ʼE Koutou Tui Koa Ki He Meʼa ʼe Mole Koutou Sio Kiai?

KA ʼUI e he tahi, ‘ ʼe ʼau tui pe ki te meʼa ʼaē ʼe ʼau sio kiai,’ pea ʼe mole moʼoni tana ʼu palalau. Heʼe ʼi te temi nei, ʼe tou tui fuli ki he ʼu meʼa ʼe mole tou sio kiai.

Ohage la, ʼi te faleako ʼe lagi koutou fai he ʼahiʼahi moʼo fakamoʼoni ʼe ʼi ai te mālohi ʼo te ukamea hila. ʼE feala ke hage ko te ʼahiʼahi ʼaenī: ʼE koutou fakaleta ʼi he moʼi pepa he ʼu eveʼi ukamea. Pea ʼe koutou ʼai te ukamea hila ʼi te lalo moʼi pepa ʼaia. Pea ʼe tetetete te moʼi pepa, pea meʼa faikehe heʼe ʼōmai fuli te ʼu kiʼi eveʼi ukamea ki te faʼahi ʼaē ʼe tuʼu ai te ukamea hila. Ka koutou fai te ʼahiʼahi ʼaia, ʼe koutou sio moʼoni koa ki te mālohi ʼo te ukamea hila? Kailoa ia, kae neʼe koutou sio lelei ki tana fakatahiʼi ʼo te ʼu kiʼi eveʼi ukamea pea ʼe fakamoʼoni ai ki te mālohi ʼo te ukamea hila.

ʼE ʼi ai te tahi ʼu meʼa ʼe tou tali, kae ʼe mole tou sio kiai. Ka tou sioʼi he paki matalelei peʼe ko he ʼakau ʼe matalelei tona togi, ʼe tou faka tui neʼe pena e he tahi pe neʼe togi e he tahi. Koia ka tou mamata ki he toʼaga vaitafe peʼe tou sioʼi te tō ifo ʼo te laʼā, ʼe mole tonu koa la ke tou manatu ko te ʼu meʼa neʼe lagi fakatupu e he Tahi ʼe Faiva ʼi te ʼu gāue ʼaia?

He Koʼe ʼe Mole Tui ʼIhi

Meʼa faikehe foki, he ko ʼihi ʼe mole kei nātou tui ki te ʼAtua ʼuhi ko te ʼu meʼa neʼe akoʼi age e te ʼēkelesia. Neʼe hoko te faʼahi ʼaia ki te tagata Nolovesi, neʼe akoʼi age kia ia ko te ʼAtua ʼe ina tutu te kau agakovi ʼi te ʼifeli kakaha. Neʼe mole kei tui ai te tagata ʼaia ki te ʼAtua, he neʼe mole mahino kia ia pe koteā te taʼi ʼAtua feiā, ʼe ina fakamamahiʼi te hahaʼi.

Ki muli age leva, neʼe tali e te tagata ʼaia ke ina ako te Tohi-Tapu mo he Fakamoʼoni ʼa Sehova. Neʼe punamaʼuli ai ʼi tana ʼiloʼi ʼaē ʼe mole ʼui e te Tohi-Tapu ʼe fakamamahiʼi te kau agakovi ʼi he ʼifeli kakaha. ʼE fakatatau e te Tohi-Tapu te mate ki hakita moe. ʼI te faitoka, ʼe mole tou logoʼi he mamahi; pea ʼe mole tou ʼiloʼi he meʼa. (Tagata Tānaki 9⁠:​5, 10) Neʼe toe ako e te tagata ʼaia, ko te hahaʼi ʼaē ʼe mole nātou līaki tanatou agakovi, ʼe tuku anai nātou e te ʼAtua ke nātou nonofo ʼo talu ai ʼi tonatou ʼu falemaka. (Mateo 12⁠:​31, 32) Pea ko te toe ʼo te kau mate ʼe fakatuʼu anai nātou e te ʼAtua ʼi te temi ʼaē kua ina fakatuʼutuʼu kiai, ʼaki te ʼamanaki ʼaē ke nātou maʼu te maʼuli heʼegata ʼi te Palatiso. (Soane 5⁠:​28, 29; 17⁠:⁠3) ʼE moʼoni te fakamahino ʼaenī, heʼe ʼalutahi mo te ʼui ʼaē ʼa te Tohi-Tapu ko te “ ʼAtua ʼe ʼofa.” (1 Soane 4⁠:​8, MN) Neʼe hoko atu e te tagata fakamalotoloto ʼaia tana ako te Folafola ʼa te ʼAtua, pea ʼi te temi nei kua ʼofa ki te ʼAtua ʼo te Tohi-Tapu.

Ko ʼihi ʼe nātou fakafisi ki te manatu ʼaē ʼe ʼi ai he ʼAtua ʼofa, ʼuhi ko te lahi ʼo te ʼu mamahi pea mo te heʼe faitotonu. ʼE nātou manatu tahi mo te tagata mai Suete, ʼaē ʼi te tahi ʼaho neʼe ina tuhiʼi te lagi pea mo ʼui fēnei: “ ʼE feala koa ke ʼi ai he ʼAtua māfimāfi pea mo fonu ʼi te ʼofa ʼi ʼoluga, kae ʼe lahi ʼi lalo nei te agakākā pea mo te agakovi?” Neʼe toe liliu mo ia ʼo mole tui ki te ʼAtua, he neʼe mole he tahi neʼe lava tali ki tana fehuʼi. Pea neʼe ina kamata ako te Tohi-Tapu mo te kau Fakamoʼoni ʼa Sehova. Neʼe ina ako ai ko te Folafola ʼa te ʼAtua ʼe ina tali ki te fehuʼi ʼāfea ʼaenī, He koʼe ʼe fakagafua e te ʼAtua ke hoko te agakovi?a

Neʼe ako ai e te tagata fakamalotoloto ʼaia, ko te ʼi ai ʼo te agakovi ʼi te kele ʼe mole ko he fakamoʼoni ʼaia ʼe mole ʼi ai he ʼAtua. Koʼeni tona faʼifaʼitaki: Neʼe faʼu e he tagata te hele moʼo tuʼusi ʼo te kanoʼi manu. Kae ko te tahi tagata ʼe ina toʼo anai te hele ʼaia, ʼo mole ina fakaʼaogaʼi moʼo tuʼusi te kanoʼi manu, kae moʼo fakapogi he tahi. Ko te fakaʼaogaʼi kovi ʼo te hele ʼe mole ina faka ʼuhiga leva neʼe mole faʼu e he tahi. ʼO toe feiā pe, ko te mole fakaʼaogaʼi lelei ʼo te kele ohage ko te meʼa ʼaē neʼe fakatuʼutuʼu kiai, ʼe mole faka ʼuhiga leva ʼe mole ʼi ai hona Tupuʼaga.

ʼE akoʼi mai e te Tohi-Tapu ko te ʼu gāue ʼa te ʼAtua ʼe haohaoa ia. “ ʼE mole maʼu ia te ia te heʼe faitotonu; ʼe faitotonu pea mo agatonu.” (Teutalonome 32⁠:⁠4) Ko te ʼAtua ʼe ina foaki te ʼu meʼa ʼofa lelei ki te tagata, kae ko ʼihi meʼa ʼofa ʼe ina fakaʼaogaʼi kovi, ʼo tupu ai tana ʼu tuʼuga mamahi. (Sakopo 1⁠:17) Kae ko te ʼAtua ʼe ina fakagata anai te ʼu mamahi ʼaia. Pea “ko te kau agavaivai ʼe nātou maʼu anai te kele, . . . pea ʼe nātou nonofo ai anai ʼo talu ai.”​—⁠Pesalemo 37⁠:​11, 29.

Ko te tagata mai Suete ʼaē neʼe tou talanoa ki ai ʼi te kamata, neʼe fakaʼofaʼofa ʼi tana sio ki te ʼu mamahi ʼo te malamanei. ʼE moʼoni, ko tana fakaʼofaʼofa ʼaia ʼe ina fakamoʼoni mai ʼe ʼi ai moʼoni he ʼAtua. ʼO feafeaʼi?

Maʼa te tokolahi, ko te ʼaluʼaga pe e tahi ke nātou tui ai ki te ʼAtua ʼe ko tanatou tui ki te evolisio. Ko nātou ʼaē ʼe faka tui ki te evolisio, ʼe nātou akoʼi ki te hahaʼi te “maʼuli ʼo ia ʼaē ʼe mālohi”​—⁠ko tona faka ʼuhiga ko te tagata pea mo te manu ʼe nā faiga ke nā maʼuʼuli. Ko ʼaē ʼe mālohi ʼe maʼuli anai, kae koia ʼaē ʼe vaivai ʼe mate anai. ʼE nātou ʼui ʼe kua fakatuʼutuʼu ke feiā te maʼuli. Kae kapau la ʼe tonu ke mate ia ia ʼaē ʼe vaivai, kae maʼuli ia ia ʼaē ʼe mālohi, pea ʼe feafeaʼi anai hatatou fakamahino te fakaʼofaʼofa ʼa ʼihi hahaʼi mālolohi, ohage ko te tagata mai Suete, ʼi tanatou sio ki te ʼu mamahi ʼaē ʼe tāu mo te hahaʼi?

Te ʼIloʼi ʼo Te ʼAtua

ʼE mole feala ke tou sio ki te ʼAtua heʼe mole hona sinoʼi tagata. Kae ʼe loto e te ʼAtua ke tou ʼiloʼi ia ia. ʼE tou lava ʼiloʼi ia ia, kapau ʼe tou sioʼi tana ʼu gāue​—⁠te ʼu meʼa ʼaē neʼe ina fakatupu, ʼaē ʼe fakatātā ki te “ ʼu paki” pea mo te “ ʼu meʼa ʼaē neʼe togi.” ʼE ʼui fēnei e te Tohi-Tapu ia Loma 1⁠:20 (MN): “Ko tona ʼu kalitate fakapulipuli [ʼo te ʼAtua] ʼe ʼiloga kehe talu mai te fakatupu ʼo te malamanei, heʼe mahino ki ai te ʼatamai ʼaki te ʼu meʼa ʼaē kua faʼu, ʼio, tona mālohi heʼegata pea mo tona ʼuhiga ʼAtua.” Ei, mo kapau ʼe koutou vakavakaʼi he paki pea mo he meʼa neʼe togi, ʼe koutou lava ʼiloʼi ai te ʼulugaaga ʼo te tagata ʼaē neʼe ina gaohi te ʼu meʼa ʼaia, ʼo toe feiā pe mo kapau ʼe koutou metitasio ki te ʼu gāue taulekaleka ʼaia ʼo te ʼAtua, pea ʼe koutou lava ʼiloʼi lelei anai tona ʼulugaaga.

ʼE mahino ia, ʼe mole tou maʼu fuli anai te ʼu tali ʼo ʼuhiga mo te ʼu mamahi ʼo te maʼuli, ʼaki pe tatatou sioʼi te ʼu meʼa ʼaē neʼe fakatupu e te ʼAtua. Kae ʼe feala ke tou maʼu he ʼu tali ki te ʼu fehuʼi ʼaia mo kapau ʼe tou kumi ki te Folafola ʼa te ʼAtua, te Tohi-Tapu. ʼI tanā lau te Tohi-Tapu pea mo tanā tali te ʼu manatu ʼaē ʼe tuʼu ai, ko te ʼu tagata ʼaia e lua ʼaē neʼe tou talanoa kiai, neʼe mahino ai leva kia nāua ʼe ʼi ai te ʼAtua pea ʼe tokaga ki te ʼu meʼa ʼaē ʼe hoko kia tatou.

[Kiʼi nota]

[Haʼuʼaga ʼo te paki pasina 28]

J. Hester and P. Scowen (AZ State Univ.), NASA