ʼE Faigataʼa Te Akoʼi ʼo Te Fānau Ia ʼAho Nei
ʼI TE afiafi, ʼi te ʼamanaki pupunu e te tagata tona fale kai kae ʼalu ki tona ʼapi, neʼe fehūfi age te ʼu fafine e toko lua pea mo te tamasiʼi ʼo fakaʼui tanatou meʼa kai. Neʼe kua gaʼegaʼe te tagata pea neʼe ina fia ʼui age kua māpunu te fale kai, kae neʼe toe fetogi tana manatu pea neʼe ʼalu ʼo teuteuʼi mai tanatou meʼa kai. ʼI te lolotoga fai palalau pea mo kakai ʼa te ʼu fafine e toko lua, neʼe feleleʼaki te tamasiʼi ʼi te loto fale kai, ʼo ina fakatō te ʼu keke ki lalo pea mo ina molomoloki ʼaki tona ʼu vaʼe. Pea mole ʼui ki tana faʼe ke ina munaʼi kae neʼe kata ia. ʼI tanatou mavae mai te fale kai, logope te kua gaʼegaʼe ʼo te tagata kae neʼe ina fufulu te meʼa ʼaē neʼe ʼulihi e te toe.
ʼE lagi koutou mahino ki te meʼa ʼaenī, ʼaē ʼe ʼasi mai ai ʼe tokolahi te ʼu famili ʼe mole kei nātou akoʼi tanatou fānau. ʼE lahi tona ʼu tupuʼaga. Ko ʼihi mātuʼa ʼe nātou tuku tanatou fānau ke nātou fai te meʼa ʼaē ʼe nātou loloto kiai, heʼe ʼi tanatou manatu ʼe tonu ke nātou lahilahi ake ʼi he ʼu ʼaluʼaga ʼe nātou faʼifaʼitaliha ai. Lagi ko ʼihi mātuʼa ʼe nātou maʼumaʼua fau, ʼo mole nātou maʼu honatou temi ke nātou tokaga pea mo akoʼi tanatou fānau. ʼE logoʼi e ʼihi mātuʼa ʼe maʼuhiga age te ako ʼo tanatou fānau, koia kapau ʼe lelei te ako ʼa te tamasiʼi ʼi te faleako pea mo aʼu ki te ʼu faleako lalahi, ʼe nātou tuku ke faʼifaʼitaliha tanatou fānau.
Kae ko ʼihi ʼe nātou ʼui ʼe tonu ke fetogi te ʼu lekula ʼa te ʼu mātuʼa pea mo te sosiete. Koia ʼaē ʼe liliu ai te tamaliki ʼo māmio kovi pea ʼi te ʼaho fuli ʼe tuputupu te agamālohi ʼi te faleako. Koia, neʼe fakahā fakalelei e te pule faiako ʼo te kolesi ʼi Séoul, ʼo te Lepupilika ʼo Kolea, ʼe tonu ke faka maʼuhigaʼi te akoʼi ʼo te aga ʼa te tamaliki. Neʼe ina ʼui fēnei: “Kapau ʼe koutou fakatuputupu he ʼu aga ʼe lelei pea ʼe ina maʼu ai te ʼatamai mālama.”
ʼE lahi te ʼu mātuʼa ʼe mole nātou tokagaʼi te ʼu tokoni ʼaē ʼe fai age kia nātou, heʼe nātou loto ke ʼolo tanatou ʼu fānau ki te ʼu faleako lalahi pea ke lelei tonatou maʼuli. Kapau ko koutou ko he tāmai peʼe ko he faʼe, koteā ʼaē ʼe koutou loto ke fai e takotou fānau ʼi te ka haʼu? ʼE koutou loto koa ke liliu ko he tagata peʼe ko he fafine ʼe fakapotopoto? Peʼe ko he tahi ʼe leleiʼia e ʼihi, ʼe aga mo te hahaʼi, pea mo ina maʼu he fakakaukau ʼe lelei? Kapau ʼe koutou loto ki te faʼahi ʼaia, tou vakaʼi te alatike ʼaē ka hoa mai.