Ke Liliu Te Metitāsio Ko He Meʼa Fakafiafia
MAʼA ʼihi, ko te metitāsio ʼe ko he meʼa faigataʼa. ʼE lagi hage maʼa nātou ʼe ko he meʼa fakatupu gaʼegaʼe, ʼe fakamaʼua kiai he fakakaukau mālohi. ʼE lagi ufiufi te ʼu hahaʼi ʼaia, ʼi tanatou mole metitāsio, tāfito la mokā ʼe nātou lau he meʼa ʼe maʼuhiga. (Filipe 4:8) Kae ko te fakakaukauʼi fakalogologo ʼo te ʼu moʼoni ʼaē neʼe tou ako ʼo ʼuhiga mo Sehova, mo tona ʼu kalitātē taulekaleka, mo tana ʼu gāue fakaofoofo, mo te ʼu meʼa ʼaē ʼe ina fakamaʼua mai kiā tatou, pea mo tana fakatuʼutuʼu faka kolōlia, ʼe feala pea ʼe tonu ke liliu ko he lakaga fakafiafia moʼo fakaʼaogaʼi kiai totatou temi. Koteā tona tupuʼaga?
Ko Sehova ʼAtua ʼe ko te Pule Māʼoluga ʼo te ʼatulaulau pea ʼe lolotoga gāue nei ki te fakahoko ʼo tana fakatuʼutuʼu lahi. (Soane 5:17) Logola ʼe maʼumaʼua ia Sehova, kae ʼe tokaga ia ki te ʼu fakakaukau fakalogologo ʼo tana ʼu kaugana takitokotahi. Neʼe ʼiloʼi e Tavite te faʼahi ʼaia pea neʼe ina tohi fēnei ʼaki te takitaki ʼa te ʼAtua: “Ê Sehova, neʼe ke sivisivi au pea ʼe ke ʼiloʼi au. Neʼe ke ʼiloʼi te temi ʼaē ʼe au heka ai, pea mo te temi ʼaē ʼe au tuʼu ai. Neʼe ke tokaga mai mamaʼo ki taku manatu.”—Pesalemo 139:1, 2.
ʼI te kamata, ʼe lagi mole faʼa leleiʼia anai e he tahi ia te ʼu palalau ʼaenī. ʼE lagi feala ke manatu fēnei: ‘ ʼE “mamaʼo” te ʼAtua, kae ʼe ina ʼiloʼi taku ʼu manatu kovi fuli ʼaē ʼe hake ʼi taku fakakaukau.’ ʼE lelei ke tou ʼiloʼi ia te faʼahi ʼaia. ʼE lava ʼaoga mai ki tatatou tauʼi ia te ʼu manatu kovi, pea ka tou maʼu te ʼu taʼi manatu ʼaia, tou fakahā ki te ʼAtua, ʼo tou falala ʼe fakamolemole mai anai ʼo fakatafito ki tatatou tui ki te sākilifisio faitotogi ʼa Sesu. (1 Soane 1:8, 9; 2:1, 2) Kae ʼe tonu foki ke tou toe manatuʼi ko Sehova ʼe ina sivisivi te ʼu faʼahi lelei ʼo tana kau atolasio. ʼE ina tokagaʼi mokā ʼe tou metitāsio ʼo ʼuhiga mo ia ʼaki he loto fakafetaʼi.
ʼE lagi koutou feʼekeʼaki anai, “Peʼe tokaga moʼoni koa ia Sehova ki te ʼu manatu lelei fuli ʼo tana kau atolasio e toko lauʼi miliona?” ʼE mahino papau ia. Neʼe faka maʼuhigaʼi e Sesu ia te tokaga mai ʼa Sehova kiā tatou ʼi tana ʼui ʼaē māʼia mo te ʼu kiʼi pāsele liliki ʼe tokaga kiai ia Sehova, pea mo toe ʼui fēnei: “E koutou mauhigaʼage i te fakatahiʼi o te faga misi fuape.” (Luka 12:6, 7) ʼE mole feala ki te ʼu kiʼi manulele ʼaē ko te ʼu pāsele ke nātou fakakaukau kiā Sehova. Koia kapau ko Sehova ʼe tokaga kiā nātou, pea e feafeaʼi age la hana tokaga mai kiā tatou ʼaenī, pea mo fiafia ʼi tana sio mai kiā tatou takitokotahi ʼe tou manatu age kiā te ia! Ohage ko Tavite, ʼe tou lava faikole fēnei mo he loto falala: “Ke liliu . . . te metitāsio ʼo toku loto ʼo lave lelei ʼi muʼa ʼo tau ʼafio, Ê Sehova, toku Maka pea mo toku Fakamaʼuli!”—Pesalemo 19:14.
ʼE tou maʼu te tahi fakamoʼoni ʼo te tokaga moʼoni ʼa Sehova ki te metitāsio ʼo tana kau atolasio agatonu, ʼi te ʼu palalau ʼaē neʼe fai e te polofeta ko Malakia mai te ʼAtua. ʼO ʼuhiga mo totatou temi, neʼe fakakikite fēnei e te polofeta: “ ʼI te temi ʼaia, ko nātou ʼaē ʼe manavasiʼi kiā Sehova neʼe nātou fefaipalalauʼaki, ʼo tahi fai palalau mo tona kaumeʼa, pea neʼe tokagaʼi e Sehova pea mo fakalogo. Pea neʼe ʼi ai te tohi fakamanatu neʼe kamata tohi ʼi ʼona muʼa maʼa nātou ʼaē ʼe manavasiʼi kiā Sehova pea mo nātou ʼaē ʼe nātou manatuʼi tona huafa.” (Malakia 3:16) Ko tatatou manatuʼi ko Sehova ʼe ina haga “tokagaʼi” tatou mokā tou manatu kiā te ia, ʼe ina fakaliliu anai tatatou metitāsio ʼo ʼuhiga mo te ʼAtua ʼe ko he meʼa fakafiafia. Koia ʼofa pe ke tou ʼio ki te ʼu palalau ʼa te tagata fai pesalemo ʼaē neʼe ina tohi fēnei: “ ʼE au metitāsio anai ki tau ʼu gāue fuli, pea ʼe au tokagaʼi anai tau ʼu faʼahiga aga.”—Pesalemo 77:12.