“Kapau e Puli Te Kona o Te Masima”

NEʼE hoko te ʼu tau ʼuhi ko ia. Neʼe fakaʼaogaʼi ohage ko he paʼaga moʼo totogi ʼaki he ʼu meʼa. ʼI Siaina ʼāfea, neʼe maʼuhiga ʼuluaki te aulo pea hoa kiai. Ei, kua fualoa ʼaupito te fakaʼaogaʼi ʼo te māsima e te hahaʼi ohage ko he meʼa maʼuhiga. ʼO aʼu mai ki te temi ʼaenī, ʼe kei ʼui ʼo ʼuhiga mo te māsima ʼe ko he faitoʼo, pea ʼe fakaʼaogaʼi ʼi te malamanei katoa ki te gaohi meʼa kai pea moʼo taupau te meʼa kai ke tologa.

ʼE lahi te ʼu lelei ʼo te māsima pea mo tona faʼahiga fakaʼaogaʼi, koia ʼe mole tou punamaʼuli ai ki te fakaʼaogaʼi e te Tohi-Tapu ia te māsima ʼi he ʼu ʼaluʼaga fakatā. Ohage la ʼi te Lao Faka Moisese, neʼe fakamaʼua ke kita māsimaʼi te mōlaga ʼaē neʼe kita momoli kia Sehova ʼi te ʼaletale. (Levitike 2:​13) Neʼe mole fai ia te faʼahi ʼaia ke kano lelei ai te ʼu sakilifisio, kae neʼe lagi fai feiā he neʼe fakatātā e te māsima te maʼa pea mo te heʼe popo.

ʼI tana akonaki ʼiloa ʼi te Moʼuga, neʼe ʼui fēnei e Sesu ki tana kau tisipulo: “E ko koutou te masima o te kelekele.” (Mateo 5:​13) ʼI tana ʼu palalau ʼaia, neʼe fakahā ai e Sesu ʼo ʼuhiga mo tanatou faka mafola ia te Puleʼaga ʼa te ʼAtua, ʼe ʼaoga anai te gāue ʼaia moʼo hāofaki te hahaʼi ʼaē neʼe logo kiai. ʼE mahino ia, ko nātou ʼaē neʼe nātou maʼuliʼi te ʼu fakatotonu ʼa Sesu, ʼe puipui anai nātou mai te hahaʼi ʼaē neʼe maʼuʼuli ia tafa ʼo nātou, ʼaē neʼe popo tonatou maʼuli ʼi te faʼahi fakaʼatamai pea mo te faʼahi fakalaumālie.​—1 Petelo 4:​1-3.

Kae neʼe fai e Sesu te fakatokaga ʼaenī: “Kae kapau e puli te kona o te masima, . . . E mole kei hona aoga, gata pe ki tona liaki ki fafo ke molomoloki e te hahai.” ʼI tana talanoa ki te faʼahi ʼaia, neʼe ʼui fēnei e te tagata sivi Tohi-Tapu ko Albert Barnes ʼo ʼuhiga mo te māsima ʼaē neʼe māhani kiai ia Sesu pea mo tana kau ʼapositolo, “neʼe mole faʼa maʼa ia, he neʼe fio ai te ʼu kiʼi moʼi lauʼakau pea mo te ʼu eveʼi kele.” Koia kapau neʼe puli te kona ʼo te māsima, “pea neʼe lagi kei toe pe he kiʼi tuʼuga kele.” ʼE ʼui fēnei e Barnes, “neʼe mole he ʼaoga ʼo te ʼu meʼa ʼaia, gata pe ki . . . tona fola ʼi te ʼu ala, ohage ko te kilikili.”

ʼI tanatou fakalogo ki te fakatokaga ʼaia, ʼe tonu ke nofo tokaga te kau Kilisitiano naʼa nātou tuku tanatou fai faka mafola peʼe nātou lotonoa ʼo fai te ʼu aga ʼo te mālama ʼaenī. Heʼe kapau ʼe nātou fai feiā, pea ʼe nātou popo anai ʼi te faʼahi fakalaumālie, pea ʼe mole kei ʼi ai anai honatou ʼaoga, ohage ko te ‘māsima ʼaē kua puli tona kona.’