ʼE Hage Koa Tau Faifakamafola Ko Te Hahau?

ʼE MAʼUHIGA kia tatou te faifakamafola. Kaʼe, ko te hahaʼi fuli ʼae ʼe tou faifakamafola ki ai, ʼe mole natou mahino ki te faʼahi ʼaia. Logo la ʼe fia logo te hahaʼi ki te meʼa ʼae ʼe ui ʼi te Tohi-Tapu, kaʼe ʼe mole natou fia ako te Folafola ʼa Te ʼAtua mo tatou.

Tou vakaʼi te faʼifaʼitaki ʼo Gavin. Neʼe kau ki te ʼu fono kaʼe neʼe mole fia fai hana ako Tohi-Tapu. ʼE fakamahino e Gavin neʼe mole malama feʼauga ki te Tohi-Tapu pea neʼe ina loto ke mole iloʼi e ʼihi te aluʼaga ʼaia. Neʼe tuʼania naʼa kole age ke kau ki he lotu pea neʼe mole loto ke kakāʼi ia ia. Kotea tau manatu? ʼE feala koa ke ke tokoni kia Gavin? Fakakaukauʼi te ʼu lelei ʼe feala ke maʼu e he tahi mai te ʼu akonaki Fakatohi-tapu. Neʼe ui fenei e Sehova ki te kau Iselaele: “Ke hifo taku palalau o hage ko he hahau, o hage ko he vao fuluihega.” (Tetelonome 31:19, 30; 32:2) Koia, tou vakaʼi he ʼu ako mai te hahau. Pea kapau ʼe tou fakatatau tatatou faifakamafola ki te hahau, ʼe feala ke tou tokoni ki te “tagata fuli.”—1 Timoteo 2:3, 4.

ʼE FAKATATAU FEAFEAʼI TATATOU FAIFAKAMAFOLA KI TE HAHAU?

Ko te hahau ʼe lave lelei. Ko te hahau ʼe faʼufaʼu mamalie ʼaki te kakapu ʼo liliu ai ko te ʼu mosiʼi vai. Neʼe hifo feafeaʼi te ʼu palalau ʼa Sehova “o hage ko he hahau”? Neʼe palalau ki tana hahaʼi ʼaki he agalelei, mo he agamalu pea mo he lototokaga. ʼE tou faʼifaʼitakiʼi ia Sehova moka tou fakaʼapaʼapa ki te ʼu akonaki ʼe tui ki ai te hahaʼi. ʼE tou fakalotomalohiʼi ia natou ke natou fakakaukauʼi pea ke natou toʼo ʼe natou totonu ʼanatou tonu. Ka tou fakaha he lototokaga feia, ʼe lotolelei anai te hahaʼi ke natou tali te ʼu faʼahi ʼae ʼe tou palalau ki ai. Pea ʼe lelei age anai tatatou faifakamafola.

Ko te hahau ʼe mokomoko. ʼE fakalotofimalie anai ki te hahaʼi tatatou faifakamafola mo kapau ʼe lahi te ʼu puleʼaki ʼae moʼo tokoni kia natou ke natou fia ako te moʼoni. Ko te tehina ko Chris ʼae neʼe ina ʼuluaki fakaui kia Gavin ke fai hana ako Tohi-Tapu, neʼe mole ina fakakinauʼi ia ia. Kaʼe, neʼe faiga ke ina maʼu ia he ʼu puleʼaki ke mole ufiufi ai ia Gavin ʼi ʼanā faipalalau ki te Tohi-Tapu. Neʼe ui e Chris kia Gavin ʼe i ai he logo maʼuhiga ʼi te Tohi-Tapu. Pea kapau ʼe ina ako te logo ʼaia, ʼe tokoni anai ki ai ke mahino lelei ki te ʼu fono. Neʼe fakamahino age e Chris neʼe tui papau ko te Tohi-Tapu ʼe moʼoni ʼuhi ko te ʼu lea fakapolofeta ʼae ʼe tuʼu ai. Pea ki muli age, neʼe lahi tanā faipalalau ki te ʼu lea fakapolofeta ʼae kua hoko. Ko te ʼu faipalalau ʼaia neʼe logoʼi ai e Gavin he fakalotofimalie. Pea neʼe ina tali leva ke fai hana ako Tohi-Tapu.

Ko te hahau ʼe ʼaoga ki te maʼuli. ʼI te temi vevela ʼi Iselaele, ʼe feala ke mole ʼua lolotoga ni mahina. Kapau ʼe mole palapala te kele, pea ʼe feala ke magemage mo mamate ai te ʼu fuʼu ʼakau. Neʼe fakakikite e Sehova ʼe ʼi ai anai he taʼi laʼa ʼi totatou temi, ko tona fakaʼuhiga, ko te hahaʼi ʼe natou ʼua kai anai ʼi tanatou “logo ki te u folafola a [Sehova].” (Amosi 8:11) Neʼe ina fakapapau ʼe hage anai te kau fakanofo ko he “hahau ae e hau mai [ia Sehova]” ʼi tanatou fakamafola te logo lelei ʼo te Puleʼaga. Pea ʼe lagolago ki ai te ‘tahi ʼu ovi.’ (Mikea 5:6; Soane 10:16) Ko te logo ʼae ʼe tou fakamafola ʼe kau ki te ʼu fakatuʼutuʼu ʼa Sehova ʼae ke haofaki te maʼuli ʼo natou ʼae ʼe ʼua kai ki te moʼoni. ʼE maʼuhiga koa kia tatou te logo ʼaia?

Ko te hahau ʼe ko he tapuakina mai ia Sehova. (Tetelonome 33:13) Ko tatatou faifakamafola ʼe ko he tapuakina, peʼe ko he meʼa ʼofa kia natou ʼae ʼe natou tali te moʼoni. Ko te ako e Gavin ia te Tohi-Tapu neʼe ko he tapuakina kia ia he neʼe tokoni ki ai ke ina maʼu te ʼu tali ki ʼana fehuʼi fuli. Neʼe vave tana tuputupu pea neʼe papitema. ʼI te temi nei, kua fiafia ʼi te fakamafola ʼo te logo lelei ʼo te Puleʼaga mo tona ʼohoana ko Joyce.

KE KE FIAFIA ʼI TAU FAIFAKAMAFOLA

Ko te fakatatau ʼo tatatou gaue faifakamafola ki te hahau, ʼe toe tokoni mai ke tou mahino ʼe maʼuhiga ʼatatou faiga ʼi te faifakamafola. ʼO feafeaʼi? Tou toʼo he faʼifaʼitaki: ʼE feala ki te ʼu gaue ʼae ʼe tou fai ke mole lahi, ʼe fakatatau ki he mosiʼi vai ʼe tahi. Kaʼe, ko mosiʼi vai ʼe lauʼi miliona, ʼe palapala ai te kele. ʼO toe feia pe, ʼe lagi tou manatu ʼe mole lahi te gaue ʼae ʼe tou fai takitokotahi ʼi te faifakamafola. Kaʼe, ko ʼona fua ʼe iloga ʼi tatatou fakatahiʼi te ʼu faiga ʼa te toko lauʼi miliona kaugana ʼa Sehova ʼi te kele, ʼe foaki ai he fakamoʼoni “ki te u puleaga fuli.”a (Vakaʼi te kiʼi nota.) (Mateo 24:14) Ko tatatou faifakamafola ʼe ko he tapuakina koa mai ia Sehova ki ʼihi? ʼEi, ko te logo ʼae ʼe tou fakaha ʼe hage anai ko te hahau, ko tona fakaʼuhiga ʼe logo lelei mo mokomoko pea mo ʼaoga ki te maʼuli.