Ko He Agaaga ʼo Te Nātulā ʼo Te Tagata
Ko Jodie ko te tagata ʼe ʼi ai tana kiʼi matani gāue ko te fakatau ʼo te ʼu meʼa ʼe ʼaoga ki te ʼapi. Neʼe tokoni ki te fafine moʼo vakavakaʼi ke fakatau te ʼu meʼa ʼo te loto fale ʼo tona tēhina ʼaē kua mate. ʼI tana huke ia te ʼu meʼa ʼaē neʼe tuku ʼi te ʼu tafaʼaki ʼo te tafuʼaga afi ʼāfea, neʼe ina maʼu ai te ʼu kēsi e lua ʼe fafaʼo ai te ʼu meʼa gelu. Neʼe punamaʼuli ʼi tana sio ki te tahi meʼa neʼe fafaʼo ʼi te loto kēsi. Neʼe ina maʼu ai te foʼi falā neʼe pelupelu ʼi te pepa gigila—neʼe ko te 7 800 000 falā! Neʼe tokotahi ia Jodie ʼi te kogafale. Koteā ʼaē ʼe tonu ke ina fai? Ke ina toʼo fakalogologo te kiʼi kēsi ʼaia, peʼe ina fakahā age ki te fafine ia te falā ʼaē neʼe ina maʼu?
KO TE meʼa ʼaē neʼe hoko kiā Jodie ʼe ko he agaaga ʼaia ʼe kehekehe ai te tagata pea mo te manu. ʼE ʼui fēnei ʼi te tohi The World Book Encyclopedia: “ ʼI te ʼu aga ʼaē ʼe makehe ai te tagata, ko tana lava fakafuafua te meʼa ʼaē ʼe tonu ke ina fai pea mo te meʼa ʼaē ʼe mole tonu ke ina fai. Ko he kulī ʼe pakupaku, ka ina maʼu he moʼi pipi ʼi he fuga laupapa, ʼe mole fakakaukau ia peʼe tonu ke ina kai peʼe kailoa. Kae ko Jodie, ʼe ina maʼu te fealagia ʼaē ke ina vakavakaʼi te aga ʼaē ʼe tonu ke ina fai. Kapau ʼe ina taupau te falā, pea ko hana kaihaʼa, kae ʼe mahino ia ʼe mole maʼutokā anai ia. ʼE mole ʼaʼana te falā, pea ʼe mole ʼiloʼi e te fafine ʼe ʼi ai te falā. Pea tahi ʼaē meʼa, tokolahi te hahaʼi ʼi te kolo ʼaē ʼe nofo ai ia Jodie ʼe nātou lau anai tona vale mo kapau ʼe ina liufaki te falā.
Kapau la neʼe ko koutou ʼaē neʼe hoko ki ai te ʼaluʼaga ʼaē neʼe hoko kiā Jodie, koteā anai te meʼa ʼaē ka koutou fai? ʼE ʼiloga anai ʼi takotou tali ia te faʼahiga maʼuli ʼaē kua koutou filifili ke koutou mulimuli kiai.
Te ʼu Lēkula ʼo Te Meʼa ʼAē ʼe Lelei Pea Mo Te Meʼa ʼAē ʼe Kovi
Lolotoga he temi fualoa, ko te lotu neʼe ina fakahā te faʼahiga lēkula ʼo te maʼuli ʼaē ʼe tonu ke muliʼi e te hahaʼi. Neʼe lahi te ʼu puleʼaga neʼe nātou mulimuli ki te takitaki ʼa te Folafola ʼa te ʼAtua, ia te Tohi-Tapu. Kae ʼi te malamanei kātoa, kua kaugamālie te hahaʼi kua nātou lītuʼa ki te ʼu lēkula faka lotu, ʼo nātou ʼui ʼe mole kei feala hona maʼuliʼi, pea ko te takitaki ʼa te Tohi-Tapu kua ʼāfea ia. Koteā ʼaē neʼe fetogi ʼaki te ʼu faʼahi ʼaia? ʼE ʼui fēnei ʼi te tohi Ethics in Business Life, “ko te poto fakatagata kua ina maʼu ia te tuʼulaga ʼaē neʼe maʼu e te lotu moʼo takitaki te maʼuli ʼo te hahaʼi.” Tokolahi te hahaʼi ʼe mole kei nātou kumi te takitaki faka lotu, kae kua nātou haga ki te kau popoto ʼaē ʼe nātou sivi te aga ʼaē ʼe tonu ke fai. ʼE ʼui fēnei e Paul McNeil, ko te tagata ʼe ina sivi te ʼu pelesepeto ʼa te kau tōketā: “Ko te tuʼulaga ʼaē neʼe maʼu e te kau pātele kua maʼu e te kau popoto ʼaē ʼe nātou sivi te ʼu aga ʼaē ʼe tonu ke fai. . . . ʼI te temi nei ko te hahaʼi ʼe nātou talanoa ʼo ʼuhiga mo te ʼu aga ʼaē ʼe tonu ke fai, kae ki muʼa atu neʼe nātou ʼui ʼe nātou mulimuli ki te ʼu aga faka lotu.”
Kapau ʼe tonu ke koutou fai he ʼu tonu maʼuhiga, ʼe koutou ʼiloʼi feafeaʼi ia te meʼa ʼaē ʼe lelei pea mo te meʼa ʼaē ʼe kovi? Ko ai ʼaē ʼe ina fakafuafua te ʼu aga ʼaē ʼe tonu ke koutou fai, ko te ʼAtua peʼe ko koutou?