Te ʼu Fehuʼi ʼa Te Kau Lautohi

Ko Te Kau Fakamoʼoni ʼa Sehova ʼe Ko He Lotu Polotesitā Koa?

Ko te kau Fakamoʼoni ʼa Sehova ʼe mole natou ʼui ko nātou ʼe ko he Lotu Polotesitā. Koteā tona tupuʼaga?

Neʼe fakatuʼu ia te Lotu Polotesitā ʼi te 16 sēkulō ʼi Eulopa ʼi tana faiga ʼaē ke ina fetogi ia te Lotu Katolika. Ko te kupu “Polotesitā” neʼe ʼuluaki fakaʼaogaʼi kiā nātou ʼaē neʼe mulimuli kiā Maletino Lutelo ʼi te taʼu 1959 ʼi te fakatahi lahi ʼi te kolo ko Spire. Talu mai te taʼu ʼaia, ko te kupusiga palalau ʼaia ʼe fakaʼuhiga kiā nātou ʼaē ʼe mulimuli ki te ʼu pelesepeto pea mo te ʼu fakatuʼutuʼu ʼa te Réforme (fetogi), ko he ʼu hahaʼi neʼe fakafeagai ki te Lotu Katolika ʼo natou liliu ai leva ko te kau Polotesitā. ʼI te 11 tohi ʼaē neʼe tā ʼo te tikisionalio (Merriam-Webster’s Collegiate Dictionary), ʼe fakaʼuhiga ia he tagata Polotesitā “ko he tahi ʼe kau ki he kautahi ʼe fakafisi ki te ʼuhiga pule ʼa te Tuʼi Tapu ki te mālamanei pea ʼe natou lagolago ki te ʼu pelesepeto foʼou ʼa te kau Polotesitā ʼaki pē te tui, ko te kau Kilisitiano fuli ʼe feala ke natou liliu ko he kau pelepitelō pea mo te māʼoluga ʼo te Tohi-Tapu heʼe ko te matapuna pē ʼaia e tahi, ʼe maʼu ia te moʼoni.”

Tatau aipē peʼe ko te kau Fakamoʼoni ʼa Sehova ʼe natou fakafisi ki te ʼuhiga pule ʼa te tuʼi tapu ki te mālamanei kae natou tali ʼaki he loto kātoa ia te māʼoluga ʼo te Tohi-Tapu, kae ʼe lahi ia te ʼu faʼahi ʼe natou kehekehe ai mo te Lotu Polotesitā. ʼE talanoa kiai te tohi (The Encyclopedia of Religion), ʼe “kehe” pē ia te kau Fakamoʼoni ʼa Sehova. Tou vakaʼi ia he ʼu puani e tolu ʼe hā ai tonatou kehekehe.

ʼUluaki, logolā ko te kau Polotesitā ʼe nātou fakafisi ki ʼihi akonaki ʼi te tauhi ʼa te Lotu Katolika, kae ko te kau takitaki Polotesitā ʼe natou taupau ʼihi akonaki Katolika ohagē lā: Ko te Tahitolu, te ʼifeli pea mo te maʼuli tuputupua ʼo te nefesi ʼo te tagata. Kae ko te kau Fakamoʼoni ʼa Sehova ʼe natou tui ʼe mole gata pē ia te fakafeagai ʼa te ʼu akonaki ʼaia ki te Tohi-Tapu kae ʼe toe fakatupu e te ʼu akonaki ʼaia ia he ʼu manatu hala ʼo ʼuhiga mo te ʼAtua.—Vakaʼi ia te ʼu pāsina 4 ki te 7 ʼo te nusipepa ʼaenī.

Lua, ko te lotu ʼaē ʼe lagolago kiai ia te kau Fakamoʼoni ʼa Sehova, ʼe mole ina fakafihiʼi te ʼu akonaki ʼa te Lotu Polotesitā peʼe ko te Lotu Katolika, kae ʼe ina fia foaki pē ia he ako fakalaumālie ʼe ʼaoga ki te maʼuli ʼo te hahaʼi. ʼE natou mulimuli lelei ki te tokoni ʼaenī ʼa te Tohi-Tapu: “ ʼE mole tonu ki he kaugana ʼa te ʼAliki ke fakatupu kē. ʼE tonu ke agalelei ki te hahaʼi fuli, ke poto ʼi te fai akonaki, pea mo faʼa kātaki fualoa. ʼE tonu ke ina fakatonutonuʼi ia te hahaʼi fakafeagai ʼaki te agamalū.” (2 Timoteo 2:24, 25, Bible Segond Révisée) Ko te kau Fakamoʼoni ʼa Sehova ʼe natou fakahā ia te mole ʼalutahi ʼo te ʼu akonaki ʼa te Tohi-Tapu pea mo te ʼu akonaki ʼaē ʼe akoʼi e te ʼu lotu. Koia, ʼe mole natou fakatuʼutuʼu ke natou fakafeagai ki ʼihi kautahi fakalotu. Kae ʼe natou fakatuʼutuʼu ke natou tokoni ki te hahaʼi ʼaē ʼe fakamālotoloto ke natou maʼu ia te ʼatamai mālama totonu ʼo ʼuhiga mo te ʼAtua pea mo tana Folafola, ia te Tohi-Tapu. (Kolose 1:9, 10) Kapau ʼe mole fia fakamoʼoni ia te hahaʼi ʼo he tahi ʼu lotu ki te ʼu akonaki ʼa te kau Fakamoʼoni ʼa Sehova, pea ʼe mole faiga nātou ke fakaloaloa atu ia te fai palalau heʼe mole ʼi ai hona fua.—2 Timoteo 2:23.

Tolu, ʼe mole natou hagē ko te Lotu Polotesitā ʼaē ʼe lahi ia tona ʼu kautahi e teau tupu, heʼe ko te kau Fakamoʼoni ʼa Sehova ʼe natou taupau maʼu ia tanatou logotahi fakatautēhina. ʼO ʼuhiga leva mo he akonaki Fakatohi-tapu, ko te kau Fakamoʼoni ʼa Sehova iā fenua e 230 tupu ʼe natou mulimuli ki te tokoni ʼa te ʼapositolo ko Paulo ʼo natou “palalau . . . ʼi he logo tahi.” ʼE natou taupau ia te logo tahi. ʼE natou maʼu moʼoni te “logo tahi . . . ʼi he laumālie pē e tahi pea mo he manatu pē e tahi.” (1 Kolonito 1:10) ʼE natou faiga mālohi mo tonatou ʼu tehina ke natou “taupau te logotahi ʼo te laumālie ʼi te noʼo ʼo te tokalelei.”—Efesi 4:3.