ʼE Kotou Fia ʼIloʼi Koa Te Moʼoni?

TE MOʼONI ʼo ʼuhiga mo teā? Te moʼoni ki ʼihi fehuʼi maʼuhiga ʼaupitō ʼe feʼekeʼaki kiai te hahaʼi. Neʼe kua lagi kotou fai ia te ʼu fehuʼi ʼaenī:

• ʼE tokaga moʼoni koa te ʼAtua kiā tātou?

• ʼE gata anai koa ʼi he ʼaho ia te tau mo te mamahi?

• Koteā ʼaē ʼe hoko kiā tātou mokā tou mamate?

• ʼE ʼi ai koa he ʼamanaki ki te kau mate?

• ʼE feafeaʼi koa haku faikole pea ʼe logo mai te ʼAtua?

• ʼE feafeaʼi koa haku maʼuli fiafia?

ʼE kotou kumi anai koa kifea ia te ʼu tali ʼo te ʼu fehuʼi ʼaenī? Kapau ʼe kotou ʼolo ki he ʼu fale tā tohi peʼe ko he ʼu fale tānakiʼaga tohi, ʼe lagi kotou maʼu ai anai he ʼu lauʼi afe tohi ʼe ʼui ʼe kotou maʼu ai ia te ʼu tali. Kae ʼi te agamāhani, ʼe mole felōgoi tahi ia te ʼu tohi. Ko ʼihi tohi ʼe lagi ʼi te temi pē ʼaē ʼe tou lau ai ʼe ʼaoga, kae mole tuai pea ʼe mole kei ʼaoga ia.

Kae ʼe ʼi ai te tohi ʼe maʼu ai te ʼu tali ʼe tou lava falala kiai. ʼE ko he tohi ia ʼe moʼoni. Neʼe ʼui fēnei e Sesu Kilisito ʼi tana faikole ki te ʼAtua: “Ko tau folafola ʼe moʼoni.” (Soane 17:17) Iā ʼaho nei, ʼe tou ʼiloʼi ko te Folafola ʼaia ʼe ko te Tohi-Tapu. ʼI te ʼu pāsina ʼaē ʼe fakahoahoa mai, ʼe kotou maʼu ai anai te ʼu tali ki te ʼu fehuʼi ʼaē neʼe lagaʼi ʼi ʼoluga, pea ko te ʼu tali ʼaia ʼo te Tohi-Tapu ʼe totonu pea mo mahino lelei.

ʼE Tokaga Moʼoni Koa Te ʼAtua Kiā Tātou?

TE TUPUʼAGA ʼO TE LAGAʼI ʼO TE FEHUʼI: ʼE tou māʼuʼuli ʼi te mālama ʼe fonu ai te aga fakalialia pea mo te heʼe faitotonu. ʼE lahi te ʼu lotu ʼe natou akonakiʼi ko te ʼu mamahi ʼaē ʼe tau mo tātou ʼe ko te finegalo ia ʼo te ʼAtua.

ʼE AKOʼI MAI ʼI TE TOHI-TAPU: ʼE mole feala ʼi he temi ke fai e te ʼAtua ia he meʼa ʼe kovi. ʼE ʼui fēnei iā Sopo 34:10: “ ʼE mamaʼo ʼi te ʼAtua moʼoni ia te fai ʼo he meʼa ʼe kovi, pea ʼi te Māfimāfi ia te fai ʼo he meʼa ʼe mole faitotonu!” ʼE ʼi ai te fakatuʼutuʼu ʼofa ʼa te ʼAtua maʼa te tagata. Koia ʼaē neʼe akoʼi mai ai e Sesu ke tou faikole fēnei: “Ko tamatou Tamai ʼe ʼi selō, ke . . . hoko mai tou puleʼaga. Ke fai tou finegalo ʼi te kele, ohagē ko selō.” (Mateo 6:9, 10) ʼE ʼiloga te tokaga moʼoni ʼa te ʼAtua kiā tātou ʼi tana foaki ia te totogi maʼuhiga ʼaupitō moʼo fakahoko moʼoni ia tana fakatuʼutuʼu.—Soane 3:16.

Vakaʼi mo Senesi 1:26-28; Sake 1:13; pea mo 1 Petelo 5:6, 7.

ʼE Gata Anai Koa ʼi He ʼAho Ia Te Tau Mo Te Mamahi?

TE TUPUʼAGA ʼO TE LAGAʼI ʼO TE FEHUʼI: ʼE hoholo pē ia te mamate ʼa te hahaʼi tokolahi ʼuhi pē ko te tau. ʼE malave kiā tātou fuli te mamahi ʼaē ʼe tau mo te tagata.

ʼE AKOʼI MAI ʼI TE TOHI-TAPU: Neʼe fakakikite e te ʼAtua ia he temi ʼe ina fakatuʼu ai anai ia te tokalelei ʼi te kele kātoa. ʼAki te takitaki ʼo tona Puleʼaga, ko te hahaʼi “ ʼe mole natou toe akoʼi anai te tau.” Kae ʼe natou “tuki [anai] tanatou ʼu heletā ke liliu ko he ʼu huo laga kele.” (Isaia 2:4) ʼE fakagata anai e te ʼAtua ia te heʼe faitotonu fuli pea mo te mamahi fuli. ʼE fakapapau fēnei mai ʼi te Tohi-Tapu: “[Ko te ʼAtua] ʼe ina holoholoʼi anai te ʼu loʼimata fuli pē ʼi ʼonatou mata, pea ko te mate ʼe puli anai ia; ʼe mole toe ʼi ai anai he putu, he lāuga, he mamahi. Ko te ʼu meʼa ʼāfea [ʼe kau kiai ia te ʼu aga heʼe faitotonu pea mo te ʼu mamahi ʼo te temi ʼaenī] kua puli ia.”—Fakahā 21:3, 4.

Vakaʼi mo Pesalemo 37:10, 11; 46:9; pea mo Mikea 4:1-4.

Koteā ʼAē ʼe Hoko Kiā Tātou Mokā Tou Mamate?

TE TUPUʼAGA ʼO TE LAGAʼI ʼO TE FEHUʼI: Teitei pē ko te ʼu lotu fuli ʼi te mālamanei kātoa ʼe natou akonakiʼi ʼe ʼi ai te meʼa ʼi te loto sino ʼo te tagata ʼe hoko atu tona maʼuli mokā mate te tagata. Ko ʼihi ʼe natou tui ʼe feala ki te kau mate ke natou fakamamahiʼi te hahaʼi ʼaē ʼe kei māʼuʼuli, peʼe natou tui ko te ʼAtua ʼe ina fakatūʼā te hahaʼi agakovi ʼo ina tauteaʼi nātou ki te ʼifeli kakaha ʼo talu ai.

ʼE AKOʼI MAI ʼI TE TOHI-TAPU: ʼI te mate, ʼe mole kei hoko atu te maʼuli ʼa te tagata. ʼE ʼui fēnei iā Tagata Tānaki 9:5: “Ko te kau mate ʼe mole kei natou ʼiloʼi he meʼa.” Mai tona ʼaluʼaga ʼaē ko te kau mate ʼe mole kei natou ʼiloʼi he meʼa, peʼe natou logoʼi he meʼa peʼe natou fai he meʼa, koia ʼaē ʼe mole feala ai ke natou fakamamahiʼi peʼe natou tokoni ki te kau māʼuʼuli.—Pesalemo 146:3, 4.

Vakaʼi mo Senesi 3:19 pea mo Tagata Tānaki 9:6, 10.

ʼE ʼi Ai Koa He ʼAmanaki Ki Te Kau Mate?

TE TUPUʼAGA ʼO TE LAGAʼI ʼO TE FEHUʼI: ʼE tou fia māʼuʼuli, pea mo tou fia fakafiafia mo nātou ʼaē ʼe tou ʼoʼofa ai. ʼE tou fakaʼamu fuli ke tou toe sisio kiā nātou ʼaē kua mamate kae neʼe tou ʼoʼofa mamahi ai.

ʼE AKOʼI MAI ʼI TE TOHI-TAPU: ʼE kaugamālie ʼaupitō te hahaʼi kua mamate ʼe fakatuʼuake anai. Neʼe fakapapau e Sesu “ko nātou . . . ʼaē ʼe nonofo ʼi te ʼu falemaka fakamanatu ʼe natou . . . hū mai anai ki tuʼa.” (Soane 5:28, 29) ʼO mulimuli ki te ʼuluaki fakatuʼutuʼu ʼa te ʼAtua, ko nātou ʼaia kā fakatuʼuake ʼe natou maʼu anai te fealagia ʼaē ke natou māʼuʼuli ʼi te kele kua liliu ko he palatiso. (Luka 23:43) ʼI te fakapapau ʼaia, ko te hahaʼi fakalogo ʼe natou māʼuʼuli haohaoa anai pea mo heʼegata. ʼE ʼui fēnei ʼi te Tohi-Tapu: “ ʼE maʼu anai te kele e te kau faitotonu, pea ʼe natou nonofo ai anai ʼo talu ai.”—Pesalemo 37:29.

Vakaʼi mo Sopo 14:14, 15; Luka 7:11-17; pea mo Gāue 24:15.

ʼE Feafeaʼi Koa Haku Faikole Pea ʼe Logo Mai Te ʼAtua?

TE TUPUʼAGA ʼO TE LAGAʼI ʼO TE FEHUʼI: Teitei pē ko te hahaʼi ʼi te ʼu lotu fuli ʼe natou faikole. Kae tokolahi ʼe hagē kiā nātou ʼe mole logoʼi ʼanatou faikole.

ʼE AKOʼI MAI ʼI TE TOHI-TAPU: Neʼe akoʼi mai e Sesu ke ʼaua naʼa tou lau liuliuga he ʼu palalau ʼi ʼatatou faikole. Neʼe ina ʼui fēnei: “Kā kotou faikole, ʼaua naʼa kotou lau ʼo liuliuga ʼakotou ʼu palalau.” (Mateo 6:7) Kapau ʼe tou loto ke logoʼi e te ʼAtua tatatou ʼu kole, pea ʼe tonu foki ke tou faikole ʼo mulimuli ki tona loto. Pea ki te faʼahi ʼaia, ʼe tonu ke tou akoʼi muʼa peʼe koteā te finegalo ʼo te ʼAtua, pea hoki tou faikole leva ʼo mulimuli kiai. ʼE fakamahino fēnei mai iā 1 Soane 5:14: ‘Tatau aipē pe koteā he meʼa ʼe tou kole ʼo mulimuli ki te finegalo ʼo te ʼAtua, ʼe fagono mai ia kiā tātou.’

Vakaʼi mo Pesalemo 65:2; Soane 14:6, 14; pea mo 1 Soane 3:22.

ʼE Feafeaʼi Koa Haku Maʼuli Fiafia?

TE TUPUʼAGA ʼO TE LAGAʼI ʼO TE FEHUʼI: ʼI te manatu ʼa te tokolahi, ko te paʼaga, mo te logona peʼe ko te matalelei ʼe ko he ʼu faʼahi ʼe natou maʼu ai anai te fiafia. Koia ʼaē ʼe natou faiga ai ki te ʼu meʼa ʼaia—kae mole natou maʼu ai pē lā te fiafia.

ʼE AKOʼI MAI ʼI TE TOHI-TAPU: Neʼe fakahā totonu e Sesu ia te tafitoʼaga ʼo te fiafia ʼi tana ʼui fēnei: “Fiafia ia nātou ʼaē ʼe natou ʼiloʼi tonatou masiva fakalaumālie.” (Mateo 5:3) ʼE hoki maʼu te fiafia moʼoni mo kapau ʼe tou fai he ʼu fakatuʼutuʼu moʼo fakafīmālieʼi ʼo te ʼu meʼa ʼaē ʼe ʼaoga tāfito kiā tātou—ko tatatou fia ʼiloʼi te ʼu moʼoni fakalaumālie ʼo ʼuhiga mo te ʼAtua pea mo tana fakatuʼutuʼu ʼo ʼuhiga mo tātou. Ko te moʼoni ʼaia ʼe maʼu ʼi te Tohi-Tapu. Ko tatatou ʼiloʼi ia te moʼoni ʼaia, ʼe tokoni mai anai ke tou mahino ki te meʼa ʼaē ʼe maʼuhiga moʼoni mai te meʼa ʼaē ʼe mole hona ʼuhiga. Kā tou tuku te moʼoni Fakatohi-tapu ke ina takitaki tatatou ʼu tonu pea mo te ʼu aga ʼaē ke tou fai, ʼe iku ai ki hatatou maʼu he maʼuli ʼe ʼi ai hona ʼuhiga moʼoni.—Luka 11:28.

Vakaʼi mo Tāʼaga Lea 3:5, 6, 13-18 pea mo 1 Timoteo 6:9, 10.

Ko te ʼu faʼahi ʼaenī neʼe tou vakaʼi, ʼe ko he kiʼi koga pē ia ʼo te ʼu tali ʼa te Tohi-Tapu ki te ʼu fehuʼi e ono ʼaē neʼe lagaʼi ʼi te kamata. ʼE kotou loto ke lahi age takotou mahino ki te ʼu faʼahi ʼaia? Kapau ʼe kotou kau iā nātou ʼaē ʼe natou “ ʼiloʼi tonatou masiva fakalaumālie,” ʼe mahino ia ko tokotou loto ʼaia ke lahi te ʼu faʼahi ke kotou mālama kiai. ʼE lagi kua kotou fai mo te tahi ʼu fehuʼi ohagē lā: ‘Kapau ʼe tokaga ia te ʼAtua kiā tātou, he koʼē koa ʼe ina fakagafua ke hoholo he toe agakovi mo he mamahi fēia ʼi te maʼuli kātoa ʼo te tagata? Koteā ia te ʼu fakatuʼutuʼu ke au fai ke lelei age toku maʼuli fakafāmili?’ ʼE foaki mai e te Tohi-Tapu ia te ʼu tali ʼe totonu pea mo lelei ki te ʼu fehuʼi ʼaia pea mo ʼihi atu.

Kae tokolahi te hahaʼi iā ʼaho nei ʼe natou feʼekeʼaki peʼe tonu koa ke natou vakaʼi te Tohi-Tapu. Maʼa nātou, ko he tohi ʼe mātolu fau pea ʼi ʼihi temi ʼe faigataʼa te mahino kiai. ʼE kotou tali koa ke foaki atu ia he tokoni ke feala hakotou maʼu te ʼu tali ʼi te Tohi-Tapu? Ko te kau Fakamoʼoni ʼa Sehova ʼe natou foaki atu te ʼu meʼa gāue e lua moʼo tokoni atu kiā koutou.

ʼUluaki, ko te tohi Koteā ʼAē ʼe Akoʼi Moʼoni Mai ʼi Te Tohi-Tapu? neʼe fai moʼo tokoni ki te hahaʼi ʼaē ʼe maʼumaʼua ke natou vakaʼi te ʼu tali totonu mai te Tohi-Tapu ki te ʼu fehuʼi maʼuhiga. Lua leva, ʼe ko te ʼu ako Tohi-Tapu ʼe fai ki te ʼu loto fale pea ʼe mole fakatotogi. ʼE feala pē ke ʼalu atu kiō koutou he Fakamoʼoni ʼa Sehova ʼe nofo ʼi tokotou kolo pea kua poto lelei ʼi te faiako Fakatohi-tapu peʼe ko he tahi age koga meʼa ʼe kotou felāveʼi ai mo nātou, pea mo fai palalau mo koutou ki te Tohi-Tapu ʼi he kiʼi temi siʼi pē ʼi te vāhaʼa fuli. Kua fai ia te fakatuʼutuʼu ʼaia ki te ʼu toko lauʼi miliona hahaʼi ʼi te mālamanei. Tokolahi iā nātou neʼe natou ʼui fakafiafia fēnei: “Kua au maʼu te moʼoni!”

ʼE ko te koloa maʼuhiga pē ʼaia e tahi ʼe kotou lava maʼu. Ko te ʼu moʼoni ʼaē ʼi te Tohi-Tapu ʼe ina fakaʼāteaina tātou mai te ʼu meʼa fakamanamana, mo te maʼuli maveuveu pea mo te tuʼania fakamataku. Kae ʼe tou maʼu ai ia te ʼamanaki, mo te ʼuhiga ki te maʼuli pea mo te fiafia. Neʼe ʼui fēnei e Sesu: “ ʼE kotou ʼiloʼi . . . anai te moʼoni, pea ko te moʼoni ʼe ina fakaʼāteaina anai koutou.”—Soane 8:32.