Te ʼu Fehuʼi ʼa Te Kau Lautohi

ʼE ʼui ia Kolose 1:16, MN, ʼo ʼuhiga mo te ʼAlo ʼo te ʼAtua “ko meʼa fuli neʼe fakatupu ʼaki ia ia pea maʼa ia.” Koteā tona faka ʼuhiga te ʼui ʼaē ko meʼa fuli neʼe fakatupu “maʼa” te ʼAlo ʼo te ʼAtua, ia Sesu?

Neʼe fakaʼaogaʼi e Sehova tona ʼAlo ʼulu tokotahi ko te tufuga faiva ki te fakatupu ʼo te ʼu meʼa fuli, gata pe ki te fakatupu ʼo Sesu totonu. (Tāʼaga Lea 8:27-30; Soane 1:3) ʼE mahino ia, neʼe fiafia te ʼAlo ʼi te ʼu gāue ʼaia, pea koia ʼaē ʼe ʼui ai ʼe ko te ʼu gāue “maʼa” ia.

ʼE tou ʼiloʼi ko te ʼu mātuʼa fuli ʼe nātou fakaʼamu, pea ʼe ko he meʼa ʼe tautau hoko, ke nātou fiafia ʼi tanatou fānau tagata pea mo fafine. Koia, ʼe palalau ai te tāʼaga lea faka Tohi-Tapu ki ‘te foha ʼe fiafia ai tana tāmai.’ (Tāʼaga Lea 3:12; 29:17) ʼO toe feiā aipe, ko Sehova ʼAtua neʼe fiafia kia Iselaele ʼi te temi ʼaē neʼe nātou agatonu ai. (Pesalemo 44:3; 119:108; 147:11) ʼE toe fiafia foki ʼi te agatonu ʼo tana hahaʼi ʼi te temi nei.—Tāʼaga Lea 12:22; Hepeleo 10:38.

Koia, ʼe matatonu te fiafia ʼa te ʼAtua ki tona kaugā gāue, ia Sesu, ʼi te ʼu gāue ʼaē neʼe ina fai. ʼI tona fakahagatonu, ʼe ʼui e Tāʼaga Lea 8:31 ʼo ʼuhiga mo te ʼAlo ‘neʼe fakafiafia ʼo ʼuhiga mo te koga maʼuli ʼo tona kele, pea ko te ʼu meʼa ʼaē neʼe ʼofa kiai neʼe ko te ʼu meʼa ʼaē neʼe nofo mo te ʼu foha ʼo te tagata.’ Ko te faka ʼuhiga ʼaia ʼo te ʼu palalau ʼo Kolose 1:16 ʼaē ʼe ina ʼui fēnei: “Ko meʼa fuli neʼe fakatupu ʼaki ia ia pea maʼa ia.”