakakatofa ki te ʼu puleʼaga.” Ko Selusalemi neʼe ko te kolo taulaga ʼo te puleʼaga Sutea​—te nofoʼaga ʼo te kau takitaki ʼo te ʼu hōloga hau ʼaē ʼe haʼu mai ia Tavite. (Pesalemo 48:​1, 2) Kae ko te ʼu hau ʼaia neʼe mole nātou tatau mo te kau takitaki ʼo te ʼu puleʼaga. Ko te ʼu hau ʼaia neʼe nātou heheka ʼi te “hekaʼaga faka hau ʼo Sehova” moʼo fakafofoga ia te ʼAtua. (1 Fakamatala 29:23) Koia, neʼe fakatātā e Selusalemi ia te takitaki ʼa Sehova.

Kae ko te takitaki ʼa te ʼAtua neʼe kamata ‘molomoloki e te ʼu puleʼaga’ ʼi te temi fea, pea neʼe hoko feafeaʼi? Neʼe hoko ʼi te taʼu 607 ʼi muʼa ʼo totatou temi, ʼi te temi ʼaē neʼe ʼohofiʼi ai ia Selusalemi e te kau Papiloni. Neʼe mole kei ʼi ai he tahi neʼe nofo ʼi te “hekaʼaga faka hau ʼo Sehova” pea neʼe mole kei ʼi ai he hau mai te hōloga ʼo Tavite. (2 Hau 25:​1-26) ʼE hoko anai ʼo talu ai ia te “molomoloki” ʼaia? Kailoa, heʼe ʼui ʼi te lea faka polofeta ʼa Esekiele ʼo ʼuhiga mo Setesiasi te hau fakamuli ʼo Selusalemi: “Toʼo te haʼi ʼo tou ulu, pea toʼo te kolona. . . . ʼE mole toe hili anai ki he tahi age ʼo aʼu ki te haʼu ʼo ia ʼaē ʼe feala ke ina maʼu, pea ʼe au foaki age anai ki ai.” (Esekiele 21:​26, 27) Pea neʼe ko Kilisito Sesu ʼaē “[neʼe] feala ke ina maʼu” te kolona hau ʼo Tavite. (Luka 1:​32, 33) Koia ko te “molomoloki” neʼe fakagata ʼi te temi ʼaē neʼe fakanofo Hau ai ia Sesu.

Neʼe hoko ʼanafea ia te ʼaluʼaga maʼuhiga ʼaia? Neʼe fakahā e Sesu ko te kau Senitile ʼe nātou pule anai ʼo aʼu ki te temi ʼaē kua fakakatofa. ʼE tou maʼu ʼi te kapite 4 ʼo Taniela te ʼu fakamahino peʼe ko temi e fia te loaloaga ʼo te temi ʼaia. ʼE talanoa ai ki te moemisi faka polofeta neʼe fai e Nepukanesa te Hau ʼo Papiloni. Neʼe sio ki te fuʼu ʼakau lahi neʼe tuʼusi. Ko tona tāfito neʼe mole toe homo he neʼe haʼihaʼi ʼaki te ukamea pea mo te kapa. Pea neʼe ʼui fēnei e te ʼāselo: “Ke fakalaka he ʼu temi e fitu kiā te ia.”​—Taniela 4:​10-16.

ʼI te Tohi-Tapu, ʼe tautau fakaʼaogaʼi te ʼu fuʼu ʼakau moʼo fakatā te takitaki. (Esekiele 17:​22-24; 31:​2-5) Koia ko te tuʼusi ʼo te fuʼu ʼakaʼu, ʼe ina fakatā te fakagata ʼo te takitaki ʼa te ʼAtua ʼaē neʼe fakafofoga e te ʼu hau ʼo Selusalemi. Kae neʼe hā ʼi te moemisi ʼaia ko te ‘molomoloki ʼo Selusalemi’ ʼe faka temi pe anai​—heʼe hoko lolotoga “temi e fitu.” E feafeaʼi te loaloaga ʼo te ʼu temi ʼaia?

Iā Apokalipesi 12:​6, 14, ʼe ʼui ai ko temi e tolu vaelua ʼe ko “aho e afe lua geau onogofulu.” Koia, ko “temi e fitu” ʼe tuʼa lua anai tona loaloaga, peʼe ko ʼaho e 2 520. Kae ko te ʼu puleʼaga Senitile neʼe mole gata pe tanatou “molomoloki” te takitaki ʼa te ʼAtua ia ʼaho e 2 520 ʼi te ʼosi fakaʼauha ʼo Selusalemi. ʼE mahino mai, ko te lea faka polofeta ʼaia ʼe loaloaga age. Iā Faka au 14:34 pea mo Esekiele 4:​6, ʼe ʼui ai ko “he ʼaho e tahi ʼe ko te taʼu kātoa,” koia ko “temi e fitu” ʼe ko taʼu anai e 2 520.

Ko te ʼu taʼu e 2 520 neʼe kamata ʼi ʼOketopeli 607 ʼi muʼa ʼo totatou temi, ʼi te temi ʼaē neʼe fakaʼauha ai ia Selusalemi e te kau Papiloni pea neʼe fakahifo ai te hau ʼo te hōloga ʼo Tavite. Neʼe ʼosi te temi ʼaia ʼi te māhina ʼo ʼOketopeli 1914. ʼI te temi ʼaia, neʼe fakaʼosi ai “te ʼu temi ʼaē kua fakakatofa ki te ʼu puleʼaga,” kae fakanofo e te ʼAtua ia Sesu Kilisito ko te Hau ʼi te lagi.a​—Pesalemo 2:​1-6; Taniela 7:​13, 14.

Ohage ko tona fakakikite e Sesu, neʼe fakaʼiloga tana “ ʼi henī” ʼi tona ʼuhiga Hau ʼi selo, ʼaki te ʼu fetogi fakamataku ʼaē neʼe hoko ʼi te malamanei​—te tau, te hoge, te ʼu mafuike, te ʼu taʼi mahaki. (Mateo 24:​3-8, MN; Luka 21:11) Ko te ʼu fetogi ʼaia ʼe ko he fakamoʼoni lahi ko te taʼu 1914 neʼe ina fakaʼiloga te fakatuʼu ʼo te Puleʼaga ʼo Te ʼAtua ʼi selo, pea mo te kamataʼaga ʼo “te u aho fakamuli” ʼo te tuʼu agakovi ʼo te ʼu faʼahiga meʼa ʼaenī.​—2 Timoteo 3:1-5.