Ko Sehova ʼe Tokaga Tuʼumaʼu Anai Kiā Koutou
NEʼE lahi te fakatagaʼi ʼo te kau Kilisitiano ʼi Sutea, pea neʼe nātou māʼuʼuli ʼi te lotolotoiga ʼo te hahaʼi mānumānu. Moʼo fakaloto mālohiʼi ʼo nātou, neʼe toe ʼui age e te ʼapositolo ko Paulo ia te ʼu palalau ʼaē neʼe fai e Sehova ki te kau Iselaele ʼi te temi ʼaē neʼe nātou hū ai ki te Kele ʼo Te Fakapapau. Neʼe ina tohi fēnei: “ ʼE mole au lītuʼa anai kiā koe ʼi he temi, kailoa ʼe mole au līaki anai koe ʼi he temi.” (Hepeleo 13:5, MN; Teutalonome 31:6) ʼE mahino ia ko te fakapapau ʼaia neʼe ina fakaloto mālohiʼi te kau Kilisitiano Hepeleo ʼo te ʼuluaki sēkulō.
Pea ʼe toe fakaloto mālohi kiā tatou ia te fakapapau ʼaia mokā tou tau mo te ʼu tuʼania ʼo te maʼuli ʼi te “u temi faigataa i te u aho fakamuli.” (2 Timoteo 3:1) Kapau ʼe tou falala kiā Sehova pea mo tou mulimuli ki tona finegalo, ʼe tokoni mai anai kiā tatou ʼi te ʼu temi ʼaē ʼe tou tau ai mo te ʼu faigataʼaʼia lalahi. Moʼo ʼiloʼi peʼe fakahoko feafeaʼi e Sehova te fakapapau ʼaia, tou vakaʼi age muʼa peʼe tou feafeaʼi mokā fokifā ʼe mole kei ʼi ai hatatou gāue.
Te ʼu Fihifihia ʼe Hoko Fakapunamaʼuli Mai
Kua ʼāsili ʼi te malamanei ia te mole maʼu gāue ʼa te hahaʼi. ʼI te sulunale Polonia, ʼe ʼui ai ko te mole maʼu gāue ʼe ko he “fihifihia lahi ʼaia ʼi te maʼuli faka sosiale pea mo faka ekonomika.” Māʼiape la mo te ʼu puleʼaga koloāʼia ʼe nātou tau mo te fihifihia ʼaia. Ohage la, māʼiape mo te hahaʼi ʼaē ʼe nātou gāue ʼi te Kautahi ʼo te gāue pea mo te fakatuputupu ʼo te ekonomika, “neʼe ko te toko 32 miliona tupu kau gāue” neʼe mole hanatou gāue ʼi te taʼu 2004 pea “neʼe laka age ʼi te Lakilisi Lahi ʼo te ʼu taʼu 1930.” ʼI Polonia, neʼe fai e te Pilo Lahi ia te lisi ʼo ʼuhiga mo te toko tolu miliona hahaʼi mole gāue ʼi te māhina ʼo Tesepeli 2003, pea neʼe maʼu ko te “toko 18 ʼi te teau ʼi te hahaʼi ʼaia neʼe feala ke gāue.” Neʼe ʼui ʼi te tahi sulunale, ko te lahi ʼo te mole maʼu gāue ʼa te hahaʼi Afelika ʼo te Potu Saute Afelika, neʼe ko te toko 47,8 ʼi te teau ʼi te taʼu 2002!
ʼE ko he fihifihia lahi ki te tokolahi mokā fokifā ʼe mole kei ʼi ai hanatou gāue pea mo fakamavae fakapunamaʼuli nātou ʼi tanatou gāue, pea ʼe mole hāo te ʼu kaugana ʼa Sehova mai te faʼahi ʼaia. Ko te hahaʼi fuli ʼe hoko kiā nātou “te ʼu temi pea mo te ʼu ʼaluʼaga fakafokifā.” (Tagata Tānaki 9:11) ʼE lagi tou hage ko te tagata fai pesalemo ʼaenī ko Tavite: “Neʼe fakalahi te ʼu mamahi ʼo toku loto.” (Pesalemo 25:17) ʼE koutou lava kātakiʼi anai koa te ʼu ʼaluʼaga faigataʼa ʼaia? ʼE feala ki te ʼu faigataʼaʼia ʼaia ke fakatupu kovi ki tokotou loto, mo tokotou maʼuli fakalaumālie, pea mo tokotou maʼuli fakasino. Kapau ʼe mole ʼi ai hakotou gāue, ʼe hage anai koa tokotou maʼuli ko te ʼāfea?
Te Puleʼaki Moʼo Tauʼi Tokotou Loto Hoha
Neʼe ʼui e te tōketā psychologue ko Janusz Wietrzyński: “ ʼE ko te hahaʼi tagata tāfito ʼaē ʼe lotomamahi mokā mole kei ʼi ai hanatou gāue,” heʼe ʼi te agamāhani ʼe ko nātou ʼaē ʼe nātou taupau tonatou ʼu famili. Neʼe ina ʼui, ʼe feala ki he tagata ʼe mole gāue ke kamata “hoha ʼaupito,” ʼuhi ko tona ʼita ki te ʼaluʼaga ʼo tona maʼuli. Ko he tāmai ʼe fakamavae ʼi tana gāue, ʼe feala ke puli tona matagafua pea kamata “kē mo tona famili.”
Ko te tāmai Kilisitiano ko Adam ʼe ʼi ai tana ʼu tamaliki e toko lua, neʼe ina fakahā tona loto ʼi te temi ʼaē neʼe mole kei ʼi ai hana gāue: “Kua au hoko ʼita, mole kei au leleiʼia he meʼa. ʼI te pōʼuli ʼe au moemisi pe ki te gāue pea mo fakakaukauʼi peʼe feafeaʼi anai haku taupau taku fānau pea mo toku ʼohoana, ʼaē neʼe toe fakamavae fakapunamaʼuli mo ia ʼi tana gāue.” Ko te taumātuʼa ko Ryszard mo Mariola pea mo tana tamasiʼi, ʼi te temi ʼaē neʼe mole kei ʼi ai hanā ʼu gāue, neʼe lahi ʼaupito tanā tuʼu maʼua ki te fale paʼaga. ʼE ʼui fēnei e te fafine: “Neʼe au nofo hoha tuʼumaʼu, he neʼe vevele toku loto he koʼe neʼe mā kole te toe paʼaga ʼaia ki te fale paʼaga. ʼI te temi fuli pe neʼe au manatu ai ko taku hala.” Ka tou tau mo he ʼu ʼaluʼaga feiā, ʼe faigafua hatatou ʼiʼita, mo loto tuʼania, mo hoha, pea ʼe feala ke tou taʼomia ai. Koia, e feafeaʼi hatatou lolomi tatatou ʼu manatu ʼaē ʼe mole lelei?
ʼE fakahā ʼi te Tohi-Tapu ia te tokoni lelei moʼo taupau he ʼu manatu ʼe lelei. ʼE fai mai te tokoni ʼaenī e te ʼapositolo ko Paulo: “ ʼAua naʼa koutou tuʼania ki he meʼa, kae ʼi te faʼahi fuli, ʼaki te faikole pea mo te ʼu kole mamahi ʼaki te fakafetaʼi, koutou fakahā ki te ʼAtua takotou ʼu kole; pea ko te tokalelei ʼa te ʼAtua, ʼaē ʼe māʼoluga ake ʼi te ʼu manatu fuli, ʼe ina taupau anai tokotou ʼu loto pea mo tokotou ʼu ʼatamai ʼaki ia Kilisito Sesu.” (Filipe 4:6, 7, MN ) Ka tou fakaōvi kiā Sehova ʼi te faikole, ʼe tou maʼu ai anai “te tokalelei ʼa te ʼAtua,” ʼe fīmālie anai totatou ʼatamai heʼe tou tui kiā te ia. Ko te ʼohoana ʼo Adam, ia Irena, ʼe ina ʼui fēnei: “ ʼI tamā ʼu faikole, neʼe mā fakahā kiā Sehova te ʼaluʼaga ʼo tomatou maʼuli pea mo tamā ʼu fakatuʼutuʼu moʼo faka faigafua tomatou maʼuli. ʼI te agamāhani, ko toku ʼohoana ʼaē ʼe hoha vave, kae kua kamata mahino kiā ia, ʼe ʼi ai pe anai te puleʼaki.”
Kapau ʼe fokifā pe ʼe mole kei ʼi ai hakotou gāue, ʼe koutou maʼu ia te faigamālie ʼaē ke koutou maʼuliʼi te fakaloto mālohi ʼa Sesu Kilisito ʼaē neʼe ina fai ʼi tana Akonaki ʼi te Moʼuga: “Tuku takotou hoha ki tokotou nefesi, pe koteā anai he meʼa ke koutou kai pe ko he meʼa ke koutou ʼinu, peʼe ki tokotou sino, pe koteā anai he meʼa ke koutou kofuʼi. . . . Ke koutou haga kumi muʼa te puleʼaga pea mo tona faitotonu, pea ʼe toe foaki atu anai mo te ʼu meʼa fuli ʼaia kiā koutou.” (Mateo 6:25, 33, MN ) Neʼe muliʼi e Ryszard pea mo Mariola te tokoni ʼaia ʼi te temi ʼaē neʼe nā loto hoha ai. ʼE ʼui fēnei e Mariola: “Neʼe fakaloto mālohiʼi tuʼumaʼu au e toku ʼohoana pea mo ina ʼui mai ko Sehova ʼe mole sītuʼa anai kiā mātou.” ʼE toe ʼui fēnei e tona ʼohoana: “ ʼAki tamā faikole fakatahi tuʼumaʼu, neʼe mā felogoi lelei ai mo te ʼAtua pea mā felogoi leleiʼaki, pea neʼe mā maʼu ai te fakaloto fīmālie ʼaē neʼe ʼaoga kiā māua.”
ʼE toe tokoni mai anai mo te laumālie maʼoniʼoni ʼo te ʼAtua kiā tatou. Ko te loto lolomi ʼaē ʼe feala ke fakatupu iā tatou e te laumālie, ʼe tokoni mai anai ke tou nonofo tōkakaga pea mo hāofaki totatou loto. (Kalate 5:22, 23) ʼE mole ko he meʼa faigafua, kae ʼe feala he neʼe fakapapauʼi mai e Sesu ʼe “foaki [anai] e te Tāmai ʼaē ʼi selo te laumālie maʼoniʼoni kiā nātou ʼaē ʼe nātou kole kiā te ia.”—Luka 11:13, MN; 1 Soane 5:14, 15.
Koutou Taupau Fakalelei Tokotou Maʼuli Fakalaumālie
Māʼiape la mo he Kilisitiano ʼe fakapotopoto, kae ʼe feala mo ia ke lotovaivai mokā neʼe fakamavae fakafokifā ʼi tana gāue, koia ʼaē ʼe tonu ai ke tou tōkakaga ʼo taupau fakalelei totatou maʼuli fakalaumālie. Tou toʼo te faʼifaʼitaki ʼa Moisese ʼi tona taʼu 40, ʼaē ko tona maʼuli neʼe fetogi ʼi te temi ʼaē neʼe mole kei maʼu tuʼulaga ai ʼi te fale hau pea neʼe liliu ko he tagata tauhi ōvi, kae neʼe ko he gāue neʼe fehiʼa kiai te kau Esipito. (Senesi 46:34) Neʼe tonu pe ke mulimuli ia Moisese ki tona maʼuli foʼou. Lolotoga te ʼu taʼu e 40 ki muli age, neʼe ina tuku ia Sehova ke ina gāueʼi ia ia pea mo teuteuʼi ia ia ki tana ʼu gāue foʼou ʼaē ka ina ʼamanaki fakahoko. (Ekesote 2:11-22; Gaue 7:29, 30; Hepeleo 11:24-26) Logola te ʼu fihifihia ʼaē neʼe tau mo Moisese, kae neʼe tokaga tuʼumaʼu ki te ʼu meʼa fakalaumālie, ʼo ina tali lelei te ako ʼaē neʼe foaki age e Sehova. ʼOfa pe ke ʼaua naʼa tou tuku te ʼu fihifihia ke nātou toʼo iā tatou te ʼu meʼa fakalaumālie ʼaē ʼe ʼaoga ki totatou maʼuli!
Logola ʼe feala ke tou lotomamahi mokā puli fakafokifā tatatou gāue, kae ʼe ko he temi lelei ʼaia moʼo fakamālohiʼi tatatou ʼu felogoi mo Sehova ʼAtua pea mo tana hahaʼi. Ko Adam ʼaē neʼe tou talanoa ki ai ʼi te kamata, neʼe feiā tana manatu. ʼE ina ʼui fēnei: “ ʼI te temi ʼaē neʼe puli tamā ʼu gāue taumātuʼa, neʼe mole mā manatu pe la ʼi he temi ke mā tuku tamā ʼu fono peʼe ko tamā fai faka mafola. Pea neʼe ko he faʼahi neʼe ina puipui ai māua mai te nofo hoha fau ki te ʼapogipogi.” ʼE toe feiā mo te manatu ʼa Ryszard: “Kana neʼe mole ʼi ai la te ʼu fono pea mo te fai faka mafola, neʼe mole feala anai hamā tauʼi tomā ʼu fihifihia, neʼe feala pe anai ke mā ogosia ʼaki tomā lotovaivai. Neʼe mā lotomālohi ʼaki tamā ʼu fai palalau fakalaumālie mo ʼihi, heʼe ko te ʼu fai palalau ʼaia neʼe fakatafito ki te ʼu meʼa ʼaē ʼe ʼaoga kiā nātou kae mole kiā māua.”—Filipe 2:4.
Ei, ʼaua takotou tuʼania fau ki te gāue, kae koutou fakaʼaogaʼi te temi faigamālie ʼaia ki he ʼu gāue fakalaumālie, ʼo koutou fai takotou ako takitokotahi, ʼo koutou kau ki te ʼu gāue ʼo te kokelekasio, pea mo fakalahi takotou minisitelio. ʼAua naʼa koutou mulimuli kiā nātou ʼaē ʼe fakaʼauʼauganoa heʼe mole nātou gāue, kae ʼe “lahi tuʼumaʼu [anai] takotou ʼu gāue ʼi te ʼAliki”—heʼe ko te gāue ʼaia ʼe fakatupu fiafia anai kiā koutou mo te hahaʼi fakamalotoloto ʼaē ka nātou tali anai te logo ʼo ʼuhiga mo te Puleʼaga ʼaē ʼe koutou faka mafola.—1 Kolonito 15:58, MN.
Koutou Tōkakaga Ki Te Maʼuli Fakasino ʼo Tokotou Famili
Kae ko te meʼa kai fakalaumālie ʼe mole ina foaki mai anai tatatou meʼa kai fakasino. ʼE tonu ke tou manatuʼi tuʼumaʼu te pelesepeto ʼaenī: “Kapau e i ai he tahi e mole tokaga ki ona kaiga, tafito natou o tona loto fale, kua fakafisi ki te tui, pe e koviʼage ia i he tagata pagani.” (1 Timoteo 5:8) ʼE ʼui e Adam: “Tatau aipe peʼe foimo tokaga te ʼu tēhina ʼo te kokelekasio ʼo foaki mai te ʼu meʼa ʼaē ʼe ʼaoga kiā tatou ʼi te faʼahi fakasino, kae ʼi totatou ʼuhiga Kilisitiano ʼe ko he maʼua ke tou kumi hatatou gāue.” ʼE mole tonu ke tou fakalogo pe ke tokoni mai Sehova pea mo tana hahaʼi, kae ʼe tonu ke tou manatuʼi ʼe tonu ke tou kumi hatatou gāue.
Koteā te fakatuʼutuʼu ʼaē ʼe tonu ke koutou fai? ʼE ʼui fēnei e Adam: “ ʼAua naʼa koutou fakatalitali ke tokoni faka milakulo atu ia te ʼAtua. Ka koutou kumi gāue, koutou fakahā fakahagatonu ko koutou ko te Fakamoʼoni ʼa Sehova. ʼI te agamāhani ʼe leleiʼia e te kau patolo te kau Fakamoʼoni.” ʼE tokoni fēnei mai ia Ryszard: “Koutou fakalavelave ki ʼokotou feʼilo peʼe mole nātou ʼiloʼi he gāue ʼe ʼaoga kiā koutou, koutou lau ʼi te sulunale te ʼu pasina ʼaē ʼe talanoa ai ki te ʼu kumi hahaʼi gāue, lau te ʼu kiʼi logo ʼaē ʼe tohi ai: ‛ʼE kumi he fafine moʼo taupau he tahi kua matuʼa’, peʼe ‘ko he gāue faka temi: te toli fraises.’ Koutou kumi tuʼumaʼu! ʼAua naʼa koutou filifili gāue, tatau aipe mo kapau ʼe tonu ke koutou fai he gāue ʼe mole faʼa maʼuhiga, peʼe ko he gāue ʼe mole ʼalutahi mo te gāue ʼaē ʼe koutou loto kiai.”
ʼIo, “ko Sehova ʼe ko [tou] tokoni.” ʼE mole “lītuʼa anai kiā koe ʼi he temi, kailoa ʼe mole [ina] līaki anai koe ʼi he temi!” (Hepeleo 13:5, 6, MN ) ʼE mole tonu ke koutou loto hoha fau. Neʼe tohi fēnei e te tagata fai pesalemo ko Tavite: “Tuku tou maʼuli kiā Sehova, pea ke ke falala kiā te ia, pea ʼe ina fakahoko totonu anai.” (Pesalemo 37:5) ‛Tou tuku totatou maʼuli kiā Sehova,’ ko tona faka ʼuhiga ke tou falala kiā te ia pea mo fai ia meʼa fuli ʼo mulimuli ki tona finegalo, tatau aipe peʼe tou tau mo ni ʼu faigataʼaʼia.
Ko Adam mo Irena neʼe nā fai tanā fakatuʼutuʼu ke nā fai te gāue ʼaē ko te fufulu ʼo te ʼu matapā sioʼata pea mo te ʼu tuʼuga, pea mo nā fakapotopoto mokā nā fai fakatau. Neʼe nā tatuʼu ki te pilo kumi hahaʼi gāue. ʼE ʼui fēnei e Irena: “Neʼe mā maʼu te tokoni ʼi tona temi totonu.” ʼE toe ʼui e tona ʼohoana: “ ʼAki te temi, neʼe mā mahino ai ko tamā ʼu fakatuʼutuʼu ʼaē neʼe mā fakahā ʼi tamā ʼu faikole neʼe mole ʼalutahi mo te finegalo ʼa te ʼAtua. Ko he ako ʼaia kiā māua ke mā falala ki tona poto pea ke ʼaua naʼa mā fai ʼo mulimuli pe ki tomā poto ʼo māua. ʼE lelei age hata fakatalitali fakalelei ki te puleʼaki ʼaē ka foaki mai anai e te ʼAtua.”—Sakopo 1:4.
Neʼe fai e Ryszard pea mo Mariola te ʼu gāue kehekehe ʼe vaeluaʼi temi, kae neʼe feala ai hanā kau ki te fagonogono ʼi te ʼu telituale ʼaē ʼe ʼaoga lahi ai he kau fai faka mafola. ʼE ʼui fēnei e Ryszard: “ ʼI ʼihi temi, neʼe mā maʼu ia te ʼu gāue ʼi te ʼu temi tonu pe ʼaē neʼe mole kei ʼi ai hamā meʼa kai. Neʼe mā fakafisi ki he ʼu gāue ʼe totogi lelei naʼa mole feala anai ke mā fakahoko tomā ʼu maʼua faka teokalatike. Neʼe mā leleiʼia age hamā fakatalitali kiā Sehova.” ʼE nā tui papau ko Sehova ʼaē neʼe ina faka fealagia ia meʼa fuli ke feala hanā lue hona kogafale ʼe mole faʼa totogi kovi, pea ki muli age neʼe maʼu leva te gāue ʼa Ryszard.
ʼE feala ke kita lotomamahi mokā mole kei ʼi ai hatatou gāue, kae he koʼe ʼe mole koutou fakaʼaogaʼi te faigamālie ʼaia ke koutou sio tonu ai ko Sehova ʼe mole ina līʼakina anai koutou? ʼE tokaga ia Sehova kiā koutou. (1 Petelo 5:6, 7) Neʼe ina fakapapau fēnei ʼaki te polofeta ko Isaia: “ ʼAua naʼa ke sio ki ʼou tafaʼaki, koteʼuhi ko au tou ʼAtua. ʼE au fakaloto mālohiʼi anai koe. ʼE au tokoni anai kiā te koe.” (Isaia 41:10) ʼE mole tonu ke koutou lotovaivai mokā hoko atu kiā koutou he meʼa fakapunamaʼuli ohage ko te mole kei ʼi ai ʼo hakotou gāue. Koutou fai ia meʼa fuli ʼe koutou lavaʼi, pea koutou tuku te ʼu faʼahi ʼaē kiā Sehova. Koutou fakatalitali “fakalogologo” kiā Sehova. (Tagilāulau 3:26) ʼE mahino papau ia, ʼe koutou maʼu anai he ʼu tapuakina lahi.—Selemia 17:7.
[Paki ʼo te pasina 9]
Koutou fakaʼaogaʼi tokotou temi ki he ʼu gāue fakalaumālie
[Paki ʼo te pasina 10]
Koutou fakapotopoto mokā koutou fai fakatau, pea ʼaua naʼa koutou loto filifili mokā koutou kumi gāue