Watchtower TANAKIʼAGA TOHI ʼI TE NETI
Watchtower
TANAKIʼAGA TOHI ʼI TE NETI
Faka'uvea
  • TOHI-TAPU
  • TOHI
  • FONO
  • w02 15/8 p. 8-9
  • Kua Nātou Fiafia He Kua Nātou Popoto ʼi Te Lautohi!

Aucune vidéo n'est disponible pour cette sélection.

Il y a eu un problème lors du chargement de la vidéo.

  • Kua Nātou Fiafia He Kua Nātou Popoto ʼi Te Lautohi!
  • Te Tule Leʼo—2002
Te Tule Leʼo—2002
w02 15/8 p. 8-9

Kua Nātou Fiafia He Kua Nātou Popoto ʼi Te Lautohi!

ʼI TE tahi ʼu potu ʼo te ʼu motu ʼo Salomone, ko te toko 80 ʼi te teau ʼo te hahaʼi ʼaē kua Fakamoʼoni kia Sehova, neʼe mole nātou popoto ʼi te lautohi pea mo te faitohi. Pea neʼe ko he faʼahi neʼe faigataʼa ai hanatou fai ʼo hanatou ʼu tali ʼi te ʼu fono faka Kilisitiano ʼaē ʼe fai ʼi te vāhaʼa fuli, kae neʼe faigataʼa tāfito ai hanatou akoʼi ki te hahaʼi te ʼu moʼoni ʼo te Puleʼaga. ʼE feala moʼoni koa ke akoʼi te lautohi pea mo te faitohi ki ni hahaʼi kua lalahi?

Ko te kaupepa lahi Appliquez-vous à la lecture et à l’écriture, ʼaē neʼe tā e te kau Fakamoʼoni ʼa Sehova, neʼe fakaʼaogaʼi ki te ako ʼo te teitei ʼu kokelekasio fuli ʼa te kau Fakamoʼoni ʼa Sehova ʼo te ʼu motu fuli ʼo Salomone. ʼE fakahā ʼi te ʼu fakamatala ʼaenī ka hoa mai, pe neʼe koteā te tokoni neʼe fai e te polokalama ʼaia ki te toko lauʼi teau hahaʼi ke nātou popoto ʼi te lautohi pea mo te faitohi. Tahi ʼaē meʼa maʼuhiga, neʼe feala ʼaki te ako lautohi ʼaia ke hikihiki age tanatou faka mafola te ʼu meʼa ʼaē ʼe nātou tui kiai.—1 Petelo 3:15.

Neʼe fakatokagaʼi e te tuagaʼane misionea neʼe hinoʼi ki te kokelekasio ʼe ko ʼona kau fai faka mafola ʼo te Puleʼaga ʼe toko teau tupu, ʼi te ako ʼo Te Tule Leʼo ʼi te vāhaʼa fuli, ko te tokolahi neʼe mole ʼi ai hanatou ʼu nusipepa pea ko te tokosiʼi neʼe fai hanatou ʼu tali. Koteā tona tupuʼaga? Neʼe mole nātou popoto ʼi te lautohi. ʼI te temi ʼaē neʼe fakahā ai e te kokelekasio, ʼe fai anai he ako ki te lautohi pea mo te faitohi, neʼe tali lelei e te misionea ke ina fai te faʼahi ʼaia. ʼI te kamata ʼo te ako, neʼe tokosiʼi te kau ako, kae mole tuai pea neʼe ko te toko 40 hahaʼi neʼe kau kiai.

Neʼe koteā tona ʼu fua? ʼE ʼui fēnei e te tuagaʼane misionea: “Hili te kiʼi temi nounou ki te kua fai ʼo te ako, neʼe ʼau ʼalu ʼi te hola ono uhu ki te fakatauʼaga meʼa kai ʼo toʼo meʼa kai maʼa te kau misionea. Neʼe ʼau sio ki te tahi kau ako, feiā aipe mo te kau tūpulaga, ʼe nātou fakatau te ʼu niu matuʼu pea mo te ʼu magisi. Koteā tona tupuʼaga? Koteʼuhi neʼe nātou fia maʼu hanatou ʼu kiʼi foʼi piesi moʼo totogi hanatou ʼu peni pea mo hanatou ʼu kaupepa ki tanatou ako! Pea ko te ako ʼaia neʼe ko he ʼaluʼaga lelei ke nātou tahi maʼu takitokotahi hanatou Tule Leʼo.” ʼE ina toe ʼui fēnei: “ ʼI te temi nei, mokā fai Te Tule Leʼo, ko te kau tūpulaga pea mo te hahaʼi matutuʼa kua nātou tali fuli, pea kua mahōlō tamatou ako ʼo Te Tule Leʼo.” Neʼe fiafia ʼaupito te misionea ʼaia ʼi te temi ʼaē neʼe kole age e te toko fā ʼi te kau ako ʼaia, pe kua feala ke nātou kau ki te gāue fai faka mafola heʼe mole kei nātou tuʼaniaʼi te faʼahi ʼaia.

Ko te ʼu fua lelei ʼaē neʼe maʼu ʼi te kau ako ʼaia, neʼe feala ai ke ako he tokolahi ki te lautohi pea mo te faitohi. Ohage la, lolotoga ni ʼu taʼu, ko te ʼohoana ʼo te tēhina neʼe fakatupu fihifihia ki te kokelekasio. Neʼe ina tuki makaʼi te hahaʼi mokā hoko he kiʼi tokakovi, pea neʼe ina ʼohofi te ʼu fafine mo te koga ʼakau. ʼI tana tau tatuʼu mo tona ʼohoana ki te ʼu fono, ʼi te lahi fau ʼo tona maheka ki tona ʼohoana, neʼe ʼai e te tēhina tona ʼu mata sioʼata ʼuli ke mole tukugakoviʼi ia ia e tona ʼohoana ʼe sio ki he tahi ʼu fafine.

Kae mole tuai ki te kamata fai ʼo te ako lautohi, neʼe kole e te fafine ʼaia: “ ʼE feala koa haku kau ki te ako?” Pea neʼe tali tana kole. Talu mai te ʼaho ʼaia neʼe mole puli ʼi te ako peʼe ko te ʼu fono ʼo te kokelekasio. Neʼe gāue kinakina ki te faʼahi ʼaia pea neʼe fakaofoofo tana tuputupu, pea neʼe fakatupu fiafia kia ia. Neʼe ina fai te tahi kole: “ ʼE feala koa ke ʼau ako te Tohi-Tapu?” Neʼe fiafia tona ʼohoana ʼo ina kamata ako te Tohi-Tapu mo ia, pea neʼe haga tuputupu ʼi tana lautohi pea mo tana faitohi, pea mo tana mahino ki te Tohi-Tapu.

Ki he tahi kua taʼu 50 kae neʼe heʼeki fāfā ki he peni, ʼe mahino ia ko te tohi ʼo he mataʼi tohi neʼe ko he meʼa faigataʼa ʼaupito. Ko ʼihi ʼi tanatou kamata faitohi neʼe papala tonatou ʼu kauʼi tuhi he neʼe mālohi fau tanatou kukumi te peni ʼi te lauʼi pepa. Hili te ʼu kiʼi vāhaʼa ki tanatou ʼu faiga ke nātou puke fakalelei tanatou peni, ko ʼihi neʼe nātou ʼui fakafiafia fēnei: “Kua feala ke ʼau hikihiki māmālie toku nima ʼi te moʼi pepa!” ʼE toe fiafia te kau faiako ʼi tanatou sio ki te tuputupu ʼa te kau ako. Neʼe ʼui fēnei e te tahi fafine faiako: “Ko te akoʼi ʼo he kalasi ʼe ko he meʼa fakafiafia lahi, pea ʼi te agamāhani mokā hili he fai ako, ʼe pasipasi te kau ako moʼo fakahā tanatou fakafetaʼi moʼoni ki te fakatuʼutuʼu ʼaia mai ia Sehova.”

Kua toe fakafiafia foki mo te kau Fakamoʼoni ʼaia kua popoto ʼi te temi nei ʼi te lautohi pea mo te faitohi. Koteā tona tupuʼaga? Koteʼuhi kua nātou fakaʼaogaʼi ʼi te temi nei ia tonatou poto lautohi pea mo tonatou poto faitohi moʼo fakavikiviki kia Sehova.

[Paki ʼo te pasina 8, 9]

Ko te kau tūpulaga pea mo te hahaʼi matutuʼa ʼe nātou fakafetaʼi ki te ʼu ako

    Te ʼu Tohi Fakaʼuvea (1978-2025)
    Mavae
    Hu Ki Loto
    • Faka'uvea
    • Vaevae
    • Préférences
    • Copyright © 2025 Watch Tower Bible and Tract Society of Pennsylvania
    • Conditions d’utilisation
    • Règles de confidentialité
    • Paramètres de confidentialité
    • JW.ORG
    • Hu Ki Loto
    Vaevae