Te Kau ʼAselo—ʼE Natou ʼAoga Koa Ki Tokotou Maʼuli?

ʼI Te tahi ʼAhotapu hili hoʼata, neʼe olo ia Kenneth mo Filomena ʼae ʼe maʼuʼuli ʼi Curaçao, ʼo fakasiosio ia he taumatuʼa ʼe nā fai tanā ako Tohi-Tapu.

Neʼe ui fenei ʼe Kenneth: “ ʼI tamā tau atu neʼe mapunu tonā ʼapi pea puli mo tanā motoka. Kaʼe neʼe hage neʼe uga au ke au telefoni ki te fafine.”

Neʼe tali age e te fafine pea neʼe ina fakaha age ʼe gaue tona ʼohoana. Kaʼe ʼi tana iloʼi ʼae ʼe tutuʼu ʼi tuʼa ia Kenneth mo Filomena, neʼe haʼu ai ʼo avahi te matapa.

Neʼe nā tokagaʼi ai neʼe tagi ia te fafine. ʼI te kamata ʼo te ako e Kenneth ʼaki te faikole, neʼe toe tagi ia te fafine. Koia neʼe fakalavelave age e Kenneth mo Filomena pe ʼe ʼi ai he aluʼaga neʼe hoko.

Neʼe ui age e te fafine neʼe teuteu ke fakamate ʼi te hili hoʼata pe ʼaia. Neʼe ina lolotoga fai he tohi ki tona ʼohoana pea mo te pauʼi ʼa Kenneth. Neʼe ina ui age kia naua ʼe lotomamahi tuʼumaʼu. Pea neʼe natou vakaʼi fakatahi ai ia he ʼu manatu fakalotomalohi ʼi te Tohi-Tapu. Ko te ʼu fakalotomalohi ʼaia neʼe fetogi ai leva tana manatu.

Neʼe ui fenei e Kenneth: “Neʼe ma fakamalo kia Sehova ʼi tana fakafealagia mai ke ma tokoni ki te fafine, kaʼe tafito ia tana ʼekenaki maua lagi ʼaki he ʼaselo peʼe ko te laumalie maʼoniʼoni ke ma pauʼi te fafine.”a

Neʼe tonu koa te tui ʼa Kenneth mo Filomena ki te tokoni age ʼa te ʼAtua kia naua ʼaki he ʼaselo, peʼe ʼaki Tona Laumalie Maʼoniʼoni ʼae ko tona malohi gaue? Peʼe neʼe ko he to tonu pe ʼo tana pauʼi?

ʼE mole tou iloʼi papau te faʼahi ʼaia. Kaʼe ʼe tou iloʼi, ʼe fakaʼaogaʼi e te ʼAtua ia tana kau ʼaselo moʼo tokoni ki te hahaʼi ʼi te faʼahi fakalaumalie. Ohage la, ʼe ui ʼi te Tohi-Tapu neʼe fakaʼaogaʼi e te ʼAtua ia he ʼaselo moʼo taki ia te Kilisitiano ko Filipo ke alu ʼo tokoni ki te tagata maʼu tuʼulaga Etiopea ʼae neʼe fia mahino ki te ʼu meʼa fakalaumalie.—Gaue 8:26-31.

ʼE lahi te ʼu lotu ʼe natou lagolago ki te tui ki te ʼu malohi fakalaumalie, ʼo natou ui ko ʼihi ʼe agalelei ʼe natou fai te finegalo ʼo te ʼAtua peʼe ko natou ko he ʼu ʼaselo tauhi. Tokolahi ʼe natou tui ʼe maʼuʼuli moʼoni te kau ʼaselo pea ʼe feala hanatou tokoni kia natou ʼi hona faʼahiga aluʼaga pe. Kaʼe ʼe toe tokolahi mo te hahaʼi ʼae ʼe mole tui ki te kau ʼaselo.

ʼE maʼuʼuli moʼoni koa te kau ʼaselo? Kapau koia, neʼe natou tutupu feafeaʼi? Kotea ia te moʼoni ʼo ʼuhiga mo te kau ʼaselo? ʼE natou ʼaoga koa ki totatou maʼuli? Tou vakaʼi ia he ʼu fakamoʼoni ʼo ʼuhiga mo te faʼahi ʼaia.